Canadapi shuj rijsishca colegiomanda huaquin estudiantecunaca, shuj paseomanmi rishcarca. Chai paseopica shuj huambraguta violashca nishpami huaquin huambracunataca juchachirca. Caita uyashpami Leonard Stern shuti jarica shuj periodicopica escribirca: “Ali yachaita charina, ninanda estudiana, charij o pobre canapash jovenguna nalita rurachunga na jarcai ushanllu” nishpa.

Chai periodicopica Leonard Stern shuti jarica caitapashmi escribirca: “Tauca taitamamacunaca, paicunapa huahuacunamanga ima ali cajta, ima nali cajta yachachinapa randica, ali notacunata llujchichun, ali trabajocunata charichunbashmi munan yarin” nishpa.

Estudiana, ali notacunata charina ali cashpapash, gentecunapa nalita rurana munaicunata mishachunga na ayudanllu. Shinaca ali gentecuna cachunga ¿imata yachajunata ayudanga?

Bibliaca shuj espejoshnami can. Imapi mejorashpa catinata yachachun, imacunatalla na rurai ushashcata intindichunmi ayudan (Santiago 1:23-25). Bibliaca shujcunahuan shujlla shina causachun, llaquishpa, juyaihuan, pacienciahuan, respetohuan, jarcarishpa ali tratanata yachachunmi ayudan. Juyanamanda parlashpaca Bibliapica ninmi: “juyarishpami, tucuicuna imapipash na pandashpa aliguta causanguichi” nishpa (Colosenses 3:14). Shinaca ¿imamandata juyanaca minishtirishca can? Juyaimanda parlashpaca Bibliapica caitami nin:

• ‘Juyaita charishpaca llaquita apanllami, shujcunatapash llaquinmi. Shujcuna imata charijtapash, ñucapaj cashcanman yashpaca na ricunllu. Na ñucami ashtahuan ali cani ninllu, na jariyanllu. Juyaita charishpaca, na imatapash pinganayaita ruranllu, na paipajlla alita mascanllu, na ñapash fiñarinllachu, na fiñashcalla causangapaj munanllu. [Nalita] rurajpica, na cushijunllu. Ashtahuangarin na llullashpa aliguta rurajpimi cushijun. Tucui llaquita apanllami, ima nalita rurajpipash saquinllami. Juyaica, ima horapash na tucurinllu’ (1 Corintios 13:4-8).

• “Juyaita charishpaca, paipaj cumba runagutaca, ima nalitapash na ruranllu” (Romanos 13:10).

• “Tucuimanda yalica, caishuj chaishuj ninanda juyarishpami causana canguichi. Chai juyaimi, ashtaca juchacunataca pacashpa anchuchinga” (1 Pedro 4:8).

Ñucanchi familiacunahuan, ali amigocunahuan cashpaca ¿nachu tranquilo, ali sintiripanchi? Paicuna ñucanchita ninanda juyashcamandami shina sintiripanchi.

Juyaimandami imagutapash ruranchilla. Caipi yuyapashun: Jorge shuti jarica chairalla nacirishca paipa nietogutami ricunayachirca. Shinapash tabacota chupanata yachashcamandami, Jorgepa mashaca llullu huahuagupaman quimirichunga na saquirca. Chaimi Jorgeca 50 huatacunata tabacota chupashpa causashca cashpapash, paipa nietoguta ricunayaimandaca tabacota chupanata saquirca. Caita ricushpami, juyaica imata rurachunbash ayudajlla cashcata ricupanchi.

 Juyanataca tucuicunallatami yachajui ushapanchi. Taitamamacunami huahuacunamanga juyanataca yachachina can. Taitamamacunami micunaguta cun, huañujujpipash cuidan, imapash ama pasachunbash ricurian. Ali taitamamacunaca huahuacunamanga ima ali o nali cashcataca, parlashpami yachachin. Shinami paicunapa huahuacunamanga alita ruranata yachachin.

Shinapash na tucui taitamamacunachu chaitaca ali pactachin. Taitamamacuna huahuacunata na ali viñachishcamanda, chai huahuacuna nalicuna tucunataimanga na ninajupanchichu. Taucacunami huahuacuna cashpa familia ucupi nali causashca, taitahuanlla o mamahuanlla causashca cashpapash, viñashpaca ali gentecuna tucushca. Paicunaca juyaj, respetajcunami tucushca. Cati temapica imahorapash na cambiangachu nishca gentecunapash, paicunapa causaipi cambiai ushashcatami ricupashun.