1. Pihuanbash ali amigocuna cangapaca ¿imatata rurana capanchi?

PIHUANBASH ali amigocuna cangapaca, pundapica paihuan yalingapami tiempota llujchina capanchi. Shinallata pai imashina sintirishcata, paipa causaipi imacunalla pasashcata parlashpapashmi ali amigocuna tucuita ushapanchi. Shinapash Jesuspa ali amigocuna canaca dificilmi caita ushan. ¿Imamandata difícil caita ushan? Huaquin yuyaicunata ricupashunchi.

2. Primer yuyaica ¿imatata ricuchin?

² Primer yuyai, ñucanchica Jesustaca na ñavi ñavi ricuita ushapanchichu. Apostolcunapa punllacunapipashmi huaquingunaca Jesustaca na ñavi ñavi rijsirca. Chaimandami apóstol Pedroca paicunataca cashna nirca: ‘Jesucristotaca, na ricushca cashpapash, ninandami juyanguichi. Cunambi na ricushpapash, paita crishpami causanajunguichi’ nishpa (1 Ped. 1:8). Shinaca Jesuspa ali amigocuna cangapaca, Jesusta ñavi ñavipacha ricunaca na minishtirinllu.

3. Segundo yuyaica ¿imatata ricuchin?

³ Segundo yuyai, ñucanchica Jesushuanga na parlaita ushapanchichu. Mañanajushpaca ñucanchicunaca Jehová Diostami mañapanchi. Jesuspa shutipi mañashpapash, Jesustaca na mañapanchichu. Jesusca Jehová Diostalla mañana cashcatami yachachirca. Shinami Jehovatalla adorajushcata ricuchipanchi (Mat. 4:10). Jehovatalla adorashpapash, Jesusta juyashcatapashmi ricuchi ushapanchi.

4. a) Tercer yuyaica ¿imatata ricuchin? b) Cai temapica ¿imata yachajupashun?

⁴ Tercer yuyai, Jesusca cielopimi causan, chaimi paihuanga na tiempota yalita ushapanchi. Jesuspa ladopipacha caita na ushashpapash, paimandaca ashtacatami yachajuita ushapanchi. Cai temapica, Jesuspa ali amigocuna cangapaj imacunatalla  rurana cashcatami yachajupashun. Shinapash callaripica Jesuspa ali amigocuna canaca imamanda minishtirishcapacha cashcatami yachajupashun.

5. ¿Imamandata Jesuspa ali amigocuna cana capanchi? (“Jesuspa ali amigocuna cashpami, Jehovapa ali amigocunapash caita ushapanchi”, “¿Pitata adorana capanchi?” nishca recuadrocunatapash ricupangui).

⁵ Jehovapa ali amigocuna cangapaca, Jesuspa ali amigocuna canaca minishtirishcapachami can. ¿Imamandata shina nipanchi? Primero, Jesusca paipa catijcunataca nircami: ‘Cangunaca, ñucata juyahuanguichimi. Shina cajpimi, ñuca Taitapash cangunataca juyajun’ (Juan 16:27). Shinallata nircapashmi: “Ñuca Taitapajman ñuca na pushajpica, pipash na paillata chayai ushanllu” nishpa (Juan 14:6). Imashinami shuj huasiman yaicungapaca, punguta yalinaca minishtirishcapacha can. Shina cuendami Jehová Diospa ali amigocuna cangapaca, Jesuspa ali amigocuna canaca minishtirishcapacha can. Jesusca nircami: “Ñucami, llamacuna yaicuna pungu cani” nishpa (Juan 10:7). Segundo, Jehová Dios imashinapacha cashcataca Jesusmi ricuchirca. Chaimi paipa catijcunataca: “Maijambash ñucata ricushpaca, ñuca Taitatami ricujun” nirca (Juan 14:9). Shinaca Jehová Diospa alipacha amigocuna cangapaca, Jesusta rijsinapachami capanchi. Jesusmanda yachajushpaca, Jesustaca ashtahuanmi juyapashun. Shinallata Jehová Diostapashmi ashtahuan juyapashun.

6. ¿Imamandata Jesuspa ali amigocuna canaca minishtirishcapacha can?

⁶ Jehová Dios ñucanchi mañaicunata contestachunga, Jesuspa ali amigocunami cana capanchi. Mañanajushpaca “Jesuspa shutipimi mañanchi” nishpallaca na quedanachu capanchi. Jehová Dios ñucanchi mañaicunata contestangapaj Jesusta  imashina utilizajtami intindina capanchi. Jesusca paipa catijcunataca nircami: “Ñuca shutipi ñuca Taitata imaguta mañajpipash carashallami” nishpa (Juan 14:13). Jehová Diosmi ñucanchi mañaicunata uyan. Shinapash paipa munaita pactachichunga paipa Churi Jesusmanmi autoridadta cushca (Mat. 28:18). Ñucanchi mañaicunata nara contestashpallatami Jehová Diosca ñucanchicuna Jesuspa consejocunata pactachijujta o na pactachijujta ricun. Jesusca nircami: “Cangunata shujcuna ima nalita rurashcata cungajpica, jahua pachapi tiajuj cangunapaj Taitami, cangunapaj juchacunatapash anchuchinga. Ashtahuangarin cangunata imatapash nalita rurajcunata na perdonajpica, cangunapaj Taitapash, canguna rurashca juchacunataca na anchuchingachu” nishpa (Mat. 6:14, 15). Jehová Dioshna, Jesushnallatami ñucanchicunapash shujcunataca tratana capanchi.

