1 Samuel 6:1-21
-
Filisteocunaca Taita Diospa Arcatami israelitacunaman tigrachin (1-21)
6 Jehová Diospa Arcaca filisteocunapa alpacunapimi 7 quillacunata carca.
2 Filisteocunaca sacerdotecunata y adivinocunata cayashpami cashna tapunajurca: “Jehová Diospa Arcahuanga ¿imatata rurana canchi? Arcata pai tiajushca pushtumanllata imashina tigrachinata villaichi” ninajurcami.
3 Chaimi paicunaca cashna nirca: “Israel llactapa Jehová Diospa Arca del Pactotaca* na chusha maquica tigrachinachu canguichi. Culpamanda ofrendata* Taita Diosman cachanataca na cunganachu canguichi. Shina rurashpallami cutin ali tucunguichi. Y Taita Dios imamanda shina castigashpa catijujtapash yachaj chayanguichi” ninajurcami.
4 Chaimi filisteocunaca “culpamanda ofrendata cungapaca ¿imatata cachana canchi?” nishpa tapunajurca. Sacerdotecuna y adivinocunaca cashnami nirca: “Cangunapash y cangunapa gobernantecunapash igualllatami castigai tucushcanguichi. Chaimandami filisteocunapa gobernantecunaca 5 caimandaca orohuan rurashca 5 hemorroidescunata y orohuan rurashca 5 ucuchacunata cachana canguichi.
5 Llactata llaquichinajuj hemorroides de orota y ucuchacuna de orotami rurana canguichi. Shinallata Israel llactapa Taita Diostaca respetashcatami ricuchina canguichi. Shina rurajpimi talvez Taita Diosca cangunata, cangunapa diosta y cangunapa llactatapash na castigashpa catinga.
6 ¿Imashpata cangunapash Egipto llactamanda faraonshna y chai llactamanda gentecunashna terco tercocuna tucunajunguichi? Israel llactapa Taita Dios paicunata ninanda llaquichijpimi paicunaca israelitacunata richun saquirca. Chaimi israelitacunaca chaimanda llujshishpa rirca.
7 Shinaca shuj mushuj carretata y shicucunata charij ishcai vacacunata seguraichi. Yugota nunca na churashca vacacunami cana can. Chai jipaca chai vacacunataca carretapimi huatana canguichi. Pero vacacunapa shicucunataca corralmanmi apana canguichi.
8 Jehová Diospa Arcataca carretapimi churana canguichi. Shinallata Arca ladopica oro cosascunahuan cajatami churana canguichi. Chaica Taita Diosman cungapaj culpamanda ofrendami canga. Chai jipaca vacacuna carretata aizashpa richun saquishpa
9 ricushpa quidanguichi. Chai vacacuna Bet-Semes llactaman rina ñanda vichai rishpa, Arcapa llactaman rijta ricushpaca Israel llactapa Taita Dios ñucanchita shinapacha castigashcatami yachashun. Pero na chai ñanda rijpica na Taita Dios castigajushcata sino yangamanda shina pasajushcatami yachashun” ninajurcami.
10 Chaimi filisteocunaca paicuna nishcashna rurarca. Filisteocunaca shicucunata charij ishcai vacacunata mascashpami chai vacacunataca carretaman huatarca. Y paicunapa shicucunataca shuj corralpimi churarca.
11 Chai carretapimi Jehová Diospa Arcata, orohuan rurashca ucuchacunata y orohuan rurashca hemorroidescunata charij cajata churarca.
12 Chai vacacunaca directomi Bet-Semes llactaman rina ñandaca rinajurca. Vacacunaca huacashpami ñanmandapash ni derechaman ni izquierdaman na llujshishpa directo rinajurca. Shinallata filisteocunapa gobernantecunaca Bet-Semes llacta fronteracamanmi vacacunataca catishpa rinajurca.
13 Bet-Semes llactamanda gentecunaca trigotami ura pambapica cosechanajushcarca. Paicunaca Arcata ricushpami ninanda cushijunajurca.
14 Chai carretaca Josué shuti betsemita runapa pambamanmi chayarca. Shuj jatun rumi ladopimi shayarirca. Chaimi chai gentecunaca carretapa maderataca yamdata rurashpa chai vacacunataca rupachina ofrendatashna* Jehová Diosmanga cararca.
15 Levitacunami* Jehová Diospa Arcata, oro cosascunahuan cajata uriajuchishpa chai jatun rumipi churarca. Chai punllaca Bet-Semes llactamanda jaricunaca Jehová Diosmanga rupachina ofrendacunata y shuj ofrendacunatapashmi cararca.
16 Chaita ricushpami filisteocunapa 5 gobernantecunaca chai punllallata Ecrón llactaman tigrarca.
17 Filisteocunaca orohuan rurashca hemorroidescunatami culpamanda ofrendatashna Jehová Diosman cungapaj cacharca. Shujtaca Asdod llactamanda, shujtaca Gaza llactamanda, shujtaca Asquelón llactamanda, shujtaca Gat llactamanda y shujtaca Ecrón llactamandami cacharca.
18 Shinallata orohuan rurashca ucuchacunaca filisteocunapa 5 gobernantecuna charishca llactacunahuanga igual cantidadmi carca. (Chai llactacunaca jatun pircacunahuan muyundi pircashca llactacuna y campomanda comunidadcunapashmi carca).
Shinallata Jehová Diospa Arcata churashca jatun rumica cunan punllacamanmi shuj testigo cuenda tiajun. Chai rumica Josué shuti betsemita runapa pambapimi can.
19 Shinapash Jehová Diosca Bet-Semes llactamanda jaricunataca paipa Arcata ricushcamandami huañuchirca. Taita Diosca chai llactamandaca 50 mil 70* gentecunatami huañuchirca. Jehová Dios paicunata shinapacha huañuchishpa castigashcamandami llacta entero ninanda huacanajurca.
20 Chaimi Bet-Semes llactamanda jaricunaca cashna ninajurca: “Santopacha santo Jehová Diospa ñaupapica ¿pita caita ushangayari? Ñucanchita saquishpaca ¿pipamanshi ringayari?” ninajurcami.
21 Chaimi paicunaca Quiryat-Jearim llactamanda gentecunataca cashna nichun mensajerocunata cacharca: “Jehová Diospa Arcatami filisteocunaca tigrachimushca, Arcata apangapaj shamuichi” ninajurcami.
Notacuna
^ Glosariopi “Arca del Pacto” shimita ricupangui.
^ O “Ofrenda por la culpa”. Glosariopi “ofrenda por la culpa” shimita ricupangui.
^ O “ofrenda quemada”. Glosariopi “ofrenda quemada” shimita ricupangui.
^ Hebreo shimipica “70 jaricuna, 50 mil jaricuna” nijunmi.
