1, 2. ¿Imatata ali yachana, ali intindina capanchi? (Callari dibujota ricupangui).

IMASHINAMI ñaupa temapi ricuparcanchi, Diabloca crichingapami munan, Taita Diosca mandana derechotaca na charinllu, gentecunapash paicunallata mandashpami ashtahuan ali causanga nishpa. Shinapash ¿chaica ciertochu can? Yuyapai. Paicunallata mandashpa causangapaj munaj gentecunaca, para siempre causaita ushashcanman. ¿Paicunallata mandashpa o Taita Dios mandajpichu ashtahuan ali causanman? ¿Para siempre causashpa, quiquinllata tucuita decidi ushashpachu ashtahuan cushilla causaita ushanguiman?

² Chaitaca tucuicunallatami aliguta pensarishpa cada uno ricuna capanchi. Jehová Dioslla mandana derechota charishcataca tucuicunami ali yachana capanchi. Pailla ali mandanata, paita apoyanataca alimi intindina capanchi. Shinapash ¿imamandata Jehová Dioslla mandana derechota charin? Huaquin yuyaicunata Bibliapi ricupashun.

3. ¿Imamandata Jehová Dioslla mandana derechota charin?

³ Jehová Diosca Tucuita Ruraj, Tucui Ushaita Charij Taita Diosmi can. Chaimandami paica mandana derechota charin (1 Crón. 29:11; Hech. 4:24). Apóstol Juanga shuj muscuipishnami, Jesushuan mandana 144.000 gentecunata ricurca. Paicunaca Jehová Diostaca ninajurcami: “Jatun Dioslla, canmi tucui imatapash rurashcangui. Can munashcamanda rurashcami, tucui ima cashpapash tian. Chaimandami canga, ninan punchapamba tiajunata, ninanda alicachi tucunata, ninan ushaihuan tiajunata chasquinapacha cangui” nishpa (Apoc. 4:11). Jehová Diosmi tucuita rurarca. Chaimandami paica angelcunatapash, gentecunatapash mandana derechota charin.

4. Imata ruranata agllai ushashpapash ¿imata agllana derechotata na charipanchi?

⁴ Diabloca imapash plantacunata, animalcunata ruraitaca na ushashcachu. Chaimandami paica mandana derechotaca na charin. Diablopash, Adán y Evapash Jehová Diosta na cazushpaca, Jehová Dios mandachun na munashcatami ricuchirca (Jer. 10:23). Paicunaca imata ruranata agllai usharcami. Shinapash ¿Jehová Dios paicunata na mandachun munashpa, Jehovata ladoman saquina derechota charircachu? Na. Ñucanchicunapash cada punllami imata ruranata agllai ushanchi. Shinapash, Tucuita Ruraj Jehová Dios ñucanchita na mandanachu can nishpa agllana derechotaca na charinchichu. Imashinami ricupanchi, Jehová Dios ñucanchita mandachun na munashpaca, nalitami ruranajunchiman. Gentecunaca Jehová Dios ñucanchita mandachunmi minishtinchi.

5. ¿Imamandata Jehová Diospa decisionguna ali cajtaca seguro caita ushapanchi?

⁵ Jehová Diosca tucui ima ali cajta ricushpa mandaj Taita Diosmi can. Chaimandami paica mandana derechota charin. Bibliapica Jehová Diosca ninmi: ‘Ñucami llaquijpash, aliguta ricushpa mandajpash, [alita] rurajpash cani’. Ñucaca chashna ruranatami alicachini nishpa (Jer. 9:24). Jehová Dios churashca leycunaca tucuimi ali can. Chaimandami alita rurangapaca, gentecuna churashca leycunata ricunataca na minishtin. Paillata ima ali cajta ricushpami gentecunamanga leycunata curca. Bibliapica ninmi, Jehová Diospa mandanaca ‘[alita] rurashpa, aliguta ricushpa callari rumishna shinllipachami can’ nishpa. Chaimandami Jehová Diospa leycuna, consejocuna, decisionguna ali cajtaca, seguro caita ushapanchi (Sal. 89:14; 119:128). Diabloca nijushcami, Jehová Diosca na ali mandaita ushanllu nishpa. Shinapash, Diabloca gentecunaman ali causaita cuitaca na ushashcachu.

6. ¿Imamandata Jehová Diosca cai mundota mandana derechota charin?

