1-3. a) Ashtacacunaca ¿imatata paicunapa trabajomandaca yuyan? b) ¿Ima tapuicunatata cai capitulopica yachajupashun?

 MUNDO enteropi gentecunami paicunallata mantiniringapaj, o familiata mantiningapaj ashtacata trabajan. Ashtacacunaca paicunapa trabajotaca na gushtanllu. Huaquingunacarin, na rinayajpitami trabajomanga rin. Quiquinbash shina cashpaca, quiquinba trabajota alicachingapaca ¿imatata rurai ushapangui?

² Bibliapica ninmi: ‘‘Tucui runacuna imatalla rurashcamanda [o trabajashcamandaca] micushpa, ufiashpa, cushijushpa causachun Taita Dios cushcatami yacharcani’’ nishpa (Eclesiastés 3:13). Ñucanchicuna trabajana munaita charichunmi Jehová Diosca rurarca. Ñucanchi trabajota alicachichunmi munan (Eclesiastés 2:24; 5:18, liipangui).

³ Shinaca, ñucanchi trabajota alicachingapaca ¿imatata rurai ushapanchi? ¿Imashina trabajocunapita na trabajana capanchi? ¿Imashinata trabajashpapash, Jehovata ali adorashpa catita ushapanchi? ¿Imata ñucanchipaca ashtahuan importante can?

4, 5. ¿Imatata Jehová Diosca trabajomandaca yuyan?

⁴ Jehová Diosca ninandami trabajanataca alicachin.  Génesis 1:1​pica ninmi: “Callaripica, Taita Diosmi jahua pachatapash, cai pachatapash rurarca” nishpa. Cai Alpatapash, cai Alpapi tucui ima tiashcacunatapash rurashca jipaca, cushijushpami nirca: ‘Cai rurashcacunaca aligupachami’ can nishpa (Génesis 1:31; Salmo 104:31).

⁵ Jehová Diosca siempremi trabajan. Jesusca nircami: “Ñuca Taitaca, cunangaman imagutapash rurajunllami” nishpa (Juan 5:17). Jehová Dios imatalla rurajujta na ali yachashpapash, Jesushuan jahua cielopi mandachun ungidocunata agllajujtaca yachapanchimi (2 Corintios 5:17). Jehová Diosca gentecunatapashmi ñaupaman pushajun, cuidajun. Chaimandami mundo enteropi tauca millón gentecunaca, ali villaicunata uyaimanda Jehovata rijsishpa, shuj juyailla paraíso Alpagupi para siempre causanata shuyanajun (Juan 6:44; Romanos 6:23).

6, 7. ¿Imashinata yachanchi, Jesusca ali trabajador cajta?

⁶ Jesuspash trabajanataca ninandami alicachin. Cai Alpaman nara shamushpaca, cielopipash, cai Alpapipash tucuita rurashpami Taita Diostaca ayudajurca (Proverbios 8:22-31; Colosenses 1:15-17). Cai Alpapi cashpapashmi Jesusca shinllita trabajashpa catirca. Joven cashpaca, carpinteromi carca. Mesacunata, bancacunata, huasicunatapashmi rurashcanga. Ali trabajador cajpimi Jesustaca “carpintero” nishpa rijsin carca (Marcos 6:3).

⁷ Shinapash ashtahuanbachaca, ali villaicunatami villachirca, paipa Taitamandapash yachachirca. Villachingapaj, yachachingapaca quimsa huata chaupitallami charirca. Paica tutamandapacha amsayangacamanmi villachin, yachachin carca (Lucas 21:37, 38; Juan 3:2). Caru caru pushtucunaman polvolla  ñangunata rishpami, tucuicunaman villachingapaj esforzarirca (Lucas 8:1).

8, 9. ¿Imamandata Jesusca, paiman imata mingashcataca alicachishpa rurarca?

⁸ Huaquin punllacunaca ocupadopacha caimandami, micungapaj tiempotapash na charirca. Jesuspaca, Jehovapa munaita ruranami, micunagushna fuerzata cun carca (Juan 4:31-38). Tucuicunaman paipa Taitamanda parlangapaj esforzarimandami Jehová Diostaca nirca: ‘Can imata mingashcataca, ñami pactachircani. Shinami, cai pachapica punchapambagumi cangui nijuni’ nishpa (Juan 17:4).

⁹ Imashinami ricupanchi, Jehovapash, Jesuspash ashtacatami trabajan. Trabajanatapash alicachinmi. Ñucanchicunapash Jehovapa, Jesuspa ejemplotami catingapaj munapanchi (1 Pedro 2:21; Efesios 5:1). Chaimandami imata rurashpapash, ali rurangapaj esforzaripanchi.

10, 11. Ñucanchi trabajota alicachishpa ricungapaca ¿imatata rurana capanchi?

