1. Huaquinbica ¿imamandata manllaita charinchi?

 BIBLIAPICA huañushcacunata, demoniocunata, shamuj punllacunapi ima pasanatapash na manllana cashcatami yachachin. Shinapash cunan punllacunapi ‘manllanai cosascuna’ tiashcamandami tucuicunallata manllaihuan causapanchi. Por ejemplo, guerracuna, shuacuna, huañuchijcuna, unguicuna tiashcamandami manllanchi (Luc. 21:11). Huaquinbicarin ali religionba contra tucushca gobiernocunata, familiacunata y shuj gentecunatapashmi manllaita ushapanchi. Shinallata huaquingunaca cunanbi charishca llaquicunata o “shamuj punllacunapi llaquicunataca na aguantai ushashachu” nishpami manllan.

2. Gat llactaman David chayajpica ¿imata pasarca?

² Davidpi pensaripashunchi. Davidca huaquin viajecunatami manllaita sintirca. Rey Saúl Davidta huañuchingapaj catiriajujpica Davidca filisteocuna causaj Gat llactamanmi pacajushpa rirca. Chaipica Gat llactamanda Akís shuti reymi David “chunga huaranga” filisteocunata huañuchishcata yachaj chayarca. Chai rey chaita yachashcata yachaj chayashpaca Davidca ‘ninandami manllarca’ (1 Sam 21:​10-12). Davidca ashtaca filisteocunata huañuchishcamanda rey Akís paita imatapash ruranga yashpami manllajurca. Shinapash cai manllaicunata mishangapaca Davidca ¿imatata rurarca?

3. Salmo 56:​1-3, 11​pi nishcashnaca Davidca paipa manllaicunata mishangapaca ¿imatata rurarca?

³ Salmo 56​pica Davidca Gat llactapi cashpa imashina sintirishcatami parlan. Chaipica imamanda manllaihuan sintirishcata y chai manllaicunata mishangapaj Jehová Diospi confiana ayudashcatami na pacashpa villan (Salmo 56:​1, 2, 3, TNM-S; a 11​ta liipangui). Davidca Jehová Diospi confiashpaca alitami rurarca. Rey Akís paita ama imatapash rurachunga paipa ñaupapi loco tucushpami, locoshna ricurirca. Shinami Davidca Akís reypa ñaupapica na sirvij o nimapapash na  valij personashna ricurirca. Chaimandami Davidca rey Akispa ñaupamanda pacajushpa rita usharca. Jehová ayudajpimi chashna rurajpica ali llujshirca (1 Sam 21:13–22:1).

4. Jehová Diospica ¿imashinata ashtahuan confiaita ushapanchi? Shuj ejemplomanda parlapai.

⁴ Ñucanchicunatapash Jehová Diospi confianami manllaicunata mishachun ayudaita ushan. Shinapash manllaihuan cashpaca ¿imashinata Jehová Diospica ashtahuan confiaita ushapanchi? Por ejemplo, quiquinda “shuj na jambirinalla nanaitami charingui” nijpica callaripica talvezpashmi manllaihuan sintiripanguiman. Shinapash shuj ali doctor chashna nanaicunatallata charijta ña ayudashca doctor ñucanchita ayudagrijushcata yachashpaca ashtahuan tranquilomi sintirinchiman. Shinallata manllaihuan cashpa paiman parlajpi pai aliguta uyajpica ñucanchita ciertopacha intindishcata cuenta japishpami ali sintiripanchiman. Y talvezpashmi doctorca shuj gentecunata ima tratamientocuna ayudashcata ricushpa “chai tratamientotallatami cachasha” ninga. Jehová Dioshuanbash chashnallatami can. Jehová Dios imacunatalla rurashcata ricushpa cunanbi imacunatalla rurajujta, jipa punllacunapipash imacunatalla ruranata yachanami paipi ashtahuan confiachun ayudanga. Salmo 56​pica David chaitallata rurashcamanda Jehová Diospi ashtahuan confiashcatami ricuchin. Huaquin versocunata yachajujushpaca Jehová Diospi ashtahuan confiangapaj, manllaicunata mishangapaj imata rurai ushashcata ricupashunchi.

JEHOVÁ DIOSCA ¿IMATATA ÑA RURASHCA?

