Jehová Diosca nali cosascunata tucuchingacaman pacienciahuan shuyachunmi munan. Shinapash ¿imamandata pacienciahuan shuyachun munan? Cushilla shuyachunga ¿imata ayudanga?

JEHOVÁ DIOSCA ¿IMAMANDATA SHUYACHUN MUNAN?

Bibliapica: “Mandaj Diosca, cangunata llaquingapaca shuyangarami. Shinamandami, cangunata llaquishcamandaca, jatumbi churai tucunga. Mandaj Diosca, imatapash cashcatapacha ruraj Taita Diosmi. Paita yariashpa causajcunaca, tucuicunami ninanda cushijun” ninmi (Is. 30:18). Ashtahuanbachaca Isaiasca cai shimicunataca Jehovata na cazungapaj munaj judiocunatami nirca (Is. 30:1). Cai shimicuna na cazuj judiocunapa cajpipash, Jehovata cazuj judiocunataca paipa promesacunata shuyachunmi ninanda ayudarca. Cunan punllacunapipashmi Jehovapa promesacunata shuyachun ayudaita ushan.

Shinaca ¿imamandata pacienciahuan shuyana capanchi? Porque Diospashmi paipa punllata apamungapaca pacienciahuan shuyajun. Paica ima punlla, ima hora, cai alpapi nali ruraicunata tucuchinataca ña agllashcallami charijun. Y paillatami chai punlla chayamuchunga shuyajun (Mat. 24:36). Jehovapa punlla chayamujpica paimanda y paipa sirvijcunamanda Diablopa nishcacuna llulla cashcatami clarito ricuringa. Chai punllami Diablota y paipa catijcunatapash tucuchitapacha tucuchishpa saquinga. Shinapash Jehová Diosca paita sirvijcunataca ‘llaquishcatami’ ricuchisha nishcami.

Jehová Diospa punlla chayamungacamanga ñucanchi problemacunaca na tucuringachu. Shinapash Jehová Diosca, cai llaquicunahuan cashpapash cushilla caita ushashcatami nin. Profeta Isaías nishcashnaca Jehová Dios ali causaiguta apamungacamanga cushillami shuyashpa catita ushapanchi (Is. 30:​18, TNM-S). a Shinaca ¿imashinata cushilla cashpa catita ushapanchi? Chaipaca chuscu cosascunata yachajupashunchi.

JEHOVAPA PUNLLA CHAYAMUNGACAMANGA ¿IMASHINATA CUSHILLA SHUYAITA USHAPANCHI?

Ali cosascunata ricungapaj esforzaripashunchi. Davidca paipa causaipica ashtaca llaquicunatami charirca (Sal. 37:35). Shinapashmi Davidca: “Mandaj Diospaj ñaupajpica, upalla cailla. Paitaca shuyajuilla. Nalicunata ruraj runapaj causaipi tucui ali llujshijta ricushpapash, ama ninanda munashpa fiñarijuichu”  nircami (Sal. 37:7). Cai textopi consejotaca paillatapashmi pactachirca. Callaripica Jehová Dios paita salvanata prometishcapimi pensarirca. Catipica Jehová paimanda ima ali cosascunata rurashcatami valorashpa ricurca (Sal. 40:5). Ñucanchicunapash llaquicunahuan, problemacunahuan cashpapash ali cosascunata ricungapaj esforzarina capanchi. Shinami Jehová Dios nali cosascuna tucuchingacaman shuyanaca ashtahuan facilmi canga.

Jehovata alabangapaca tucui oportunidadcunata aprovechapashunchi. Davidca Salmo 71​ta escribijushpaca: “Ñucaca, tucui causaipimi candalla shuyajusha. Ashtahuan ashtahuanmi, candaca alicachijusha” nircami (Sal. 71:14). Davidca Jehovata alabangapaca paimanda villachin carca. Y Jehovaman candaitapashmi candan carca (Sal. 71:​16, 23). Ñucanchicunapash Davidpa ejemplota catishpami Jehovata alabangapaca ñucanchi amigocunaman y familiacunaman predicana capanchi. Shinallata reuniongunapipashmi canticocunata candana capanchi. Shinaca Salón del Reinopi canticota candajushpaca chai canticopi imatapacha nijujta yaipi charipangui. Caita ruranami Jehovapa punlla chayamungacaman cushilla shuyachun ayudanga.

Huauquipanicunahuan tiempota yalingapaj esforzaripashunchi. Davidca problemacunata charishpaca Jehová Diostaca: “Cambajlla causajcunapaj ñaupajpica, ali cashcamandami, cambaj shutipilla shuyajusha” nircami (Sal. 52:9). Davidca, Jehovata sirvijcunahuan tiempota yalishpami animarirca. Ñucanchicunapashmi reuniongunapi, predicacionbi y shuj horascunapipash huauquipanicunahuan tiempota yalishpa animarita ushapanchi (Rom. 1:​11, 12).

Jehová Dios carasha nishca promesapi confiapashunchi. Salmo 62:5​pica: “Ñuca almaca, Taita Diospillami saman. Paitallami shuyashpa causani” ninmi. Ñucanchi pensashcashna Jehovapa punlla na ucha chayamujpica pai carasha nishca promesapi confianami importante can. Jehovapa punlla na ucha chayamushpa parajpipash Jehovapa promesa pactarinataca seguromi cana capanchi. ¿Imashinata paipa promesacunapi confiaita ushapanchi? Chaipaca Bibliatami yachajuna capanchi. Shinallata profeciacuna imashina pactarijushcatapashmi yachajuna capanchi. Ashtahuanbash Jehová Dios imashina ñucanchita yachachijushcata yachajunami ayudanga (Sal. 1:​2, 3). Para siempre causaiguta ñucanchiman carasha nishca promesata Jehová pactachingacamanga Jehová Diostaca paihuan ali amigo cangapami, paipa espíritu santota mañashpa catina capanchi (Jud. 20, 21).

Rey Davidshnallatami Jehovapa promesacunapi confiajcunata, juyaihuan cuidan cashcataca seguro caita ushapanchi (Sal. 33:​18, 22). Jehovapa punlla chayamungacamanga cushilla, pacienciahuanmi ali cosascunata ricungapaj esforzarina capanchi. Chaipaca Jehovata alabashpa, huauquipanicunahuan tiempota yalingapaj esforzarina capanchi. Shinallata Jehovapa promesacunapi ashtahuan confiangapapashmi esforzarina capanchi.