1, 2. Bautizarishca jipaca ¿imatata rurashpa catina capanchi? ¿Imamandata chaita ruranaca importante can?

 ¿CADA mashna tiempopita quiquinba huasigutaca limpiapangui? Quizás chai huasipi ña causai callarigrijushpaca ali alimi limpiapariangui. Pero ñana limpiashpa saquitapacha saquijpica ¿imashi pasanman? Huasica polvo jundashpa ñapashmi mapayanman. Chaimandami huasigu limpiolla ricurichunga siempre limpiana capanchi.

² Huasigu limpiolla ricurichun siempre limpiajunshnallatami ñucanchi pensamientocuna, ñucanchi causaipash limpio cachun ricuriana canchi. Ñucanchicunaca nara bautizarishpallatami ñucanchi causaipica shuj shuj cambiocunata rurashcanchi. Shinallata ‘cuerpota y ñucanchi yuyaicunata mapayachij cosascunamandapashmi’ caruyashcanchi (2 Cor. 7:1). Pero bautizarishca jipapash apóstol Pablopa consejotami cazuna capanchi. Pabloca: “Quiquingunapa pensamientocunataca mushujyachishpami catina capanguichi” nircami (Efes. 4:23). Cai consejota siempre cazungapaj esforzarinaca ¿imamandata importante can? Porque cai mundopi nali mapa yuyaicunaca ñapashmi ñucanchitaca pandachita ushan. Ama shina pasachun y Jehovapa ñaupapi ali ricuringapaca siempremi ñucanchi pensamientocuna, ñucanchi personalidad y ñucanchi munaicunapash limpio cachun ricuriana capanchi.

3. Ñucanchi yuyaicunata Jehová munashcashna cambiana nishpaca ¿imatata ningapaj munapanchi? (Romanos 12:2).

³ Ñucanchi pensamientocunata Jehová munashcashna cambiashpa catingapaca ¿imatata rurana capanchi? (Romanos 12:2​ta liipangui). Ñucanchi pensamientocunata cambiashpa catingapaca  huaquin ali cosascunata ruranallaca na suficiente canllu. Chaipa randica ñucanchicuna imashna cashcata ali ali ricushpa, minishtirishca cambiocunata rurashpami Jehovapa mandashcacunata cazungapaj ninanda esforzarina capanchi. Cai cosascunataca siempremi rurana capanchi.

4. Cai mundopa yuyaicunata ama catingapaca ¿imatata rurana capanchi?

⁴ Ña perfectocuna cashpaca tucuitami Jehová munashcashna rurai ushashun. Pero chaicamanga Jehová munashcashna causangapami esforzarina tucunchi. Romanos 12:2​pi apóstol Pablo ima nishcapi pensaripashunchi. Paica ñucanchi yuyaicunata cambiashpa catina cashcata y Taita Diospa voluntad maijan cajta ricuna cashcatami nirca. Cai mundopa yuyaicuna ñucanchicunata cambiachunga na saquinachu capanchi. Chaipa randica imata decidigrijushpa o ima metacunata charishpapash “¿Jehová Dios munashcashnachu rurajuni?” nishpami pensarina capanchi.

5. Jehovapa punllamanda imata pensashcata yachangapaca ¿ima tapuicunapita pensarina capanchi? (Fotocunata ricupangui).

⁵ Jehová Diosca ‘paipa punllataca’ pendiente causachunmi munan (2 Ped. 3:12). Chaimi cashna pensarina capanchi: “Ñuca causaipi decisiongunahuanga ¿cai nali mundo ñalla tucurinata ali intindishcatachu ricuchijuni? Estudianamanda, trabajanamanda imatapash decidishpaca ¿Jehová Diosta aliguta sirvina ashtahuan importante cashcatachu ricuchijuni? Jehová Dios ñucata y ñuca familiatapash cuidanataca ¿segurochu capani, o material cosascunata charinapillachu preocuparini?” nishpami pensarita ushapanchi. Jehová Diosca ñucanchicuna pai munashcashna causangapaj esforzarijpica ninandami cushijun (Mat. 6:25-27, 33; Filip. 4:12, 13).

6. ¿Imatata cada punlla rurashpa catina capanchi?

