Pihuanbash ali amigo cangapaca, pai imashina cashcata yachanaca minishtirishcami can. Taita Diospa amigo cangapapashmi, pai imashinapacha cashcata yachanaca minishtirishca can. Shinallami paitaca ashtahuan juyashun. Taita Diosca ashtahuanbachaca: Tucui ushaita charij, tucuita ali yachaj, alita ruraj o justo, juyaj Diosmi can.

‘¡Jatun Mandaj [Jehová] Dioslla. Ricui, jahua pachatapash, cai pachatapash, cambaj ninan ushaihuanmi rurarcangui!’ (JEREMÍAS 32:17).

Taita Diospa rurashcacunapimi pai ashtaca ushaita charishcata ricupanchi. Indi ushashcata rupajujtaca tucuicunallatami sintinchi. Inditaca Jehová Diosmi rurashca. Indica ushashcatami ninanda rupan. Caita ali intindingapaca, caipi yuyapashun. Shuj mangapi yacuta timbuchinajushcanchiman, chai timbujuj yacuca nachu ¿rupa rupa can? Ari. Indicarin chai timbujuj yacutapash, yalimi ashtacatapacha rupa rupa can. Cada segundomi Indipica tauca tauca bomba nuclear nishcacuna tugyanajujpishna ninandapacha rupajun.

Cielopica ashtaca ashtaca planetacuna, estrellacunami tian. Chai estrellacunahuan ricujpica Indica uchillagumi can. Cientificocunaca, UY Scuti nishca estrellaca Inditapash yali ashtahuan jatun jatunbachami can ninmi. UY Scuti estrella Indi tiajuj pushtupi tiajushpaca, chuscu planetacunatapash yali ocupajushca pushtutami ocupanman. Caica profeta Jeremiaspa nishcacuna cierto cashcata cuenta japichunmi ayudan. Paica  Jehová Diosmi paipa tucui ushaihuan tucuita rurarca nin.

¿Imashinata Taita Diosca paipa ushaihuan ñucanchitaca ayudan? Taita Diosca ñucanchicuna causai ushachunmi Indita, cai Alpapi tucui ima tiashcacunatapash rurashca. Cada unota ayudangapapashmi paipa ushaita utilizan. Jesús cai Alpapi cajpica, Taita Diosmi paipa ushaita cushpa milagrocunata rurachun ayudarca. Chaimandami Mateo 11:5​pica nin: ‘Ñausacunapash ricunajunmi. Jangacunapash purinajunmi. Lepra ungüihuan causajcunapash ali tucushcami. Na uyajcunapash uyanajunmi. Huañushcacunatapash causachijunmi’ nishpa. Cutin cunan punllacunapica ¿imashinata paipa ushaita cushpa ayudajun? Bibliapica ninmi: ‘Shaijushcacunamanga, paimi ushaita cujun’ nishpa. Shinallata Jehová Diospi ‘shuyashpa causajcunaca ushaitami japinga’ ninmi (Isaías 40:29, 31). Shinaca llaquicunata chimbapurangapaj, aguantashpa cati ushangapaca ‘Taita Diosmandami ninan ushaitaca charipanchi’ (2 Corintios 4:7). Taita Dios paipa ushaihuan ñucanchita ayudajushcata yachashpaca ¿nachu paita ashtahuan juyachun ayudan?

“¡Mandaj Dioslla, can rurashcacunaca, na cuentai ushanallamari! Tucui chaicunataca, cambaj ali yachaihuanmi rurashcangui” (SALMO 104:24).

Taita Diospa rurashcacunata ricushpami, pai ali yachaita charishcata cuenta japinchi. Cientificocunaca Jehová Diospa rurashcacunata ricushpami mushuj aparatocunata rurashca, o chai rurashca aparatocunata mejorashpa catishca. Chaitaca biomimética nishpami rijsin. Paicunaca fotota llujchingapaj shuj camaramanda callarishpa, aviongunacamanmi rurashca.

Taita Diospa ali yachaitaca ñucanchicuna imashina cashcata ricushpami ashtahuan cuenta japipanchi. Vijsa ucupi shuj huahua imashina tiai callarishcapi yuyapashun. Vijsapi huahuagu tiai callarishcamandapachami tullugucuna, aicha caragu, angugucunapash, paipa cuerpogupash asha asha formarishpa catin. Cuerpo entero ali formarishca cajpimi, ña 9 quillacuna jipaca mamaca huahuaguta ungun. Ali yachaihuan Taita Dios gentecunata rurashcata ricushpami ashtacacunaca Salmo librota escribij runagushna nishca: ‘Ninanda manllarina, juyaillaguta [ñucata] rurashcamandami candaca alicachisha’ nishpa (Salmo 139:14).

¿Imashinata Taita Diosca paipa ali yachaihuan ñucanchitaca ayudan? Ñucanchita Ruraj, ali yachaita charij Taita Diosca ñucanchicuna cushilla causachun imata minishtishcataca alimi yachan. Chaimi Bibliapica ali consejocunata cushca. Por ejemplo, Colosenses 3:13​pica ninmi: ‘Caishujhuan chaishujhuan perdonarishpami causana canguichi’ nishpa. Chai consejoca alipachami can. Investigadorcunaca perdonarinaca ali puñui ushachun, ali presionda charichun, ama depresión nishca ungüita charichun, shuj shuj ungüicunapash ama charichun ayudajtami cuenta japishca. Taita Diosca ali yachaita charij ali amigoshnami ñucanchitaca ninanda juyaimanda alipacha consejocunata cushpa ayudan (2 Timoteo 3:16, 17). Shinaca ¿nachu paipa amigo cangapaj munapangui?

