1 Corintios 4:1-21
4 Ñucanchitaca Cristopa sirvijcunatashna tucuicuna ricuchunmi munapanchi. Shinallata, Taita Dios pacalla charishca secretopa* encargadocunatashna* ricuchunmi munapanchi.
2 Shinapash encargadocunaca paicunapa ruraicunataca aligutami pactachina can.
3 Ñucaca, quiquinguna ñucata juzganata o tribunalcunaman apashpa ñucata juzganataca ashatallapash na preocuparinichu. Nisiquiera ñucallatapash na juzgarinichu.
4 Shinapash ñuca concienciapica tranquilomi sintiripani. Shina cashpapash, alita ruraj* runami cani nitaca na ushapanichu. Porque Jehová* Diosllami ñuca alita rurashcata o nalita rurashcata nina derechotaca charin.
5 Pero nara tiempo chayajpillataca, nipita na juzgajunachu capanguichi. Sino Señor Jesús shamungacamanmi shuyana capanguichi. Paimi yanapi pacashcashna tianajuj cosascunataca, punchalla michaman llujchinga. Gentecuna paicunapa shungu ucupi imata charishcatapashmi ricuchinga. Chaipimi Taita Diosca cada uno según imata rurashcata ricushpa alipi churanga.
6 Huauquicuna, quiquingunapa alipallatami ñucamanda, Apolosmandapash parlashpa caicunata nipashcani. Ñucanchica, “Taita Dios escribichishca shimipi imata nijujtallami rurana capanguichi” nishca shimicunatami pactachishcanchi. Quiquingunapash chai shimicunata pactachinata yachajuchunmi shina rurapashcanchi. Shina rurashpaca quiquingunaca na jariyanguichichu. Ni shujcunapa favor, ni shujcunapa contrapash na tucunguichichu.
7 Shinaca ¿imata charishpata quiquinga shujcunamanda mejormi cani yajungui? ¿Nachu Taita Dios quiquinmanga tucuita cushca? Taita Dios tucuita cushca cajpica ¿imashpata imatapash na chasquishcashna jariyajungui?
8 Quiquingunaca ¿ñachu tucui ima munashcata charinguichi? ¿Ñachu charij tucushcanguichi? ¿Ñachu ñucanchi illa mandai callarishcanguichi? Ña mandai callarishca cajpica, cushijuimanmi. Porque ñucanchipashmi quiquingunahuanga ña mandanajunchiman carca.
9 Ñucaca pensanimi gulpi gentecuna ricuchunmi apostolcunataca huañuchi tucuna último grupopi Taita Dios churashcata. Chaimi ñucanchitaca shuj teatropi presentarijtashna cai mundopi gentecunapash, angelcunapash ricunajun nishpa.
10 Ñucanchitaca Cristota catimandami muspacunatashna ricun. Pero quiquingunataca Cristota catinajujpimi aliguta yuyajcunatashna ricun. Shinallata ñucanchica fuerza illami capanchi. Pero quiquingunaca fuerzayumi capanguichi. Quiquingunataca respetanmi. Pero ñucanchitaca na ricunayachinllu.
11 Ñucanchica cunangamanmi yarjai pasanajunchi, yacunayachinajunchipash. Minishtirishca ropagutallapash* na charipanchichu.* Macai tucushcami capanchi.* Huasigutapash na charipanchichu.
12 Ñucanchi maquihuanbachami shinllita trabajanchi. Shujcuna ñucanchita nalicunata rimajpipash ali shimicunahuanmi tigrachinchi. Catiriashpa llaquichijpipash pacienciahuanmi aguantashpa catipanchi.
13 Shujcuna ñucanchimanda llullacunata nishpa juchachijpipash aliguman parlashpami tigrachinchi. Gentecunaca cunangamanmi ñucanchitaca, cai mundopi basuratashna, shitashca jupatashna ricun.
14 Cai shimicunataca quiquingunata pingaichingapaca na escribijupanichu. Sino ñucapa juyashca huahuacunatashna consejangapami escribijupani.
15 Quiquingunaca, Cristota imashina catinata yachachichun 10 mil profesorcunata charishpapash, na tauca taitacunata charipanguichichu. Ñucaca Cristo Jesusta catimanda y ali villaicunata villachimandami, quiquingunapa taitashna tucushcani.
16 Shinaca, ñucapa ejemplota catipaichi nishpami quiquingunataca rogapani.
17 Chaimi Timoteotaca quiquingunapaman cachajupani. Paica ñucapa juyashca churigushnami capan. Paica tucui shunguhuanmi Cristotaca sirvijun. Cristo Jesusta sirvijuimanda ñuca imashina yachachijushcataca paimi quiquingunamanga yarichinga.* Cada congregacionbi ñuca imashina yachachijunshnami paica yarichinga.
18 Huaquingunaca, Pabloca na visitangapaj shamugrijunllu yashpami jariyashcacuna can.
19 Jehová* Dios munajpica ñallami quiquingunata visitangapaj risha. Ñucaca jariyashcacunata ricungapami munapani. Pero na paicuna imata parlashcata yachangapachu paicunataca ricungapaj munapani. Sino paicuna Taita Diospa poderta charijta o na charijta yachangapami ricungapaj munapani.
20 Taita Diospa Gobiernota cazujushcataca ñucanchi parlocunahuanga na ricuchinchichu. Sino ñucanchi rurashcacunahuanmi Taita Diospa espíritu santota charishcataca ricuchinchi.
21 ¿Imatata munapanguichi? ¿Vara caspihuan richun, juyaihuan richun o aliguman richunllu munapanguichi?
Notacuna
^ O “secreto sagradopa”. Glosariopi “secreto sagrado” shimita ricupangui.
^ O “mayordomocunatashna”.
^ O “llachapagutallapash”.
^ Griego shimipica “lluchullami capanchi” nijunmi.
^ O “maltratai tucushcami capanchi”.
^ O “yuyarichinga”.
