Juyashca huauquipanicuna:

Más o menos dos mil seiscientos huatacuna huashamanga, profeta Ezequielca shuj muscuipishna ricushpami, Jehová Dios ñaupaman pushajuj shuj jatun carrota ricurca. Jehová Diospa carrota Ezequiel ricushpaca, chai carro ñapash cuyurijujtami ricurca. Maijan ladoman rina cashpapash, velocidadta na bajashpami ñapash cuyurin (Ezeq. 1:​4, 9, 12, 14, 16-27).

Muscuipishna Ezequiel ricushcamandaca ¿imatata yachajunchi? Jahua pachapi Jehovapa organización ñapash cuyurijujtami yachajunchi. Cutin cai Alpapi Jehovapa organizacionmandaca ¿imatata nita ushanchi? Caina huata imacunatalla rurashcata ricushpami, cai Alpapi paipa organizacionbash uchalla cuyurichun Jehová Dios ricuriajujta cuenta japinchi.

Estados Unidos llactapica, Betelpi sirvij ashtaca huauquicunami Brooklyn llactamanda, Warwick-Nueva York llactapi mushuj Betelman o shuj ladocunaman cosascunata yalichinajuimanda ashtacata ocupado cashca. Huaquingunataca Betelmanda llujchishpami, shuj ladocunapi sirvigrichun cachashca. Cutin shuj llactacunapica, Betelpi sirvij huauquicunami Betel huasicunata rurashpa, arreglashpa, shuj Betel huasita caishuj Betel huasihuan tandachijpi ayudashpa ocupado cashca, o shuj llactaman causangapaj rina tucushca. Quiquingunapash na shuj huasicunaman yalina tucushpapash, imagutallapash Jehovamanda rurashpami ocupado yalipashcanguichi.

Cuerpo Gobernantemanda huauquicunaca, mundo enteropi huauquicuna Jehovapa organizacionhuan igual cangapaj munaimanda ocupado yalinajujta ricushpami, ninanda cushijushpa animarin. Villachijcuna ashtahuan minishtirijuj pushtucunapi sirvingapaj ashtaca huauquipanicuna rishcatapash yachanchimi. Shujcunaca shuj shimita yachajushpa chai shimita parlaj gentecunamanmi villachi callarishca. Na cashpaca, imashina ashtahuan villachinatami yachajushca. Ashtacacunaca ashtahuan villachingapami imacunatapash rurashca. Shinallata, Jesusta ali catijcunaca rucullagucuna cashpa, ungüicunata charishpapash, causaiman apaj ñanda calpanshnami Jehovata sirvinata na saquishpa, Diablo llulla cashcata ricuchinajushca (1 Cor. 9:24).

Quiquinguna ninanda esforzarinajujta alicachishpa Jehová Dios ricujujtaca seguromi cana capanguichi (Heb. 6:10). Quiquingunaca Abrahanshna Sarashnami capanguichi. Abrahanga 70 huatacunata charishpapash, paicuna causajushca Ur llactata saquishpami, Canaán alpacunaman rirca. Shinami paica huañungacaman carpa huasigucunapi 100 huatacunata causarca. Paicunaca, Jehovapa munaita paicunapa causaipi pundapi churana na fácil cajpipash, ishcandillatami Jehová Diospa munaita pactachirca (Gén. 11:31; Hech. 7:​2, 3).

Ñucanchipash tapurishunchi, ¿Abrahansh­na Sarashnachu Jehovapa munaitara ñucanchi causaipi pactachingapaj munanchi? nishpa. Cai tu curimui punllacunapi causajushpapash, Taita Diosta cazushpa causajcunami Jesuspa mandashcata pactachinajun. Jesusca paipa catijcunataca cashna nishpami mandarca: “Ñucapaj yachajujcuna tucuchun, cai pachapi causanajuj tucuilla gentecunapajman rishpa, villana canguichi. Paicunataca Taitapaj, Churipaj, Diospaj jucha illaj Espiritupaj shutipimi bautizana canguichi” nishpa (Mat. 28:19).

“Rishpa, villana canguichi” nishpaca, ali villaigucunata villachishpa ocupado canamandami Jesusca parlajurca. ¡Jesusta catijcuna na shaijushpa, caina huata imacunatalla rurashcata ricushpami ninanda cushijunchi! Diospa Reinomanda ali villaigucunata tucui Alpapi villachichun, Jehová Dios ñaupaman pushashpa bendiciajushcataca cuenta japinallami can (Mar. 13:10).

Ashtaca gentecunami, Diospa Reinomanda ali villaigucunataca alicachishpa chasquin. Caina huataca, publicadorcuna ashtahuan mirashpami 8.340.847 tiarca. Shinallata, cada quillami más o menos 10.115.264 gentecunaman Bibliamanda yachachishca. Chaipimi ricunchi, Jehovapa carroca na shayarishpa ñapash cuyurijujta. Quiquingunapash na shaijushpami ocupado cashcanguichi. Shina rurashpa catipaichi. Gentecuna salvarichun villachina tiempoca ñallami tucuringa.

Huata 2017pa textoca cashnami nijun: “Jehovapi confiashpami alita rurana cangui” nishpa (Sal. 37:​3, NM). Chaipi nishcata cazushpa, alita rurashpaca Jehová Diospi confiashcatami ricuchinchi. Ñucanchillami canchi nishpaca nunca na yuyanachu canchi. Jesusca nircami: “Ricuichi, ñucami cai pacha tucuri punllacaman tucui punllacuna cangunahuan cani” nishpa (Mat. 28:20) ¿Nacha cai shimicunataca pactachinga?

Ama cungashunchichu, Jehová Diosc­a bendiciashpa catingami. Ashtacata cashpa o ashagutalla cashpapash ñucanchi ushashcaguta rurachun, tucui shunguahuan paita sirvichunmi munan. Shina rurashpaca Jehová Diostami ninanda cushichinchi (2 Cor. 9:​6, 7). Shinaca, ñucanchi juyashca Taita Diosta mañashpa, paipa Shimita yachajushpa, cushijushpa villachishpa catipashunchi. Shinami paipa ali amigocuna cashpa cati ushashun.

Diabloca, “punllacuna tucurijujta yachashpami” ñucanchicunata Jehová Diosmanda caruyachingapaj munan (Apoc. 12:12). Cai punllacunapica, ñucanchicuna Jehová Diosta na cazushpa paita sirvinata saquichunmi, Diabloca imatapash ruranga. Shinapash Jehová Diosmanda ñucanchi na caruyajpica, Diabloca nunca na paipa munaitaca pactachi ushangachu (Sal. 16:​8). Ama cungapaichichu, quiquingunataca ninandami juyapanchi. Shinallata, cai tucurimui punllacunapi Taita Diospa Reinota apoyashpa catinajushcamandaca ninandami agradicipanchi.

Quiquingunapa huauquicuna,

Testigo de Jehovacunapa Cuerpo Gobernante