Hechos 27:1-44
27 Chai jipami Festoca, ñucanchicunata Italiaman cachangapaj decidirca. Chaimi Pablota y chaishuj prezocunataca, soldadocunapa capitán* apashpa rina carca. Chai capitanga Julio shutimi carca. Paica Augusto* nishca soldadocunapa grupomandami carca.
2 Ñucanchica Adramitio llactapi cashpami, shuj barcota japishpa rircanchi. Chai barcoca provincia de Asiapi barcocuna shayarina puertocunamanmi ña rigrijushcarca. Ñucanchihuanga Aristarco shuti runagupashmi rijurca. Paica provincia de Macedonia, Tesalónica llactamandami carca.
3 Cayandi punllaca Sidón llactamanmi chayarcanchi. Julioca llaquishpami Pablotaca tratarca. Ashtahuangarin, Pablotaca paipa amigocunata ricungapaj richun, paipa amigocuna paita cuidachunbashmi saquirca.
4 Sidón llactamanda rinajujpica, ninanda huairamushpami huairaca shinllita huactamurca. Chaimi Chipre llacta ladota muyushpa rircanchi.
5 Chai jipaca, mar yacuta rishpami Cilicia y Panfilia llactacunata yalishpa rircanchi. Barcoca Licia llactapa Mira shuti llactapimi shayarirca.
6 Chaipimi, capitanga Alejandría llactamanda Italia llactaman rigrijuj barcopi ñucanchitaca pushashpa rirca.
7 Tauca punllacunata barcopi alimanda rishpami, juyaipa Cnido llactaman chayagrircanchi. Ninanda huairamujujpimi, barcoca na ri ushajurca. Chaimi Creta llacta ladota muyushpa Salmone llacta frenteta yalishpa rircanchi.
8 Ninandapacha huairajujpi na ri ushashpami, manñatalla rishpa Bellos Puertos nishca pushtuman chayarcanchi. Chai pushtuca Lasea llacta ladopimi carca.
9 Ña tauca punllacunami yalirca. Barcopi rishpa catinapash peligrosomi carca. Porque Pecadocunamanda Limpiarina Punllapa* ayunana punllapash ñami yalishcarca. Chaimi Pabloca cashna nishpa advirtirca:
10 “Cumbacuna, barcopi rishpa catishpaca llaqui apashunmi. Barcopash pambaringami y barcopi cargatapash chingachiringami. Ashtahuangarin ñucanchipashmi talvez huañuringa” nirca.
11 Pero capitanga, barcota manejajta y barco dueñota uyashpami Pablo imata nijtaca na cazurca.
12 Tamia tiempopi Bellos Puertos nishca pushtupi barcota shayachina na ali cajpimi, barcopi rinajuj mayoría gentecunaca, caipica na quidashpa* barcocuna shayarina Fenice puertoman chayagrishun nirca. Chai puertoca Creta llactapimi carca. Chaimanga, indi llujshimuj jahua ladotapash, indi llujshimuj ura ladotapash yaicunallami carca.
13 Ura ladota alillaguta huairamujpimi, paicunaca Fenice puertomanga chayagrinchimari yarca. Chaimi barcota shayachina ancla gancho jirruta alzashpa, Creta isla manñatalla rinajurca.
14 Shinapash asha rato jipaca ninandami huairamurca. Chai huairaca euroaquilón nishcami carca.
15 Ninanda huairamujpimi, barcoca caiman chaiman cuyurijurca, derecho ritaca ñana ushajurcachu. Ashtahuangarin huaira vincishpami barcotaca apai callarirca.
16 Chai jipaca Cauda shuti islata muyushpami rircanchi. Shinapash barco huashapi tiajuj uchilla canoataca apenasmi vitsachi* usharcanchi.
17 Ña vitsachishca jipaca, barco ama partirichunmi, cabiacunata ucuta yalichishpa barcotaca huatarca. Shinapash mar yacu ucupi tiashca arena mundungunapi* trancarinatami manllarca. Chaimi barcopa vela jatun telacunata safashpa, barcotaca huaira apachun saquirca.
18 Cayandi punllaca, ninanda huairashpami barcotaca caiman chaiman cuyuchijurca. Chaimi barco fangalla tucuchunga, barcopi apanajushca huaquin cargataca yacuman shitai callarirca.
19 Quimsa punllacaman chashnalla cajpimi cabiacunatapash, poleacunatapash paicunapa maquihuanbacha mar yacuman shitashpa saquirca.
20 Ña tauca punllacunatami inditapash, estrellacunatapash na ricushpa yalinajurcanchi. Ushashcata* huairashpami tamiajurca. Chaimi ñana salvari ushashunllu yarcanchi.
21 Barcopi rinajuj gentecunaca, ña tauca punllacunatami nimata na micushpa yalinajurca. Chaimi Pabloca paicunapa chaupipi shayarishpa cashna nirca: “Cumbacuna, ñuca ima nishcata uyashpa, Creta islapillata quidashca cashpaca, cai llaquitapash na charinchimanllu carca. Yacumanbash nimata na shitanchimanllu carca.
22 Pero cunanga cangunataca nipanimi, ama manllaichichu. Ñucanchipuramandaca ni shujllapash na huañushunllu. Barcollami tucuringa.
