1, 2. a) ¿Imata ciertopacha ashtahuan importante can? b) ¿Imamandata Jehová Dios mandachun apoyana cashcataca ashtahuan ali intindina capanchi?

ASHTACA gentecunapaca culquimi ashtahuan importante can. Chaimandami ashtaca culquita charingapaj, o ahorrashca culquita ama tucuchingapaj imatapash ruran. Cutin shujcunapaca, paicunapa familia, sano cana, paicunapa munaicunata pactachinami ashtahuan importante can.

² Shinapash ¿imata ciertopacha ashtahuan importante can? Jehová Dioslla Ali Mandaj cashcata ricuchinami ashtahuan importante can. Chaitaca nunca na cunganachu capanchi. Chaita cungashpaca cada punlla ruraicunapi, ñucanchi problemacunapirami preocuparinchiman. Shinallata, Jehová Dios mandachun apoyana cashcata ashtahuan ali intindishpaca, llaquicunatapash aguantai ushashun, Jehová Diosmanbash ashtahuanmi quimirita ushashun.

3. Diabloca ¿imatata Jehová Diosmandaca crichingapaj munan?

³ Diabloca umachishpami crichingapaj munan, Jehová Diosca mandana derechotaca na charinllu, na ali mandanllu, gentecuna ali causachunga na munanllu, gentecunallata mandashpami ashtahuan ali causanga nishpa (Gén. 3:1-5). Shinallata llullashpami Diabloca nishca, gentecunaca Taita Diosta tucui shunguhuan cazuitaca na ushanllu. Llaquicunapi cashpaca, Taita Diosta ladoman saquingallami nishpa (Job 2:4, 5). Diablo shina nishpa llullashcamandaca ¿imatata Jehová Diosca rurashca? Jehová Diosca, pailla Ali Mandaj cashcata tucui gentecuna cuenta japichunmi tiempo yalichun saquishca.

4. ¿Imamandata Jehová Dioslla Ali Mandaj cashcata ricuchinaca minishtirishca can?

⁴ Jehová Diosca Diablo llullajujtaca alimi yachan. Shinaca ¿imamandata Jehová Diosca pailla Ali Mandaj cashcata ricuchingapaca tiempo yalichun saquishca? Angelcunamanda, gentecunamandami saquishca (Salmo 83:18, liingui). * Adán y Evamanda callarishpa ashtaca gentecunami, Jehová Dios mandachunga na munashca. Chaimandami huaquin gentecunaca pensaita ushanman, Diabloca ciertotami nijushca nishpa. Shinaca, angelcunapash, gentecunapash Jehová Dioslla Ali Mandaj cashcata intindijpillami, tranquilo, ali causaica tiaita ushan. Jehová Dioslla Ali Mandaj cashcata ricuchishca jipami, gentecunaca Jehová Dios mandajpi causashun. Chai punllacunapimi jahua pachapipash, cai Alpapipash tranquilo ali causai tianga (Efes. 1:9, 10).

5. Jehová Dios mandachun apoyashcataca ¿imashinata ricuchi ushapanchi?

⁵ Jehová Dioslla Ali Mandaj cashcata ricuchijpica, tucuicunami Diablopash, gentecunapash na ali mandai ushashcata cuenta japinga. Diablopa, gentecunapa gobiernoca tucuchi tucungami. Jehová Diosca paipa Churi Jesusta mandachun churashpami tucuita mishanga. Jehová Diosta cazuj gentecunapash Jehová Diosmanda na caruyashpa pailla mandachun apoyashcatami ricuchi ushanga (Is. 45:23, 24). ¿Nachu ñucanchicunapash Jehová Diosta cazujcunapurapi cangapaj munapanchiman? Shina cashpaca, Jehová Dioslla Ali Mandaj cashcata ricuchina minishtirishca cashcatami, ali intindina capanchi.

6. ¿Imata ñucanchipaca ashtahuan importante cana can?

