Hechos 6:1-15
6 Chai punllacunapica Jesuspa discipulocunaca ashtahuanmi mirashpa catinajurca. Chaipimi griego shimita parlaj discipulocunaca, ñucanchi viuda huarmigucunamanga cada punlla carana ración micunagutaca na caranajunllu nishpa, hebreo shimita parlaj discipulocunamanda quejari callarirca.
2 Chaimi 12 apostolcunaca gulpi discipulocunata tandachishpa nirca: “Viuda huarmigucunaman micunaguta partijuimanda Taita Diospa shimita yachachinata saquinaca na alichu canman.
3 Shinaca huauquicuna, cangunapuramandaca 7 jaricunatami agllana canguichi. Paicunaca Taita Diospa espíritu santota chasquishca, ali yachajushca, tucuicuna respetashca jaricunami cana can. Paicunatami micunaguta partichun mingana capanchi.
4 Cutin ñucanchicunaca, Taita Diosta mañashpami catishun. Shinallata Taita Diospa shimita yachachishpapashmi catishun”.
5 Apostolcuna shina nijpimi, gulpi discipulocunaca de acuerdo carca. Chaimi paicunaca Esteban runaguta agllarca. Paica tucui shunguhuan crij y Taita Diospa espíritu santotapash chasquishca runagumi carca. Shinallata Felipeta, Prócoro shuti runaguta, Nicanor shuti runaguta, Timón shuti runaguta, Parmenas shuti runaguta y Nicolás shuti runagutapashmi agllarca. Nicolasca Antioquía llactamanda judío tucushca runagumi carca.
6 Chai jipami paicunataca apostolcunapaman aparca. Chaimi apostolcunaca Taita Diosta mañashca jipaca, chai runagucunapa uma jahuapi maquita churarca.
7 Chaimi, Taita Diospa shimita villachishpa catijpica, Jerusalén llactapi Jesuspa discipulocunaca ashtacatapacha mirashpa catinajurca. Ashtaca sacerdotecunapashmi Jesuspa discipulocuna tucunajurca.
8 Esteban runagutaca Taita Diosmi ayudajurca. Taita Diosmi podertapash paimanga curca. Chaimi Estebanga shuj shuj jatun milagrocunata chai llactapica rurajurca.
9 Shinapash, Libertos nishca grupomanda huaquin jaricuna, shinallata Cirene, Alejandría, Cilicia y Asia llactamanda huaquin jaricunami Estebanda chimbapurashpa rimangapaj rirca.
10 Shinapash Estebanga alipacha yachajushca shimicunahuanmi parlajurca. Paitaca Taita Diospa espíritu santomi ayudajurca. Chaimi chai runacunaca na chashnachu can nishpa Estebanda rimaitaca na ushanajurca.
11 Chaimi, huaquin runacunataca cashna nichun pacalla yachachinajurca: “Moisestapash, Taita Diostapash nalicachishpa o na ricunayachishpa rimajujtami paitaca uyashcanchi”.
12 Chashna nijpimi chai llactapi gentecunapash, llactapi autoridadta charijcunapash y Leyta yachachijcunapash Estebanhuan culirarca. Paicunaca cungashcapi Esteban runagupaman rishpami paitaca a la fuerza japishpa Sanedrinman aparca.
13 Chaimanga llullacunata nishpa Estebanda juchachichunmi, huaquin runacunata apashpa rirca. Chai runacunaca ninajurcami: “Cai runaca tucui tiempomi Taita Diospa templo huasipa contrapash y Leypa contrapash rimajun.
14 Paitaca Nazaret llactamanda Jesusmi cai templo huasitaca urmachinga nijujtami uyashcanchi. Shinallata, Jesusmi Moisés ñucanchiman saquishca costumbrecunatapash cambianga nijujtami paitaca uyashcanchi” ninajurcami.
15 Sanedrinbi tianajujcunaca, tucuillami Esteban runagupa ñavica shuj angelpashna cajta ricunajurca.
