Shujcuna imashna sintirishcapi pensaripashunchi
Imamandata shinlli can
Shujcuna ñucanchihuan na igual cashcapilla pensarijushpaca, paicunataca na ricunayachishpami ricui callarishun. Shina yuyashpaca ñucanchishna na caj gentecunataca yanga gentecunatashnami ricui callarishun. Shuj gentecunamanda shina pensarijushpaca shujcuna imashna sintirishcata intindinaca shinllimi canga. Gentecunamanda shina pensarijushpaca na tucuicunata igual tratanajushcatami ricuchinajunchi.
Bibliapica ninmi
“Cushilla tiajcunahuanga cushijuichi, huacajcunahuanga huacaichi” (ROMANOS 12:15).
¿Imatata ningapaj munan? Shujcuna imashna sintirishcata aliguta intindinatami nijun.
Shujcuna imashna sintirishcata pensarinaca ¿imashinata ayudan?
Shujcuna imashna sintirishcata pensarinami tucuicunallata igual cashcata cuenta japichun ayudan. Chaimi shujcunapash ñucanchishnallata sintijta, ñucanchishnallata imagutapash rurajta cuenta japinchi. Shujcuna imashna sintirishcata intindinami shuj shuj laya gentecuna cashpapash tucuicunallata shuj familiashna cashcata intindichun ayudan. Ñucanchicunaca shuj gentecunahuan igual cashcata ricungapaj esforzarishpaca pitapash na yangata juchachishunllu.
Shujcuna imashna sintirishcapi pensarishpaca shujcunataca respetohuanmi tratashun. Senegal llactapi causaj Anne-Marie shuti huarmiguca shujcuna na ricunayachishca gentecunataca paipashmi na ricunayachin carca. Shinapash Anne-Marie shuti huarmiguca: “Chai gentecuna imashna sufrijta ricushpaca, ñucapash shinallata pasajushpaca imashashi sintirinman nishpami pensarircani. Chaimi ñucaca paicunamanda na yali cashcata, yali importante cangapapash na imatapash rurashcatami cuenta japircani” nin. Shinaca shuj gentecunapa problemacunatapash intindingapaj esforzarishpaca, paicuna imashna sintirijta intindishpami paicunamandaca nalicunataca na parlashun.
¿Imatata rurai ushapangui?
Ñucanchi na ricunayachishca gentecunahuan imapi na igual cashcata ricujunapa randica, imapi igual cashcata ricungapami esforzarina capanchi. Por ejemplo, chai gentecunaca ¿imashinata sintirin:
Shujcuna imashna sintirishcata intindinami tucuicunallata shuj familiashna cashcata cuenta japichun ayudan.
Familiahuan pacta micujushpa?
Punlla entero trabajashca jipa?
Paipa amigocunahuan pacta cashpa?
Paicunapa gushtashca musicata uyajushpa?
Shuj gentecunata intindingapaca cai tapuicunapi pensaripashunchi:
Pipash ñucata na valijtashna sintichijpica ¿imatata ruraiman?
Na rijsishpata ñucamanda nalicunata ninajujpica ¿imashinashi sintirinman?
Ñucapash chai llactamandallata, chai shimitallata parlaj cashpaca ¿imashna tratahuachunda munaiman?
Cai temacunata ashtahuan liipai
VILLAJUN REVISTA
Taita Diosca ¿paillata llaquipi canshnami sintirin?
ibliapica ninmi, Taita Diosca ñucanchicunata ima pasajujta, ñucanchicuna imata pensanajujta, imashina sintirinajujta intindishpami, paillata llaquipi canshna sintirin nishpa.
RIJCHARIPAICHI REVISTA
Ali causaita charingapaca: ¿Imashinata ñucanchi familiahuan, amigocunahuan ali llevarita ushapanchi?
Shuj gentecunahuan ali llevaringapaca na ñucanchipillachu pensarina capanchi. Chaipa randica paicunata imashina ayudanatami pensarina capanchi.
