Jezabel huarmica Atalía shuti ushitami charirca. Paipash paipa mamashnallatami millai nali huarmi carca. Atalía huarmica Judá llactata mandaj reyhuanmi cazararca. Ataliapa cusa huañujpica, paipa churimi mandai callarirca. Cutin paipa churi huañujpica Ataliami Judá llactataca mandai callarirca. Paipa randi pipash ama mandachunmi, ‘jatun mandajpa miraicunataca, tucuillata huañuchingapaj’ munarca. Chaimandami paipa nietocunatallata huañuchirca. Chaimi chai huarmitaca tucuicuna manllan carca.

Sumo sacerdote Jehoiadá, paipa huarmi Jehosebapash, Atalía huarmi nalita rurajujtaca alimi yacharca. Shinapash paicunapa causaita peligropi churashpami Ataliapa nietopuramanda Jehoás shuti huahuaguta pacashpa, ‘Mandaj Diospa huasipi’ viñachirca.

Jehoás 7 huatacunata charijpica Jehoiadá runaca ‘cuidaj soldadocunata mandajcunata’, Levitacunata tandachishpami cashna nirca: Templo huasipi tucuilla ‘pungucunata pipash ama yaicuchunmi cuidana canguichi’ nishpa. Chai jipami Jehoiadaca Jehoás Judá llactapa rey tucuchun coronata churachirca. Chaimi gentecunaca “jatun mandaj, causajupailla” nishpa cushijushpa caparinajurca.

‘Gentecuna ninanda caparinajujta uyashpami Atalía huarmica, Mandaj Diospa huasiman rirca’. Chaipi jatun mandajta ricushpaca cashnami caparirca: “Umachihuashcamari, umachihuashcamari” nishpa. Chaipimi ‘cuidaj soldadocunata mandajcunaca’ chai nali, millai Atalía huarmitaca huañuchingapaj aparca. Chai huarmica tucui llactapa shuj nali ejemplomi carca. Chai jipaca ¿imashi pasagrijurca?

Chai jipaca Jehoiadami gentecunata Jehová Dioshuan shuj pactota rurachun ayudarca. Chai pactota rurashpami paicunaca Jehovatallami adorashun nirca. Shinami Jehoiadaca Baalpa templo huasita, yanga rurashca dioscunatapash tucuchichun mandarca. Shinallata sacerdotecunata, levitacunatapashmi templopi ayudachun churarca.  Chaimi gentecunaca templo huasipi Jehovata cutin ali adoragrinajurca. Ashtahuanbash templo huasiman ama pipash nalicunata rurashpa mapayashcacuna yaicuchunmi, cuidaj soldadocunata churarca. Jipamanga Jehoiadapash, soldadocunata mandajcunapashmi Jehoastaca jatun mandajpa huasiman apashpa, jatun mandaj tiarina pushtupi tiachirca. Chaimi Judá llactamanda gentecunaca ninanda cushijurca. Shinami Atalía huarmimanda, Baal diosta adoranamandapash libre quedashpa Jehovatalla adoragrinajurca. ¿Jehoiadaca ciertopachachu na manllan carca? ¿Pai na manllaimanda ashtaca gentecunata ayudashcataca cuenta japinguichu?