1 Corintios 8:1-13
8 Cunanga, santocunaman carashca micunacunamanda parlashpami escribijupani. Tucuicunami chai yuyaimandaca imagutallapash yachapanchi. Pero, imatapash yachanaca jariyanamanmi apan. Shinapash juyaica shujcunata shinllichichunmi ayudan.
2 Imatapash yachanimi yajcunaca, nara alipacha yachanllu.
3 Pero pipash Taita Diosta juyajpica, Taita Diosca paitaca rijsinmi.
4 Santocunaman carashca micunamanda parlashpaca, chai yanga dioscuna na sirvijtaca yachapanchimi. Shinallata shujlla Taita Dios tiajtapash yachapanchimi.
5 Gentecunaca ninmi, jahua cielopipash, cai alpapipash shuj shuj dioscunami tian nishpa. Shinaca, gentecunapaca tauca “dioscuna”, tauca “señorcunami” tian.
6 Ñucanchipaca shujlla Diosmi tian. Paimi ñucanchipa Taita can. Paimi tucui cosascunata rurarca. Paipami ñucanchica causanchi. Shinallata shujlla Señormi tian. Paica Jesucristomi can. Jesucristomandami tucui cosascuna tian. Y paimandami causaigutapash charipanchi.
7 Shinapash na tucuicunachu chaitaca yachan. Huaquingunaca santocunatami adoran carca. Chaimandami yanga dioscunaman carashca micunata micushpaca, yanga dioscunata adoranajunshna sintirin. Y chaimi paicunapa conciencia na shinlli cashcamandaca nali sintirin.
8 Pero na micunamandallachu Taita Diospa ñaupapica ali ricurinchi. Shinaca, na micushpapash nimata na perdinchichu. Y micushpapash nimata na gananchichu.
9 Imata micunata agllana derechota charishpapash, concienciapi na shinlli cajcunata ama imagupipash nitijachingapami cuidadota charina capanguichi.
10 Quiquinga imata ruranataca alimi intindipangui. Shinaca, quiquinda santocunapa templo huasipi micunata micujujta ricushpaca ¿nachu concienciapi na shinlli caj huauquica paipash yanga dioscunaman carashca micunata micungapaj munanga?
11 Shinaca quiquin ali intindishpa micushcamandami, concienciapi na shinlli caj quiquinba huauquitaca llaquichishcangui. Cristoca chai huauquimandapashmi huañurca.
12 Shina rurashpami quiquinba huauquicunapa contra pecadota ruranajunguichi y paicunapa na shinlli concienciatapash llaquichinajunguichi. Y shinami Cristopa contra pecadota ruranajupanguichi.
13 Shinaca, micunamanda ñuca huauqui nitijana cajpica, ñuca huauquita ama nitijachingapaca, nunca más na aichataca micushachu.
