Taita Diosmanda yachajushpa, pai mandashcacunata cazushpaca quiquinga Taita Diospajman quimirita ushapanguimi. Shina rurajpica Taita Diospash quiquinbaman quimiringami (Santiago 4:8). Bibliapica ninmi: Taita Diosca “ñucanchimandaca na carupi canllu” (Hechos 17:27).

•  Taita Diosta rijsingapaj caita rurapai

•  Taita Diosman ama quimirichunmi panda yuyaicuna tian

 Bibliatami liina capangui

•  Bibliapica ninmi: “Dios escribichishca tucui Shimicunaca, paillata yarichishpa escribishcami” (2 Timoteo 3:16).

•  Caitami ningapaj munan: Bibliaca Taita Diospa shimimi can. Bibliata escribichunga Taita Dios paipa espíritu santota cushpami ayudashca. Ñucanchi ali causaiguta charichunmi Taita Diosca Bibliata cushca. Taita Dios juyaj, llaquij, tucuita ali ruraj cashcata yachajuchunbashmi Bibliaca ayudashca (Éxodo 34:6; Deuteronomio 32:4).

•  Caitami ruraita ushapangui: Bibliata cada punlla liipai (Josué 1:8). Liishcapi pensarishpami, cai textopica Jehová Diosmandaca ¿imata yachachihuan? nishpa tapurita ushapangui (Salmo 77:12).

   Por ejemplo, Jeremías 29:11​ta liishpami cashna tapurita ushapangui: Taita Diosca ¿imashinata causachun munan? ¿Llaquilla o cushilla causachunllu munan? ¿Taita Diosca ñucanchi nalita rurajpica chashnallatachu tigrachin? O na cashpaca ¿Jipa punllacunapi ali causaiguta charichunllu munan?

 Taita Diospa rurashcacunamanda yachajupai

•  Bibliapica ninmi: “Diosca, causaita causaicaman ninan ushaita charij cajta, Diospacha cajtaca, pipaj ñavipi na ricurinallataca, cai pachata pai rurashcamandapachami aligutapacha ricuchijun. Chaita tucui imatalla rurashcacunata ricuchishpami entendichishca” (Romanos 1:20).

•  Caitami ningapaj munan: Shuj cuadropi juyailla dibujoguta ricushpaca, chai cuadrota pintaj runaca alipacha pintaj runa cashcatami yachanchi. Shina cuendami Taita Dios rurashcacunata ricushpaca pai imashina cashcata yachai ushanchi. Por ejemplo, uma ñutujuta alipacha rurashcata riscushpami Taita Diosca alipacha yachaj cashcata yachanchi. Shinallata indita, estrellacunata, lunata ricushpami Taita Diosca ninan ushaita charishcata yachaj chayanchi (Salmo 104:24; Isaías 40:26).

•  Caitami ruraita ushapangui: Taita Diospa rurashcacunata ricungapaj, yachajungapami tiempota llujchina capangui. Shinallata Taita Diospa rurashcacunata ricushpami ‘Taita Diosmandaca ¿imata yachajuni?’ a nishpa tapurita ushapangui. Shinapash na tucui ricushcamandachu imagutapash Taita Diosmandaca yachajuita ushapanchi. Chaimi Taita Diosca paimanda yachajuchun Bibliata carashca.

 Taita Diospa shutitami nina capangui

•  Bibliapica ninmi: “Paitaca, ñuca shutita rijsishcamandami, alicachi tucunapi churasha. Paica ñucatami mañanga. Ñucapash tigrachishallami” (Salmo 91:14, 15).

•  Caitami ningapaj munan: Diospa shutica Jehovami can, paipa shutita rijsicunata, shinallata paipa shutita respetohuan utilizajcunataca cuidajunmi b (Salmo 83:18, La Biblia. Traducción del Nuevo Mundo [TNM]; Malaquías 3:16). Taita Diosca paipa shutita rijsichishpami paimanda yachajuchun munashcataca ricuchishca. Bibliapica Taita Diosca cashnami nin: “Ñucaca Jehová shutimi cani” (Isaías 42:8, TNM).

•  Caitami ruraita ushapangui: Mañajushpaca Jehová shutitami nina capangui.