⁶ Paipa tucui rurashcacunata cuidangapaj imata ruranataca, Jehová Diosca tucuitami ali yachan. Chaimandami paica mandana derechota charin. Shuj ejemplota ricupashun. Doctorcunapash na jambi ushash ca ungüicunata jambina podertami Jehová Diosca Jesusmanga curca (Mat. 4:23, 24; Mar. 5:25-29). Jehová Diosca gentecunapa cuerpo imashina cajta, ali tucungapaj imata minishtijujtaca alimi yachan. Chaimandami gentecunata Jesús jambijpica, Jehová Diosca na manllarirca. Shinallata, gentecunata imashina causachinatapash Jehová Diosca alimi yachan. Terremotocuna, acapanacuna ama tiachun imata ruranatapash alimi Jehová Diosca yachan.

7. ¿Imamandata nipanchi, Jehová Diosllami tucuita ali yachan nishpa?

⁷ Cai mundotaca Diablomi mandajun. Huaquin llactacunapica paicunapurami huañuchirin. Shinallata guerracunapashmi tian. Tucui chaicunata tucuchingapaj munashpapash gentecunaca imata ruranataca na yachanllu. Jehová Diosllami cai mundo enteropi tranquilo causai tiachun imata ruranata ali yachan (Is. 2:3, 4; 54:13). Jehová Diosta ashtahuan ali rijsishpaca pai tucuita ali yachashcatami ashtahuan yachajushun. Ñucanchipashmi apóstol Pabloshna nishun: “Taita Diosca, tucui imatapash charij, ali yuyaita charij, aligutapacha yachajmi. Pai llaquichijujtaca, pipash na yachai ushanllu. Imashpa pai chashna rurajujtapash, na yachanllu” (Rom. 11:33).

8. Tucuita Ali Mandaj Jehová Diosmandaca ¿imatata ashtahuan alicachipangui?

⁸ Imashinami ricupashcanchi, Bibliapica Jehová Dioslla mandana derechota charishcatami yachachin. Shinallata, Jehová Dioslla Ali Mandaj cashcatami yachachin. ¿Imamandata Jehová Diosca Ali Mandaj can? Pundapica juyaj Diosmi can. Paica “tucuita ushaj, llaquij, juyaj, na ñapash fiñarij, ninanda llaquij, na llullaj” Taita Diosmi can (Éx. 34:6). Paica siempremi paita sirvijcunataca llaquishpa respetohuan tratan. Ñucanchicuna imashina cuidarinata na ali yachajpipash paica alimi ñucanchitaca cuidajun. Diabloca nishcami, Jehová Diosca gentecuna ali causachunga na munanllu nishpa. Shinapash chaica llullami can. Paica ñucanchicuna para siempre ali causachunmi munan. Chaimandami paipa juyashca Churipa causaita curca (Salmo 84:11; Romanos 8:32, liingui).

9. ¿Imashinata yachapanchi, Jehová Diosca cada unomanda preocuparishcata?

⁹ Jehová Diosca paita sirvijuj llactamanda preocuparishpapash, cada unomandami preocuparin. Israelitacunapa punllacunapi ima pasashcata ricupashun. Casi 300 huatacunatami, Jehová Diosca juezcunata churashpa israelitacunataca contracunamanda salvarca. Chai tiempocunapi ashtaca problemacuna tiajpipash, Jehová Diosca Rut shuti huarmigutaca alicachishpami ricurca. Rutca na israelitachu carca. Shinapash Jehová Diosta sirvingapami ashtacata esforzarirca. Chaimi Jehová Diospa bendicionhuanga shuj ali cusatapash, shuj huahuagutapash charirca. Rut causarishpaca, paipa churica Jesuspa punda familia cashcatami yachaj chayanga. Shinallata, paipa causaipash, Bibliapi escribishca  cashcatami yachaj chayanga. Chaicunata yachashpaca Rutca ninandami cushijunga (Rut 4:13; Mat. 1:5, 16).

10. ¿Imamandata nipanchi, Jehová Diosca llaquishpa mandaj Taita Diosmi can nishpa?