23 Caina tutaca, Taita Diosmi shuj angelta cachamurca. Chai Taita Diostami ñucaca sirvishpa, adorashpa causajuni.
24 Chai angelca cashnami nihuarca: ‘Pablo, ama manllaichu. Roma llactapa reypa* ñaupapimi cagringui. Shinallata, cai barcopi canhuan rinajujcunatapash, candapashmi Taita Diosca salvanga’ nishpa.
25 Shinaca cumbacuna, ama manllaichichu. Ñucaca Taita Dios imata nishcatami cripani. Taita Dios ñucaman imata nishcaca pactaringapachami.
26 Shinapash ñucanchi rinajuj barcoca shuj isla ladopimi hundiringa” nirca.
27 Ña 14 punllacunatami mar de Adria nishcapi yacucunaca caiman chaiman barcotaca huactamujurca. Chaupi tutami barcopi trabajajcunaca, chaquishca alpamanmi ña chayanchi yanajurca.
28 Chaimi mashna jundu cashcata midingapaca, plomadata cabia pundapi huatashpa mar yacu ucuman shitarca. Shina shitashpa ricujpica, 36 metro jundumi cashcarca. Ashtahuan ashaguta chaiman rishpa mashna jundu cashcata ñacutin midijpica, 27 metro jundumi cashcarca.
29 Jatun rumicunahuan barco chocarinata manllashpami, paicunaca barco huasha ladopi tianajuj chuscu ancla gancho jirrucunata yacu ucuman shitarca. Uchalla punllayashpachari ali canman nishpami pensarinajurca.
30 Pero barcopi trabajajcunaca, barcomanda escaparingapaj munashpami, uchilla canoata mar yacuman uriajuchinajurca. Paicunaca barco ñaupamandami anclacunataca yacuman shitagrinchi nij tucushpami escaparingapaj munanajurca.
31 Chaimi Pabloca, soldadocunapa capitanda y soldadocunataca cashna nirca: “Si cai jaricuna na barcopi quidajpica, cangunaca na salvarita ushanguichichu” nishpa.
32 Chaimi soldadocunaca, uchilla canoata huatashca cabiacunata fitishpa canoataca yacuman urmachun saquirca.
33 Punllayangapaca ashallami faltajurca. Chaimi Pabloca, ashagutallapash micunami canguichi nishpa tucuicunata cashna ni callarirca: “Cangunaca ñami 14 punllacunata nimatapash na micushca, pinarishca shuyanajushcanguichi.
34 Chaimi cangunataca imagutallapash micunami canguichi nijupani. Cangunapa alipallatami nijupani. Porque caipi cajcunapuramandaca ni shuj na huañushunllu”.
35 Chaita nishca jipami Pabloca, shuj tandaguta japishpa, tucuicunapa ñaupapi Taita Diosta pagui nishpa mañarca. Chai jipami tandagutaca partishpa micui callarirca.
36 Chaimi tucuicuna ñana pinarishpa, imagullatapash micui callarirca.
37 Totalca 276 gentecunami* barcopi rinajurcanchi.
38 Tucuillacuna na munangacaman micushca jipaca, barco fangalla tucuchunmi trigotaca mar yacuman shitarca.
39 Barcopi trabajajcunaca cayandi punlla chaquishca alpata ricushpapash, maipi cashcataca na yacharcachu. Shinapash barcota shayachi ushanalla shuj playata ricushpami, chaipi shayachi ushashpaca, barcota chaipi shayachishun ninajurca.
40 Chaimi ancla jirrucunata huatashca cabiacunataca cuchushpa mar yacu ucuman urmachun saquirca. Shinallata, barcota purichina remo caspicunata huatashca cabiacunatapashmi cacharichirca. Chai jipami barcota huaira apachunga, barco ñaupa ladopi tiajuj vela telatapash jahuaman alzashpa templarca. Shinami paicunaca mar yacu manñaman ri callarirca.
41 Chaipimi barcoca, mar yacu ucupi arena mundunhuan chocarishpa, chaipi trancarishpa quidarca. Barcopa ñaupa ladoca, chaipi huashajushpami ni maiman na cuyurirca. Barco huasha ladoca, mar yacu olacuna fuerzahuan huactamujpimi faquiri callarirca.
42 Chaimi soldadocunaca, prezocuna nadashpa ama escaparichun, tucuilla prezocunata huañuchishun nishpa parlarirca.
43 Pero capitán Julioca Pablota salvangapaj munashpami, soldadocunataca ama shina ruraichichu nirca. Chaimi nadanata yachajcunataca mar yacuman shitarishpa, paicunara chaquishca alpaman nadashpa chayagrichun mandarca.
44 Chaishujcunataca tablacunata o barcopi imapash tiashcacunata japishpa, huambushpa richunmi mandarca. Shinami tucuicunallata yacu manñamanga, na imapash pasashpa ali chayagrirca.
Notacuna
^ Soldadocunapa capitanga 100 soldadocunata mandaj romano soldadomi carca.
^ Augustoca gente shutica na carcachu. Sino Emperador romanopa shuj titulomi carca.
^ Glosariopi “Pecadocunamanda Limpiarina Punlla” shimita ricupangui.
^ O “saquirishpa”.
^ O “sicachi”.
^ O “pudishcata”.