⁶ Imashinami ricupashcanchi, ñucanchicuna cushilla causana importante cajpipash, Jehová Dioslla Ali Mandaj cashcata ricuchinami tucuimanda ashtahuan yali importante can. Shinapash na pensanachu capanchi, ñucanchi salvarinaca na importantechu cashca, Jehová Diosca na ñucata llaquihuashcachu nishpa. ¿Imamandata na shina pensana capanchi? Ricupashun.

7, 8. ¿Imashinata Jehová Dios pailla Ali Mandaj cashcata ricuchishpa ñucanchitapash ayudan?

⁷ Jehová Diosca ashtacatami ñucanchitaca juyan. Chaimandami ñucanchita juchamanda  salvashpa, para siempre causachun munashpa paipa Churipa causaita curca (Juan 3:16; 1 Juan 4:9). Jehová Dios paipa nishcacunata na pactachijpica, Diabloca ciertota nijunshnallami ricurinman. Shinallata, Jehová Diosca nali mandajshnalla, gentecuna ali causachun na munajshnallami ricurinman. Jehová Diospa contracunapash burlarishpami ninajun: ‘Maita pactanyari. Taitacuna huañushca punllamandapachami chashnallata tiajunlla’ nishpa (2 Ped. 3:3, 4). Chaimandami Jehová Diosca Ali Mandaj cashcata ricuchishpa, paita cazuj gentecunatapash salvanga (Isaías 55:10, 11, liingui). Ashtahuangarin, Jehová Diosca juyashpa ali mandaj Taita Diosmi can. Chaimandami, paita sirvijcunata siempre juyanataca seguro canchi (Éx. 34:6).

⁸ Jehová Diospaca, pai Ali Mandaj cashcata ricuchina importante cajpipash, ñucanchicuna salvarinapash importantemi can. Paica ninandami ñucanchitaca cuidajun. Ñucanchicunapash ima ashtahuan importante cashcata yaria causashpami Jehová Dios mandachun apoyana capanchi.

9. Job libropi nishca shinaca, Diabloca ¿imatata Jobmandaca nirca? (Callari dibujota ricupangui).

⁹ Job libropica, imata yaria cana cashcatami aliguta intindichin. Job libropi nishca shinaca, Diabloca nircami, llaquicunahuan sufrijushpaca, Jobca millanayachishpami Taita Diosmandaca caruyanga nishpa. Diabloca Jehová Diostaca nircapashmi, Jobtaca canllata llaquichi nishpa. Shinapash Jehová Diosca, Jobta na llaquichingapaj munashpami Diablotaca nirca, Job ‘imatalla charishcacunataca canba maquipimi’ saquini nishpa (Job 1:7-12, liingui). Shina nijpimi Diabloca, asha tiempopilla Jobpa sirvijcunatapash, paipa juyashca 10 huahuacunatapash huañuchirca. Jobpa charishca cosascunatapash quichurca. Diabloca, Jobta Jehová Dios llaquichijushcata crichingapami munarca (Job 1:13-19). Shuj millanai ungüihuanbashmi Diabloca Jobtaca llaquichirca (Job 2:7). Ashtahuangarin, Jobpa huarmipash, paipa amigocunapashmi nalicunata nishpa Jobtaca desanimachirca (Job 2:9; 3:11; 16:2).

10. a) ¿Imashinata Jobca Jehová Diosta tucuipi cazushcata ricuchirca? b) ¿Imapita Jobca pandarirca?

¹⁰ Diablopa nishcacunaca ¿ciertochu carca? Na. Jobca nunca na Jehová Diostaca saquircachu (Job 27:5). Shinapash asha tiempotaca, imata yaria cana cashcata cungashpami Jobca, paipira pensarishpa, Jehová Diostapash imamandata cashna llaquicunata charini nishpa reclamarca (Job 7:20; 13:24). Huaquinbica pensanchipashchari, ashtacata sufrijuimandami Jobca shina nirianga nishpa. Shinapash Jehová Diosca, Job pandarijushcata ricushpami paitaca aliguta intindichirca. ¿Imashinata intindichirca? Ricupashun.

