1, 2. a) ¿Imata rurachunda Jehová Diosca Salomonda agllarca? b) ¿Imamandata Davidca ashata manllarca?

 JEHOVÁ DIOSCA Jerusalenbi templo huasita rurachunmi, Salomonda agllarca. Chai templo huasica jatun, “tucui llactacunapi rijsishca”, juyailla huasimi cana carca. Ashtahuanbachaca, ‘Mandaj Diospa huasimi’ cana carca (1 Crón. 22:1, 5, 9-11).

² Rey Davidca, paipa churi Salomonda Jehová Dios ayudanataca seguromi carca. Shinapash paipa churi joven cajpi, na experienciata charijpimi ashata manllajurca. Salomonga ¿manllaita ladoman saquishpachu, Jerusalenbi templo huasita rurashami nirca? Joven cashpa, na experienciata charishpapash ¿ñaupaman catita usharcachu? Jehová Diospa munaita pactachingapaj munashpaca, manllaitapash ladoman saquishpami Salomonga imata rurana cashcataca ucha rurai callarina carca.

 3. Rey Davidca ¿ima ali ejemplotata paipa churi Salomonmanga ricuchirca?

³ Salomonga paipa taitapa ejemplota catishpami, manllaitaca ladoman saqui ushashcanga. David joven cashpaca, jatun millai animalcunahuan macanajushpami, paipa taitapa llamagucunata salvarca (1 Sam. 17:34, 35). Shinallata, Goliat nishca jatun jatun soldadohuanbashmi na manllashpa macanajurca. Jehová Diospa ayudahuanmi  chai soldadotaca, shuj llambu rumihuanlla huañuchirca (1 Sam. 17:45, 49, 50).

 4. ¿Imamandata Salomonga manllaita ladoman saquina carca?

⁴ Davidca paillata experienciata charimandami paipa churitaca, Jehová Diospa templo huasita rurachun, ama manllachun animaita usharca (1 Crónicas 28:20, liingui). Manllaita na ladoman saquishpaca, Salomonga Jehová Diospa huasita ruraitallapash na rurai callarishpami, imapash juchata rurashca cuenda canman carca.

 5. ¿Imamandata manllaita ladoman saquinaca ñucanchipapash minishtirishca can?

⁵ Jehová Diospa mingashcata pactachingapaca, ñucanchicunapashmi manllaitaca ladoman saquina capanchi. Chaimandami cai temapica, ñaupa punllacunapi huaquin gentecunapa ejemplota yachajupashun. Paicunapa ejemplota yachajunajushpaca pensaripashunchi: “¿Imashinata ñucapash manllaita ladoman saquishpa, Jehová Diospa mingashcata pactachina cani?” nishpa.

 6. ¿Imatata Josemandaca ashtahuan alicachipangui?

⁶ Josepa ejemplota yaripashun. Potifarpa huarmica paihuan cachunmi, Josetaca inguitajun carca. Chai huarmita na nijpica, ashtaca llaquicunatami Joseca charina carca. Llaquicunata charinata yachashpapash, Joseca, manllaitapash ladoman saquishpami, Potifarpa huarmitaca na nishpa calpashpa rirca (Gén. 39:10, 12).

 7. ¿Imashinata Rahabca na manllashcata ricuchirca? (Callari dibujota ricupangui).

⁷ Cunanga Rahab shuti huarmigupa ejemplota ricupashun. Paica Jericó llactapimi causarca. Ishcai israelitacuna chai llactata pacalla chapangapaj rishpa paipa huasipi quedajpica, manllaimanda na ayudashpa saquinallami carca. Shinapash Jehová Diospi confiaimandami Rahab huarmiguca, manllaitapash ladoman saquishpa paicunata pacajuchirca, pacalla richunbash ayudarca (Jos. 2:4, 5, 9, 12-16). Paica Jehová Dios shujlla Taita Dios cajta, israelitacunaman chai alpacunata cunataca tucui shunguhuanmi crirca. Chaimandami shuj gentecunatapash, Jericó llactamanda reytapash, reypa soldadocunatapash na manllashpa israelitacunata ayudarca. Shina ruraimandami Rahabpash, paipa familiapash salvarirca (Jos. 6:22, 23).

 8. Jesuspa ali ejemplota catimandaca ¿imatata apostolcunaca na manllashpa rurarca?

⁸ Jesuspa ali apostolcunapash, Jesuspa ali ejemplota catishpami, manllaitaca ladoman saquirca (Mat. 8:28-32; Juan 2:13-17; 18:3-5). Saduceo nishcacunaca, Jesusmanda na villachinachu canguichi nishpami apostolcunataca mandarca. Shinapash paicunaca na cazurcachu (Hech. 5:17, 18, 27-29).

