1, 2. Jehová Diosca familiacuna ¿imashina causachunda munan?

 JEHOVÁ DIOSMI cusahuarmi causaitaca callarichirca. Bibliapica ninmi, Evata Jehová Dios rurashpami ‘jaripaman apamurca’ nishpa. Adanga cushijushpami nirca: “Paica ñuca tullumanda rurashca ñuca tullullatami. Ñuca aichamanda rurashca ñuca aichallatami” nishpa (Génesis 2:22, 23). Jehová Diosca cusahuarmicuna cushilla causachunmi munan.

² Shina cajpipash, ashtaca gentecunaca nunca na familia ucupi cushilla causashcachu. Shinapash Bibliapi ashtaca consejocunami familia ucupi cushilla, ali causachun ayudan (Lucas 11:28).

3, 4. a) Cusaca ¿imashinata huarmitaca tratana can? b) ¿Imamandata randimanda perdonarina can?

³ Bibliapica ninmi cusaca, huarmitaca juyaihuan, respetohuanmi tratana can nishpa (Efesios 5:25-29, liipangui). Cusaca siempremi huarmitaca ali tratashpa, cuidashpa, llaquishpa cushilla cachun ricuna can.

⁴ Shinapash, huarmi imapipash pandarijpica ¿imatata cusaca rurana can? Bibliapica ninmi: ‘Cusacunapash, cangunapaj huarmitaca juyanami canguichi. Paicunahuanga, na millaicuna canachu canguichi’ nishpa (Colosenses 3:19). Cusacuna, quiquingunapash pandarinlla cashcataca na cunganachu canguichi. Quiquingunata Jehová perdonachunga huarmi imagupi pandarijpipash perdonanami  canguichi (Mateo 6:12, 14, 15). Cusahuarmi ishcandimanda perdonarishpaca cushilla causaita ushanguichimi.

 5. Cusaca ¿imamandata paipa huarmitaca ali tratana can?

⁵ Jehová Diosca, cusa paipa huarmita ali tratachunmi munan. Cusaca, huarmigu imashina sintirijta, imata minishtijtami ricuriana can. Chaitaca pactachinapachami can. Cusa paipa huarmita nali tratajpica cusapa mañashcataca Jehová Diosca na uyangachu (1 Pedro 3:7). Jehová Diosca paita tucui shunguhuan juyajcunatami jari o huarmi cajpipash igual alicachin.

 6. Cusahuarmi shujlla shina cashcataca ¿imashinata ricuchin?

⁶ Jesusca nircami, cusahuarmicunaca ñana ‘ishcai catinllu, shujllami’ tigran nishpa (Mateo 19:6). Chaimandami, cusahuarmicunaca juyaimanda cadano huarmita, cadano jaritaca na munashpa ricujunachu can (Proverbios 5:15-21; Hebreos 13:4). Shinallata, cusahuarmi juyarishpa igual canataca na mitsarijunachu can (1 Corintios 7:3-5). Cusaca caitami yarina can, “pipash paipaj cuerpotallataca na millanayachinllu. Ashtahuangarin aliguta micushpa alichirinatami yachan.” Chaimandami, cusaca tucuimanda yalica paipa huarmita juyana can. Huarmica paipa cusa aliguta, juyaihuan tratachunmi munan (Efesios 5:29).

 7. ¿Imamandata familiaca pipash ñaupaman pushachun minishtin?

⁷ Cada familiami ali causangapaca, pipash ñaupaman pushachun minishtin. 1 Corintios 11:3​pica ninmi: “Cristoca, tucui jaricunatami umashna mandajun. Cusapash, paipaj huarmitaca, umashnami mandajun. Taita Diospash, Cristotaca umashnami mandajun” nishpa.

 8. Huarmica ¿imashinata cusata respetashcata ricuchina can?

⁸ Cusapash imapipash pandarinllami. Shinapash, cusa  imatapash dicidijpi huarmi aliguman apoyajpica familia ucupica tucuicunami cushilla sintiringa (1 Pedro 3:1-6). Bibliapica ninmi: “Huarmipash, cusataca alicachishpa” respetachun nishpa (Efesios 5:33). Shinapash, ¿cusa na testigo de Jehová cajpica? Chaipash huarmica tucui shunguhuanmi respetana can. Bibliapica ninbashmi: “Huarmicunapash, cangunapaj cusataca cazunami canguichi. Shina cazujujta ricushpami, Diospaj Shimita na crij cusapash, canguna na villajpillata crij tucunga. Canguna aliguta causashpa cazujujta ricushpami, cusapash cringa” nishpa (1 Pedro 3:1, 2). Huarmi, paipa cusata cazushpa causajpica, cusapash paipa huarmi crishcata intindishpa respetachunmi ayudanga.

 9. a) Cusapa decisionda huarmi na apoyashpaca ¿imatata rurana can? b) Tito 2:4, 5​pica ¿ima consejotata huarmicunamanga cun?

⁹ Cusapa decisionda huarmi na apoyashpaca ¿imatata rurana can? Huarmica imata pensajushcata, respetohuan aliguman cusahuan parlanallami can. Sarapa ejemplota ricushun. Sara huarmiguca imata pensashcatami Abrahanmanga nirca. Abrahanga paipa huarmi ima nishcataca na gushtarcachu.  Shinapash Jehová Diosca nircami: ‘Sara nishcataca rurailla’ nishpa (Génesis 21:9-12). Huaquinbillami Jehová Diosta sirvij cusaca Bibliapi nishcata na pactachishpa imatapash decidin, shinapash huarmica paipa cusata apoyanami can (Hechos 5:29; Efesios 5:24). Shinallata, huarmica huasi ucupi familiata cuidashpami cusata ayudan (Tito 2:4, 5, liipangui). Chaimi paipa cusapash, huahuacunapash respetanga, ashtahuan juyanga (Proverbios 31:10, 28).

