Babel llacta ladollapica Ur shuti llactami tiarca. Chai llactapi causajcunaca yanga dioscunatami adoran carca. Shinapash shuj jarica Jehová Diostami adoran carca. Paipa shutica Abrahanmi can.

Jehová Diosca Abrahanmanga nircami: ‘Canba llactata, canba familiacunatapash, saquishpa llujshi. Ñucami, can maipi causanatapash ricuchisha’ nishpa. Jipamanga nircami: ‘Canba miraimandaca, shuj jatun llactatami rurasha. Canmandami, cai pachapi causanajuj tucuilla familiacunaca bendiciai tucunga’ nishpa.

Abrahanga Jehová Dios maiman cachagrijujta na yachashpapash Jehovapimi confiarca. Abrahán, Sara, Abrahanba taita Taré, Abrahanba sobrino Lotpashmi Jehová Diostaca tucuipi cazurca. Paicunaca paicunapa cosascunata japishpami chai llactamanda ri callarirca.

 Jehová Dios carasha nishca llactaman paipa familiandi chayashpaca Abrahanga 75 huatacunatami charirca. Chai llactaca Canaán shutimi carca. Chai llactapimi Jehová Diosca cashna nirca: “Cambaj miraicunamanmi, cai llactataca carasha” nishpa. Shinapash Abrahanbash, Sarapash ña mayorllacunami carca. Huahuacunatapash na charircachu. Shinaca Jehová Diosca ¿imashinashi paipa nishcataca pactachigrijurca?