1, 2. ¿Pita ali causaita caranga?

 YUYAPAI quiquin ali purijujpi yana yana fuyu jundashpa, rayocuna manllanaita uyarishpa jaicata tamiai callarishcanman. Chai tamiamanda pacajuna pushtuta uchalla tarishpaca ¿nachu tranquilo sintiringuiman?

² Cunanbica nali punllacunapimi causanajunchi, cai mundoca ashtahuanmi huaglishpa catijun. Chaicunata ricushpaca cashna chari tapuringui, ali causaitaca ¿maipishi tarisha? nishpa. Salmo librota escribijca nircami, Jehová Diostaca cashnami nijusha: “Ñuca shuyanami cangui, ñuca shinlli jatun huasishnami cangui. Ñuca Taita Dioslla, candallami yariajusha” nishpa (Salmo 91:2). Shinaca, ñucanchicuna ima problemacunata charijpipash Jehová Diosca ayudangami. Shamuj punllacunapicarin shuj ali causaitami caranga.

 3. Jehová Dios ñucanchita cuidachunga ¿imatata rurana capanchi?

³ Jehová Diosca ¿imashinata ñucanchitaca cuidanga? Jehová Diosca imapash problemata ñucanchi charijpica aguantashpa, ñaupaman catichunmi ayudanga. Shinallata, ñucanchita llaquichijcunata yali poderta charimandami cuidaita ushan. Cunanbi ima llaquicuna japijpipash, shamuj punllacunapi Jehová Dios chai llaquicunata tucuchinatami tucui shunguhuan confiana canchi. Bibliapica ninmi: “Taita Diospaj juyaitaca, na cunganachu canguichi” nishpa (Judas 21). Nali punllacunapi causajuimanda Jehová Dios ayudachunga paimanda na caruyanachu canchi. Jehovamanda ama caruyangapaca ¿imatata rurana canchi?

4, 5. Jehová Diosca ¿imashinata juyashcata ricuchishca?

⁴ Jehovamanda ama caruyangapaca, pai ñucanchita juyashcataca na cunganachu canchi. Jehová Dios imatalla ñucanchicunamanda rurashcatapash yarinami canchi. Ñucanchi cushilla causachunga shuj juyailla Alpata, micunata, plantacunata, animalcunata, yacutapashmi cushca. Shinallata Bibliapimi Diospa shuti maijan cajta, Dios imashina cajtapash villajun. Bibliapica yachachinbashmi, ñucanchita juyaimanda Jehová Dios paipa Churita cai Alpapi sufrishpa huañuchun cachamushcata (Juan 3:16). Jesús huañushcamandami shamuj punllacunapi juyailla ali causaita charina esperanzata charinchi.

⁵ Shinallata Jehová Diosca jahua cielopimi paipa Reinota churashca. Chai Reinomi tucui llaquicunata tucuchishpa cai Alpata shuj juyailla paraisoman tigrachinga. Chaipica cushilla, tranquilo para siempremi causashun (Salmo 37:29). Cunanbillata ali causachun yachachishpami Jehová Diosca ñucanchita juyashcata ricuchishca. Shinallata Diosca paita mañachunmi munan. Ñucanchi mañashcataca siempremi uyan. Imashinami ricunchi, Jehová Diosca tucuicunatami juyashcata ricuchishca.

 6. Jehová Dios juyashcamandaca ¿imatata rurana canchi?

⁶ Jehová juyashcamandaca ¿imatata rurana cangui? Jehová Dios quiquinmanda imacunatalla rurashcataca agradicinami cangui. Shinapash, cunanbi gentecunaca agradicinataca na yachanllu. Jesús cai Alpapi cajpipash shinallatami carca. Chai punllacunapica Jesusca 10 jaricuna lepra ungüihuan cajpimi jambirca. Shinapash, paicunamandaca shujllami Jesustaca agradicingapaj tigrarca (Lucas 17:12-17). Ñucanchica, Jesusta pagui ningapaj tigrashca runagushnami cangapaj munanchi. Jehovataca siempremi agradicina canchi.

 7. Jehová Diostaca ¿imashinata juyana capanchi?

 ⁷ Jehovata juyashcataca ricuchinapachami canchi. Jesusca paipa catijcunataca nircami, Jehová Diostaca tucui shunguhuan, tucui almahuan, tucui yuyaihuanmi juyana canguichi nishpa (Mateo 22:37, liipangui). Chaica ¿imatata ningapaj munan?

8, 9. Jehová Diosta juyashcataca ¿imashinata ricuchina capanchi?