⁶ Ñucanchi pensamientocuna ali cachunga cada punllami esforzarina capanchi. Y imapash cambiocunata rurana minishtirijpica uchalla cambiangapami esforzarina capanchi. Apóstol  Pabloca Corinto llactamanda huauquipanicunamanga: “Taita Diospi tucui shunguhuan crishpa causanajushcata o na tucui shunguhuan crishpa causanajushcata cuenta japingapaca, quiquingunallatami pensarina capanguichi. Quiquinguna imashina cashcataca quiquingunallatami pensarina capanguichi” nircami (2 Cor. 13:5). Reuniongunaman rishpa o predicacionbi huaquinbi huaquinbi llujshishpaca “tucui shunguhuan crishpa causanajushcataca” na ricuchinajupanchichu. Tucui shunguhuan crishpa causanajushcataca ñucanchi pensamientocunahuan, ñucanchi ruraicunahuanmi ricuchina capanchi. Shinaca ñucanchi pensamientocunata Jehová munashcashna cambiashpa catingapaca Bibliatami liina capanchi. Jehová Dioshna pensangapami esforzarina canchi. Y minishtirishca cajpica Jehovata cushichingapami cambiocunata rurana capanchi (1 Cor. 2:14-16).

7. Efesios 4:31, 32​pi nishcashnaca ¿imatata rurana capanchi? Pero ¿imamandata difícil caita ushan?

⁷ (Efesios 4:31, 32​ta liipangui). Jehová munashcashna ñucanchi pensamientocunata cambiashca jahuapash Bibliapi nishcashnami “mushuj causaitaca ropata churajunshna churajuna capanchi” (Efes. 4:24). Chaita pactachingapaca ninandami esforzarina capanchi. Por ejemplo, ima resintirinacunatapash, culiranatapash, caparishpa rimanacunatapashmi saquina capanchi. Ñucanchi propio causaipi chashna causashca caimandami cai ruraicunata saquinaca difícil ricurin. Chaimandami Bibliapica ‘ñapash fiñarijllacunamanda’ parlan (Prov. 29:22). Cashna nali comportamientocunata ama charingapami bautizarishca jipapash cambiaringapaj esforzarishpa catina capanchi. Shuj experienciamanda ricupashunchi.

8, 9. Stephen huauquipa ejemplomandaca ¿imatata yachajuita ushapanchi?

⁸ Stephen shuti huauquica ñapashmi culiranlla carca. Paica: “Bautizarishca jipapash ñucapa caractertaca controlashpa catinarami carcani. Por ejemplo shuj punllaca shuj barriopimi gentecunaman Bibliamanda villachishpa purinajurcanchi. Shinapimi shuj shua ñuca carropa radiota shuashpa rijujta ricurcani. Chaimi paita japingapaj munashpa catircani. Ñapachami japigrijurcani. Shinapimi paica radiota alpapi shitashpa calpashpa rirca. Shina pasashcata huauquicunaman villajujpimi, shuj huauquiguca: ‘¿Chai shuhuata japishpaca imatashi ruranguiman carca?’ nishpa tapuhuarca. Shina tapujpimi ñuca yuyaicunata todavía cambiana cashcata cuenta japircani” nircami. b

⁹ Stephen huauquipa ejemplota ricushpami ñucanchi causaipi nali ruraicunata ñami tucuita saquishcani yajushpapash siempre nali ruraicuna cutin ricurimui ushashcata cuenta japipanchi. Ñucanchitapash shina pasajpica na desanimarinachu capanchi. Shinallata nali testigomi cani nishpapash na pensajunachu canchi. Apóstol Pablopashmi “alita rurangapaj munajpica, nalita rurana munairami ñucapica tian” nirca (Rom. 7:21-23). Imashinami shuj huasita limpiajpi cutinllata mapayashpa polvo jundan, shina cuendami juchayucuna caimandaca nalicunata saquishcanchi yashpapash cutinllata huaquinbica nalicunata rurai callarinchiman. Chaimandami alita rurangapaj esforzarishpa catina capanchi. Chaipaca ¿imashi ayudanga?

10. Nali munaicunata saquingapaca ¿imatata rurana capanchi? (1 Juan 5:14, 15).

¹⁰ Imapash nali munaicunata charishpaca Jehová Diostami ayudahuai nishpa mañanalla capanchi. Shina rurashpaca Jehová Dios ñucanchita uyashpa ayudanataca seguromi caita ushapanchi (1 Juan 5:14, 15​ta liipangui). Jehová Diosca cai nali munaicunataca shuj milagrota rurashpaca na anchuchingachu. Pero chai nali munaicunata mishachunga ayudangami (1 Ped.  5:10). Ñucanchicunapashmi ñucanchi mañashcashna rurangapaj esforzarina capanchi. Nali munaicunata saquingapapachami esforzarina capanchi. Por ejemplo, nali peliculacunata, televisionbi nali programacunataca na ricunachu capanchi. Librocunapipash nali cosascunataca na liinachu capanchi. Nali munaicuna ñucanchi yuyaipi ashtahuan mirachunga na saquinachu capanchi (Filip. 4:8; Col. 3:2).