7. Jesús huañushcamanda bendiciongunata chasqui ushangapaca ¿imatata rurana capanchi?

⁷ Jesuspa ali amigocunallami Jesús huañushcamandaca tauca bendiciongunata chasqui ushanga. ¿Imamandata shina nipanchi? Jesusca paipa ‘juyashca cumbacunamanda huañuna’ cashcatami nirca (Juan 15:13). Punda tiempocunapi Jehová Diosta sirvishca gentecunapashmi paicuna causarishpaca Jesusmanda yachajushpa, paipa ali amigocuna cangapaj esforzarina can. Por ejemplo, Abrahán, Sara, Moisés, Rahabpashmi causarishpaca Jesusmanda yachajunapacha can. Shinallami para siempre causana bendiciondaca chasqui ushanga (Juan 17:3; Hech. 24:15; Heb. 11:8-12, 24-26, 31).

8, 9. a) Jesuspa ali amigocuna cashpaca ¿imatata rurai ushapanchi? b) Juan 15:4, 5​pi nishca shinaca ¿imamandata Jesuspa ali amigocuna cashpa catina capanchi?

⁸ Ñucanchicunaca Jesuspa ali amigocuna caimandami Jesushuan Diospa Reinomanda ali villaigucunata villachina, yachachina bendicionda charipanchi. Jesús cai Alpapi cashpaca Jehová Diosmandami cabalguta yachachirca. Cieloman tigrashcamandapachami congregaciongunataca umashna ñaupaman apajun. Chaimi mundo enteropi villachichunbash ayudajun. Ñucanchicuna paimanda, Jehová Diosmandapash shujcunaman yachachingapaj esforzarijtaca Jesusca alicachishpami ricujun. Ñucanchicunaca Jehová Diospa, Jesuspa ayudahuanllami villachita ushapanchi (Juan 15:4 *, 5, liingui).

⁹ Bibliapica Jehová Diospa ñaupajpi ali ricuringapaca, Jesusta juyana cashcata, paipa amigocuna cana cashcatapashmi yachachin. Shinaca Jesuspa ali amigocuna cangapaj imacunatalla rurana cashcata yachajupashunchi.

10. Jesuspa ali amigocuna cangapaca ¿imatata pundapica rurana capanchi?

¹⁰ Pundapica, Jesusmandami yachajuna capanchi. Chaipaca Mateo, Marcos, Lucas, Juan librocunatami liina capanchi. Chaipimi Jesuspa causaimanda yachajui ushapanchi. Chai librocunata liishpami Jesús gentecunata llaquishpa, juyaihuan tratashcata ricui ushapanchi. Por ejemplo, paipa sirvijcunataca na yanga esclavocunatashna tratarcachu. Chaipa randica paipa ali amigocunatashnami tratarca. Chaimi pai imata yuyashcata, imashina sintirishcatapash parlanlla carca (Juan 15:15). Paipa catijcunataca ali alimi intindin carca. Paicunahuanga huacaitapashmi huacarca (Juan 11:32-36). Jesús paipa ali catijcunahuan alipacha amigocuna cashcataca, Jesuspa contracunapashmi cuenta japirca (Mat. 11:19). Ñucanchicunapashmi Jesús paipa ali catijcunata tratashcashnallata shujcunata ali tratana capanchi. Shinami tucuicunahuan ali llevarishpa cushilla causapashun.  Shinallata Jesustaca ashtahuan juyashun, respetashunbash.

11. Jesuspa ali amigocuna cangapaca ¿imatata catipica rurana capanchi?

¹¹ Catipica, Jesús imata yuyashcata, imata rurashcatapashmi rurana capanchi. Jesús imata yuyashcata yachajushpaca, Jesuspa alipacha amigocunami tucupashun (1 Cor. 2:16). ¿Imashinata Jesuspa ejemplota cati ushapanchi? Chaipaca caipi pensaripashunchi. Jesusca paipa munaita ladoman saquishpami shujcunata ayudan carca (Mat. 20:28; Rom. 15:1-3). Shujcunamandapashmi imagutapash ruranlla carca. Jesusca pipash imatapash nijpica na jaicata culiranllachu carca. Perdonaitapashmi perdonanlla carca (Juan 1:46, 47). Shinallata gentecunapa pandarishcacunatapash na cutin cutin yarijunllu carca (1 Tim. 1:12-14). Chaimi Jesuspa ejemplota catingapaj esforzarina capanchi. Jesusca nircami: “Shina juyarishpa causanajujta ricushpami, ñucapaj yachajujcuna cashcataca tucuicuna rijsinajunga” nishpa (Juan 13:35). Shinaca tapuripashunchi: “¿Jesús shinachu shuj huauquipanicunahuan tranquilo, ali cangapaj esforzarijuni?”.