5. Davidca paipa manllaicunata mishangapaca ¿imacunapita pensarirca? (Salmo 56:​12, 13).

⁵ Davidpa causai peligropi cajpipash Davidca Jehová Dios ima ali cosascunata rurashcapimi pensarirca (Salmo 56:​12, 13​ta liipangui). Y chaitaca paipa causaipica ashtaca viajecunatami rurarca. Por ejemplo, Davidca Jehová Dios tucui cosascunata rurashcapimi pensarin carca. Shinallata Jehová Dios tucui poderta charishcata, gentecunata ninanda juyaj cashcatapashmi pensarin carca (Sal. 65:​6-9). Ashtahuanbash Jehová Dios shujcunamanda imata rurashcatapashmi pensarin carca (Sal. 31:19; 37:​25, 26). Ashtahuanbachaca Jehová Dios paimanda imata rurashcata pensaringapapashmi tiempoguta llujchirca. Davidca Jehová Dios paita imashina ayudashcata, huahuamandapacha paita imashina cuidashcatapashmi pensarirca (Sal. 22:​9, 10). Shinaca caicunapi pensarinami Davidtaca Jehová Diospi tucui shunguhuan confiashpa catichun ashtahuan ayudarca.

6. Manllajujpica Jehová Diospi confiachunga ¿imata ayudanga?

 ⁶ Manllajujpica Jehová Dios imacunatalla rurashcapi pensarinami quiquindaca ayudaita ushan. Por ejemplo, Jehová Diosca pajarogucuna, sisagucuna paita na adorajpipash, paiman rijchajta na rurashcacuna cajpipashmi cuidashpa catin. Chaita ricushpami Jehová ñucanchita cuidanataca ashtahuan confiaita ushapanchi (Mat. 6:​25-32). Shinallata Jehová Dios paipa sirvijcunamanda imacunatalla rurashcata pensaripangui. Por ejemplo, Bibliapica Diosta sirvijcunapa ejemplomandami liita ushapangui. Shinallata cunan punllacunapi Diosta sirvishcacunapa experienciamandami liita ushapangui. b O cunangaman Jehová Dios quiquinda imashina cuidashcapi, imashina paipa organizacionman yaicuchun ayudashcapimi pensarita ushapangui (Juan 6:44). Shinallata quiquinba mañaicunata imashina contestashcata (1 Juan 5:14). O cunangaman Jesús huañushcamanda ima beneficiocunatalla quiquin charishcapimi pensarita ushapangui (Efes. 1:7; Heb. 4:​14-16).

7. Profeta Danielpa ejemploca Vanessa panigutaca ¿imashinata ayudarca?

⁷ Haití llactamanda Vanessa shuti paniguca shuj situacionbi cashpami manllaihuan sintirijurca. c Pai causajuj llactapimi shuj jarica paipa novia tucuchun munaimanda cutin cutin mensajecunata escribishpa ninanda atichijurca. Shinapash panigu “na” nijpica paica groseroyashpami nalicunata ruranahuan amenazarca. Manllaita mishangapaca paniguca ¿imatata rurarca? Panigu Vanessaca paipa causaita cuidangapaca shuj ancianohuanmi parlarca. Chai ancianomi autoridadcunahuan parlachun ayudarca. Shinallata paipa sirvijcunata Jehová Dios pundacunapi imashina cuidashcatami pensari callarirca. Paica ninmi: “Primeroca profeta Danielpa ejemplopimi pensari callarircani. Cai profeta ima nalita na rurashca cajpipashmi leonguna causanajuj utujuman paitaca shitarca. Chaimandami Jehová Diosca paitaca salvarca. Shinallata Jehová Diostaca, ‘ñucaca chai jarimanda cuidaringapaca ñami tucuita rurashcani. Quiquinba maquipimi saquipani. Quiquin cuidahuai’ nircanimi. Y chashna mañashca jipaca ña tranquilami sintirircani” ninmi (Dan. 6:​12-22).

JEHOVÁ DIOSCA ¿IMATATA RURAJUN?

