Llaquicuna tucurinata yachanami cushilla causachun, Taita Diosman quimirichun ayudan.

Ashtaca gentecuna llaquicunata tucuchingapaj munashpapash na tucuchi ushanllu. Cai cati informacionda ricupai:

Cunanbi mushuj jambicuna tiajpipash ¿imata pasashca?

• Ashtahuanbachaca shungu nanaimandami mundo enteropi gentecunaca huañunajushca.

• Cada huatami ashtaca millón gentecunaca cáncer nishca ungüihuan huañunajushca.

• Frontiers in Immunology nishca revistapi, David Bloom Doctorca ninmi: “Cunanbica ungüicunaca shujman shujmanmi yalishpa catijun. Shinallata mushuj ungüicunapashmi ricurimushca. O chingarishca ungüicunaca cutinmi ricurimushca” nishpa.

Huaquin llactacuna charij cashpapash ¿imata pasashca?

• Cada huatami millón yali huahuacuna huañun. Ashtahuanbachaca pobre llactacunamandami huahuacunaca huañun.

• Mil millón yali gentecunami bañota na charij pushtucunapi causan.

• Cien millón yali gentecunami limpio yacutaca na charin.

Gentecunapura imashina tratarinata yachashpapash ¿imata pasashca?

• Ashtaca llactacunapimi gentecunata jatushpa negocian. Cai nali ruraita na tucuchij llactacunamanda parlashpaca, Naciones Unidas nishcaca ninmi: “Chai llactacunaca chai nali ruraita ricushpapash nimata na ruranllu. Cutin shuj llactacunaca imata ruranata na yachaimandami chai nali ruraitaca na tucuchi ushashca” nishpa.

  ASHTAHUAN YACHANGAPAJ MUNASHPACA

  Taita Diospa Reinoca ¿imata can? videota jw.org paginapi ricupangui

Taita Diosca tucuicunamandami preocuparin

Taita Diosca gentecuna llaquicunahuan causajta ricushpaca ninandami llaquirin.

Taita Diosca, “llaquichi tucushpa causajpaj llaquitaca, na yangapi churashpa millanayachircachu. Paimandaca, ñavitapash na shujman churarcachu, ashtahuangarin paita mañajpica uyarcallami” (SALMO 22:24).

“Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” (1 PEDRO 5:7).

Na para siemprechu llaquicunahuan causashun

Bibliapica Taita Dios tucui llaquicunata ñallapacha tucuchinatami yachachin.

“Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu” (APOCALIPSIS 21:3, 4).

Taita Diosca tucui llaquicunatami tucuchinga

Taita Diosca paipa Reinota o Gobiernota utilizashpami llaquicunataca tucuchinga. Bibliapi nishcashnaca chai Gobiernoca alipa Gobiernomi can.

“Jahua pachapi causajuj Taita Diosca, ima horapash na tucuchi tucuna mandana llactata churanga. Chai mandana llactataca, na shuj llacta runacunaman cungachu. [...] Ashtahuangarin paica, causaita causaicaman mandajungallami” (DANIEL 2:44).