Filemón 1:1-25
1 Ñucaca Pablomi capani. Cristo Jesusta sirvimandami prezo cani. Quiquinga ñucanchita ayudaj, ñucanchi juyashca huauqui Filemonmi capangui. Ñucami cai cartata quiquinman escribijupani. Ñucaca Timoteondimi capani.
2 Shinallata Apfia shuti ñucanchi paniguman, Arquipo shuti huauquimanbash y quiquinba huasipi tandanajuj congregacionmanbashmi* escribijupani. Arquipo huauquica, Cristotaca soldadoshnami ñucanchihuan sirvijun.
3 Ñucanchi Taita Diospash y Señor Jesucristopash quiquingunataca ninanda juyapachun* y quiquingunaman tranquilo ali causaiguta carachunbashmi mañajupani.
4 Taita Diosta mañajushpaca, siempremi paitaca quiquinmanda agradicipani.
5 Ñucaca, quiquin tucui shunguhuan Señor Jesuspi crishcata, paita juyashcata y Taita Diospa separashca* huauquicunatapash juyashcatami cunangaman uyajupashcani.
6 Quiquinga shujcuna charishca fetallatami charipangui. Ñucanchi charishca tucui alicunataca Cristomanda* chasquishcata cuenta japichun quiquinba fe ayudachunmi, Taita Diostaca mañapani.
7 Huauquicunata quiquin juyashcata yachaj chayashpaca, ninandami cushijurcani y animarircani. Porque quiquinmandami, Taita Diospa separashcacunaca paicunapa shungupi cutin cushijushca.
8 Ñucaca Cristopa shutipimi quiquindaca alitami rurana cangui nishpa mandana derechota charini.
9 Shina cashpapash, shujcunata quiquin juyajta yachashpami, ñucaca mayor caimanda y Cristo Jesusmanda prezo caimandaca, quiquindaca rogajupani.
10 Ñucaca carcelpi cashpami, Onesimopaca taitashna tucurcani. Paica ñuca huahuashnami capan. Y paipa favormi quiquindaca rogapani.
11 Pundaca esclavo cashpapash, paica esclavocuna ruranacunataca na rurarcachu. Pero cunanga, quiquindapash y ñucatapashmi paica alipacha sirvita ushan.
12 Onesimotaca cutinmi quiquinbaman cachajupani. Paitaca ninandami juyapani.
13 Ñucaca ali villaicunata predicaimandami prezo capani. Chaimandami quiquinba randi pai ñucata sirvichun caipi quidachun* munapaiman.
14 Imata rurashpapash, quiquinba permisohuanmi rurangapaj munapani. Porque ñuca imata mañajushcata obligacionmandalla rurachunga na munapanichu. Sino quiquinba munai tucui shunguhuan rurachunmi munapani.
15 Talvez paica quiquinhuan para siempre quidangapami, quiquinmandaca asha tiempoguta* caruyashcanga.
16 Pero ñana quiquinba esclavoshna cangachu. Sino shuj juyashca huauqui cuendami canga. Paitaca ninandami juyani. Pero ashtahuanbachaca quiquinmi juyana capangui. Porque paica ñana shuj esclavollachu can. Sino Señor Jesusta catijuj huauquimi can.
17 Shinaca, ñucata shuj amigota cuenda ricushpaca, paitaca ñucata chasquinshna juyaihuan chasquipangui.
18 Ashtahuangarin, Onesimopa culpamanda quiquin imagutapash pirdishca cajpi o pai imagutapash dibijujpica, ñucami paipa randi pagapasha.
19 Ñucaca Pablomi capani. Ñuca maquihuanbacha escribishpami, Onésimo imata dibijushcataca ñucami tucuita pagapasha nijupani. Quiquinga, quiquinba causaitapashmi ñucamanga dibihuangui. Pero chaitaca nimata na ñucaca nijupanichu.
20 Ñuca huauquilla, Señor Jesuspa shutipimi cai favortaca mañajupani. Cristopa shutipimi ñuca shunguta cushichipai nishpa mañapani.
21 Ñuca imata mañashcata quiquin ruranataca seguromi capani. Chaimi ñuca imata nishcatapash yali ashtahuan ruranata seguro cashpa escribijupani.
22 Ashtahuangarin, ñuca maipi quidana pushtuguta alistapangui nishpami quiquindaca mañapani. Quiquinguna Taita Diosta mañashcamanda ñuca quidashpaca, quiquingunataca visitagrishami.
23 Epafras huauquica, ñucashnallatami Cristo Jesusmanda carcelpi can. Paipashmi quiquinman saludocunata cachamupan.
24 Ñucata ayudajcuna Marcos, Aristarco, Demas, Lucaspashmi saludocunata cachamupan.
25 Señor Jesucristopa ninan juyaica* quiquingunapa shungupi cachunmi munapani.
Notacuna
^ Glosariopi “congregación” shimita ricupangui.
^ Glosariopi “bondad inmerecida” shimita ricupangui.
^ Glosariopi “Taita Diospa separashcacuna” shimita ricupangui.
^ O “Mesiasmanda”, “Taita Diospa agllashcamanda”.
^ O “saquirichun”.
^ Griego shimipica “shuj horasguta” nijunmi.
^ Glosariopi “bondad inmerecida” shimita ricupangui.