⁸ ¿Shimillachu Jehová Diosta juyanimi nina canchi? Na. Paita tucui shunguhuan, tucui almahuan, tucui yuyaihuan juyashpaca ñucanchi rurashcacunahuanmi juyashcata ricuchishun (Mateo 7:16-20). Bibliapica yachachinmi, Diosta juyashpaca paipa mandashcacunata cazushunmi nishpa. Diospa mandashcacunata cazunaca ¿shinllichu can? Na. Jehová Diospa ‘mandashca shimicunaca, pactachi ushanallami’ can (1 Juan 5:3, liipangui).

⁹ Jehovata cazushpaca cushilla, ali causaitami charishun (Isaías 48:17, 18). Shinapash Jehovamanda ama caruyangapaj imata ruranata yachajushun.

10. ¿Imamandata Jehovamanda yachajushpa catina capangui?

¹⁰ Bibliata yachajushpami asha asha Jehová Diosta rijsishpa paipa amigo tucushcangui. Jehovahuan ali amigo canaca, nina cuendami can. Nina ama huañuchunga yamdatami catichiriana cangui. Shinallatami, Jehová Dioshuan ali amigo cashpa catingapaca, paimanda ashtahuan yachajushpa catina cangui (Proverbios 2:1-5).

11. Bibliamanda yachajushpa catijpica ¿imata pasanga?

¹¹ Bibliamanda ashtahuan yachajushpa catijpica quiquinba shungumanmi chayanga. Jesusca, profeciacuna imashina pactarinatami paipa ishcai catijcunaman intindichijurca. Shina intindichijpimi, Jesusta catijcunaca nirca: “¿Nachu Dios escribichishca Shimiguta ñucanchiman  villashpandi shamujushpaca ñucanchi shungupi aligutapacha yarijta rimarca?” nishpa (Lucas 24:32).

12, 13. a) Jehovahuan ña ali amigo cashpaca ¿imatata rurana capangui? b) Jehovata juyashpa catingapaca ¿imatata rurana capangui?

¹² Jesuspa catijcuna Diospa Shimita yachajushpa, ali intindijpimi chai yachajushcacunaca paicunapa shunguman chayarca. Quiquinbash Bibliamanda yachajui callarishpaca shinallatachari sintirircangui. Shinami Jehovata ali rijsishpa, juyai callarishcangui. Chai juyai tucurichunga na saquinachu cangui (Mateo 24:12).

¹³ Jehovahuan ña ali amigo cashpaca, shina catingapami esforzarina cangui. Jehová Diosmanda, Jesusmanda ashtahuan yachajushpa, yachajushcata quiquinba causaipi pactachinatami ali pensarina cangui (Juan 17:3). Bibliata liijushpa, yachajujushpaca cashna tapuringui ¿imatata Jehová Diosmandaca yachajuni? ¿Imamandata tucui  shunguhuan, tucui almahuan juyana cani? nishpa (1 Timoteo 4:15).

14. Jehovata juyashpa catingapaca ¿imatata rurana capanchi?

¹⁴ Shuj amigohuan siempre imatapash paihuan parlashpaca ashtahuan ali amigomi tucungui. Shinallata Jehovata siempre mañashpaca paimanda juyaica ashtahuanmi miranga (1 Tesalonicenses 5:17, liipangui). Jehovata mañai ushashcamandaca ninandami cushijunchi. Chaimandami tucui shunguhuan Jehová Dioshuan parlanalla canchi (Salmo 62:8). Mañajushpaca yangata imacunatapash nishpa, chaitallata chaitallataca na nijunachu canchi. Imamanda mañajushpapash, aliguta respetohuanmi mañana canchi. Bibliamanda yachajushpa, tucui shunguhuan mañashpaca Jehová Diostaca ashtahuanmi juyashun.

15, 16. Jehovamanda villachinataca ¿imashinata ricuna capanchi?

¹⁵ Jehovamanda ama caruyangapaca ñucanchi imata crishcatami shujcunaman villachina canchi. Jehovamanda shujcunaman villachinaca shuj jatun bendicionmi can (Lucas 1:74). Jesusca paita ali catijcunatami villachichun mandarca. Diospa Reinomanda ali villaicunataca tucuicunamanmi villachina canchi. Quiquinga ¿ñachu villachijungui? (Mateo 24:14; 28:19, 20.)

¹⁶ Apóstol Pabloca villachinataca ninandami alicachin carca. Chaimandami villachinaca ‘ninan valishcami’ can nirca (2 Corintios 4:7). Jehová Diosmanda, pai imatalla ruranamanda shujcunaman villachishpaca alita rurashpami Jehová Diosta sirvijungui. Chaitaca paica ninandami alicachin (Hebreos 6:10). Villachishpaca quiquinbash, villachishcata uyajcunapashmi beneficiarin.  Shinami ashtahuan Jehová Diosman quimirishpa, para siempre causaitapash chasqui ushangui (1 Corintios 15:58, liipangui). ¿Imata ruranata ashtahuan yali ali can?