11. Jehová munashcashna causashpa catingapaca ¿imatata rurana capanchi?

¹¹ Nali munaicunata o nali ruraicunata saquishca jahuapash Jehová Dios munashcashna causashpa catingapami esforzarina capanchi. ¿Imashinata Jehová munashcashna causai ushapanchi? Chaipaca Jehovamanda y paipa cualidadcunamanda yachajungapami esforzarina capanchi. Shinallata paipa ejemplota catingapapashmi esforzarina capanchi (Efes. 5:1, 2). Bibliapi Jehová shujcunata perdonashcata liijushpaca: “¿Ñucapashchu shujcunataca perdonani?” nishpami tapurina capanchi. O shujcuna llaquicunahuan cajpi Jehová Dios llaquishpa tratashcata liijushpaca: “¿Ñucapashchu huauquipanicuna llaquicunahuan cajpica paicunata ayudangapaj esforzarini?” nishpapashmi tapurina capanchi. Shinaca Jehová munashcashna causangapami esforzarishpa catina capanchi. Y asha asha cambiashpa catingapami pacienciata charina capanchi.

12. Stephen huauquipa ejemploca ¿imashinata Biblia gentecunapa causaita cambiai ushashcata ricuchin?

¹² Párrafo 8​pi parlashca Stephen huauquica asha ashami Jehová Dios munashcashna cambiocunata rurai usharca. Paica ninmi: “Bautizarishca jipapashmi huaquinbica ñucapa caracterta controlanaca shinlli cahuashca. Pipash culirachijpica ama ñucapash culirarijungapaca mejor anchuritami anchurini. Shinallata imagutapash aliguman arreglangapami esforzarini. Ñuca shina controlarita ushashcataca ni ñucallata na cri ushanichu. Ñuca huarmigu y shuj huauquipanicunapashmi chaita rurashcamandaca felicitahuan. Shinapash cai cambiocunataca na ñucamandallachu rurai ushashcani. Bibliami ñuca causaita cambiachun ayudahuashca. Chaimandami Biblia gentecunapa causaita cambiachun ayudai ushashcataca seguro cani” ninmi.

13. Alita rurai ushachunga ¿imata ayudanga? (Gálatas 5:16).

¹³ (Gálatas 5:16​ta liipangui). Alita rurai ushachunga Jehová Diosca paipa espíritu santota carashpami ayudajun. Bibliapa yachachishcacunata ali estudiashpami Taita Diospa espíritu santo ñucanchita ayudachun saquinajupanchi. Tandanajuicunaman rishpapashmi Taita Diospa espíritu santotaca chasquipanchi. Shinallata cai tandanajuicunapimi huauquipanicuna ñucanchishnallata nali munaicunata mishangapaj esforzarinajujta ricushpaca randimanda animarinchi (Heb. 10:24, 25; 13:7). Shinallata nali munaicunata mishangapaj Jehová Diosta tucui shunguhuan mañajpica paica paipa espíritu santota cushpami fuerzata charishpa ñaupaman catichun ayudan. Cai cosascunata rurajpipash nali munaicunaca na ñapash chingaringachu. Pero nali munaicunata ama rurangapami fuerzata charishun. Gálatas 5:16​pi nishcashnaca Taita Diospa espíritu santo ayudachun saquijcunaca ‘nali munaicunataca nimata na rurangachu’.

14. Alita rurana munaita charishpa catingapaca ¿imamandata esforzarina capanchi?

¹⁴ Jehová Diosta sirvingapaj espiritual cosascunata rurangapaj esforzarijushpaca, cai espiritual cosascunataca na descuidanachu capanchi. Shinallata alita rurangapaj munaita charingapapash esforzaripashunchi. ¿Imamandata shina nipanchi? Porque tentaciongunaca siempremi ricurishpa catinga. Bautizarishca jipapashmi nali cosascunata rurana munaitaca talvez charishpa catipashun. Por ejemplo apostashpa pugllana, tragota yapata ufiana o pornografía nishcatapash ricuna munaitami talvez charipashun  (Efes. 5:3, 4). Shuj joven testigoca: “Jaritallata munashpa ricunata saquingapami ninanda esforzarishpa catipani. Shinallata cai munaica yalingallami yarcanimi. Pero cai nali munaitaca charishpami catini” ninmi. Shinaca nali munaicuna mishangapaj munajpica ñucanchitaca ¿imata ayudanga?

