Bibliaca Taita Diospa shimi caimandami llaquilla cajcunataca ayudaita ushan (2 Corintios 7:6). Bibliaca saludmanda na parlashpapash huañungapaj munaj yuyaicunata charij gentecunatami Bibliaca ayudashca. Bibliapa ali consejocunaca quiquindapashmi ayudaita ushan.

•  Bibliaca ¿ima ali consejocunatata cun?

•  Bibliapica ¿huañungapaj munashca gentecunamandaca parlanllu?

•  ¿Bibliamanda maijan textocunata huañungapaj munaj pensamientocunata mishachunga ayudaita ushan?

•  Shuj amigo ñana causangapaj munanichu nijpica ¿imatata rurai ushanchi?

•  ¿Ña huañungapaj munashca cashca cashpaca?

• ● Quiquin imata yuyashcata parlapai.

   Bibliapica ninmi: “Ali cumbaguca paipa cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin” (Proverbios 17:17).

   ¿Imatata ningapaj munan?: Ñucanchi llaqui yuyaicunata charishpaca ayudachunmi minishtinchi.

   Quiquin imashna sintirijushcata pimanbash na villashpaca quiquinllatami llaqui apai ushapangui. Pero quiquin imashna sintirijushcata pimanbash villashpaca, quiquinllatami ashtahuan ali sintiripangui. Shinallata charishca problemacunata imashina alichi ushanatami ricupangui.

   Caita rurapai: Quiquin imashina sintirijushcataca shuj familiaman o shuj amigomanmi cunanllata parlaita ushapangui. a Quiquin imashina sintirijushcata parlangapaca shuj cartatapashmi escribita ushapangui.

• ● Doctorcunapa ayudata mascapai.

   Bibliapica ninmi: “Sano gentecunaca doctortaca na minishtinllu, pero ungushca gentecunaca minishtinmi” (Mateo 9:12, La Biblia. Traducción del Nuevo Mundo [TNM]).

   ¿Imatata ningapaj munan?: Nanashca cashpaca doctorpajmanmi rina canchi.

   Huañuna pensamientocunata charijcunaca paicunapa yuyaipi nali caimandami chashna yuyaicunataca charin. Imapash nanaicunata charishpaca na ñucanchi culpachu can, shinallata ñucanchi yuyaipi llaqui llaqui sintirishpaca na ñucanchi culpamanda cajpimi na pinganayachina canchi. Cai nanaicunapaca tratamientocunaca tianmi.

   Caita rurapai: Nara imapash ashtahuan tucushpallata doctorpa ayudata mascapai.

• ● Quiquin Taita Diospa importante cashcata yuyaripai.

   Bibliapica ninmi: ‘¿Nachu alasyu uchilla picha animalcunataca, ishcai uchilla culquipajlla jatunajun? Shina jatujpipash chaicunataca, shujllatallapash Taita Diosca, na cunganllu. [...] Chaimandami na manllana canguichi. Cangunacarin, chai ashtaca animalcunatapash ashtahuan yali valishcami canguichi’ (Lucas 12:6, 7).

   ¿Imatata ningapaj munan?: Quiquinga Taita Diospaca valishcapachami capangui.

   Tal vez solollachari sintirijupangui, pero quiquin imashina sintirijujtaca Taita Diosca alimi yachan. Causangapaj na munajujpipash quiquinmandaca Taita Diosca ninandami preocuparin. Salmo 51:17​pica Taita Diosca “ninanda llaquirishca ali shungutaca na yangapi” churangachu ninmi. Taita Diosca quiquindaca ninandami juyan. Quiquin causashpa catichunbashmi munan.

   Caita rurapai: Quiquinda Taita Dios juyajta yachangapaca Bibliata liipai. Por ejemplo, Acerquémonos a Jehová nishca libropa capítulo 24​pimi Jehová Dios quiquinda juyashcataca ashtahuan yachajuita ushapangui.

• ● Taita Diosta mañapai.

   Bibliapica ninmi: “Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” (1 Pedro 5:7).

   ¿Imatata ningapaj munan?: Taita Diosca quiquin imashina sintirishcata paiman villachunmi munan.

   Taita Diosca tranquilo sintirichun, llaquicunata aguantashpa catichunmi fuerzata caranga (Filipenses 4:6, 7, 13). Paiman quimirijcunataca Taita Diosca chashnami ayudan (Salmo 55:22).

   Caita rurapai: Cunanllata Taita Diosta mañapai. Paipa shuti Jehovata nishpa, imashina sintirishcataca paiman villapai (Salmo 83:18). Ñaupaman catingapaj ayudahuai nishpa mañapai.

• ● Bibliapi jipa punllacunapi ali causaigu tianata yuyaripai.

   Bibliapica ninmi: “Imashinami shuj ancla gancho jirruca barcota shinllita charijun, shinallatami ñucanchi shuyajushca esperanzapash ñucanchi causaitaca shinllita charijun” (Hebreos 6:19, TNM).

   ¿Imatata ningapaj munan?: Llaquicunaca huairahuan tamiashpa barcota caiman chaiman apanshnami caita ushan. Pero shamuj punllapi ali causaigu tianata shuyanami barcota jirruhuan chariyajunshna llaquicunata aguantashpa catichunga ayudaita ushan.

   Shamuj punllapi ali causaigu tianaca na muscuillachu can. Taita Diosmi llaquicunataca tucuillata tucuchisha ninmi (Revelación 21:4).

   Caita rurapai: Shamuj punllapi ali causaigu tianata ashtahuan yachangapaca Taita Diosmanda ali villaigucuna nishca folleto lección 5​tami ricuita ushapangui.

