GENTECUNALLAMI ESCRIBITA, PINTAITA, IMATAPASH RURAITAPASH USHANCHI. TAPURINCHIPASHMI cai universoca ¿imashinata tiai callarirca? ¿Imashinata causai callarircanchi? ¿Imapata causanchi? Shamuj punllacunapica ¿imashinashi causashun? nishpa.

Huaquin gentecunaca, chai tapuicunata yachanaca shinllimi can yashpami, pensaritallapash na pensarin. Cutin shujcunaca, evolucionbi crishpami, chai tapuicunataca yachangapallapash na munan. Historia, Biologiata yachachij William Provine shuti profesorca nircami: “Dioscunapash, ima munaicunapash na tianllu. Ima ali cajta, ima nali cajtaca pipash na nita ushanllu. Causana cashcamandallami causanchi” nishpa.

Shinapash huaquin gentecunaca, universo ali funcionachun leyes de la naturaleza nishcacuna tiashcata cuenta japishpami na shina yuyan. Huaquin plantacunata, animalcunata ricushpa, alicachishpami chaicuna imashina cashcata catishpa imapash mushuj aparatocunata ruran. Cada punllami ricushca ima cashpapash aligutapacha pensarishpa rurashca cashcata, chaicunata pipash rurashca cashcata, na yangamanda tiashcata.

Chaimandami evolucionbi huaquin crijcunapash paicunapa crishcacunapi cutin pensarishca. Ishcai ejemplocunata ricupashun.

ALEXEI MARNOV SHUTI NEUROCIRUJANOCA ninmi: “Escuelapi cajpica, Taita Dios na tiajta, evolucionbi crinatami yachachihuarca. Taita Dios tiajta crijcunataca muspacuna” ninmi carca. Shinapash 1990​pimi Alexeica paipa yuyaita cambiai callarirca.

Paica ninmi: “Siempremi tucuita aliguta intindinata gushtashcani. Ñucanchi umaca alipachami can. Ashtaca informaciondami umapi charita ushanchi. Ashtaca cosascunatami yachajuita ushanchi. Shinapash asha tiempotalla causana cashpaca ¿imamandata ashtaca cosascunata yachajuita ushanchi? Shina pensarishpami tapuri callarircani: ‘¿Imamandata caipi canchi? ¿Imapata causanchi?’ nishpa. Chai jipami pensarircani, tucui cosascunataca picharimi rurashca” nishpa.

Imapa causajushcata aliguta intindingapaj munashpami, Alexeica Bibliata yachajui callarirca. Jipamanga, pai pandarijushcata intindichingapami paipa huarmipash Bibliata yachajui callarirca. Paica doctorami can. Taita Dios tiajtaca na crinllu carca. Shinapash cunanbica, Bibliata yachajuimandami Taita Dios tiajta, gentecunata imapa rurashcatapash ishcandillata seguro can.

HUABI YIN SHUTI CIENTÍFICA HUARMIGUCA Física nishcatami estudiarca. Indi imashina cajta intindi ushangapami tauca huatacunata estudiarca.

Paica ninmi: “Cai mundo imashina cajta aligutapacha estudiashpaca, leyes de la naturaleza nishcata catishpa aligutapacha funcionajtami yachajurcani. Chaimi pensarircani: ‘Chai leycunataca ¿pita churarca? Yanungapaj ninatapash controlana minishtirijpica ¿pita Indi ama yapata rupachichun leycunata churarca? Indi shitajuj calor aliguta funcionachun controlajuj leycunataca ¿pita churarca?’ nishpa. Shinami tiempohuanga Bibliapi callari shimicunaca cabalta nijushcata intindircani. Chaipica nijunmi: ‘Callaripica, Taita Diosmi jahua pachatapash, cai pachatapash rurarca’ nishpa” (Génesis 1:1).

Investigaciongunata rurajpimi, ñucanchi umapi neurona nishca uchilla venagucuna imashina funcionajta, Indi imashina punchayachijta, imashina cunuchijta, shuj shuj cosascunatapash yachajushcanchi. Shinapash Alexei, Huabi nishca shinaca, Bibliami ñucanchi universo imamanda tiashcata, imamanda tucuita controlangapaj leyes de la naturaleza nishcacuna tiashcata, gentecuna imapa causashcatapash yachachin.

Cai Alpamanda parlashpaca Bibliapica ninmi: “Na yanga tiachunga rurarcachu, ashtahuangarin chaipi causanajuchunmi rurarca” nishpa (Isaías 45:18). Taita Diosca na yangamandachu cai Alpataca rurarca. Shinaca ¿imapata rurarca? Chaica ¿imatata ñucanchihuanga ricunata charin?