Asiria llactaca Israelmanda jatun 10 llactacunataca ñami mishashca carca. Cunanga Asiria llactata jatun mandaj Senaqueribca Judamanda ishcai jatun llactahuanmi quedangapaj munarca. Chaimi Judá llactamanda shuj shuj llactacunata mishashpa shamujurca. Ashtahuanbachaca Jerusalén llactatami mishangapaj munajurca. Shinapash Jerusalén llactata Jehová Dios cuidajushcataca Senaqueribca na yacharcachu.

Jerusalén llactata ama llaquichichunmi, Judá llactamanda rey Ezequiasca ashtaca valishca cosascunata Senaqueribman cacharca. Senaqueribca chai cosascunata chasquishpapash, paipa soldadocunataca Jerusalenda llaquichichunmi cacharca. Asirio soldadocuna asha asha quimirinajujpimi Jerusalenbi causaj gentecunaca ninanda manllanajurca. Chaita ricushpami Ezequiasca nirca: “Imatapash na manllanachu canguichi. Asiria llactata jatun mandajtapash, paihuan shamuj ashtaca soldadocunatapash na manllanachu canguichi”. “Ñucanchita Mandaj Taita Diosmi ñucanchihuan” can nishpa.

Rey Senaqueribca, Rabsaqué runatami Jerusalenman cacharca. Chaiman chayashpaca burlarishpami cashna caparijurca: “Ezequiastaca, na uyanachu canguichi. Paica umashpallami, Mandaj Diosmi quishpichinga nijun”. ‘Maijan diospash, ñuca maquimanda cacharichitaca na ushangachu’ nishpa.

Ezequiasca Jehová Diostaca imatata rurasha nishpami tapurca. Chaimi Jehová Diosca nirca, Rabsaqué nishcataca ama manllaichu, Senaqueribca Jerusalendaca na llaquichingachu nishpa. Chai jipami Senaqueribpa cartacunata Ezequiasca chasquirca. Chaipica cashnami nijurca, cangunataca Jehová Diosca na salvaita ushangachu, ama yangaca macanajuichichu nishpa. Chaimandami Ezequiasca Jehovata cashna mañarca: ‘Chai jatun mandajpa maquimanda ñucanchita quishpichiyari nipanimi. Can Taita Diospacha cajta yachachun chashna rurapayari’ nishpa. Chaimi Jehová Diosca nirca: ‘Cai puebloman yaicumuitaca na ushangachu. Ñucami cai pueblotaca ayudashpa quishpichisha’ nishpa.

Senaqueribca Jerusalén llactata mishanataca seguromi carca. Shinapash shuj tutaca Jehová Diosca Asirio soldadocuna Jerusalén llactamanda canllapi cajpimi shuj angelta cacharca. Chai angelmi 185 mil asirio  soldadocunata huañuchirca. Senaqueribca paipa alipacha soldadocuna huañushca cajpimi, imatapash na rurai ushashpa mishai tucushpa huasiman tigrarca. Shinami Jehová Diosca Ezequiasta, Jerusalén llactatapash cuidasha nishcata pactachirca. ¿Quiquin Jerusalenbi cashpaca Jehovapi confianguimanlla carca?