17. ¿Imamandata uchalla villachina capanchi?

¹⁷ Uchallami villachina canchi. ‘Diospaj Shimita villachun mingashcataca uyanayachijpi, na uyanayachijpipash villajunallami’ canchi (2 Timoteo 4:2). Gentecunaca Diospa Reinomanda villachichunmi minishtin. Bibliapica ninmi: “Mandaj Dios shamuna jatun punllami ña chayamujun, ñallapachami chayamunga”. Tucuri punllaca “shamungapachami, na unayangachu” nishpa (Sofonías 1:14; Habacuc 2:3). Jehová Diosca ñallami Diablopa nali ruraicunata tucuchinga. Nara tucuchijpillatami gentecunaca ima pasanata yachana can. Shinami paicunapash Jehovapa lado tucushpa paita sirvinata agllanga.

18. ¿Imamandata Jehovata sirvijcunahuan tandanajuna capanchi?

¹⁸ Jehová Diosca paita sirvijcunahuan tandanajushpa adorachunmi munan. Bibliapica ninmi: ‘Caishujhuan chaishujhuan ashtahuan juyarishpa, imata cashpapash alita ruranata yarichirishunchi. Tandanajunataca na saquinachu canchi. Shujcunaca tandanajunata saquinllami. Jesús tigramuna punlla ña chayamujujta yachashpacarin, ashtahuanmi yarichirina canchi’ nishpa (Hebreos 10:24, 25). Shinaca tucui tandanajuicunapi cangapami esforzarina canchi. Chai tandanajuicunami caishujhuan chaishujhuan animarishpa, shinlliyashpa catichun ayudanga.

19. Huauquipanicunata juyachunga ¿imata ayudanga?

¹⁹ Tandanajuicunaman rishpaca ali amigocunatami taringui. Paicunami Jehová Diosta ali adorachun ayudanga. Tucui ladocunamanda huauquipanicunatami rijsingui. Paicunapash quiquinshnallata Jehovata adorangapami chaipi can. Shinapash juchayucuna caimandaca imapipash pandaringami. Chaimandami huauquipanicuna  imapipash pandarijpica perdonangapaj listo cana cangui (Colosenses 3:13, liipangui). Huauquipanicuna imagutapash ali rurashcatami ricuna cangui. Shinami paicunata juyangui, Jehová Diosmanbash ashtahuan quimiringui.

20, 21. Ali causaica ¿imata can?

²⁰ Jehová Diosca paita sirvijcuna ali causaita charichunmi munan. Bibliaca yachachinmi, shamuj punllacunapica ashtahuan ali causaitami charishun nishpa.

²¹ Cai Alpa shuj paraíso tucujpica ñana 70, 80 huatacunatalla causashunllu. Chaipica ima ungüipash illaj, tranquilo, para siempre causashpami cushijushun. Shina “causaita causanatami” Bibliapica ali causana nin. Jehová Diosca ñucanchicunaman shina ali causaita cungapami munan. Shinapash ñucanchicunami ‘causaita causanata japingapaca’ esforzarina canchi (1 Timoteo 6:12, 19).

22. a) ‘Causaita causanata’ chasquingapaca ¿imatata rurana capanchi? b) ¿Imashinata para siempre causaitaca chari ushanchi?

²² ‘Causaita causanata’ chasquingapaca ¿imatata rurana canchi? ‘Imatapash aliguta rurashpami’ causana canchi (1 Timoteo 6:18). Chaipaca, Bibliapi imata yachajushcatami pactachina canchi. Shinapash ñucanchillata ali, para siempre causaitaca na chari ushanchichu. Jehová Diosca paita ali sirvijcunata ‘ninanda juyaimandami’ shina ali causaita cunga (Romanos 5:15). Jehová Diosca, paita sirvijcuna ali causaita charichunmi munan.

23. ¿Imamandata cunanbillata ali decisiongunata agllana cangui?

²³ Tapuripai ¿Taita Dios mandashca shinachu paitaca adorajuni? nishpa. Imapipash cambiana cashcata cuenta japishpaca uchallami cambiana canchi. Tucuipi cazungapaj ayudahuai nishpa mañajpica Jehovallatami ñucanchitaca ayudanga. Diablopa nali ruraicunapa tucurimui punllacunapica Jehová Diosmi paita ali sirvijcunataca  cuidanga. Chai jipaca Jehovapa munai pactarijpimi, shuj juyailla paraíso Alpagupi para siempre causashun. Cunanbillata ali decisiongunata agllashpaca, para siempre causaita chasquishpami cushilla causashun.