8. Davidca ¿imatata seguro carca? (Salmo 56:8).

⁸ Gat llactapi cashpa Davidpa causai peligropi cajpipash manllaicuna paita mishachunga na saquircachu. Chaipa randica, Jehová Dios paita ayudangapaj chai ratopi imatalla rurajushcapimi pensarirca. Davidca Jehová Dios paita ayudajushcata, cuidajushcata, pai imashina sintirijta ali intindijtami ricurca (Salmo 56:8​ta liipangui). Shinallata paitaca Jonatán y Ahimelecmi animota cushpa pai imata minishtishcapi ayudarca (1 Sam 20:​41, 42; 21:​6, 8, 9). Rey Saúl huañuchingapaj munajpipashmi Davidca salvarita usharca. Chaimandami rey Davidca Jehová Dios paita tucuipi cuidajushcata, pai imashina sintirijta intindishcatapash seguro carca.

9. Jehová Diosca paipa sirvijcunapica ¿imatata ricujun?

⁹ Shuj difícil situacionhuan cashpa manllaihuan sintirijushpaca Jehová tucui quiquin ima pasajujta ricujushcatami yaipi cana capangui. Shinallata Jehová Diosca quiquindaca na ricuitallaca ricujunllu. Ashtahuangarin quiquin imashina sintirijta ali intindijtapashmi yaipi caita ushapangui. Por ejemplo, punda tiempopi paita sirvijcuna Egipto llactapi esclavoshna causanajujpica Jehová Diosca: “Paicunapaj ninan llaquicunataca, ñucami yachani” nircami (Éx. 3:7). Davidca shuj cancionbica: Jehová Diosmi “ñuca llaquilla cajta” y “ñuca ninan llaquihuan” cajtaca ricuhuashca nircami (Sal. 31:7). Shinallata Jehová Diospa agllashca llacta paicunapa nali decisiongunamandallata sufrinajujta ricushpaca ‘paipashmi ninanda llaquirijurca’ (Is. 63:9). Shinaca ñucanchicuna llaquihuan cajpi, manllarishca cajpica Jehová Diosca ñucanchi manllaicunata mishachunmi ayudangapaj munan. Chaita yachashpaca ashtahuan tranquilomi sintiripanchi.

10. Shuj difícil situacionbi cashpa Jehová Dios tucuita ricujushcata y pai ayudanataca ¿imamandata seguro caita ushapangui?

 ¹⁰ Huaquinbica shuj situacionbi manllaihuan cashpaca Jehová Dios ñucanchita ayudajushcata ricunaca ashtahuan dificilmi caita ushan. Shinaca pai ayudajushcata ricungapaca ¿imatata rurai ushapanchi? Ñucanchicunaca Jehová Dios ñucanchimanda imata rurajushcata ricuchun ayudahuai nishpami mañaita ushapanchi (2 Rey. 6:​15-17). Jipaca cashna pensaripashunchi: “Reunionbi shuj discursota o comentariota uyashpaca ¿animarishcanichu? Shuj publicacionda liishpa, shuj videota ricushpa o shuj canticota uyashpaca ¿animaripashcanichu? O na cashpaca ¿shuj huauquiguchu shuj textota liishpa ñucataca animashca?” nishpa. Huaquinbica Jehová Diospa organizacionbi tucui charishca ayudacuna, huauquipanicunapa ayudacuna Jehová Diosmanda shamujushcataca facilmi cungaita ushapanchi. Shinapash Jehová Diosca ñucanchimanda preocuparimandami cai tucui ayudacunataca ñucanchiman cushca (Is. 65:13; Mar. 10:​29, 30). Chaimandami pai ayudanataca tucui shunguhuan confiaita ushapanchi (Is. 49:​14-16).