 9. Bibliapa 2 Timoteo 1:7​pi nishca shinaca ¿pi ayudajpita manllaitaca ladoman saqui ushapanchi?

⁹ Josepash, Rahabpash, Jesuspash, apostolcunapash tucui shunguhuanmi alita rurangapaj munarca. Paicunapillata confianapa randica, Jehová Diospi confiashpami manllaitaca ladoman saqui usharca. Ñucanchicunapash, imatapash manllajushpaca, ñucanchipillata confianapa randica, Jehová Diospimi confiana capanchi (2 Timoteo 1:7, liingui). Shinaca ¿imashinata familiapipash, congregacionbipash manllaita ladoman saquishcata ricuchi ushapanchi? Ricupashun.

10. ¿Imamandata Jesusta catij jovengunaca manllaita ladoman saquina can?

¹⁰ Jesusta catij jovengunapashmi, Jehová Diosta ali sirvingapaca manllaita ladoman saquishcata ricuchina can. Jovengunaca, Salomonba  ejemplotami yarita ushan. Salomonga na manllashpami ali decisiongunata agllarca, Jehová Diospa huasitapash rurai tucuchirca. Taitamamacunapash, huahuacuna ali decisiongunata agllachunmi ayudaita ushan, ayudanapash can. Shinapash, picunahuan llevarinata, ima diversiongunata charinata, causaipi limpio canata, ima hora bautizarinataca jovengunallatami agllana can (Prov. 27:11). Diabloca, jovenguna ali decisiongunata agllachunga na munanllu. Jehová Diostapash, paipa mandashcacunatapash na alicachinllu. Chaimandami jovengunaca, manllaitapash ladoman saquishpa ali decisiongunata agllana can.

11. ¿Imashinata Moisesca na manllashcata ricuchirca?

¹¹ Jovengunaca shamuj punllacunapi imata ruranataca, maimandami ricuna can. Huaquin llactacunapica, universidadman yaicushpa ali trabajota tarichunmi jovengunataca atichin. Cutin pobre llactacunapi causanajuj jovengunaca, familiata ayudanami canchi nishpa trabajotara pundapi churan. Quiquinbash shina pensajushpaca, Moisespa ejemplotami yarina capangui. Paica faraonba ushipa huasipimi viñarca. Munashpaca, charij tucungapaj, chai llactata mandangapapash esforzarinallami carca. Moisespa familiapash, yachachijcunapash, reyta consejashpa ayudajcunapash, charij tucuchun, llactata mandachunmi Moisestaca atichinajushcanga. Shinapash Moisesca na manllashpami, Jehová Diosta sirvinata agllarca. Egiptomanda rishpa, chaipi tucuilla charishcacunata saquishpapash Jehová Diospimi tucui shunguhuan confiarca (Heb. 11:24-26). Chaimandami Jehová Diosca bendiciarca. Shamuj punllacunapicarin ashtacatami bendiciashpa catinga.

12. ¿Imashinata jovengunaca Moisespa ejemplota cati ushan?

¹² Jovengunapash Moisespa ejemplota catishpa, Jehová Diosta sirvinata, paipa Reinota pundapi churashpaca ashtaca bendiciongunatami chasquinga. Paicunapa familiaman minishtirishca cosasgucunata cuchunga Jehová Diosllatami ayudanga. Apostolcunapa punllacunapi Timoteo shuti jovengushnami, quiquinbash Jehová Diosta sirvinata pundapi churashpa causaita ushapangui a (Filipenses 2:19-22, liingui).

13. Manllaita ladoman saquinaca ¿imashinata shuj panigutaca ayudarca?

¹³ Cunanga, Alabama-Estados Unidosmanda shuj joven panigupa ejemplota ricupashun. Paica, manllaitapash ladoman saquishpami Jehová Diosta ashtahuan sirvina munaita pactachirca. Paica ninmi: “Ñucaca siempremi shuj gentecunahuan parlanataca ninanda pinganayachin carcani. Tandanajui Huasipi shujcunahuan parlaitapash na ushanllu carcani. Villachingapaj llujshishpacarin ashtahuanmi manllan carcani. Na rijsishca gentecunapa punguta huactachinatapash ninandami manllanayan carca” nishpa. Chai paniguca, taitamamapash, shuj huauquipanicunapash ayudajpimi, precursora regular tucurca. Paica ninbashmi: “Cai mundotaca Diablomi mandajun. Gentecunaca paipa yuyaicunata catishpami nin, universidadman rina, famoso cana, ashtaca culquita, cosascunata charinami alipacha can nishpa. Shinapash cai mundopica ashacunallami chaicunataca pactachin. Ashtacacunaca chai munaita na pactachi ushaimandami sufrishpa, preocuparishpalla causan. Shinapash ñucaca, Jehová Diosta sirvimandami cushijushca, ali causani” nishpa.

