Marcos 16:1-8
-
Jesusca causachi tucurcami (1-8)
16 Indi huashajushca jipaca sábado tutami carca. Chaimi María Magdalena, Santiagopa mama María y Salomepash mishquilla ashnajuj plantagucunata Jesuspa cuerpopi churagringapaj randirca.
2 Semanapa primer punlla* ña indi llujshishca jipami, chai huarmigucunaca Jesusta churashca bovedaman tutamandata rirca.
3 Paicunaca parlarinajurcami: “Bóveda jatun utujuman yaicunapi tapashca* rumitaca ¿pishi ladoman churashpa cunga?” nishpa.
4 Shinapash bovedaman yaicunata ricushpaca, tapashca jatun jatun rumita ña ladoman churashcatami ricurca.
5 Chai bóveda jatun utujuman yaicushpaca, ali ladopi shuj joven runagu tiajujtami ricurca. Chai joven runaguca largo yura ropata* churajushcami tiajurca. Paita ricushpami chai huarmigucunaca ninanda manllarirca.
6 Shinapash chai joven runaguca nircami: “Ama manllarichichu. Jatun racu caspipi* huañuchi tucushca, Nazaret llactamanda Jesusta mascanajujtaca alimi yachani. Paica ñami causachi tucushca, ñana caipi canllu. Ricupaichi, caipimi paitaca churashcarca.
7 Shinapash Jesuspa discipulocunaman y Pedromanga ‘Jesusca cangunata ñaupashpami Galilea llactaman rijun. Chaipimi pai nishcashna cangunahuan tuparinga’ nishpa villagripaichi” nirca.
8 Chaimi chai huarmigucunaca, bóveda jatun utujumanda llujshishpa calpashpa rirca. Paicunaca manllashpandi, chujchushpandimi rinajurca. Manllaimandami nipiman na imatapash villarca.*
Notacuna
^ Chai punllatami cunanbica domingo nin. Judiocunapaca domingomi semanapa primer punlla carca.
^ O “quilpashca”.
^ O “llachapata”.
^ Glosariopi “jatun racu caspi” shimita ricupangui.
^ Punda tiempo importante manuscritoscunapica Marcos libroca versículo 8pillami tucurin.
