1, 2. a) Efesios 6:16​pi nisha shinaca ¿imatata rurana capanchi? b) ¿Maijan tapuicunamandata yachajugripanchi?

‘ALIPACHA crina jarcarina escudotashna’ charinaca minishtirishcapachami can (Efesios 6:16, liingui). Soldadocuna macanajui horasca chai escudomi paipa cuerpo enterota pacan carca. Chai escudoshnami feta charinaca cai mundopa nali ruraicunamanda, huainayanamanda, ama shujcunata llaquichinamandapash jarcarichun ayudan.

² ‘Tucurimui punllacunapi’ causanajuimandami shinlli feta charishcata o na charishcatapash ricuchina capanchi (2 Tim. 3:1). Shinapash ¿imashinata shinlli feta charishcata ricuchipanchi? Shinlli feta charishpa catingapaca ¿imatata rurana capanchi? ¿Imashinata shinlli feta charishpa catita ushapanchi? Chaitaca cai temapimi yachajupashun.

3. Soldadocunaca ¿imashinata paicunapa escudocunataca cuidan carca?

³ Punda tiempomanda soldadocunapa escudocunaca animalpa carahuan rurashcami carca. Shinallata chai escudocunaca fierrotapashmi charirca. Chaimi soldadocunaca chai fierrocuna ama jirrunbrachun aceitecunata churan carca. Paicunapa escudocuna huaglijujta ricushpaca soldadocunaca uchashpami conponen carca. Ña conponeshpaca soldadocunaca macanajungapaj ña listomi carca. Cai chimbapuraica ¿imashinata ñucanchi shinlli feta charishcata ricuchin?

4. a) Shinlli feta charishcata yachanaca ¿imamandata minishtirishca can? b) Shinlli feta charishcata yachangapaca ¿imatata rurana capanchi?

⁴ Punda tiempomanda soldadocunaca paicunapa escudocunataca cuidanmi carca. Shina cuendami ñucanchicunapash chai escudotashna ñucanchi feta cuidariana capanchi. Cada unomi shinlli feta charishcata o na charishcata ricuchina capanchi.  Shinallami Jehovata sirvijcunaca, ninan ushaita charij ayacunahuan macanajungapaj listo cashcata ricuchipashun (Efes. 6:10-12). Llaquicunata charishpaca chai llaquicunata aguantangapaca ¿imatata rurana capanchi? Primero, Jehovata mañapashunchi. Jipaca Diospa ñaupajpi ali cashcata yachangapami Diospa Shimita liina capanchi (Heb. 4:12). Bibliapica ninmi: “Mandaj Diostaca, cambaj tucui shunguhuan yariangui. Aligutapacha yarishpami purini yashpaca, ama jariyanguichu” nishpa (Prov. 3:5, 6). Chaimi cashna tapurina capanchi: “¿Imatapash ruragrijushpaca alichu agllashcani? Por ejemplo, culquimanda imapash problemacunata charishpaca ¿Hebreos 13:5​pi Jehová Dios nishcacunata yarircanichu?” nishpa. Cai textopica ninmi: “Candaca na jichushachu, na saquishachu” nishpa. Cai shimicunaca ¿Jehovapi confiachunllu ayudashca? Cai shimicunata yarishca cashpaca shinlli feta charishcatami ricuchijupangui.

5. Na shinlli feta charishcataca ¿imashinata yachai ushapanchi?

⁵ Nali munaicunata, nali yuyaicunata, nali ruraicunata charishcata cuenta japishpaca na shinlli feta charishcatami talvez ricuchipashun. Chaita cuenta japishpaca ñucanchillatami llaquilla sintiripashun. Shinallata yapata preocuparijuna, llullana, llaqui llaqui sintirijunaca ñucanchi fe na shinlli cashcatami ricuchinchiman. Shina pasajujpica ¿imatata rurana capanchi?

6. ¿Imatata tucuicunallata munapanchi?

