Apocalipsis 19:1-21
19 Chai jipaca, ashtacacuna jahua cielopi shinllita cashna nijtami uyarcani: “Jehová* Diosta alabaichi.* Ñucanchi Taita Diosmi gentecunataca salvan. Paica jatunyachi tucushcami can, podertapashmi charin.
2 Porque Taita Diospa juiciocunaca alipachami can, na pandarinllu. Paimi culquimanda huainayashpa causajuj huarmitapash castigarca. Chai huarmimi paipa huainayana juchahuan* cai alpapi causajcunataca nalicunata rurachishca. Shinallata Taita Diosca paipa esclavocunata chai huarmi huañuchishcamandami chai huarmitaca randi llaquichirca” ninajurcami.
3 Chai jipallami cutin cashna ninajurca: “Jehová* Diosta alabaichi.* Chai llactapa cushnica para siempremi vichai rijungalla” nishpa.
4 Chai jipami 24 ancianocuna y chuscu querubingunaca* mandangapaj tiarina pushtupi* tiajuj Taita Diospa ñaupapi cungurishpa paita adoranajurca. Paicunaca “amén, Jehová* Diosta alabaichi”* ninajurcami.
5 Shinallata, mandangapaj tiarina pushtumandaca cashna nijujmi uyarirca: “Taita Diospa esclavocunapash, paita manllajcunapash, uchillacunapash, jatungunapash* y tucui quiquingunapash ñucanchi Taita Diostaca alabaichi” nircami.
6 Shinallata ashtaca gentecuna parlanajujtashnami uyarcani. Paicunaca shuj jatun cascada yacucuna ushashcata* huacajunshna, rayocuna shinllita culun ninshnami parlanajurca. Paicunaca cashnami ninajurca: “Jehová* Diosta alabaichi.* Jehová* Diosmi Tucui Ushaita Charij ñucanchi Taita Dios can. Paica ñami mandai callarishca.
7 Ninandapacha cushijushunchi y paita alabashunchi. Porque Maltun Llamagupa cazamientoca ñami chayamushca. Paipa noviapash ñami cazarangapaj alistarishcalla can.
8 Shinapachami pasanga. Maltun Llamagupa noviamanga fino lino tela ropatami* churajuchun curca. Chai ropaca limpio, punchapambami carca. Fino lino telaca, Taita Diospa separashcacunapa* ali ruraicunatami ricuchijun” ninajurcami.
9 Shuj angelca nihuarcami: “Caita escribipai: ‘Maltun Llamagupa cazamiento cenaman invitashcacunaca cushillami cana can’” nishpa. Shinallata nihuarcami: “Taita Diospa cai shimicunaca na llullachu can” nishpa.
10 Shina nijpimi, chai angelta adorangapaj paipa ñaupapi cungurijurcani. Chaimi chai angelca nihuarca: “Cuidado, ama shina ruraichu. Taita Diostami adorana cangui. Ñucaca quiquinshnallata y quiquinba huauquicunashnallata esclavollami capani. Profeciacunaca* Jesusmanda villachingapami tian. Chaimi chai huauquicunaca Jesusmanda villachingapaj mingashca can” nihuarcami.
11 Chai jipaca jahua cielo pascariajujtami ricurcani. Chaipica shuj yura caballopi tiajujmi ricurirca. Chai caballopi tiajujca, Aliguta Cazuj y Ciertota Parlaj shutitami charirca. Paimi ima ali cajta ricushpa* juzgan, shinallata ima ali cajta ricushpa macanajun.
12 Paipa ñavicunaca rupajuj ninashnami can. Paipa umapica ashtaca coronacunami tian. Paipica shuj shutimi escribishca tiajun. Chai shutitaca nipipash na yachanllu. Solo paillami yachan.
13 Paipa jahualla churajushca ropapash yahuarhuan mancharishcami* can. Paica Taita Diospa Shimi nishca shutitami charin.
14 Shinallata, jahua cielopi soldadocunaca yura caballopi tiarishcami paitaca catinajurca. Paicunaca fino, yura, limpio lino telata churajushcacunami carca.
15 Tucuilla llactacunata atacangapami, paipa shimimandaca largo, filo filo espada llujshijurca. Paicunataca jirru varahuanmi mandanga.* Ashtahuangarin paica uvasta saruna pushtupimi uvastaca sarunga. Chai pushtuca Tucui Ushaita Charij Taita Diospami can. Y chai pushtuca Taita Dios ninandapacha culirashcatami ricuchin.
16 Paipa jahualla churajunapica, changapimi “reycunapa Rey y mandajcunapa Mandaj” nishca shuti escribishca tiajun.
17 Shinallata, shuj ángel indipi shayajujtami ricurcani. Paica shinllita caparishpami jahua cielota volanajuj tucuilla pajarocunataca nirca: “Caiman shamuichi. Taita Diospa jatun cenaman tandanajumuichi.
18 Reycunapa aichatapash, comandantecunapa aichatapash, ashtaca poderta charij gentecunapa aichatapash micuichi. Shinallata caballocunapa aichatapash, caballopi tianajujcunapa aichatapash, libre gentecunapa aichatapash, esclavocunapa aichatapash, uchillacunapa aichatapash, jatungunapa aichatapash y tucuicunapa aichatapash micuichi” nircami.
19 Manllanai sacha animaltapash, cai alpapi reycunatapash y paicunapa soldadocunatapash tucuilla tandanajushca cajtami ricurcani. Paicunaca yura caballopi tiajujhuan y paipa soldadocunahuan macanajungapami tandanajushca carca.
20 Chai manllanai sacha animalca japi tucurcami. Paihuanga llullashpa villachij profetapashmi japi tucurca. Chai llullashpa villachij profetami, sacha animalpa señalta charijcunatapash y chai sacha animalpa estatuata adorajcunatapash, manllanai sacha animalpa ñaupapi manllanai cosascunata rurashpa umachirca. Manllanai sacha animalpash y llullashpa villachij profetapash causallatami, azufrehuan ninanda rupajuj nina lagunaman ishcandi shitai tucurca.
21 Shinapash reycuna y paipa soldadocunaca, yura caballopi tiajujpa shimimanda llujshijuj largo espadahuanmi huañuchi tucurca. Paicunapa aichacunataca tucuilla pajarocunami na munangacaman micunajurca.
Notacuna
^ Griego shimipica “aleluya” nijunmi. Aleluya nishpaca “Jah alabashca cachun” nijunmi. “Jehová” shutitami ashalla shimicunapica “Jah” nin.
^ Griego shimipica “pornéia” nijunmi. Glosariopi “huainayana jucha” shimita ricupangui.
^ Griego shimipica “aleluya” nijunmi. Aleluya nishpaca “Jah alabashca cachun” nijunmi. “Jehová” shutitami ashalla shimicunapica “Jah” nin.
^ Querubingunaca importantepacha angelcunami can.
^ Griego shimipica “tronopi” nijunmi.
^ Griego shimipica “aleluya” nijunmi. Aleluya nishpaca “Jah alabashca cachun” nijunmi. “Jehová” shutitami ashalla shimicunapica “Jah” nin.
^ O “importantecunapash, na yapa importantecunapash”.
^ O “pudishcata”.
^ Griego shimipica “aleluya” nijunmi. Aleluya nishpaca “Jah alabashca cachun” nijunmi. “Jehová” shutitami ashalla shimicunapica “Jah” nin.
^ O “llachapatami”.
^ Glosariopi “Taita Diospa separashcacuna” shimita ricupangui.
^ O talvez “tsirapachishcami”.
^ Griego shimipica “michinga” nijunmi.
