Gálatas 2:1-21
2 Shinami 14 huatacuna jipaca, Bernabehuan Jerusalenman cutin rircani. Chaimanga Titotapash pushashpami rircani.
2 Ñucanchi Señor Jesucristo ri nijpimi, ñucaca Jerusalenman vichai rircani. Chaipimi huauquicunamanga, na judío gentecunaman predicajushca ali villaicunamanda parlarcani. Pero respetashca huauquicunamanllami parlarcani. Ñucaca, Taita Diospa obrata ali rurajushcata o nali rurajushcata seguro cangapami shina rurarcani. Sinoca, ñuca rurashca obraca yangami canman carca.
3 Pero nisiquiera ñucata cumbajuj Titotapash na circuncisionda* rurai nishpaca pipash obligarcachu. Y eso que paica griego carca.
4 Pero chai problemaca llulla huauquicunamandami tiai callarirca. Chai llulla huauquicunaca, ñucanchicuna Cristo Jesushuan shujllashna caimanda libre cashcata ricungapaj munashpallami, pacalla ñucanchipurapi chapurirca. Shina rurashpami ñucanchitaca leypa esclavotashna charingapaj munanajurca.
5 Pero ñucanchica ima horapash na paicunataca uyarcanchichu. Porque ali villaicunamanda chasquishca cabal yachachishcacunata quiquinguna charishpa catichunmi shina ruraparcanchi.
6 Importante y respetashca jaricunaca mushuj yuyaicunataca na nihuarcachu. Paicuna ima cashca cajpipash ñucapaca na importahuanllu. Porque Taita Diosca na chaicunataca ricujunllu.
7 Ashtahuangarin, imashinami Pedroca circuncisionda rurashcacunaman villachina obrata chasquishcarca, shinallata ñucapash na circuncisionda rurashcacunaman villachina obrata chasquishcatami paicunaca ricurca.
8 Porque Taita Diosmi Pedrotaca circuncisionda rurashcacunapa apóstol cachun churarca. Taita Diosllatami ñucatapash na judío gentecunapa apóstol cachun churahuarca.
9 Taita Dios ñucata ninanda juyashcata* cuenta japishpami Santiago, Cefas* y Juanga paicunapa ali lado maquita ñucaman y Bernabeman curca. Ñucanchicuna na judiocunaman villachichun y cutin paicunaca circuncisionda rurashcacunaman villachingapaj de acuerdo cashpami shina rurarca. Santiago, Cefas y Juanga congregacionba pilar cuendami carca.
10 Paicunaca pobregucunataca ama cungapanguichichu nishpallami ñucanchitaca mañarca. Chaita rurangapaca tucui shunguhuanmi esforzarijupashcani.
11 Shinapash Antioquía llactaman Cefas chayamujpica, pai pandarijushcamandami paitaca ñavi ñavi rimarcani.
12 Porque Santiagopa cumbacuna nara chayamujpica, na judío gentecunahuanmi Cefasca igual micunata yachan carca. Pero Santiagopa cumbacuna chayamujpica, circuncisionda ruranata apoyajcunata manllaimandami, na judiocunahuanga ñana micushpa paicunahuanga ñana tandanajurca.
13 Chaimi shuj judiocunapash Cefas cuendallata na judiocunamandaca caruyarca. Bernabepash paicunashnallatami na judiocunamandaca caruyarca.
14 Ali villaicunapa cabal yachachishcacunata na catishpa causanajushcata ricushpami, Cefastaca tucuicunapa ñaupapi cashna nircani: “Quiquinga judío cashpapashmi judioshna causanapa randica na judío gentecunashna causangui. ¿Shina cashpapashchu na judío gentecunataca judiocunapa costumbrecunata catishpa causachun obligajungui?” nircanimi.
15 Ñucanchica nacirishcamandapachami judío capanchi. Shuj llactamandacunashna pecadorcunaca na capanchichu.
16 Taita Diosca, Jesucristopi crijpillami pitapash sin culpa justota ricun. Y na leypi nishcata pactachishcamandaca pitapash ima culpapash illa justotaca ricunllu. Chaitaca alimi yachapanchi. Chaimi ñucanchica Cristo Jesuspi cripanchi. Porque shinami leypi nishcata pactachimanda Taita Diospa ñaupapi ima culpapash illa justo ricurinapa randica, Cristopi crishcamanda ima culpapash illa justo ricurita ushashun. Porque leypi nishcata pactachimandaca nipipash na Taita Diospa ñaupapi ima culpapash illa justo ricuritaca ushangachu.
17 Cristomanda ima culpapash illa justo ricuringapaj esforzarijpipashmi ñucanchitaca pecadorcunatashna ricun. Shinaca ¿Cristomi pecadota rurachijun ninachu capanchi? Na, na shina canllu.
18 Punda imata urmachishcata cunanbi shayachishpaca Leypi nishcata na cazushcatami ricuchijuiman.
19 Shinaca, leyta catimandami, leypaca huañushcashna cani. Y shinami Taita Diosta sirvingapaca causajuni.
20 Cristohuan jatun racu caspipi* clavashcashnami cani. Y ñana ñucapallataca causajunichu. Sino Cristomi ñucahuanga shujllashna causajun. Cunanbica Taita Diospa Churipi crimandami cashna causaita charini. Taita Diospa Churimi ñucata juyashpa, ñucamanda paipa causaita curca.
21 Taita Diospa ninan juyaitaca* na rechazanichu.* Si leyta catimanda Taita Diospa ñaupapi ima culpapash illa justo ricurita ushana cashca cajpica, yangami Cristoca huañushca canman carca.
Notacuna
^ Glosariopi “circuncisión” shimita ricupangui.
^ Glosariopi “bondad inmerecida” shimita ricupangui.
^ Cefasca apóstol Pedropa chaishuj shutimi carca.
^ Glosariopi “jatun racu caspi” shimita ricupangui.
^ Glosariopi “bondad inmerecida” shimita ricupangui.
^ O “na ladoman saquinichu”.
