1. Davidca ¿imatata rurarca?

REY DAVIDCA nircami: “Mandaj Diosca jatumbachami, ninandapacha alicachi tucunatami charin” nishpa (Sal. 145:3). Davidca Jehová Diosta ninanda juyaimandami ‘tandanajushcacunapa chaupipi’ Jehovata alabarca (Sal. 22:22; 40:5). Davidca nircami: “Ñucanchi ñaupa taita Israelpaj Mandaj Taita Dioslla, canga causaita causaicamanmi alicachi tucujungui” nishpa (1 Crón. 29:10-13). Ñucanchicunapashmi Jehovataca ninanda juyapanchi. Chaimandami David nishcashna ñucanchipash ni ushapanchi.

2. a) Jehová Diosta alabangapaca ¿imatata rurana capanchi? b) Ashtaca huauquipanicunaca ¿ima manllaitata charishca? Cai temapica ¿imatata yachajupashun?

² Tandanajuicunapi comentashpami Jehová Diostaca alabanchi. Shinapash ashtaca huaquipanicunaca comentangapaj munashpapash manllaimandami na comentan. Chai manllaita mishangapaca ¿imatata rurana can? Ali comentariocunata cungapaca ¿ima consejocunata ñucanchitaca ayudanga? Cai tapuicunamanda nara yachajushpallata chuscu yuyaicunata yachajupashun. Chai yuyaicunata yachajunajushpaca, tandanajuicunapi imamanda comentana minishtirishca cashcata ricupashun.

3-5. a) Hebreos 13:15 nishca shinaca ¿imamandata tandanajuicunapi comentana capanchi? b) ¿Jehová Diosca tucuicuna igual comentachunllu munan?

³ Jehová Diosca paita alabachunmi munan (Sal. 119:108). Comentariocunata cushpami Taita Diosman ‘imagutapash carashpa rupachinshna’ caranajunchi. Chaitaca ni pipash ñucanchimandaca na rurai ushangachu (Hebreos 13:15, liingui, MTQI) *. ¿Jehová Diosca tucuicuna igualtapacha comentachunllu munan? Na, na chaita munanllu.

 ⁴ Jehová Diosca tucuicuna na igual rurai ushashcataca alimi yachan. Shinallata paita alabangapaj imagutapash rurashcataca Jehová Diosca ninandami alicachin. Israelitacuna Jehovata alabangapaj imacunatalla rurashcata ricupashunchi. Huaquinguna charishpaca shuj llamagu o shuj chivogutami Jehovaman caran carca. Cutin huaquinguna na charishpaca “ishcai urpita, na cashpaca ishcai palomatami” cun carca. Shinapash huaquinguna ni urpiguta ni palomaguta na charishpaca “ashtahuan ali jacutami” ashaguta cunalla carca (Lev. 5:7, 11). Chai jacu baratolla cajpipash Jehová Diosca alimi chasquin carca. Shinapash chai jacuca ashtahuan ali jacumi cana carca.

⁵ Jehová Diosca cunangamanmi na cambiashca. Ñucanchicuna tandanajuicunapi comentajpica Jehová Diosca alimi chasquin. Apolos runagushna, apóstol Pabloshna ñucanchicunapash alipacha parlachun, na manllashpa parlachunga Jehová Diosca na shuyanllu (Hech. 18:24; 26:28). Jehová Diosca ñucanchi usharishcagutalla rurachunmi mañan. Ishcai uchilla culquiguta cushca viuda huarmigupi pensaripashunchi. Chai ishcai uchilla culquiguta tucui shunguhuan cushcamandami Jehová Diosca ali chasquirca (Luc. 21:1-4).

6. a) Hebreos 10:24, 25​pi nishcashnaca shujcunapa comentashcacunaca ¿imashinata ñucanchitaca ayudan? b) Huauquipanicuna tandanajuicunapi comentajta uyashpaca ¿imatata rurana capanchi?