⁶ Jehovata, Jesusta cushichingapaj preocuparinaca alimi can (1 Cor. 7:32). Ñucanchicuna juchapi urmashca cashpaca Jehová Dioshuan cutin ali amigo cangapami ninanda esforzarinchi (Sal. 38:18). Cusahuarmicunaca cushilla causangapami randimanda ayudarin. Shinallata tucuicunallatami familia ucupi cushilla cangapaj, huauquipanicunahuanbash cushilla yalingapaj munapanchi (1 Cor. 7:33; 2 Cor. 11:28).

7. a) ¿Imacunamandata na yapata preocuparina capanchi? b) Proverbios 29:25​pi nishca shinaca ¿imamandata gentecunataca na manllana capanchi?

⁷ Yapata preocuparinaca shinlli feta charichunga na ayudanllu. Ashtaca ropata charina, yapalla micunata charina munaipash shinlli feta charichunga na ayudanllu (Mat. 6:31, 32). Chaicunapi yapata preocuparijushpaca ashtahuan cosascunata charingapaj, culquita ashtahuan charina munaihuanllami causanajunchiman. Shina causajushpaca shinlli fetapash na charita ushashunllu. Shinallata Jehovata aliguta sirvitapash na usharingachu (Mar. 4:19; 1 Tim. 6:10). Shinallata gentecunapa ñaupajpi ali ricurinatara, na cashpaca gentecuna ñucanchimanda burlaringa yashpami yapata preocuparinchiman. Chaicunapira preocuparijushpaca, Jehovapa ñaupajpi nali cashcatapash na cuenta japishunllu. Ama cashna pasachunga ¿imatata rurana capanchi? Shinlli feta charingapaj, ama manllangapaj ayudahuai nishpami Jehovata mañana capanchi (Proverbios 29:25, liingui; Luc. 17:5).

8. Jehovamanda, huauquipanicunamanda llullacunata parlanajujpica ¿imatata rurana capanchi?

⁸ Diabloca “llullapacha cashpami, llullapaj taita” can. Chaimi Jehová Diosmanda, Jehovata sirvijcunamanda llullacunata nichunmi cai mundomanda gentecunata Diabloca utilizan (Juan 8:44). Por ejemplo, apostatacunaca Jehovapa organizacionmanda llullacunata nishpami Internetpi, telepi, radiocunapi, shuj cosascunapipash villashca. Chai llullacunaca “Diablo flecha pundapi ninata japichishpa” shitamujuj cuendami can (Efes. 6:16). Llullacunata parlanajujta uyashpaca ¿imatata rurana capanchi? ¿Imamandata chai llullacunataca na uyana capanchi? Jehovapi, huauquipanicunapi confiaimandami chai llullacunataca na uyana capanchi. Ashtahuanbachaca apóstata nishcacunahuanga nimamanda na parlanachu capanchi.

9. Llaqui llaqui sintirijushpaca ¿imata pasaita ushan?

⁹ Llaqui llaqui sintirijushpaca shinlli feta charitaca na ushashunllu. Huaquinbica problemacunata  charimandami llaqui llaqui sintiri ushapanchi. Shinapash problemacunata charishpaca cungashca causaitaca na ushapanchichu. Chai problemapilla pensarinajushpaca Jehová Dios carasha nishcacunatapashmi cungaita ushapanchi (Apoc. 21:3, 4). Llaqui llaqui cashpaca shaijushca caimandami Jehovata sirvinatapash saquita ushapanchiman (Prov. 24:10). Chai pasachunga ama saquipashunchichu.

10. Shuj panigumandaca ¿imatata yachajui ushapanchi?

¹⁰ Cunanga Estados Unidos llactamanda shuj panigu shinlli feta charishpa catishcata yachajupashunchi. Chai paniguca paipa cusa irqui cajpimi cuidana tucurca. Chai paniguca Estados Unidos llactamanda Jatun Betelmanmi shuj cartata cacharca. Paica nircami: “Llaquicunahuan cashpaca llaqui llaquimi sintiripashcanchi. Shinapash Jehová Dios carasha nishcacunataca siempremi yaripanchi. Shinallata ñucanchi shinlli feta charishpa catichun, ama llaqui llaqui sintirichunmi publicaciongunaca ayudahuashca. Chai publicaciongunapi yuyaicunaca alipachami cashca. Chaicunami ñucanchitaca ñaupaman catichun, llaquicunahuan Diablo llaquichijpipash aguantashpa catichun ayudahuashca” nishpa. Cai panigupa shimicunaca ñucanchicuna llaqui llaqui cashpapash ñaupaman catichunmi ayudan. Shinallata Diablo ñucanchita llaquichingapaj munajpipash Jehovapi confiashpa catipashunchi. Jehová Dios cushca publicaciongunatapash ali utilizapashunchi.