‘Mandaj Diosca, alita ruraj [o justo]’ Diosmi can (SALMO 37:28).

Tucui Ushaita charij Taita Diosca imahorapash nalitaca na ruranllu (Job 34:10). Taita Dios justo cashcamandami Salmo librota escribij runaguca nirca: “Gentecunataca tucuicunapaj ali cachun ricushpami mandangui” nishpa (Salmo 67:4). Ñavita ricushpallaca gentecunataca na juzganllu. Shungupi imashina cashcata ricushpami juzgan (1 Samuel 16:7). Cai muyundi Alpapi ashtaca nalita rurajcuna, nali gobiernocuna tiajta ricushpami imata ruragrijujtaca villashca. Chaimi: “Diosta na manllajcunaca, llactamanda [o Alpamanda] anchuchi tucungami” nishca (Proverbios 2:22).

Shina nishpaca, Taita Diosca shuj millai, nali juez shina gentecunata castigashpa cushijun cashcataca na ninajunchichu. Bibliapica Jehová Dios ‘ninanda llaquij, ali shunguta’ charij Dios cashcatami ricuchin. Chaimandami, nalita rurashpa causaj gentecuna shungumanda arripintirijpica llaquishpa ayudan. Chaica Jehová Dios alitalla ruraj Dios cashcatami ricuchin (Salmo 103:8; 2 Pedro 3:9, NM ).

¿Imashinata Taita Diosca alita rurashpa ñucanchitaca ayudan? Apóstol Pedroca nircami: ‘Taita Diosca, na pitapash ñavita ricushpalla chasquinllu. Maijan llactapi cashpapash paita manllashpa, imatapash cashcatapacha rurajtami, Diosca alicachin’ nishpa (Hechos 10:34, 35). Na ñavitalla ricushpa tratashcamandami tucuicunallata ali causai ushapanchi. Gentecuna ima razamanda cajpipash, maimanda cajpipash, na estudiashca cajpipash, charij o pobre cajpipashmi paita adorachunga saquin.

Taita Diosca pai alita ruraj cashcata yachashpa ñucanchicunapash alita rurashpa cushilla causachunmi munan. Chaimandami tucuicunaman concienciata cushca. Concienciamanda parlashpaca Bibliapica ñucanchi shungupi mandashcacunata  escribishca cuendami alita rurachun o nalita rurachun yachachijun nin (Romanos 2:15). Shuj ali concienciaca llaquichij, nali cosascunata rurachunga na saquinllu. Imapipash pandarijpica arripintirichun, ama cutin chaicunata rurachunmi ayudan. Shinaca, Taita Dios alita ruraj cashcata yachanaca paita ashtahuan rijsichun, paita juyachunmi ayudan.

‘Taita Diosca, ninandapacha juyajmi’ can (1 JUAN 4:8).

Bibliapica Taita Dios tucui ushaita charishcata, tucuita ali yachai ushashcata, alitalla ruraj Dios cashcatami nijun. Shinapash Taita Dios juyaita charishcataca na nijunllu. Chaipa randica Taita Dios juyaj cashcatami nijun. ¿Imamandata shina nin? Jehová Diosca tucuita ali yachaj caimanda, alitalla ruraj caimanda, tucui ushaita charimandami imatapash rurai ushan. Shinapash imatapash rurashpaca, juyaimandami ruran.

Jehová Diosca juyaimandami cielopi angelcunata, cai Alpapi gentecunata rurarca. Shinallata paipa munaimi, cai Alpataca gentecuna causachun rurarca. Cunanbipashmi gentecunata juyashcata ricuchijun, chaimi ‘Inditaca nalicunamanbash, alicunamanbash punllayachijun. Tamiatapash [alita] rurashpa causajcunaman, [nalita] rurashpa causajcunamanbash tamiachijun’ (Mateo 5:45).

Jehová Diosca ‘ninanda llaquishpa, juyaj cajtapashmi ricuchin’ (Santiago 5:11). Tucui shunguhuan paimanda yachajungapaj esforzarijcunataca alicachishpami ricun. Paica cada unotami ali ali rijsin. Chaimi Bibliapica nin: “Paica, ñucanchimandaca na carupi canllu” nishpa (Hechos 17:27).

¿Imashinata Taita Diosca ñucanchicunata juyashcata ricuchishca? Ashtaca cosascunapimi ñucanchita juyashcataca ricuchin. Por ejemplo, ¿nachu Familiahuan cushilla yalishpa, shuj huahuagu asijujta ricushpaca cushijupanchi? Ari, cushijupanchimi. Causashpa catingapaj chai cosascuna na minishtirishca cajpipash, cushillami sintichin.

Paita mañachun saquishpapashmi Taita Diosca juyashcata ricuchin. Bibliapica ninmi: “Ima illajpipash, na chaitalla yariashpa llaquilla causanachu canguichi. Ashtahuangarin Taita Diosmanmi, imatapash villashpa ninanda mañana canguichi” nishpa. Jehová Diosca ñucanchi llaquicunata paiman villachunmi munan. Shina rurajpica tranquilo ali causaiguta caramushpa ‘shungutapash, yuyaicunatapash huacaichisha’ ninmi (Filipenses 4:6, 7).

Cai temapica Taita Diosca tucui ushaita charij, tucuita ali yachaj, alita ruraj o justo, juyaj Taita Dios cashcatami yachajupashcanchi. Cunanga Taita Dios imatalla rurashcata, jipa punllacunapi imacunatalla ruragrijujta yachachunmi cati temacunata liishpa catichun animapanchi.