¹⁰ Jehovata sirvijcunaca huarmipa, huahuacunapa o ñucanchipa minishtirishca cosasgucunata randingapami shinllita trabajanchi. Cushijushpa trabajangapaj munajpipash, huaquinbica shinllimi can. Shinaca, ñucanchi trabajota na gushtashpaca ¿imatata rurai ushapanchi?

¹¹ Trabajana imapa ali cajtami yaipi charina capanchi. Imapi, mashnata trabajanataca, tal vez na agllaita ushashunllu. Shinapash, Jehová Diospa munaita  pactachijushcata intindishpami, ali sintirita ushapanchi. Jehová Diosca cusa paipa huarmita, huahuacunata aliguta cuidachunmi munan. Bibliapica ninmi, paipa huarmita, huahuacunata na mantinij cusacunaca Taita Diosta na rijsij gentecunamandapash “ashtahuan yali nalicunami” can nishpa (1 Timoteo 5:8). Cusacunaca, paipa familiata aliguta mantiningapami esforzarina can. Quiquinba trabajota na alicachishpapash, Jehová Diospa munaita pactachijushcataca siempre yaripangui.

12. Honrado, ali trabajadorcuna canaca ¿imamandata ali can?

¹² Honrado, ali trabajadorcuna cashpaca, trabajota alicachita ushashunmi (Proverbios 12:24; 22:29). Trabajachijujpash ñucanchipi confiangami. Honrado trabajadorcunataca, culquitapash, imapash cosasgucunata na shuhuashcamanda, trabajana horascunapi na shuj cosascunata rurajushcamandami alicachin (Efesios 4:28). Ashtahuanbachaca, honrado, ali trabajador cajtaca Jehová Diosmi ricujun. Pai alicachishpa ricujujta yachashpami, ‘ali yuyaita’ o ali concienciatapash chari ushapanchi (Hebreos 13:18; Colosenses 3:22).

13. ¿Imamandata trabajopi aliguta portarinaca ali can?

¹³ Trabajopipash Jehovata alabai ushashpami, ñucanchi trabajohuanga cushilla sintirita ushapanchi (Tito 2:9, 10). Huaquinbicarin, ñucanchi ali portarijta ricushpami shuj cumbaca tal vez Bibliata yachajui callaringa (Proverbios 27:11; 1 Pedro 2:12, liipangui).

14-16. Shuj trabajota chasquigrijushpaca ¿imacunapita pensarina capanchi?

¹⁴ Bibliapica imapilla trabajanata, imapilla na trabajanataca na tucuita nijunllu. Shinapash, imapi trabajanata  aliguta ricushpa agllangapami, huaquin textocunapica Jehová Dios imata pensajta ricui ushapanchi (Proverbios 2:6). Shinaca, Bibliapa textocunapi pensarishpa cai cati tapuicunata ricupashun:

¹⁵ Cai trabajoman yaicushpaca ¿Jehovapa mandashcacunata pactachi ushashachu? Imashinami ña yachapanchi, Jehová Diosca shuhuanata, llullanataca millanayachinmi (Éxodo 20:4; Hechos 15:29; Efesios 4:28; Apocalipsis [Revelación] 21:8). Shinaca, Jehová  nalicachishca cosascunata rurana trabajotaca, na chasquinachu capashcanchi (1 Juan 5:3, liipangui).

¹⁶ Cai trabajota chasquishpaca ¿Jehová Dios nalicachishca cosasta shujcuna rurachunllu ayudagrijuni o apoyagrijuni? Shuj ejemplota ricupashun. Iglesiata rurana trabajo ricurijpica ¿imatata ruranchiman? Construccionbi trabajanaca alimi can. Shinapash, iglesiacunapi panda yachachishcacunataca Jehová Diosca millanayachinmi. Shinaca, quiquinllata na pandata yachachijushpapash, panda yachachishcacuna mirachun ayudajushcamandaca ¿alichu sintiripanguiman? (Apocalipsis 18:4).

17. Jehová Dios alicachishca decisiongunata agllangapaca ¿imatata rurana capanchi?

¹⁷ Jehová Dios imata pensajta intindishpaca, ‘aliguta yachajushca cashpami’ ima ali cajta, ima nali cajtapash yachai ushashun (Hebreos 5:14). Tapuripai: “Cai trabajota chasquishpaca ¿shujcunata nitijachishachu? ¿Ñuca huarmita o cusata, huahuacunatapash saquishpachu shuj ladopi, o shuj llactapi trabajangapaj rigrini? ¿Paicunaca imashi tucunga?” nishpa.

18. ¿Imamandata Jehovata adoranata pundapi churanaca shinlli caita ushan?