11. Aida panigutaca paipa manllaita mishachunga ¿imata ayudarca?

¹¹ Senegal llactamanda Aida shuti paniguca shuj difícil situaciondami yalijurca. Shinapimi Jehová Dios paita imashina ayudajujta cuenta japirca. Cai paniguca tucui huahuacunamandaca mayormi carca. Chaimandami paipa taitacunaca pai mantiniringapaj y paicunatapash mantini ushachun culquita ali ganachun munarca. Shinapash cai paniguca precursora tucushpami ashatalla trabajashpa ashalla culquita ganajurca. Chaimandami paipa familiaca paihuan culirashpa paitaca nalicachishpa rimai callarirca. Shina pasajpi panigu Aida imashina sintirishcatami parlan. Paica ninmi: “Ñucaca, ñuca taitacunata na ayudai ushajpi tucui gentecuna ñucapa contra tucunatami manllajurcani. Shinallata Jehová Diostaca, ‘cai tucui cosascuna pasachun ¿imamandata saquihuangui?’ nishpami culparcani” ninmi. Shinapash shuj punlla shuj discursopi uyashca yuyaicunami cai panigutaca ninanda ayudarca. Paniguca ninmi: “Turiguca discursopica Jehová Dios ñucanchita ali ali rijsishcata, ima llaquicunahuan cajpipash imashina sintirijta ali intindishcatami yarichirca” ninmi. Shinallata: “Anciano turigucuna y shuj turiñañacunapash Jehová Dios ñucata ninanda juyashcatami yarichirca. Jehová Dios ñucapa mañaicunata uyashcata ricushpami con confianza ashtahuan mañai callarishpa ashtahuan tranquila sintiri callarircani” ninmi. Tiempohuanga paniguca precursora shina sirvishpa catingapami shuj  ali trabajota tarirca. Y chai trabajohuanga paipa taitacunata y shuj gentecunatapashmi ayudaita usharca. Paica ninmi: “Jehová Diospica totalmente confianatami yachajushcani. Shinallata paita mañashpami ñucapa manllaicunatapash mishai ushashcani” ninmi.

JEHOVÁ DIOSCA ¿IMATATA RURANGA?

12. Salmo 56:9​pi nishcashnaca Davidca ¿imatata Jehová Diosmandaca seguro carca?

¹² (Salmo 56:9​ta liipangui). Cai versiculopica David paipa causai peligropi cajpi manllaihuan sintirijushpa chai manllaicunata mishangapaj imata ashtahuan rurashcatami ricuchin. Davidca jipa punllacunapi Jehová Dios paimanda imata ruranapimi pensarirca. Shinallata minishtirishca horaspi Jehová Dios paita ayudanataca seguromi carca. Y Jehová Diosca Davidmanga, “Israel llactapica paimi rey tucunga” nishpami prometishca carca (1 Sam. 16:1, 13). Y Davidca Jehová Dios paiman imata prometishcata cumplina cashcataca seguromi carca.

13. Jipa punllacunapica Jehová Diosca ¿imatata ruragrijun?

¹³ Jehová Diosca, “cunan punllacunapi llaquicunata, problemacunata tucuchisha” nishpaca na prometishcachu. d Cai mundopi ima llaquicuna, ima problemacunata charijpipash Jehová Diosca, “jipa punllacunapimi cai tucui llaquicunata tucuchisha” nishpa prometishca (Is. 25:​7-9). Shinaca Jehová Dios huañushcacunata causachingapaj, tucui unguicunata tucuchingapaj, nali gentecunata tucuchingapaj poderta charishcataca alimi yachapanchi (1 Juan 4:4).

14. ¿Imacunapita pensarita ushapanchi?

¹⁴ Manllajushpaca Jehová Dios jipa punllacunapi imata ruranatami pensarita ushapangui. Por ejemplo, Jehová Dios Diablota y nali gentecunata ña tucuchijpica ¿imashina causaigutashi charishun? Shinallata paraíso alpagupica Jehová Diosta cazuj gentecunaca asha ashami perfecto tucunga. Y chashna gentecunahuan causanaca ¿imashinashi canga? 2014 huatapica asamblea regionalpi shuj escenificacionda ricuchishpami Jehová Dios carashca promesacunapi pensarichun animarca. Chaipica shuj huauquigu paipa familiahuan 2 Timoteo 3:​1-5​pi nishca shimicuna paraíso alpagupi imashina pactarinatami parlanajurca: “Paraíso alpagupica cushilla causaigumi tianga. Gentecunaca paicunapura juyarishpami causanajunga. Shinallata Jehovapa yachachishcacunataca ninandami valichinga. Humilde gentecunaca Jehová Diosta respetashpami causanga. Taitamamacunata cazuj, agradecido, llaquij, familiacunata juyajcunami canga. Shinallata de acuerdo cangapapash munajcuna, shujcunamanda ali cosascunata parlajcuna, controlarinata yachajcuna, blando shungu gentecuna, alita ruranata gushtajcunami canga. Amigocunata na llaquichijcuna, ali uyangapaj munajcuna, humilde gentecuna, paicunapa munaicunata juyanapa randica Taita Diosta juyajcunami canga. Taita Diosta ciertopacha catijcunami canga. Chashna gentecunamandaca na caruyanachu capangui”. Shinaca “Familiahuan o huauquipanicunahuan cashpaca, ¿‘paraíso alpagupica ¿imashinashi causashun?’ nishpa parlana costumbreta charipanichu?” nishpa pensaripangui.