11. Shinlli feta charishcata yachangapaca ¿ima tapuicunatata tapurina capanchi?

¹¹ Shinlli feta charinaca shuj jatun escudoshnami can. ¿Chai escudota cuidanaca minishtirishcachu can? Ari, minishtirishcami can. Tauca quillacuna huashaman ñucanchicuna imashna cashcapi pensaripashunchi. Tapuripashunchi: “¿Ama yapata preocuparingapaj esforzarishcanichu? ¿Apostatacunata ama uyangapaj, paicunahuan ama parlangapaj esforzarishcanichu? ¿Llaqui llaqui ama cangapaj esforzarishcanichu?” nishpa. Caicunata rurajushpaca, shinlli feta charishcatami ricuchinajupanchi. Shinapash shinlli feta charini nishpaca na confiarinachu capanchi. Diabloca shuj cosascunahuanbashmi ñucanchitaca pandachingapaj munan. Chaipaca shuj yuyaimanda yachajupashunchi.

12. Charijyana munaicunaca ¿imamanda apaita ushan?

¹² Charijyana munaicunaca shuj cosascunapira pensarichun, shinlli feta charichunbash na ayudanllu. Apóstol Pabloca nircami: “Pipash soldado tucushpaca, na cai causaipajlla imatapash ruranacunahuan huatarinshna pandarinllu. Soldado cachun paita agllajta cushichingapajmi, na chashna causan” nishpa (2 Tim. 2:4). Punda tiempopi romano soldadocunaca negociocunataca na charinachu carca. Na cazushpa negociota charij soldadotaca ¿imatata rurana carca?

13. Soldado romanocunaca ¿imamandata negociocunataca na charina carca?

¹³ Cunanga caipi pensaripashunchi. Tucuilla soldadocunami cada punlla imashina macanajunata cutin cutin yachajun. Shinapash paicunapuramanda shujca micunata jatunapirami ocupado yalin. Chishica chai soldadocunaca paicunapa escudocuna ali cachunmi cutin cutin ricun. Shinallata paicunapa espadatapashmi afilan. Cutin shuj soldadoca cayandi punlla micunata jatunatarami segurajun. Soldadocunapa contracunaca na yashcapimi cayandi punlla llaquichingapaj shamun. Shinaca ¿maijan soldadota listo cashcata ricuchin? ¿Cutin cutin yachajushca soldado o micunatara segurajushca soldadochu listo cashcata ricuchin? Macanajungapaj listo cashca soldadomi soldadocunata ñaupaman pushajpa ñaupajpi alicachi tucushca quedanga. Ñucanchicunaca ¿maijan soldadoshnata cangapaj munapanchi?

14. Jesusta ali catijcunapaca ¿imata ashtahuanbachaca ali can?

¹⁴ Ali yachajushca soldadoshnami ñucanchicunapash Jehovapa, Jesuspa ñaupajpi ali cangapaj munapanchi. Diabloca imacunatapash cai mundopi rurachunmi munan. Shinapash ñucanchipaca Jehová Diospa ñaupajpi ali canami ashtahuanbachaca ali can. Chaipaca tiempota, ñucanchi rurai ushashcatami Jehovata sirvingapaj ali utilizana capanchi. Shinallami shinlli feta charishpa cati ushapashun. Shinallata espiritualmente macanajungapaj tucui churajunacunatami churajushca catina catipanchi.