14. ¿Ima ratocunapita taitamamacunaca manllaita ladoman saquishcata ricuchina can?

¹⁴ Taitamamacunapash manllaita ladoman saquishcatami ricuchina can. Shuj ejemplota  ricupashun. Huaquinbica cutin cutinmi, Familiahuan Adorana Tutata charina horaspi, villachina o tandanajuiman rina horascunapi trabajopica nin, ashtahuan horascunata trabajashpa quedai nishpa. Chai ratocunapi na ushanichu ningapaca, manllaita ladoman saquinami minishtirin. Shina rurashpami, taitamamacunaca shuj ali ejemplota huahuacunamanga ricuchinajun. Huaquinbicarin, congregacionbi huaquin taitamamacunaca huaquin cosascunata huahuacuna rurachun saquinllami. Cutin shuj taitamamacunaca chai cosascunatallata paipa huahuacuna rurachunga na saquingapaj munanllu. Chai taitamamacunata ¿imamandata na saquingui? nishpa tapujpica ¿imatata rurai ushan? Manllaitapash ladoman saquishpami, imamanda na saquishcata respetohuan parlana can.

15. ¿Imashinata Salmo 37:25​pi, Hebreos 13:5​pi shimicunaca taitamamacunata ayudaita ushan?

¹⁵ Taitamamacunaca, huahuacuna Jehová Diosta sirvina munaita charichun, chai munaita pactachichun ayudashpami, manllaita ladoman saquishcata ricuchin. Huaquin taitamamacunaca paicunapa huahuacuna precursor cachun, shuj ladopi villachingapaj richun, Betelpi sirvichun, Tandanajui Huasicunata rurashpa Jehová Diosta sirvichun animanataca ashata manllanmi. Paicuna mayoryajpi, huahuacuna na cuidanata manllashpami na animangapaj munan. Shinapash ali yuyaita charij taitamamacunaca manllaita ladoman saquishpami, Jehová Dios paipa nishcacunata pactachinataca tucui shunguhuan crin (Salmo 37:25; Hebreos 13:5, liingui). Taitamamacunaca paicunapa ejemplohuanmi, huahuacunataca manllaita ladoman  saquishpa Jehová Diospi confiachun ayudan (1 Sam. 1:27, 28; 2 Tim. 3:14, 15).

16. a) Huahuacuna Jehová Diosta sirvina munaita charichunga ¿imatata huaquin taitamamacunaca rurashca ? b) Taitamamacunapa ayudahuanga ¿imatata huahuacunaca rurai ushashca?

¹⁶ Cunanga Estados Unidosmanda shuj cusahuarmipa ejemplota ricupashun. Paicunaca, paicunapa huahuacuna Jehová Diosta ashtahuan sirvina munaita charichunmi ayudarca. Cusaca ninmi: “Ñucanchi huahuacuna parlaitapash, puritapash nara ushajpillatami precursorcuna cushilla cajta, congregacionbi ayudana ali cajta parlan carcanchi. Cunanbica, precursor cana, congregacionbi ayudana munaitami charin. Chaicunata pactachingapaj munaimandami, cai mundopa tentaciongunamanda caruyashpa Jehová Diosta sirvinata pundapi churashpa causan” nin. Cutin shuj huauquica ishcai huahuacunatami charin. Paica ninmi: “Ashtaca taitamamacunaca ashtaca culquita gashtashpa, tiempotapash yalishpami huahuacunataca estudiocunapa, deportecunapa prepararichun, imapash instrumentocunata tocanata yachajuchun ayudan. Chai cosascunapi ayudanapa randica, Jehová Diospa ñaupajpi ali ricurichun ayudanami ashtahuan ali can. Ñucanchi huahuacuna Jehová Diosta ashtahuan sirvina munaita charijpi, chai munaita pactachingapaj esforzarinajujta ricushpaca ashtacatami cushijunchi” nishpa. Jehová Diosca, paita ashtahuan sirvina munaita charichun, chai munaita pactachichun ayudajuj taitamamacunataca ashtacatami bendicianga.

17. ¿Imashinata congregacionbipash manllaita ladoman saquishcata ricuchi ushapanchi?

¹⁷ Congregacionbipashmi manllaita ladoman saquishcata ricuchina canchi. Huaquin ejemplocunata ricupashun. Ancianocunaca, manllaita ladoman saquishpami pipash jatun juchata rurajpica na yangata saquinalla can. Shuj huauqui o shuj pani imapash llaqui apashpa hospitalpi cajpica uchami ayudana can. Huaquin ancianocunacarin, carcelcunaman rishpami Bibliamanda yachachin, tandanajuicunatapash chaipi ruran. Cunanbica soltera panigucunapashmi, Jehová Diosta ashtahuan sirvita ushan. Huaquingunaca, precursoracunami caita ushan. Cutin shujcunaca, villachingapaj ayudachun minishtinajun pushtucunamanmi rita ushan. Shinallata, Departamento Local de Diseño y Construcción nishcapipashmi ayudaita ushan. Diospa Reinomanda Villachijcunapa Escuelaman ringapapashmi solicitudta jundachita ushan. Huaquin panigunacarin, Galaad Escuelamanbashmi rita ushan.