⁶ Comentariocunata cushpa caishujmanda chaishujmanda animarishunchi (Hebreos 10:24, 25, liingui). Tandanajuicunapi shuj shuj comentariocunata uyashpaca ninandami cushijunchi. Huahuacuna tucui shunguhuan ashalla shimicunahuan comentajta uyashpaca ninandami cushijunchi. Shinallata shuj huauqui o pani Bibliamanda imata ali intindishcata comentajta uyashpaca ninandami cushijupanchi. Huaquinguna parlanata pinganayachishpa o ñucanchi idiomata yachajushpapash comentajta uyashpaca ninandami cushijunchi (1 Tes. 2:2). Paicuna shina comentajta uyashpaca ¿imatata rurana capanchi? Tandanajui jipa paicunahuan parlashpa comentarioca alipachami carca, quiquinba comentarioca ninandami ayudahuarca nishpa cushichina capanchi. Ñucanchipash tandanajuicunapi comentashpaca shujcunata cushichishun, ñucanchipash cushilla sintirishun (Rom. 1:11, 12).

7. Tandanajuicunapi comentanaca ¿imashinata ñucanchipallata ali can?

⁷ Tandanajuicunapi comentanaca ñucanchitallatami ayudan (Is. 48:17). Tandanajuicunapi  comentanaca ¿imashinata ayudan? Punda yuyai, comentangapaj esforzarishpaca tandanajuicunapa ali prepararingapaj, Bibliata ashtahuan intindishpa ñucanchi causaipi pactachinatapashmi ali yachajushun. Cati yuyai, shina comentashpaca ñucanchillatami tandanajuipi cushilla sintirishun. Último yuyai, comentangapaj esforzarishpaca ima comentashcapash ñucanchi yuyaipillatami quedanga.

8, 9. a) Malaquías 3:16​pi nishca shinaca tandanajuicunapi comentangapaj esforzarijta ricushpaca ¿imashinata Jehová Diosca sintirin? b) Huaquin huaquipanicunaca ¿imatata manllashpa catin?

⁸ Jehová Diosca ñucanchi paipi crichunmi munan. Tandanajuicunapi ñucanchi comentajta uyashpaca Jehová Diosca ninandami cushijun. Shinallata comentangapaj esforzarijta ricushpaca Jehová Diosca ninandami alicachin (Malaquías 3:16, liingui). Shina esforzarijujta ricushpaca Jehová Diosllatami ñucanchitaca bendician (Mal. 3:10).

⁹ Imashinami ricupanchi, tandanajuicunapi comentangapami esforzarina capanchi. Shinapash huaquin huauquipanicunaca comentanatami manllashpa catin. Shina manllajushpaca ama llaquiripanguichu. Cunanga Bibliapa huaquin yachachishcacunamanda, Bibliapi parlashca huaquin gentecunamandami yachajupashun. Shinallata tandanajuicunapi ashtahuan comentangapaj huaquin consejocunatapashmi yachajupashun.

10. a) Comentangapaca ¿imamandata manllanchi? b) Manllaita charishpaca ¿imatata ricuchijupangui?

¹⁰ ¿Tandanajuicunapi comentangapaj manllanchichu? Shina manllajushpaca na quiquinlla comentanata manllanguichu. Ashtaca huauquipanicunami comentanata ashata manllan. Shinaca manllaimanda na comentashpaca imamanda shina sintirijushcatami ali yachana capanchi. ¿Jaicata cunganata manllaimandachu na comentanchi? O shujcunahuan ricujpica ñuca comentariocunaca ¿nalimi canga yashcamandachu na comentanchi? Shina sintirijushpaca humilde cashcatami ricuchijupangui. Shinallata shujcuna quiquinmanda yali cashcatami ricuchijupangui. Jehová Diosca humildecunataca  alicachishpami ricun (Sal. 138:6; Filip. 2:3). Shinapash Jehová Diosca tandanajuicunapi paita alabachun, huauquipanicunatapash cushichichunmi munan (1 Tes. 5:11). Jehová Diosca ñucanchita ninandami juyan. Chaimi paica tandanajuicunapi na manllashpa comentachun ayudanga.

11. ¿Bibliapa maijan textocunata ñucanchitaca ayudai ushan?

¹¹ Bibliapa huaquin yachachishcacunamanda yachajupashunchi. Bibliapi nishca shinaca tucuicunallatami parlocunapi ‘cutin cutin pandarinchilla’ (Sant. 3:2). Jehová Diospash, ñucanchi huauquipanicunapash ñucanchicuna jucha illaj cachunga na shuyanllu (Sal. 103:12-14). Huauquipanicunaca ñucanchi familiacuna caimandami ñucanchitaca ninanda juyan (Mar. 10:29, 30; Juan 13:35). Huaquinbica ñucanchi munashcashna na parlai ushajpipash ñucanchi huaquipanicunaca alimi intindin.

12, 13. Nehemiasmanda, profeta Jonasmandaca ¿imatata yachajupanchi?