15. Apóstol Pabloca ¿imacunatallata nirca?

¹⁵ Shinlli feta charishpa catingapami ninanda esforzarishpa catina capanchi. Apóstol Pabloca  nircami: ‘Ninandapacha culquita munajcunaca’ paicuna ‘crishpa catijushcatapash saquinllami’ nishpa (1 Tim. 6:9, 10). “Crishpa catijushcatapash saquin” nishpaca na minishtirishca cosascunatara charingapaj munashcatami ningapaj munan. Ñucanchica ‘shinlli shungu tucushpami’ huaquinbica nalicunatara rurai ushanchiman. Chai nali munaicuna ñucanchi shunguta huaglichichunga na saquinachu capanchi. Diabloca ñucanchicuna shinlli feta ama charichunmi chai nali munaicunahuan pandachingapaj munan.

16. Lucas 18:18-23​ta liishca jipaca ¿imatata tapurina capanchi?

¹⁶ Cunanga caipi pensaripashunchi. Ashtaca cosascunata randingapaj culquita charishcanchiman. Shinapash na minishtishpata yangata randinaca ¿alichu canman? Na minishtishpata randinaca nalichu canman. Shinapash cai tapuicunapi pensaripashunchi: Randi ushashpapash ¿chaicunata utilizangapaj fuerzata charinichu? Na cashpaca chai cosascuna huaglijpica ¿imatata ruragrini? Charishca cosascunapira yapata pensarijunaca ¿alichu canman? nishpa. Shina pensarijushpaca Jesuspa tiempopi charij charij jovenshnami caita ushanchiman. Chai jovenga Jesuspa invitaciondaca na chasquircachu (Lucas 18:18-23, liingui). Charishcaguhuanlla cushilla causashpaca Jehovata sirvingapajpash ashtahuan tiempotami charishun. Shinallata ñucanchi charishca fuerzatapash Jehovapa munaita pactachingapami utilizaita ushapashun.

17. Huauquipanicunaca ¿imatata na rurai ushan?

¹⁷ Cada punllami shuj macanajui cuendata charipanchi. Chaimi macanajungapaca siempre listo cana capanchi (Apoc. 12:17). Ñucanchi huauquipanicunaca ñucanchi shinlli feta charichunga na imatapash rurai ushanllu. Ñucanchimi shinlli feta charingapaca esforzarina capanchi.

18. Macanajuj soldadocunaca ¿imamandata escudotaca tucui fuerzahuan charin carca?

¹⁸ Punda tiempopi macanajuj soldadotaca na manllashpa macanajujtami ninanda alicachishpa ricun carca. Shinapash chai soldado escudo illaj chayamushpaca paipaca shuj jatun pingaimi carca. Roma llactamanda Tácito shuti jarica escribircami: “Macanajuipi escudota chingachishpa shamunaca shuj jatun pingaimi carca” nishpa. Chaimandami macanajuj soldadocunaca escudotaca tucui fuerzahuan charin carca.

19. ‘Alipacha crina jarcarina escudotashna japingapaca’ ¿imatata rurana capanchi?

¹⁹ Chai soldadoshna ñucanchi feta shinlliyachingapaca, tucui tandanajuicunamanmi rina capanchi. Shinallata tucui gentecunaman Jehová Diospa shutita, paipa Reinomandapashmi villachina capanchi (Heb. 10:23-25). Ashtahuanbash, Bibliatami cada punlla liina capanchi. Shinallata Bibliapi liishcata ñucanchi causaipi pactachingapaj ayudahuai nishpami Jehová Diosta mañana capanchi (2 Tim. 3:16, 17). Shina rurajpimi Diablo ñucanchita imacunahuanbash llaquichishpa catitaca na ushangachu (Is. 54:17). ‘Alipacha crina jarcarina escudotashna japinami’ ñucanchicuna shinlli feta chari ushachun ayudanga. Shina rurashpami cada punlla charishca llaquicunata mishai ushashun. Shinallata ñucanchi huauquipanicunahuanbash Jehová Diosta ali sirvishpa cati ushashun. Shinami Diablota, paipa nali angelcunatapash Jesús llaquichijpica ñucanchica Jesuspa lado cashcata ricuchipashun (Apoc. 17:14; 20:10).