Chai yuramanda micushpa na huañunguichu nishpaca Diabloca Evapa cuerpolla huañuna cashcata, paipa alma maipipash causashpa catina cashcataca na nijurcachu. Diabloca shuj culebrata parlachishpami Evataca cashna nirca, canga na huañunguichu, cai alpapi cushilla causaitami charigringui, Diostapash na minishtinguichu nishpami Evataca umachirca (Gén. 2:17; 3:3-5).

Shinaca alma causashpa catin nishca panda yachachishcacunaca jardín de Edenbica na tiai callarircachu. Shinaca ¿maipita chai panda yachachishcacunaca tiai callarirca? Maipipacha callarishcataca na ali yachapanchichu. Noepa punllapi Jatun Manllanayai Tamiapimi panda religiongunaca tucuilla tucurirca. Chai punllapica Noé, paipa familiallami salvarirca. Paicunaca Jehovata sirvijcunami carca. Shinaca chai punllapica panda yachachishcacunaca ñana tiarcachu.

Almaca na huañunllu nishca panda yachachishcacunaca Jatun Manllanayai Tamia punlla jipami tiai callaririanga. Babel llactapica, Jehová Diosca tucui gentecunapa parlotami cambiarca. Chaimi gentecunaca paicunapura na intindirishpa ‘caiman chaiman’ separarirca. Shinami almaca na huañunllu nishca panda yachachishcacunahuan chai gentecunaca quedarianga (Gén. 11:8, 9). Cai panda yachachishca imahorapacha tiai callarishcataca na yacharinllu. Shinapash cai panda yachachishcata “llullapaj taita” Diablo callarichishcataca seguromi capanchi. Cai panda yachachishcata mundo enteromanda gentecuna crijta ricushpaca Diabloca ninandami cushijushcanga (Juan 8:44).