1 Samuel 29:1-11
-
Filisteocunaca Davidpica na confianllu (1-11)
29 Filisteocunaca Afec llactapimi paicunapa tucuilla soldadocunata tandachirca. Cutin israelita soldadocunaca Jezreel llactapi tiaj pugyu ladopimi paicunapa carpacunata shayachishca carca.
2 Filisteocunapa gobernantecunaca soldadocunandimi shamunajurca. Soldadocunaca 100 grupocunapi y mil grupocunapi tandachishcami catinajurca. Shinallata Davidpash y paipa soldadocunapash rey Akispa huashata catishpami shamunajurca.
3 Chaimi filisteocunapa jefecunaca Akistaca “cai hebreocunaca* ¿imatata caipica ruranajunyari?” nishpa tapunajurca. Shina ninajujpimi rey Akisca cashna nirca: “Paica Davidmi can. Paica Israel llactapa rey Saulpa sirvientemi can. Paica más o menos huata yalitami ñucahuan causajushca. Saulta saquishpa caiman shamushca punllamandapachami paipica ima nalitapash na ricushcanichu” nircami.
4 Shina nijpimi filisteocunapa jefecunaca Akistaca cashna nirca: “Chai runataca can paiman cushca pushtumanllata tigrachun ni. Paitaca ñucanchihuan macanajungapaj richunga ama saquichu. Denoca guerrapi cashpaca ñucanchipa contra shayarinman. Paica Saulpa ñaupapi ali quidangapaj munaimanda ñucanchipa soldadocunatara huañuchinman.
5 ¿Nachu bailashpa rinajuj gentecunaca Davidmandaca
‘Saulca mil contracunatami huañuchishca,cutin Davidca 10 mil contracunatami huañuchishca’ nishpa candanajurca?” ninajurcami.
6 Chaimi Akisca Davidta cayashpa cashna nirca: “Causajuj Jehová Diospa shutipimi jurani, canga ñuca ricuipica ali personami cangui. Ñuca soldadocunahuan guerraman can rijushcamandaca cushillami cani. Can caiman shamushca punllamandapachami canbica ima nalitapash na ricushcani. Shinapash filisteocunapa gobernantecunaca canbica na confianllu.
7 Mejor tigrailla y filisteocunapa gobernantecunata ama culirachingapaca imatapash ama ruranguichu” nircami.
8 Shina nijpimi Davidca rey Akistaca cashna nirca: “Ñucaca ¿ima nalitata rurapashcaniyari? Caiman shamushca punllamandapachaca ¿imapash nalitachu rurashcani? Ñuca amolla ¿imashpata canba contracunahuan macanajungapaj richunga na saquihuanguiyari?” nircami.
9 Chaimi rey Akisca Davidtaca cashna nirca: “Canga ñucapaca Taita Diospa shuj ángel cuendami ali ali cashcangui. Shinapash filisteocunapa jefecunaca ‘paitaca ñucanchihuan macanajungapaj richunga ama saquichu’ nishcami.
10 Shinaca cayallata punllayajhuan canbash y canhuan shamushca soldadocunapash caimanda richi” nircami.
11 Shina nijpimi Davidca paipa soldadocunandi madrugadota jatarishpa filisteocunapa alpacunaman tigrarca. Cutin filisteocunaca Jezreel llactamanmi rirca.