• ● Imata quiquin gushtashcata rurapai.

   Bibliapica ninmi: “Cushilla shunguhuan causanaca, cuerpopajpash ali jambigumi” (Proverbios 17:22).

   ¿Imatata ningapaj munan?: Ñucanchi gushtashca cosascunata rurashpaca ñucanchillata ali, sanomi cashun.

   Caita rurapai: Quiquin imata gushtashcata rurapai. Por ejemplo, quiquinda ali sintichij musicacunata uyapai, quiquinda imata gushtashcata liipai o imatapash ruranata mascapai. Shinallata shujcunamanda imagutapash rurashpapashmi cushilla sintiripangui (Hechos 20:35).

• ● Quiquinba saludta cuidaripai.

   Bibliapica ninmi: ‘Cuerpo shinlliyachun pugllanaca, alimi’ (1 Timoteo 4:8).

   ¿Imatata ningapaj munan?: Ali puñuna, ejerciciota rurana, sano micunata micunami quiquinba saludpaca ali can.

   Caita rurapai: Quince minutocunatallapash puringapaj llujshipai.

• ● Pensamientocuna cambiai ushashcata yuyaripai.

   Bibliapica ninmi: “Caya punlla ima tucunatapash, napacha yachashpami causanguichi” (Santiago 4:14).

   ¿Imatata ningapaj munan?: Ñucanchi problemacuna na tucurinashnalla cashpapash, tiempohuanga tucurita ushangami.

   Cunanbi chimbapurajushca llaquicuna shinlli cajpipash llaquicunaca tucuringami. Chaimi llaquicunata aguantashpa catina capanchi (2 Corintios 4:8). Problemacunaca caya cashpa o imahorapash tucuringami, pero huañujpica ñana pipash imatapash ruraita usharinllu.

   Caita rurapai: Llaqui llaqui sintirimanda huañungapaj munashca gentecunamandami Bibliapica liita ushapangui. Tiempohuan, na yuyashcapi paicunapa causai imashina cambiashcata ricupai. Paicunapa causaipi ima pasashcata huaquin yuyaicunapi ricupai.

 Ari. Bibliapica huañungapaj munanchi nishca huaquin gentecunamandami parlan. Paicunahuan culiranapa randica Taita Diosca paicunata ayudangapajmi listo carca. Taita Diosca quiquindapashmi ayudangapaj munan.

Elías

•  ● Eliasca ¿pita carca? Aunque na manllaj profeta cashpapash, huaquinbica llaquillami sintirin carca. Santiago 5:17​pica: “Eliaspash, munaicunata charij ñucanchishnallata runami cashca” ninmi.

•  ● Eliasca ¿imamandata huañungapaj munarca? Eliasca huaquinbica manllaihuan, sololla, imapajpash na valinshnami sintirirca. Chaimi Eliasca cashna nirca: “Mandaj Dioslla [...]. Ñuca causaita quichuhuailla” (1 Reyes 19:4).

•  ● Eliastaca ¿imata ayudarca? Eliasca pai imashina sintirishcatami Taita Diosmanga villarca. Jehová Diosca ¿imashinata Eliastaca ayudarca? Jehová Diosca paimanda preocuparishcata, shinallata Jehová ninan ushaita charishcata ricuchunbashmi Eliastaca ayudarca. Jehová Diospaca Elías ninan valishca cashcatapashmi ricuchirca. Shinallata paita cuidachunbashmi shuj ayudanteta cacharca.

•  ▸ Eliaspa causaimanda liipai: 1 Reyes 19:2-18.

Job

•  ● Jobca ¿pita carca? Jobca charij charij runami carca. Paipa familiapash ashtacami carca. Shinallata Taita Diostapash ali sirvij runami carca.

•  ● Jobca ¿imamandata huañungapaj munarca? Jobpa causaica na pensashcapimi jaicata cambiarca. Jobca paipa tucui charishcacunatami chingachirca. Shinallata paipa tucui huahuacunapashmi huañurca. Paitapashmi shuj ungui japirca. Canba culpamandallatami chai llaquicunataca charingui nishpami juchachirca. Shina llaquicunata charimandami Jobca: “napacha unaicaman causangapaj munanichu” nirca (Job 7:16).

•  ● Jobtaca ¿imata ayudarca? Jehová Diosta mañana, shujcunahuan parlanami Jobtaca ayudarca (Job 10:1-3). Paipa amigo Elihupa ali shimicunami Jobtaca ama yapata llaquilla sintirichun ayudarca. Taita Diospa nishcacunata cazuna, paipa ayudata chasquinami Jobtaca ashtahuan ayudarca.

•  ▸ Jobpa causaimanda liipai: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● Moisesca ¿pita carca? Israelitacunata ñaupaman pushaj, shinallata tucuipi cazuj ali profetami carca.

•  ● Moisesca ¿imamandata huañungapaj munarca? Moisesca Israel llactata ñaupaman pushana responsabilidadtami charirca. Israelitacunaca Moisestami cutin cutin rimanajurca. Chaimandami shaijushca sintirirca. Moisesca Taita Diostaca: “ñuca causaita quichuhuailla” nishpami mañarca. (Números 11:11, 15).

•  ● Moisestaca ¿imata ayudarca? Moisesca imashina sintirishcatami Taita Diosman parlarca. Taita Diosca Moisés israelitacunata ama sololla pushachunmi shujcuna ayudachun mingarca.

•  ▸ Moisesmanda liipai: Números 11:4-6, 10-17.