¹⁰ Jehová Diosca llaquishpa mandaj Taita Diosmi can. Chaimandami, pai mandajpi causanajuj gentecunaca, libre cushilla sintirin (2 Cor. 3:17, NM). Rey Davidca nircami, Jehová Diospa ‘ñaupajpica, alicachinajuipash, ushaipash, cushijuipashmi tian’ nishpa (1 Crón. 16:7, 27). Salmo librota escribij Etán shuti runagupash nircami: ‘Canda caparishpa mañanajuj gentecunaca, ninandami cushijun. Mandaj Dioslla, canba ñavi punchayachijpimi purinajun. Canba shutipimi, tucui punllacuna cushijunajunga. [Alita] can rurajpimi, jatunyachi tucunga’ nishpa (Sal. 89:15, 16).

11. Jehová Dioslla Ali Mandaj cashcata ashtahuan seguro cangapaca ¿imatata rurana capanchi?

¹¹ Llaquishpa mandaj Taita Diospi ashtahuan pensarishpami Jehová Dioslla ashtahuan ali mandaj cashcataca seguro caita ushashun. Ñucanchicunapash Salmo librota escribij runagushna sintirishpami nipanchi: “Huaranga punllacunata, canllapi canapaj randica, shuj punllatallapash, cambaj huasi patiocunapi purijunami ashtahuan ali” can nishpa (Sal. 84:10). Jehová Diosmi ñucanchitaca rurarca. Chaimandami ñucanchicuna cushilla cangapaj imata minishtinajujtaca ali yachan, na mitsashpapash caran. Imata mandashpapash ñucanchicuna ali causachun munashpami mandan. Shinlli ricurijpipash, paita cazushpaca ñucanchillatami cushilla causashun (Isaías 48:17, liingui).

12. Ashtahuanbachaca ¿imamandata Jehová Dios mandachun apoyangapaj munapanchi?

¹² Bibliapica ninmi, huaranga huatacunata Jesús Mandashca jipaca huaquin gentecunaca Jehová Dios mandachunga na munangachu nishpa (Apoc. 20:7, 8). ¿Imamandata na munanga? Chai punllacunapica ña cutinmi Diabloca, paicunapilla pensarichun gentecunataca umachingapaj munanga. Tal vez paicunataca crichingapaj munangami, Jehová Diosta na cazushpapash para siempre causaita ushanguichi nishpa. Chaimandami tapurina capanchi: Chai llullataca crigrinichu nishpa. Jehová Diosta juyashpa, ali Taita Dios cashcamanda paita sirvishpa, pailla mandana derechota charishcata intindishpaca Diablopa llullacunataca uyaitallapash na uyashunllu. Jehová Dios juyashpa mandajuj punllacunapimi causangapaj munashun.

13. Jehová Dios mandachun munashcataca ¿imashinata ricuchi ushapanchi?

¹³ Imashinami yachajupashcanchi, Jehová Diosllami mandana derechotaca charin. Paillami Ali Mandaj Taita Dios can. Chaimandami Jehová Dios mandachun tucui shunguhuan apoyana capanchi. Shinaca ¿imashinata apoyashun? Jehová Diosta tucuipi cazushpa, paita tucui shunguhuan sirvishpa, imata rurashpapash Jehová Dios munashcashna rurashpami, Jehová Dios mandachun apoyanajunchi. Ashtahuangarin, shina rurashpami, Jehová Dios mandachun munashcataca, tucui shunguhuan alicachishcata ricuchinajunchi (Efesios 5:1, 2, liingui).

14. Cusacuna, taitacuna, ancianocunapash ¿imashinata Jehová Diospa ejemplota catita ushan?

¹⁴ Bibliapica ninmi, Jehová Diosca juyaihuanmi mandan nishpa. Chaimandami, Jehová Dios mandachun munaj cusacuna, taitacuna, ancianocunaca Jehová Diospa  ejemplota catishpa na maipash cachun mandana can. Apóstol Pablopash Jehová Diospa, Jesuspa ejemplotami catirca (1 Cor. 11:1). Alitami rurana cangui nishpaca, na shujcunata rimajurcachu, na pingaichijurcachu. Ashtahuangarin, juyaihuanmi alita rurachun animarca (Rom. 12:1; Efes. 4:1; Filem. 8-10). Apóstol Pabloca Jehová Diospa ejemplotami catijurca. Ñucanchicunapash, shujcunata juyaihuan tratashpami Jehová Dios mandachun apoyanajunchi.

15. Jehová Dios mandachun apoyajuimandaca ¿imashinata Jehová Dios churashca ñaupaman pushajcunata cazushcata ricuchi ushapanchi?

