Shuj llactamanda caimanda, shuj shimita parlaimanda, shuj religionda charimanda o jari o huarmi caimanda, o charij o pobre caimandami gentecunaca huaquingunataca nali tratashca. Huaquingunacarin edadta ricushpa, estudiashca o na estudiashcata ricushpa o discapacitado cajta ricushpami paicunamandaca nali pensai callarin. Shinapash paicunaca tucuicunatami igual tratanchi yuyanmi.

Shinapash ¿Quiquinga tucuicunata igual tratapanguichu? Na tucuicunata igual trataj gentecunami tian ninaca facilmi. Shinapash huaquinbica ñucanchillata gentecunata na igual tratanajushcata cuenta japinaca na facilchu can. Shinapash tucuicunallatami huaquinbica shujcunataca na igual tratashcanchi. Gentecunamanda, shuj shuj cosascunamanda estudiashca David Williams shuti jarica, “shuj llacta gentecunamanda, shuj laya gentecunamanda nali yuyaicunata charij gentecunaca, ñapashmi na cuenta urmashpa chai gentecunata tuparishpaca na igual tratai callarin” ninmi.

Por ejemplo, Yovitsa shuti jarica Europa llactapimi causan. Pai causajuj pushtupica shuj laya gentecunapashmi causan. Paica ninmi “chai gentecunaca nali gentecunami can nishpami crin carcani. Shinapash paicuna nali gentecuna can nishpa yuyashcamandami nalitaimanga na rimajunichu nishpa pensan carcani” nishpa.

Gobiernocunaca gentecunaca paipurallata igual tratarichun munashpami leycunata llujchishca. Shina leycunata llujchishpapash tucuicunata igual tratarichunga na ayudashcachu. Gobiernocunapa leycunapi caita o chaitami rurana canguichi nishpa mandajpipash, chai mandashcacunaca gentecuna imata sintijta, imata yuyajtaca na cambiashcachu. Shinaca gentecunata na igual tratana yuyaicunaca gentecunapa shungupi, yuyaipimi tiai callarin. Shinapash tucuicunata igual tratachunga ¿imata ayudanga?