1. Jesús paipa catijcunahuan último tutata cashpaca ¿imatata nirca?

 JESUSCA paipa catijcunahuan último tutata cai alpapi cashpaca casi 30 viajetami juyaimanda parlarca. Jesusca nircami: “Caishujhuan chaishujhuan juyarishpa causanguichi” nishpa (Juan 15:12, 17). Paicuna juyarishpa causanajujta ricushpami gentecunaca Jesuspa ali catijcuna cashcata cuenta japina carca (Juan 13:34, 35). Shinapash juyani nitallaca na ninachu capanchi. Chaipa randica ruraicunahuanmi huauquipanicunataca juyana capanchi. Chaimi Jesusca cashna nirca: “Maijambash pai juyashca cumbacunamanda huañushpaca, ninandapacha juyashcatami ricuchin. Ñuca imata mandashcata rurashpaca, ñuca juyashca cumbacunami canguichi” nishpa (Juan 15:13, 14).

 2. a) Jehovata sirvijcunaca ¿imamandata rijsishcacuna can? b) Cai temapica ¿ima tapuicunatata yachajupashun?

² Cunanbi Jehovata sirvijcunaca juyarishpa, shujllashna tandanajushca causaimandami rijsishcacuna can (1 Juan 3:10, 11). Chaimi na ñucanchishnalla viñashca cajpipash, shuj llactamanda cajpi o shuj shimita parlajpipash tucuilla huauquipanicunahuan juyarishpa causanchi. Shinapash cashnachari tapurinchi: “Juyarishpa causanaca ¿imamandata cunanbi minishtirishca can?  Jehová Diospash, Jesuspash ¿imashinata ñucanchitaca shinllichin? Jesuspa chaquita catishpa huauquipanicunahuan juyarishpa causangapaca ¿imatata rurana capanchi?” nishpa (1 Cor. 8:1).

 3. ‘Tucurimui punllacunapi’ causajuimanda ¿imatata ashtaca gentecunaca rurashca?

³ ‘Tucurimui punllacunapi’ causaimandami ashtacacunaca “llaquita apashpa, llaquinayaita” causan (2 Tim. 3:1-5; Sal. 90:10). Chaimi ñana causangapaj munashpa cada huata 800 mil yali gentecuna paicunamandallata huañuchirishca. Shinaca cada 40 segundomi shuj huañuchirin. Huaquin huauquipanicunapashmi ñana causangapaj munashpa paicunamandallata huañuchirishca.

 4. Punda tiempopica ¿picunallata huañungapaj munarca?

⁴ Punda tiempopi huaquin Jehovata sirvijcunapashmi llaqui llaqui sintirimanda huañungapaj munarca. Por ejemplo, Job runagu llaqui llaqui sintirimandami cashna nirca: ‘Ñuca causaitaca millanayanmi, napacha causangapaj munanichu’ nishpa (Job 7:16; 14:13). Shinallata Jonás runagupash paipa munai na pactarijpimi llaquilla sintirirca. Chaimi cashna nirca: “Mandaj Dioslla, ñuca causaita quichuhuailla nipanimi. Ñucapaca, causangapaj randica huañunami ashtahuan ali canman” nishpa (Jon. 4:3). Profeta Eliaspash ninanda llaquirishpami huañungapaj munarca. Paica nircami: “Mandaj Dioslla, caicamanllami causangapaj munani. Ñuca causaita quichuhuailla. Ñucaca, ñuca ñaupa taitacunata yali ashtahuan alipash na canichu” nishpa (1 Rey. 19:4). Paicuna shina sintirishca cajpipash Jehová Diosca paicunata juyashpa catirca. Paicuna huañuchunga na munarcachu. Chaimandami Jehová Diosca paicunata shinllichishpa cutin causangapaj munachun, paita tucui shunguhuan sirvishpa catichunbash ayudarca.

 5. Ñucanchi huauquipanicunata juyaihuan ayudanaca ¿imamandata minishtirin?

