Apocalipsis 20:1-15
20 Shinallata, jahua cielomanda shuj ángel urai shamujujtami ricurcani. Chai angelca ucu ucu utujupa llavetapash, shuj jatun cadenatapashmi maquipi charijurca.
2 Chai angelmi dragonda japirca. Chai dragonga pundamandapacha tiashca culebrami can. Paimi Diablo y Satanás* can. Paitami mil huatacunata huatarca.
3 Shina huatashpami paitaca ucu ucu utujuman shitarca. Chaipimi paitaca vichashpa* saquirca. Y gentecunata cutinga ama pandachichunmi, mil huatacaman chai utujuman yaicuna entradataca vichashpa, ali ali sellashpa saquirca. Chai jipami dragonga asha tiempota libre quidana* can.
4 Shinallata, mandangapaj tiarina pushtucunatami* ricurcani. Chaipi tiarijcunamanga Taita Diosmi juzgana autoridadta curca. Shinapachami pasanga. Jesusmanda y Taita Diosmanda villachishcamanda huañuchi tucushcacunapa* yahuartapashmi* ricurcani. Paicunaca ni manllanai sacha animaltapash, ni paipa estatuatapash na adorashcarcachu. Ni frentepipash, ni maquipipash na sacha animalpa señaltaca chasquishcarcachu. Paicunaca causarishpami, Cristohuan mil huatacunata mandarca.
5 Paicunami primero causachi tucushcacuna can. Chaishuj huañushcacunaca, mil huatacuna tucurishca jipami, causachi tucurca.
6 Primero causachi tucushcacunaca cushijushca y perfectomi can. Paicunaca cati huañuitaca* na rijsingachu. Paicunaca Taita Diospa y Cristopa sacerdotecunami* tucunga. Mil huatacunatami Cristohuan mandanga.
7 Shinapash mil huatacuna tucuri na tucurimi, Diabloca* ñana prezo canga. Paica libremi quidanga.
8 Diabloca Gog llactatapash y Magog llactatapash umachingapami llujshinga. Chai llactacunaca alpapa chuscundi esquinacunapimi can. Chai llactacunataca macanajuipi macanajugrichun tandachingapami shina ruranga. Paicunaca mar yacupi arenacunashna ashtaca ashtacacunami can.
9 Paicunaca cai alpapi tucui ladocunaman rishpami, Taita Diospa separashcacunapa* campamentota y Taita Dios juyashca llactatapash muyurca. Shinapash, jahua cielomanda nina urai shamushpami, paicunataca rupachishpa tucuchirca.
10 Gentecunata pandachijushca Diabloca, azufrehuan ninanda rupajuj nina lagunamanmi shitai tucurca. Chai lagunapica ñami manllanai sacha animalpash y llullashpa villachij profetapash carca. Chaipimi paicunaca tuta y punlla para siempre llaquichi tucunga.*
11 Shinallata, mandangapaj tiarina shuj yura pushtutami ricurcani. Chaipica Taita Dios tiajujtapashmi ricurcani. Cai alpapash, cielopashmi paipa ñaupamandaca pacajushpa rirca. Paicunaca nunca más ñana ricurircachu.
12 Chai jipaca, huañushcacunaca uchillacuna cashpa y jatunguna cashpapash* mandangapaj tiarina pushtu ñaupapi shayanajujtami ricurcani. Shinallata rollocuna pascarijtapashmi ricurcani. Pero shuj rollopashmi pascarirca. Chai rolloca picunalla causaita chasquinata ricuchij rollomi carca. Rollocunapi escribishcashnami, huañushcacunataca paicuna imata rurashcata ricushpa juzgarca.
13 Mar yacupashmi chaipi caj huañushcacunataca entregarca. Shinallata huañuipash y Pantionbashmi* chaipi caj huañushcacunataca entregarca. Y cada unomi paicuna imata rurashcamandaca juzgai tucurca.
14 Huañuipash y Pantionbash* nina lagunamanmi shitai tucurca. Nina lagunaca cati huañuitami* ricuchijun.
15 Shinallata, picunalla causaita chasquinata ricuchij libropi na anotashcacunaca, nina lagunamanmi shitai tucurca.
Notacuna
^ Caipica “Taita Diospa principal enemigomanda parlashpami” shina nijun.
^ O “vichicashpa”.
^ O “saquirina”.
^ Griego shimipica “tronocunatami” nijunmi.
^ Griego shimipica “jachahuan huañuchi tucushcacunapa” nijunmi.
^ Caipica “para siempre huañunatami” shina nijun.
^ Griego shimipica “Satanasca” nijunmi. Satanás nishpaca “napacha cazungapaj munan o contra” nijunmi.
^ Glosariopi “Taita Diospa separashcacuna” shimita ricupangui.
^ O “japi tucunga”, “carcelpi churai tucunga”.
^ O “importantecuna cashpa y na yapa importantecuna cashpapash”.
^ Caipica “para siempre huañunatami” shina nijun.