¹² Cunanga Bibliapi parlashca ishcai Jehovata sirvijcunamanda yachajupashunchi. Paicunamanda yachajunami comentangapaj ama manllachun ayudanga. Pundapica Nehemías runagumanda ricupashunchi. Nehemiasca reypa catij mandajmi carca. Jerusalenba pircacuna urmashca cajta, pungucunapash rupachishca cajta uyashpaca ninandami llaquirirca (Neh. 1:1-4). Imamanda llaquilla cashcata rey tapujpica Nehemiasca ninanda manllarishcanga. Nara imatapash nishpallatami Jehovata ñapash mañarca. Nehemías shina ruraimandami Jehová Diosca paipa llactata ayudarca (Neh. 2:1-8). Nehemiasmandaca ¿imatata yachajupanchi? Ñucanchicuna nara comentashpallatami Jehovata mañana capanchi. Cunanga profeta Jonaspi pensaripashunchi. Jehová Diosca Nínive llactamanda gentecunahuan parlachunmi Jonastaca mandarca. Shinapash Jonasca manllaimandami shuj llactamanra rirca (Jon. 1:1-3). Jehová Dios ayudaimandami Jonasca Nínive llactamanda gentecunahuan parlangapaj rirca. Jonás shina ruraimandami Nínive llactamanda gentecunaca salvari usharca (Jon. 3:5-10). Profeta Jonasmandaca ¿imatata yachajupanchi? Imashinami Jonasta ayudarca shinallatami Jehová Diosca ama manllachun, ñaupaman catichun ayudanga. Ñucanchi huauquipanicunaca Nínive llactamanda gentecunashnaca na canllu. Chaimandami paicunataca na manllana capanchi.

¹³ Shinaca tandanajuicunapi ñucanchi comentariocunahuan huauquipanicunata cushichingapaca cai cati consejocunata ricupashunchi.

14. a) Tandanajuicunapaca ¿imamandata ali prepararina capanchi? b) ¿Imashinata prepararita ushapanchi?

¹⁴ Tucuilla tandanajuicunapa prepararipashunchi. Tandanajuicunapa prepararingapaj shuj punllata o shuj horasta agllashcalla charishpaca comentangapaca na manllashunllu (Prov. 21:5). Shinapash na tucuicuna chai punllata o chai horasllataca prepararinchichu. Cunanga 80 yali huatacunata charij Eloise viuda panigumanda ricupashunchi. Chai paniguca semanapi callari punllacunapimi Villajun revistataca prepararin.  Chai paniguca ninmi: “Semanapi callari punllacunapi tandanajuipa prepararishpaca tandanajuipica cushillami yalini” nishpa. Cutin Joy shuti paniguca semana enteromi trabajan. Paica Villajun revistataca tandanajuipa shuj punlla faltajpillami prepararin. Cai paniguca ninmi, shina prepararishpami tandanajuipi imata yachajugrishcataca yari ushani nishpa. Ike huauquica anciano, precursor shina sirvijuimandami ocupado ocupado yalin. Chai huauquica ninmi: “Villajun revistata tucuita prepararinapa randica semanapi asha ashami prepararini. Shina prepararinami ñucapaca ali cashca” nishpa.

15. Comentangapaj munashpaca ¿imatata rurai ushapanchi?

¹⁵ Tandanajuicunapa ali prepararingapaca ¿imatata rurana capanchi? Pundapica, Jehová Diospa espiritu santotami mañana capanchi (Luc. 11:13; 1 Juan 5:14). Chai jipaca Villajun revistapi temata, subtitulocunata, fotocunata o dibujocunata, recuadro nishcacunata ricungapaj shuj tiempoguta llujchina capanchi. Shinaca cada parrafota liishpa, textocunatapash liishpami ali pensarina capanchi. Shina prepararijushpaca imatalla comentanatapash agllapai. Shina ali prepararishpaca comentangapapash na manllashpami ñucanchillata cushilla sintirishun (2 Cor. 9:6).