¹⁸ Tucurimui punllacunapi causajushcamandaca, Jehovata pundapi churanaca shinllimi can (2 Timoteo 3:1). Shuj trabajota tarina, chai trabajopi paranapash shinllimi can. Ñucanchi familiata mantinina importante cajpipash, Jehovata adoranami ashtahuan importante can. Na cosascunatarachu pundapi churana capanchi (1 Timoteo  6:9, 10). Shinaca ¿imashinata familiata mantinina cashpapash, ‘ima ashtahuan importante cashcataca pundapi churai’ ushapanchi? (Filipenses 1:10, NM ).

19. ¿Imashinata Jehovapi confianaca trabajomanda ama yapata preocuparichun ayudan?

¹⁹ Jehovapi tucui shunguhuan confiapashunchi (Proverbios 3:5, 6, liipangui). Jehová Diosca, ñucanchicuna imata minishtijujtaca alimi yachan. Ashtacatami ñucanchimandaca preocuparin (Salmo 37:25; 1 Pedro 5:7). Bibliapica ninmi: ‘Cunan imaguta charishpapash, chaihuanlla cushijushpa causanguichi. Diosca cashnami nirca: “Candaca na jichushachu, na saquishachu”’ nishpa (Hebreos 13:5). Familiata mantininami cani nishpa yapata preocuparichunga, Jehová Diosca na munanllu. Paica cutin cutinmi paita sirvijcunata cuidai ushashcata ricuchishca (Mateo 6:25-32). Shinaca, imapi trabajashpapash, Bibliata estudianata, villachingapaj llujshinata, tandanajuicunaman rinataca, na saquinachu capanchi (Mateo 24:14; Hebreos 10:24, 25).

20. Minishtirishca cosasgucunahuanlla causangapaca ¿imatata rurai ushapanchi?

²⁰ Ima ali cajtallami ricuna capanchi (Mateo 6:22, 23, liipangui). Ima ali cajtallami ricuna nishpaca, Jehovata sirvinamanda minishtirishca cosascunahuanlla causana cashcatami shina nijun. Culquita, mushuj llujshishca cosascunata charinapa randica, Jehovapa amigo canatami pundapica churana capanchi. Chaimandami ama dibi tucungapaj esforzarina capanchi. Ña dibi tucushca cashpaca, chai dibicunata imashina asha asha paganata o imashina pagashpa tucuchinatami pensarina capanchi. Na cuidadota charishpaca, shuj cosascunapira esforzarishpami, Jehovata mañangapaj, yachajungapaj,  villachingapapash ñana tiempotapash animotapash charishun. Cosascunapira preocuparijunapa randica ‘micunaguta, churajunaguta charishpallata, cushijushpa causanatami’ yachajuna capanchi (1 Timoteo 6:8). Tucuicunallatami Jehovata ashtahuan sirvingapaj imata ruranataca pensarijuna capanchi.

21. ¿Imamandata ima ashtahuan importante cajtaca yaria cana capanchi?

²¹ Ima ashtahuan importante cajtaca yariami cana capanchi. Ñucanchi tiempota, fuerzacunata, cosascunataca  aligutami ocupana capanchi. Na cuidadota charishpaca, estudianacunapira, culquipira preocuparishpami chaicunapi ashtaca tiempota yalishun. Jesusca nircami, Taita Diospa Reinotami “pundaca mascana canguichi” nishpa (Mateo 6:33). Ñucanchi munaicuna, decisionguna, costumbrecuna, cada punlla ruraicunami ñucanchi shungupi ima ashtahuan importante cashcata ricuchin.

22, 23. a) Ñucanchipaca ¿imata ashtahuan importante can? b) Ñucanchi trabajota alicachingapaca ¿imatata yarina capanchi?

²² Jehovata sirvina, ali villaicunata villachinami ashtahuan importante can (Mateo 24:14; 28:19, 20). Jesushnami tucuicunaman villachingapaj esforzarina capanchi. Huaquin huauquipanicunaca, villachijcuna minishtirijuj pushtucunapimi villachingapaj rishca. Shujcunacarin, villachingapami shuj shimitapash yachajushca. Paicunahuan parlashpaca alimi canman. Paicunaca Jehovata ashtahuan sirvimanda cunanbi ashtahuan cushilla, ali sintirishcatami parlanga (Proverbios 10:22, liipangui).

²³ Ñucanchi familiaman minishtirishca cosasgucunata cungapaj tauca horascunata, o tauca trabajocunapi trabajana tucushpapash, siempre yaripangui, quiquinba familiata mantiningapaj quiquin esforzarijujtaca, alicachishpami Jehová Diosca ricujun. Shinaca, ima trabajota charishpapash Jehovapa, Jesuspa ejemplota catishpa ali trabajadorcuna capashunchi. Shinallata, Jehovata sirvina, ali villaicunata villachina ashtahuan importante cashcataca, yaria capashunchi. Shinami ninanda cushijushun.