Josué 1:1-18
1 Jehová Diosta sirvij Moisés huañushca jipami, Jehová Diosca Moisesta ayudaj, Nun shuti runapa churi Josuetaca* cashna nirca:
2 “Ñucata sirvij Moisesca ñami huañushca. Cunanga canbash y cai gentecunapash Río Jordanda yalishpa israelitacunaman ñuca carashca alpacunaman yaicuichi.
3 Moisesman prometishcashnami cangunapa chaqui maipi sarushca alpacunataca gulpita cangunaman cusha.
4 Canguna japina alpaca desiertomanda* Libanocaman* y jatun Río Eufratescamanmi* canga. Cutin indi huashajuj ladomanga Mar Grande* yacucamanmi canga. Shinallata hitita gentecunapa alpacunapashmi cangunapaj canga.
5 Can causashcacamanga candaca pipash na mishaita ushangachu. Imashinami Moisesta ayudarcani, shinallatami candapash ayudasha. Candaca na saquishachu, na jichushachu.
6 Shinlli tucungui y ama manllanguichu. Punda taitacunaman ñuca carasha nishca alpacunata japichunga canmi cai llactataca ayudangui.
7 ”Shinlli tucungui y ama manllanguichu. Ñucata sirvij Moisés canda mandashca tucuilla Leycunata cazungui. Canba causaipi tucuita aliguta pensarishpa rurangapaca, cai mandashca Leymandaca ni ali ladoman, ni lluqui ladoman na anchurinachu cangui.
8 Cai libropi escribishca Leyta cazungapaca, cai Leymandaca parlajunallami cangui. Cai Leytaca tutapash y punllapashmi liina cangui. Cai liishcacunapica tutapash y punllapashmi pensarijunalla* cangui. Shinami aliguta causai ushangui. Y imata cashpapash aliguta pensarishpami rurai ushangui.
9 Ñucami candaca shinlli tucungui y ama manllanguichu nishpa mandajuni. Shinaca na manllanachu cangui. Porque ñucami canba Jehová Dios cani. Ñucami can maiman rijpipash canhuan casha” nircami.
10 Shina nijpimi Josueca llactapa funcionariocunataca cashna mandarca:
11 “Carpacunata shayachishca pushtuman rishpa llacta enteroman cashna nishpa mandaichi: ‘Micunacunata seguraichi. Porque quimsa punlla jipaca Río Jordanda chimbashpa ñucanchi Jehová Dios caragrijuj alpacunata japingapami rigrinchi’ nichi” nircami.
12 Shinallata Rubenba, Gadpa jatun familiacunaman y Manasespa chaupi jatun familiamanbashmi Josueca cashna nirca:
13 “Jehová Diosta sirvij Moisés imata mandashcata yaripaichi. Paica nircami: ‘Cangunapaj Jehová Diosmi canguna cai alpapi tranquilo ali causachun cai alpata cangunaman carajun.
14 Cangunapa huarmicuna, huahuacuna y animalcunapash Río Jordán cai ladopi* Moisés cushca alpacunapimi causashpa quidanga. Pero alipacha shinlli soldadocunaca, cangunapa huauquicunata ñaupashpami macanajungapaj listo Río Jordandaca yalina canguichi. Cangunami paicunataca ayudana canguichi.
15 Cangunaman tranquilo ali causaiguta carashcashnallatami, Jehová Dios cangunapa huauquicunamanbash tranquilo ali causaiguta carangacaman paicunataca ayudana canguichi. Shinallata paicunapa Jehová Dios carashca alpacunata paicunapash japingacamanmi ayudana canguichi. Chai jipaca cangunaman cushca alpacunaman tigrashpa chaipi causashpa quidai ushanguichi. Chai alpacunataca Jehová Diosta sirvij Moisesmi Río Jordanba indi llujshimuj ladopi cangunamanga curca’ nircami” nirca.
16 Chaimi paicunaca Josuetaca cashna ninajurca: “Quiquin ima nishcataca tucuitami rurashun, maiman richun nijpipash rishunllami.
17 Imashinami Moisesta tucuipi cazurcanchi, shinallatami quiquindapash cazushun. Y ashtahuanbachaca imashinami quiquinba Jehová Diosca Moisesta ayudarca, shinallata quiquindapash ayudachunmi munapanchi.
18 Pi cashpapash quiquinba mandashcacunapa contra shayarishpa y quiquin imata mandashcata na cazujpica, maimandami huañuna can. Quiquinga shinlli tucungui y ama manllanguichu” ninajurcami.
Notacuna
^ O “Jehosúa”. Cai shutica “Jehovami salvan” nijunmi.
^ Caipica huaquin gentecunalla causaj, ima horapash na tarpushca chaquishca pambacunatami shina nijun.
^ Caipica frontera nortemandami parlajun.
^ Caipica frontera este o indi llujshimuj ladomandami parlajun.
^ Caipica Mar Mediterraneomandami parlajun.
^ O “upalla liina”.
^ Caipica indi llujshimuj ladomandami parlajun.