¹⁵ Jehová Dios mandachun apoyangapaj munashpaca, Jehová Dios churashca ñaupaman pushajcunatapash respetanami capanchi. Paicunapa decisionda na ali intindishpa, na alicachishpapash apoyanami capanchi. Cai mundopi gentecuna na shina cajpipash, Jehová Dios mandachun munashpami ñaupaman pushajcunataca apoyanchi (Efes. 5:22, 23; 6:1-3; Heb. 13:17). Cazushpaca, ñucanchillatami Jehová Dios munashcashna ali causashun.

16. ¿Imashinata ñucanchi decisiongunapica Jehová Dios mandachun apoyanajushcata ricuchipanchi?

¹⁶ Ñucanchi decisiongunahuanmi Jehová Dios mandachun apoyanajushcata o na apoyanajushcata ricuchinchi. Paica na tucuipa shuj leyta churashcachu. Chaipa randica, pai imata pensashcatami Jehová Diosca nin. Shuj ejemplota ricupashun. Jehová Diosca ima ropata churajunataca na ninllu. Chaipa  randica, ñucanchillata ali yuyashpa churajuchunmi, ali villaicunata villajcunashnami churajuna canguichi nin (1 Tim. 2:9, 10). Shinallata, ñucanchi agllashca decisiongunahuan shujcunata nitijachichunga na munanllu (1 Cor. 10:31-33). Jehová Diospa yuyaita pundapi churashpa decisiongunata agllashpami, Jehová Dios mandachun munashcata, apoyanajushcata ricuchipanchi.

17, 18. Jehová Dios mandachun apoyangapaca ¿imatallata cusahuarmicunaca ruraita ushan?

¹⁷ Cazarashcacunapashmi Jehová Dios mandachun apoyaita ushan. Huaquingunapaca, cazarashca causaica shinllimi can. Ashtaca problemacunatami charin. Shina pasajpica Jehová Diosta, israelitacunatami yarita ushan. Jehová Diosca Israel llactapa cusashnami cani nircami (Is. 54:5; 62:4). Israelitacuna cutin cutin llaquichijpi, paicunahuan ali causaita charina shinlli cajpipash cutin cutinmi Jehová Diosca paicunata perdonarca. Paicunahuan ari nishpa pactota rurashcatapash yariami carca (Salmo 106:43-45, liingui).

¹⁸ Jehová Diosta juyaj cusahuarmicunaca, Jehová Dios munashcashnami igual causan. Imacunamandapash na yangata partirinalla, na divorciarinalla cashcataca yaipimi charin. Bibliapi nishca shinaca, huarmi o cusa shujhuan puñushpa juchapi urmajpillami divorciarishpa, cutin cazarangapaj libre quedaita ushanman (Mat. 19:5, 6, 9, NM). Cazarashpa igual causangapaj shinllita esforzarishpami, cusahuarmicunaca Jehová Dios mandachun apoyanajun.

19. Pandarishpaca ¿imatata rurana capanchi?

¹⁹ Juchayucuna caimandami huaquinbica pandarishpa Jehová Diosta llaquichinchi. Paica ñucanchicuna pandarijta ali yachashpami, ñucanchita salvangapaca paipa Churipa causaita curca. Shinaca imapipash pandarishpaca, Jehová Diostami perdonahuai nishpa mañana canchi (1 Juan 2:1, 2). Shinapash, pandata rurashcata cutin cutin yarishpa na ali sintirijunapa randica, ama cutin pandaringapami esforzarina capanchi. Jehová Diosman ashtahuan quimirijpica, paica perdonangami, ali sintirichunbash ayudangami. Shinallata chaipura llaquicunata jipacunaman charishpa aguantachunbash ayudangami (Sal. 103:3).

20. ¿Imamandata Jehová Dios mandachunga cunanllata apoyana capanchi

²⁰ Jehová Dios mandajpica, tucuicunami paipa ali ñangunamanda yachajushpa catishun (Is. 11:9). Shinapash, cunan punllacunapillatami Jehová Dios imata pensajta, pai imata rurachun munashcatapash yachajunajunchi. Ñallami tucui gentecunaca Jehová Dioslla mandana cashcata yachanga. Cunanmi Jehová Dios mandachun apoyashpa, paita tucui shunguhuan sirvishpa, tucuipi paipa ejemplota catingapaj esforzarina capanchi.