11. Jehová Diospa ayudahuanga ¿imatata Jobca intindirca?

¹¹ Jobman Jehová Dios imata nishcata yachangapaca, Job capítulo 38manda 41camamanmi ricuna capanchi. Shinapash chai capitulocunapica, Job imamanda sufrijushcataca Jehová Diosca na imatapash nircachu. Ashtahuangarin, ama paipilla preocuparichunmi Jehová Diosca, paica tucui poderta charij Taita Dios cashcata, cutin Jobca imapash yangallagu cashcata intindichirca (Job 38:18-21, liingui). Shina intindichijpimi Jobca, imata yaria causana cashcata ali intindirca.

12. Aliguta intindichishpa ayudajpica ¿imatata Jobca rurarca?

 ¹² Jehová Diosca ¿Job sufrijujpipash na llaquishpachu imata yaria causana cashcata intindichirca? Na. Jobca Jehová Dios ayudangapaj munashcataca intindircami. Ashtahuangarin nircami: “Llaquirishpami, ñutu alpapi, uchufapi tiarini” nishpa (Job 42:1-6). Jehová Dios nara ayudajpica, Elihú shuti joven runagupashmi Job pandarijushcata intindichishpa ayudarca (Job 32:5-10). Shujcunapa consejota Job ali chasquijta ricushpami Jehová Diosca, ashtacata Jobtaca alicachirca (Job 42:7, 8).

13. Llaquicuna tucurishca jipapash ¿imashinata Jehová Diospa ali shimicunaca Jobta ayudashpa catirca?

¹³ Llaquicuna tucurishca jipapashmi, Jehová Diospa ali shimicunaca Jobta ayudashpa catirca. Bibliapica ninmi: “Job runagutaca jipa punllacunapica, punda bendiciashcatapash yalimi bendiciarca” nishpa. Shinami Jobca, ‘canchis churitapash, quimsa ushitapash charirca’ (Job 42:12-14). Jobca paipa huahuacunata juyashpapash, paipa huañushca huahuacunataca llaquirishpami yarijushcanga. Shinallata, paipash, paipa familiapash imashina sufrishcataca llaquirishpami yarijushcanga. Imamanda sufrishcata intindishpapash, Jobca huaquinbica tapurijushcangami, ¿imamandata shinapacha sufrina carcani? nishpa. Shina yuyaicuna shamujpica, Jehová Dios imata nishcata yarishpami Jobca alillata sintirishpa, imata yaria causana cashcata intindishpa causashcanga (Sal. 94:19).

14. Jobmandaca ¿imatata yachajupanchi?

¹⁴ Job ima pasashcata yarinami ñucanchicunatapash imata yaria causana cashcata intindichun, animarichun ayudanga. Jehová Diosca ñucanchicuna aguantachun, ‘yachajuchun, japigrinata yariajlla’ causachunmi Job ima pasashcataca paipa Shimipi escribichishca (Rom. 15:4). Shinaca, ¿imatata yachajuna capashcanchi? Ñucanchi problemacunapi yapata preocuparijunapa randica, Jehová Dioslla Ali Mandaj cashcata ricuchina importante cashcatami yaria cau sana capanchi. Shinallata, siempre yaripashun, jatun llaquicunapi cashpapash, Jobpa ejemplota catishpa Jehová Diosmanda na caruyashpami, Jehová Dios mandachun apoyanajushcata ricuchipanchi.

15. Llaquicuna japijpipash Jehová Diosmanda na caruyashpaca ¿imatata ricuchipanchi?

¹⁵ Imashinami Jobpa causaipi ricupashcanchi, llaquicunapi cashpaca na pensanachu cashcanchi, Jehová Diosca ñucanchihuan culirashcami can nishpa. Llaquicunapi cashpaca, Jehová Dios mandachun munashcatami ricuchina capanchi (Prov. 27:11). Llaquicunata aguantashpaca, Jehová Diospa ñaupajpica alimi ricurishun. Shamuj punllacunapi imata japinatapash seguromi cashun (Romanos 5:3-5, liingui). Jobpa ejemplopi ricushca shinaca, Jehová Diosca “ninanda llaquishpa, juyaj” Taita Diosmi can (Sant. 5:11). Shinaca, Jehová Dios mandachun apoyajcunata bendicianataca, seguromi cana capanchi. Shinami, ima llaquicuna shamujpipash, cushilla aguantashpa catita ushashun (Col. 1:11).