12. Jesuspa ali amigocuna cangapaca ¿imatata ashtahuan rurana capanchi?

¹² Quimsapica, ungidocunatami apoyana capanchi. Ungidocunata ñucanchicuna apoyanajushcata Jesús ricushpaca, paita apoyajushcatashnami ñucanchitaca ricunga (Mat. 25:34-40). Jesusca paipa catijcunamanga Diospa Reinomanda villachichun, yachachichunmi mandarca. Chai mandashcata pactachishpami ungidocunata apoyajushcata ricuchipashun (Mat. 28:19, 20; Hech. 10:42). ‘Shuj llamagucunaca’ Jesús mandashcashna mundo enteropi villachi ushachunmi ayudanajun (Juan 10:16). Shuj llamagucunamanda cashpapash, Jesús mandashcata pactachingapaj esforzarijpica ungidocunata, Jesustapash apoyajushcatami ricuchipanchi.

13. Lucas 16:9​pi shimicunataca ¿imashinata pactachi ushapanchi?

¹³ ¿Imashinata Jehová Diospa, Jesuspa amigocuna caita ushapanchi? Jehová Diospa Reino ñaupaman catichunmi culquihuanbash apoyaita ushapanchi. Shinami Jehovapa, Jesuspa amigocuna cashcatapash ricuchi ushapashun (Lucas 16:9, liingui) *. Por ejemplo, na fácil chayanalla pushtucunapi villachi ushachunmi culquiguhuan apoyaita ushapanchi. Shinallata Tandanajui Huasicunata shayachingapaj, arreglangapaj, llaqui apashca pushtucunapi huauquipanicunata ayudangapapashmi contribuciongunata cushpa ayudaita ushapanchi. Congregaciongunapipashmi contribuciongunata churashpa ayudaita ushapanchi. Shuj huauqui o pani minishtijushcata yachashpaca uchallami ayudana capanchi (Prov. 19:17). Caicunata rurashpami ungidocunata ayudajushcata ricuchipanchi.

14. Efesios 4:15, 16​pi nishca shinaca Jesuspa ali amigocuna cangapaca ¿imatata rurana capanchi?

¹⁴ Chuscupica, Jehová Diospa organizaciondami apoyana capanchi. Congregaciongunataca Jesusmi uma cuenda mandajun. Chaimi ñucanchicunaca huauqui ancianocunataca juyaihuan cazuna capanchi. Shinami Jesuspa alipacha amigocuna tucuita ushapanchi (Efesios 4:15, 16, liingui). Por ejemplo, Jehová Diospa organizacionga, Tandanajui Huasicunata ali aprovechachunmi huaquin cambiocunata rurashca. Chaimi huaquin congregaciongunataca shujllapi tandachishca. Shinallata territoriocunatapash tandachishca. Chaita ruraimandami Jehovapa organizacionman cushca culquigutaca na yangata gashtarishca. Cai cambiocuna tiajpipash tucuicunallatami aliman apoyashca. Cai huauquipanicunaca  tauca huatacunata shuj congregacionbilla caimandami huauquipanicunahuan alipacha amigocuna cashcanga. Shina cambiocuna tiashcamandami huaquin huauquipanicunaca shuj shuj congregaciongunaman rina tucushca. Tucui huauquipanicuna cai cambiocunata apoyajujta ricushpaca Jesusca ninandami cushijunga.

15. Jipa punllacunapica ¿imashinata Jesushuanga caita ushapashun?

¹⁵ Ungidocunaca para siempremi Jesushuan jahua cielopi mandanajunga. Ungidocunaca Jesushuan jahua cielopi pacta caimandami paita ricunga, paihuanbash parlaita ushanga (Juan 14:2, 3). Cutin cai Alpapi causangapaj munajcunaca Jesusta na ricushpapash, paicunata Jesús juyashcatami cuenta japinga. Shinami Jesushuanga alipacha amigocuna caita ushanga. Shinallata Jehová Diospash, Jesuspash bendiciajpimi cushilla causanajunga (Is. 9:6, 7).

16. Jesushuan ali amigocuna caimandaca ¿ima bendiciongunatata chasqui ushapanchi?

¹⁶ Jesushuan alipacha amigocuna cangapaj esforzarijpica tauca bendiciongunatami chasqui ushapanchi. Por ejemplo, cunanbillatami Jesús ñucanchita juyashcata, apoyashcatapash ricui ushapanchi. Shinallata para siempre causana bendiciondapashmi chasquita ushapanchi. Ashtahuanbachaca, Jesushuan alipacha amigocuna caimandami Jehová Diospa amigocunapash caita ushapanchi. Jesushuan ali amigocuna canaca shuj jatun bendicionmi can.