15. Tucui gentecunallata nali munaicunata charishcata yachanaca ¿imashinata ñucanchitaca animan? (Fotota ricupangui).

¹⁵ Nali munaicunata charimanda na ushajushna sintirijushpaca na sololla cashcatami yarina capanchi. Chaimandami Bibliapica: ‘Quiquinguna charishca llaquicunataca tucui gentecunallatami charin’ ninmi (1 Cor. 10:13a). Cai textotaca shuj Bibliapica cashnami traducishca: “Tucui gentecunata japijuj nalita rurachina munaillatami, cangunatapash japijun” nishpa. Corinto llactamanda huauquipanicunamanmi cai shimicunataca nirca. Porque huaquingunaca cazarashca jahua shujhuan causajcuna, homosexualcuna, machajcunami carca (1 Cor. 6:9-11). Paicunaca bautizarishca jipapashmi nali munaicunata mishangapaj esforzarina tucushcanga. Paicunaca ungidocuna cashpapash juchayucunami carca. Chaimandami nali munaicunata mishangapaj esforzarina tucushcanga. Shinami shujcunapash ñucanchishnallata nali munaicunata charishpapash cai nali munaicunata mishai ushashcata ricuchin. Caita yachanaca ñucanchitaca ninandami animan. Chaimandami ‘tucui shunguhuan crishpa, Diablopa contra shinlli shayarina capanchi. Imashinami yachapanchi, mundo enteropi huauquipanicunapashmi ñucanchishnallata sufrinajun’ (1 Ped. 5:9).

16. ¿Imata pensanata peligroso can?

¹⁶ Ñucanchicuna charishca nali munaicunata shujcunaca na intindingachu yashpaca na pensanachu capanchi. Cashna pensanaca peligrosomi can. Ñucanchicuna shina pensashpaca ñucanchi nali munaicunata mishachunga nipi na ayudai ushashcata y chai nali munaicunata na mishai ushashachu nishpami crinchiman. Pero Bibliapica: “Taita Diosca pai ima nishcataca siempremi cumplin. Chaimi quiquinguna aguantai ushashca pruebacunatalla charichun saquinga. Ashtahuangarin,  chai pruebacuna shamujpica chai pruebacunata aguantachunmi Taita Diosca ayudanga” ninmi (1 Cor. 10:13b). Shinaca nali munaicunata charishpapash Jehová Diostaca tucui shungumi sirvita ushapanchi. Jehovapa ayudahuanga nali munaicuna mishachunga na saquishunllu.

17. Nali munaicunata charishpapash ¿imatata rurana capanchi?

¹⁷ Pecadorcuna caimanda nali munaicunata ricuri ushashcataca siempremi yaipi charina capanchi. José runaguca Potifarpa huarmi nalicunata nijpica uchallami anchurirca. Shina cuendami nali munaicunata charishpaca chaicunata saquingapaj ninanda esforzarina capanchi (Gén. 39:12). Nali munaicuna ñucanchita controlachunga na saquinachu capanchi.

18, 19. ¿Ima tapuicunapi pensarinata ñucanchi yuyaicunata cambiashpa catichun ayudanga?

¹⁸ Ñucanchi yuyaicunata cambiashpa catingapami esforzarina capanchi. Chaipaca Jehová Dios munashcashna pensangapaj y rurangapami esforzarina capanchi. Chaimandami siempre cashna pensarina capanchi: “Último punllacunapi causajushcataca ¿ñuca ruraicunahuan ricuchijunichu? ¿Nali ruraicunata saquishpa mushuj ropata churajunshnachu cambiocunata rurangapaj esforzarijuni? Shinallata ¿Jehová Diospa espíritu santo ayudachun saquishpa nali munaicunata mishangapaj esforzarijunichu?” nishpami pensarita ushapanchi.

¹⁹ Cai tapuicunapi pensarishpaca ñucanchi ima ali cosascunata ruranajushcapi y na tucuita ali ali rurai ushashcatapashmi yaipi charina capanchi. Imapipash mejorana cashcata ricushpaca na desanimarinachu capanchi. Chaipa randica Filipenses 3:16​pi consejota catipashunchi. Chaipica: “Ña mashnata ñaupaman catinajushca cashpapash, chai ñanbillata aliguta purishpa catipashunchi” ninmi. Ñucanchi pensamientocunata Jehová munashcashna cambiangapaj esforzarijpica, Jehová Diosca bendiciangami.