16. Jehová Dioslla Ali Mandaj cashcata ricuchinataca ¿imamandata yaria causana capanchi?

¹⁶ Jehová Dioslla Ali Mandaj cashcata ricuchina minishtirishca cashcata yaria causanaca na facilchu can. Ashtahuanbachaca llaquicunapi cashpami, imata yaria causana cashcata yarinaca shinlli can. Huaquinbicarin, yapata pensarijuimandami uchilla problemacunapira yapata preocuparinajunchi. Chaimandami llaquicuna japijpipash, Jehová Dios mandachun apoyana minishtirishca cashcataca siempre yaria causana capanchi.

17. ¿Imamandata Jehová Dios mingashcata pactachinapi ocupado canaca, Jehová Dioslla Ali Mandaj cashcata ricuchina minishtirishca cashcata yaria causachun ayudan?

¹⁷ Jehová Dios imata mingashcata pactachinapi ocupado cashpaca, Jehová Dios mandachun apoyanata yaria causana cashcatami intindishun. Shuj ejemplota ricupashun. Renee shuti panigutaca derrame cerebraltami curca. Ashtaca nanaicunatami charirca, cancertapashmi charirca.  Tratamientocunapa hospitalman rishpaca, chaipi doctorcunaman, enfermeracunaman, shuj ungushcacunaman, paita visitangapaj rijcunamanmi villachin carca. Shuj viajeca, ishcai semana chaupita hospitalpi cashpami 80 horascunata villachirca. Huañugrijushpapash, paipaca Jehová Dioslla Ali Mandaj cashcata ricuchinami ashtahuan importante carca. Shinami paica alillata sintirin carca.

18. ¿Imashinata shuj panigupa ejemploca Jehová Dios mandachun apoyanata yaria causachun ayudan?

¹⁸ Tucui punllacunami uchilla problemacunataca charinchi. Chaicunapipash Jehová Dios mandachun apoyajushcata ricuchinataca yariami cana capanchi. Jennifer shuti panigupa ejemplota ricupashun. Paica avionbi huasiman tigragrijushpami aeropuertopi shuyajurca. Shinapash aviongunaca shujpash shujpash na rishpami quedanajurca. Chaimandami paica quimsa punllacunata aeropuertopi carca. Paica pensarita ushanmanmi carca, caipica ñucagullami cani, shaijushcami cani nishpa. Shinapash paica na shina pensarijurcachu. Chaipa randica, shuyanajuj gentecunamanbash villachingapaj ayudahuai nishpami Jehová Diostaca mañarca. Shinami Jennifer paniguca ashtaca gentecunahuan parlarca, ashtaca revistacunata, folletocunatapash saquirca. Paica ninmi: “Aeropuertopi shuyashpa tiajunaca shinllimi can. Shinapash Jehová Diosca bendiciahuarcami. Paipa shutita jatunbi churachunmi fuerzata cuhuarca” nishpa.

19. Jehová Diospa llactaca ¿imatata rurashca?

¹⁹ Panda religionguna na intindijpipash, Jehová Diospa llactaca Jehová Dios mandachun apoyana minishtirishca cashcata intindishpami, siempre apoyajushca. Ñucanchicunapash, cada unomi Jehová Dioslla Ali Mandaj cashcata ricuchingapaj esforzarina capanchi.

20. Pai mandachun apoyanajujcunataca ¿imashinata Jehová Diosca ricun?

²⁰ Ima llaquicuna ricurijpipash aguantashpa, paita ali sirvishpa, pai mandachun apoyajujcunataca tucui shunguhuan alicachishpami Jehová Diosca ricun (Sal. 18:25, NM). Cati temapica, Jehová Dios mandachun imamanda apoyana cashcata, imashina apoyana cashcatami ashtahuan yachajupashun.