 Mañaicunata rurashpami Jehová Dioshuanga parlaita ushapangui

•  Bibliapica ninmi: “Tucui yuyaihuan paita mañajcunata ayudangapaca ladopimi” (Salmo 145:18).

•  Caitami ningapaj munan: Jehová Diosca tucui shunguhuan mañajcunamanmi quimirin. Mañaicunata rurashpapashmi paita alicachishcata, paita respetashcatapash ricuchinchi.

•  Caitami ruraita ushapangui: Taita Diosta mañanataca na saquinachu capangui (1 Tesalonicenses 5:17). Imashina sintirishcata, ima llaquicunata charishcataca Taita Diosmanmi parlaita ushapangui (Salmo 62:8). c

 Taita Diospimi feta charina capangui

•  Bibliapica ninmi: “Ashtahuangarin crishpallami, Taita Diostaca cushichin” (Hebreos 11:6).

•  Caitami ningapaj munan: Taita Diosman quimiringapaca paipimi crina canchi. Bibliapica ninmi feta charina nishpaca Taita Dios tiashcapi crinallaca na canllu. Ashtahuangarin, Jehová Diospimi tucui shunguhuan confiana capanchi. Chaipaca Taita Dios pactachisha nishcacunapi crinata, paipa mandashcacuna ñucanchi causaipi ayudaj cashcapipashmi tucui shunguhuan confiana capanchi. Paihuanbash ali cangapaj munashpaca paipimi confiana canchi.

•  Caitami ruraita ushapangui: Bibliata estudiashpallami quiquinllata Jehová Diospi confiashpa paipa consejocunapash ali cashcata cuenta japipangui (Romanos 10:17). Testigo de Jehovacunaca cushijushpami quiquindaca ayudapanga. d

 Taita Dios munashcashnami causana capangui

•  Bibliapica ninmi: “Taita Dios mandashca shimicunata pactachishpa causanajushpallami, paita juyanajushcataca yachanchi” (1 Juan 5:3).

•  Caitami ningapaj munan: Jehová Diosta juyaimanda paipa mandashcacunata pactachingapaj esforzarij gentecunapamanmi Jehová Diosca quimirin.

•  Caitami ruraita ushapangui: Bibliata yachajujushpaca Jehová Dios imata munashcata, imata na munashcatami cuenta japita ushapangui. Chaimi ‘Taita Dios munashcashna causangapaca ¿imatata rurana cani?’ nishpa tapurita ushapangui (1 Tesalonicenses 4:1).

 Taita Diospa mandashcacunata pactachishpa causajushpallami Taita Dios cuidajushcataca cuenta japipangui

•  Bibliapica ninmi: “Mandaj Dios ali cajtaca, ricushpa yachaichiyari” (Salmo 34:8).

•  Caitami ningapaj munan: Taita Dios pai imashina cashcata rijsichunmi quiquindaca invitajun. Taita Dios imashina juyaj cashcata, quiquinda imashina ayudashcata ricushpami paipaman ashtahuan quimiringapaj munapangui.

•  Caitami ruraita ushapangui: Bibliata liijushpaca, Bibliapa consejocunata pactachingapami esforzarina capangui, shina rurashpami quiquinba causaipi ayudajushcata cuenta japita ushapangui (Isaías 48:17, 18). Shinallata problemacuna, llaquicuna ricurijpipash Jehovapa ayudahuan ñaupaman catita ushashcata, cushilla causaiguta tari ushashca ejemplocunamandapashmi yachajuita ushapangui. e

 Panda yuyai: Taita Diosta na ricui ushaimandami paitaca na rijsi ushanchi.

 Caica na ciertochu can: Taita Diosmanda yachajunaca huaquinbica dificilmi can, paica shuj espiritumi can. Shina cajpipash Taita Diostaca rijsita ushanchimi. Bibliapica para siempre causaiguta charingapaca Taita Diosta rijsinami canchi ninmi (Juan 17:3). Bibliaca Taita Diosman quimirichun, pai imashina cashcata rijsichun, shamuj punllacunapi gentecunamanda imata ruranata yachachunmi ayudan. Shinallata Taita Diospa mandashcacuna maijan cashcata yachajuchunbashmi ayudan (Isaías 45:18, 19; 1 Timoteo 2:4). Shinaca Taita Diosta rijsita ushapashcanchi (Salmo 83:18). Paimanbash quimirita ushashcanchimi (Santiago 4:8).