18. ¿Imashinata mayorlla panigucunapash manllaita ladoman saquishcata ricuchi ushan?

¹⁸ Congregacionbi mayorlla panigucunataca tucui shunguhuanmi juyanchi. Congregacionbi cashcamandapash cushijushcapachami canchi. Huaquingunaca punda huatacunapishna Jehovata ñana sirvi ushashpapash, manllaita ladoman saquishpami congregacionbica ashtacata ayudai ushan (Tito 2:3-5, liingui). ¿Imashinata ayudai ushan? Huaquinbica joven panigucunaca, imashina aliguta mudarinataca na yachanllu. Chaimandami ancianocunaca, chai joven paniguta ayudachun shuj mayorlla paniguhuan parlaita ushan. Joven paniguhuan parlangapaca, manllaitapash ladoman saquishpami, mayorlla paniguca, congregacionbi pensarishpami aliguta mudarina cangui nishpa joven panigutaca ayudana can. Shinapash, na shinlli shimihuan rimashpachu intindichina can (1 Tim. 2:9, 10). Shina ayudashpami mayorlla panigucunaca, congregación ashtahuan shinlli tucushpa catichun ayudan.

19. a) ¿Imashinata bautizarishca huauquicunapash manllaita ladoman saquishcata ricuchi ushan? b) ¿Imashinata Isaías 12:2​pash, Filipenses 2:13​pash bautizarishca huauquicunataca ayudan?

 ¹⁹ Bautizarishca huauquicunapash manllaita ladoman saquishpami ayudan can. Congregacionbi ashtahuan responsabilidadcunata charingapaj esforzarishpaca, ashtacatami congregaciongunataca ayudan (1 Tim. 3:1). Shinapash ¿imamandata huaquin huauquicunaca na ashtahuan responsabilidadcunata charingapaj munan? Huaquingunaca punda pandarishcacunata yarishpami, na siervo ministerial tucunachu cani, na anciano tucunachu cani nishpa pensarin. Cutin shujcunaca, responsabilidadcunata ali pactachitaca na ushashachu yashpami pensarin. Quiquinbash shina pensarijujpica, Jehová Diosca ayudangami (Isaías 12:2; Filipenses 2:13, liingui). Moisespa ejemplota yaripai. Paica Jehová Diospa mingashcata pactachitaca na ushashachu yajurcami (Éx. 3:11). Shinapash Jehová Diosmi manllaita ladoman saquichun, paiman imata mingashcata pactachichun ayudarca. Shinaca, na pactachi ushashachu yashpa manllajushpaca, Jehová Diostami ayudahuai nishpa mañana capangui. Bibliatapash cada punllami liina capangui. Shinallata, ñaupa punllacunapi Jehová Diosta sirvijcuna imashina manllaita ladoman saquishcapimi pensarina capangui. Ashtahuangarin, humilde cashcata ricuchishpami, ancianocunata ayudahuai nishpa parlana capangui. Shinallata, imapipash ayudashallami nishpami parlana capangui. Tucuilla bautizarishca huauquicunatami manllaitapash ladoman saquishpa, congregacionbi ashtahuan sirvingapaj esforzarichun animapanchi.

20, 21. a) ¿Imashinata rey Davidca Salomonda animarca? b) ¿Imatata tucui shunguhuan cripanchi?

²⁰ Jerusalenbi templo huasi tucuringacamanmi Jehová Diosca ayudanga nishpami rey Davidca, Salomondaca animarca (1 Crón. 28:20). Salomonga paipa taita imata nishcataca yariami cashcanga. Chaimandami Joven cashpapash, na experienciata charishpapash ñaupaman catirca. Salomonga manllaitapash ladoman saquishpami, Jehová Diospa ayudahuanga 7 huata chaupipi Jehová Diospa jatun templo huasitaca tucuchirca.

²¹ Imashinami Salomonda ayudarca, shinallatami ñucanchicunataca manllaita ladoman saquichun, familiapipash, congregacionbipash ñucanchi responsabilidadcunata pactachichun Jehová Diosca ayudanga (Is. 41:10, 13). Manllaita ladoman saquishpa, Jehová Diosta sirvingapaj esforzarijpi cunanbipash, shamuj punllacunapipash Jehová Dios bendicianataca tucui shunguhuanmi crina capanchi. Chaimandami rey David nishca shinaca, ‘ali yuyaita japishpa, rurai callarinalla’ capanchi.