16. Tandanajuicunapa ali prepararingapaca ¿ima ayudacunatata charipanchi? Chaicunataca ¿utilizajupanguichu?

¹⁶ Jehovapa organización cushca ayudacunata utilizapashunchi. Jehová Diosca paipa organizacionhuanmi tandanajuicunapa prepararingapaj huaquin ayudacunata cushca. JW Library^® aplicacionga celularpi o tabletpi descargashca publicaciongunata charichunmi ayudan. Shinami maipi cashpapash o ima horas cashpapash chai publicaciongunata yachajunata, liinata, uyaitapash ushanchi. Huaquin huaquipanicunaca trabajopi, escuelapi o colegiopi samana horaspimi Bibliamanda yachajungapaj cai aplicacionda utilizan. Huaquingunacarin maimanbash rijushpami cai aplicacionda utilizan. Shinallata Watchtower Library, INTERNETPI BIBLIOTECA Watchtower^™ nishcacunatapash charipanchi. Chaicunami Bibliata ashtahuan intindichun ayudan.

17. a) ¿Imamandata comentariocunata ali prepararina capanchi? b) Jehová Diospa amigo tucupai: Comentangapaj aliguta prepari nishca videomandaca ¿imatata yachajupangui?

¹⁷ Villajun revistapi huaquin parrafocunapi comentangapaj prepararipangui. ¿Imamandata huaquin comentariocunata ali prepararina capanchi? Huaquinbica comentangapaj tauca huauquipanicuna maquita alzajpimi, Villajun revistata yachachij huauquica ñucanchicunata na comentachin. Chaimandami huaquin comentariocunata ali prepararishca charina capanchi. Shinallata ama tiempota yalingapami Villajun revistata yachachij huauquica huaquingunatalla comentachin. Shinaca callari parrafocunapi na comentachijpica na culirashpa, na llaquirinachu capanchi. Parrafocunapi na comentai ushashpapash shuj textogutallapash liingapaj, ñucanchi  propio shimicunapillata comentangapaj esforzaripashunchi. *

18. ¿Imamandata ashalla shimicunapi comentana capanchi?

¹⁸ Ashalla shimicunapi comentapashunchi. Intindirinalla, ashalla shimicunapi comentajpica shujcunatami cushichishun. Shinaca 30 segundocunapilla comentangapaj esforzarina capanchi (Prov. 10:19; 15:23). Tauca huatacunata ña Testigo cashpapash 30 segundocunapilla comentangapaj esforzarina capanchi. Shinami mushujcuna imashina comentana cashcata yachajunga. Shuj parrafomanda ashtacata comentajpica shuj huauquipanicuna uyashpaca shina comentaitaca na ushashachu yashpami maquita na alzanga. Shinaca ashalla shimicunahuan comentajpica shuj huauquipanicunapashmi comentangapaj munanga. Parrafopa tapuita rurajpica ñucanchicunata primero comentachun mañajpica, párrafo enterotaca na comentanachu capanchi. Chaipa randica intindirinalla, ashalla shimicunapimi comentana capanchi. Parrafomanda minishtirishca yuyaicunata ña comentashca cajpica shuj yuyaicunamandapashmi comentaita ushapanchi (“ ¿Imacunatallata comentai ushanchi?” nishca recuadrota ricupangui).

19. Villajun revistata yachachij huauquitaca ¿imatata ni ushapangui?

¹⁹ Villajun revistata yachachij huauquitaca shuj parrafopi comentachichun mañapai. Tandanajui nara callarijpillatami chai huauquihuan shuj parrafomanda comentachihuai ni ushapangui. Chai parrafoman chayajpica uchallami maquita alzana capangui.

20. ¿Tandanajuicunaca imapita ali amigocunahuan micungapaj rishca cuenda can?

²⁰ Tandanajuicunapi huauquipanicunahuan igual canaca shuj ali amigocunahuan micungapaj rishca cuendami can. Huauquipanicuna micungapaj invitashpa, imagutapash apashpa shamupangui nijpica ¿imatata ruranchiman? Imaguta apashpapash pingaimandami gushtangacha o nacha gushtanga nishpa pensarinchi. Shinapash tucuicuna gushtashcata apangapami esforzarinchi. Cunanga caipi pensaripashunchi, Jehová Diosmi tandanajuicunaman ñucanchitaca invitashca. Chai tandanajuicunapica ashtaca micunata carajuj cuendami Jehová Diosca Bibliamanda yachachijun (Sal. 23:5; Mat. 24:45). Shinapash Jehová Diosca tandanajuicunapa prepararichun, comentachunmi mañan Shinaca tucui shunguhuan imagutapash rurajpica Jehová Diosca ninandami cushijun. Jehová Dios carashcacunamandaca na ñucanchilla yachajushunllu. Ashtahuangarin shujcunapash yachajuchunmi ayudashun.