10. Partirinamanda, divorciarinamandaca ¿imatata Bibliaca nin?

¹⁰ Huaquinbica cusahuarmicunaca imagumandapash jaicatami partiringapaj, divorciaringapaj munan. Bibliapica ninmi: “Huarmica, cusataca na jichunachu” can. “Cusapash huarmitaca napacha jichunachu” can nishpa (1 Corintios 7:10, 11). Shinapash cusahuarmi nali causashpa paicunapa causai peligropi cajpi, mantinita ushashpapash na mantinijpi, Jehovata adorachun na saquijpica partirinata o na partirinataca alimi ricuna can. Shinapash ¿divorciarita usharinllu? Bibliapica ninmi, cusahuarmimanda maijanbash cadano jarihuan, cadano huarmihuan huainayana juchapi urmajpillami divorciarita ushan nishpa (Mateo 19:9).

11. Huahuacunaca ¿imatata ashtahuan minishtin?

¹¹ Taitamamacuna, quiquingunapa huahuacunahuan imagutapash rurangapaj o pugllangapaj tiempota llujchipaichi. Shinapash tucuimanda yalica Jehovamanda yachachichunmi huahuacunaca minishtin (Deuteronomio 6:4-9).

12. Huahuacunata cuidangapaca ¿imatata taitacunaca rurana can?

¹² Diablo mandajushcamandaca cai mundoca ashtahuan ashtahuanmi huaglishpa catijun. Chaimandami huaquin nali gentecunaca huahuacunata llaquichin, violan. Chaicunamanda huahuacunahuan parlanataca huaquin taitamamacunaca pinganayachinmi. Shinapash nali gentecunamanda,  huahuacunata huaglichishpa purijcunamanda cuidarichunmi huahuacunataca yachachina can. Taitamamacunami huahuacunataca cuidana canguichi. a (1 Pedro 5:8.)

13. Taitamamacunaca ¿imashinata huahuacunataca yachachina can?

¹³ Taitamamacunami huahuacuna ali portarichun yachachina responsabilidadta charin. ¿Imashinata huahuacunataca yachachina can? Huahuacunaca cutin cutin yachachichunmi minishtin. Shinapash imapipash pandarijpi astina tucujpica maipashcachunga na astinachu can (Jeremías 30:11). Taitamamacunaca culira cashca horasca na  maipash cachun huahuacunataca imacunatapash ninachu can. Shina rurashpaca “espadahuan chugrichinshnami” llaquichinga (Proverbios 12:18). Imamanda cazuna cashcatami paicunaman intindichina cangui (Efesios 6:4, NM; Hebreos 12:9-11. Página 223​pi nota 30​ta ricupangui).

14, 15. ¿Imamandata huahuacunaca taitamamacunata cazuna can?

¹⁴ Na fácil cajpipash Jesusca siempremi paipa Taitata cazurca (Lucas 22:42; Juan 8:28, 29). Jehová Diosca, huahuacunapash taitamamacunata shinallata cazuchunmi munan (Efesios 6:1-3).

¹⁵ Huahuacuna, taitamamacunata cazuna na fácil cajpipash yaripaichi, cazushpaca Jehovata, taitamamatapashmi cushichinguichi. b (Proverbios 1:8; 6:20; 23:22-25.)

16. a) Diabloca ¿imashinata jovengunata pandachingapaj munan? b) ¿Imamandata Jehovata ali sirvijcunahuan llevarina cangui?

¹⁶ Diabloca amigocunata, shuj jovengunata utilizashpami quiquinda juchapi urmachingapaj munan. Paica yachanmi amigocuna imatapash rurai nijpi aguantanaca na fácil cashcata. Shuj ejemplota ricushun, Jacobpa ushi Dinaca Jehovata na sirvij gentecunahuanmi llevari callarirca. Chaimandami paipash, paipa familiapash ashtaca llaquicunapi urmarca (Génesis 34:1, 2). Jehovata na sirvij amigocunaca, paicuna shina Jehová millanayachishca cosascunata rurachunmi munan. Chaicunata ruranaca quiquinda, quiquinba familiata, Diostapash ninandami llaquichinga (Proverbios 17:21, 25). Chaimandami, Jehovata tucui shunguhuan sirvij amigocunahuanlla llevarina cangui (1 Corintios 15:33).

17. Familia ucupica ¿imatata cada uno rurana can?

¹⁷ Familia ucupi cada uno Diospa mandashcacunata cazushpaca, problemacunataca na yapa charishunllu. Chaimandami cusaca paipa huarmigutaca juyaihuan tratana can. Huarmi paipa cusata respetashpa, cazushpaca Proverbios 31:10-31​pi nishca huarmigushnami canga. Shinallata taitamamacuna, huahuacunaman Jehová Diosmanda yachachipaichi (Proverbios 22:6). 1 Timoteo 3:4, 5; 5:8​pica ninmi: Taitaca familiata “aliguta mandaj cachun” nishpa. Huahuacunatapash ninmi, cangunapa taitamamataca cazunami canguichi nishpa (Colosenses 3:20). Yaripaichi familia ucupi maijanbash pandarishpaca humilde caimanda cada uno perdonahuai ninallami can. Jehová Diosca Bibliapimi familia ucupi tucuicuna imata ruranata yachachin.