15. Tania panigutaca manllaicunata mishachunga ¿imata ayudarca?

¹⁵ Macedonia jahua lado llactamanda Tania shuti panigutaca paipa manllaicunata mishachunga Jehová Diospa promesacunapi pensarinami ayudarca. Cai panigu Bibliata estudiai callarijpi paipa taitacuna paihuan ninanda culirashcatami villan. Paniguca ninmi: “Ñuca mama ñucata macanatami manllajurcani. Y chaillatami pasahuarca. Reunionmanda cada tigrashcami macai callarihuarca. Y testigo de Jehová tucujpicarin candaca huañuchitami huañuchishun nihuarcami”. Y testigo tucujpica huasimandami calpachirca. Shina pasajpica paniguca ¿imatata rurarca? Paniguca ninmi: “Ñucaca Jehová Diosta cazushpaca para siempremi cushilla causaita ushasha yashpami pensari callarircani. Shinallata cai mundopi imata perdijpipash Jehová Diosca ñucamanga ashtahuanmi imatapash carahuanga. Jipa punllacunapicarin ima llaquicunatapash cungaitapachami cungashun yashpami pensarin cariani” ninmi. Cai paniguca Jehová Diosta na saquishpa  sirvimandami Jehovapa ayudahuanga maipi causanagutapash tarirca. Cunanbica cai paniguca shuj ali huauquiguhuanmi cazada can. Ishcandillatami tiempo completopi sirvinajun.

CUNANMANDALLATA JEHOVAPI TUCUI SHUNGUHUAN CONFIAPASHUNCHI

16. Lucas 21:​26-28​pi shimicuna pactarijpica ñucanchicuna na manllashpa ñaupaman catichunga ¿imata ayudanga?

¹⁶ Ninan Manllanayai Llaqui tiempocunapica, gentecunaca “manllaimandaca desmayaitapashmi desmayanajunga”. Shinapash Jehová Diosta sirvijcunaca shinlli tucushpami Jehová Diosta sirvishpa catipashun (Lucas 21:​26-28​ta liipangui). Jehovata sirvijcunaca paipi confianata yachajushcamandami chai tiempocunapica na yapata manllashun. Tania paniguca: “Punda pasashca cosascunami shuj situaciongunata o llaquicunata shinlli tucushpa ñaupaman catichun ayudan ninmi. Shinallata ima llaquicunata charijpipash Jehová Dios ayudashpa, bendiciai ushashcatami yachajupashcani”. Huaquinbica gentecunara Taita Diosmanda ashtahuan yali poderta charinshnami ricurita ushan. Shinapash chaica na ciertochu can. Jehová Diosllami tucuimanda ashtahuan yali poderta charin. Imapash llaqui situaciongunaca na para siempre cangachu shuj punllaca tucuringami.

17. 2024 huatapa textoca ¿imapata ayudanga? (Callari paginapi fotota ricupangui).

¹⁷ Cai mundopica ashtaca nali cosascuna tiashcamandami manllaihuan causapanchi. Shinapash ñucanchicunaca Davidshnallatami cai nali cosascuna manllachichunga na saquina capanchi. 2024 huatapa textoca Jehová Diosman David nishca shimicunami can. Paica: “Manllaihuan cashpaca canbimi confiani” nircami (Sal. 56:​3, TNM-S). Bibliata ashtahuan intindingapaj llujchishca shuj libroca cai versomandaca cashnami nirca: “Davidca llaquicunahuan, problemacunahuan cashpaca na chaipilla yapata pensarinllu carca. Ashtahuangarin Taita Dios salvanapillami pensarin carca” nircami. Shinaca imapash llaquihuan cashpaca cai huatapa textota yaipi charipangui. Shinallata Jehová Dios imata rurashcata, imata rurajujta, shamuj punllacunapi imata ruranata pensaringapaj tiempoguta llujchipangui. Shina rurashpaca Davidshnallatami: “Taita Diosta yariajllami causajuni. Runa imata ruranatapash, na manllashachu” nipashun (Sal. 56:4).