Tucuicunata igual tratanataca na ñapash yachajui usharingachu. Imashinami shuj ungüimanda ali tucungapaca tiempo minishtirin, shinallatami tucuicunata igual tratanata yachajungapaca tiempo minishtirin. Tucuicunata igual tratangapaca ¿imatata rurana capanchi?

“Juyarishpa causanatami churajunshna yariajlla causana canguichi. Shina juyarishpami, tucuicuna imapipash na pandashpa aliguta causanguichi” (COLOSENSES 3:14).

¿Imatata ningapaj munan? Shujcunamanda imapash ali cosascunata ruranaca tandanajushca cachunmi ayudan. Shujcunaman juyaita ricuchinami tucuicunata igual tratachun ayudanga. Shinami shujcunata na ricunayachishpaca na ricushunllu.

Quiquin na ashta llevarishca gentecunata imagutapash rurashpa juyaita imashina ricuchinapi pensaripai. Imapash ushashca cosascunatapacha ruranaca na minishtirinllu. Caicunata rurangapaj esforzaripai:

• Paicuna ucuman yaicugrinajujpica punguta pascashpa ayudapai. O na cashpaca buspi rinajushpaca quiquinba asientota pai tiarichun cunallami capangui.

• Paicuna quiquinba shimita na parlajpipash paicunahuan ashagutallapash parlangapaj esforzaripangui.

• Quiquin na gushtashca cosascunata rurajpipash ama ñapash culirangapaj esforzaripangui.

• Paicuna imatapash parlajujpi aliguta uyashpa paicuna imashna sintijta intindingapaj esforzaripangui.