⁵ Cunan punllacunapi ashtaca huauquipanicunaca ashtaca problemacunata charimandami juyaihuan ayudachun minishtin. Huaquin huauquipanicunaca paicunata llaquichishcamanda, burlarishcamandami llaquilla sintirishca. Cutin shuj huauquipanicunaca trabajopi cumbacuna huasha rimajpi o yapata trabajaimandami shaijushca, llaquilla sintirishca. Shinallata shuj huauquipanicunaca familiapi problemacunata charishpa, na Testigo cusa o huarmi cutin cutin nalicachishpa rimashcamanda o shuj llaquicunamandapashmi ninanda llaquirin. Chaicunata aguantachunga ¿pita ayudaita ushan?

 6. Jehová Diosca ¿imashinata paipa sirvijcunataca shinllichin?

⁶ Jehová Diosca ¿imashinata paipa sirvijcunataca shinllichin? Paicunata juyashcata yarichishpami Jehová Diosca paipa sirvijcunataca shinllichin. Israelitacunaca Jehovapa cai shimicunata uyashpaca ninandami cushijurianga. Jehová Diosca nircami: “Cangunaca, ñuca ricuipica ninan valishcami carcanguichi. Ñucapi alicachi tucushcacuna cajpimi, cangunata juyani. Na manllanachu canguichi, ñucami cangunahuan cani” nishpa (Is. 43:4, 5). Shinaca Jehová Dios quiquinda alicachishcata, juyashcataca na cunganachu capangui. a Bibliapica ninmi: ‘Ninan ushaita charij Mandaj Diosca cangunata quishpichinga. Cangunamandaca, ninandami cushijunga’ nishpa (Sof. 3:16, 17).

 7. Jehová Diosca ¿imashinata ñucanchicunataca juyan? (Callari dibujota ricupangui).

 ⁷ Ima llaquita charijpipash paipa sirvijcunataca Jehová Diosca nishcami, cuidasha cushichishami nishpa. Bibliapica ninmi: Jehová Diosca ‘marcashpami pushamunga, cunguri jahuapi churashpami juyajunga. Shuj mama paipa huahuata cushichinshnami cushichinga’ nishpa (Is. 66:12, 13). Caipi pensaripashunchi, shuj mama paipa huahuaguta juyaihuan marcajpica ¿imashinata chai huahuaguca sintiringa? Chai huahuaguca cushillami sintiringa. Shinallatami Jehová Diosca paipa sirvijcunata ninanda juyashpa, alicachishpami ricun. Jehová Dios ñucanchita juyashcataca seguromi cana capanchi (Jer. 31:3).

8, 9. Jesús ñucanchita juyashcata yarinaca ¿imashinata ñucanchitaca ayudan?

⁸ Jehová Dios paipa sirvijcunata ninanda juyashcataca ¿imamandata seguro capanchi? Juan 3:16​pica ninmi: “Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” nishpa. Jesusca ñucanchita ninanda juyaimandami ñucanchimanda huañurca. Bibliapica ninmi: ‘Llaquipash, manllaipash Cristo ñucanchita juyajujtaca’ na anchuchi ushangachu nishpa (Rom. 8:35, 38, 39).

⁹ Huaquinbica llaquicunata charimandami shaijushca, llaquilla sintirinchi. Jehová Diosta cushilla sirvitapash ñana ushanchichu. Shinaca chai llaquicunata aguantangapaca Jesús ñucanchita juyashcatami yarina capanchi (2 Corintios 5:14, 15, liingui). Chaita yarinami Jehovata sirvishpa catichun, causashpa catichunbash ayudanga. Shinallata Jesús ñucanchita juyashcata yarinami pipash ñucanchita llaquichijpi, terremotocuna tiajpi o shuj llaquicuna tiajpi ñaupaman catichun ayudanga.

10, 11. Llaquilla caj huauquipanicunataca ¿picunallata cushichina can?

¹⁰ Jehová Diosca huauquipanicunahuanmi ñucanchitaca shinllichishpa ayudan. Huauquipanicunata juyashpaca Jehová Diostami juyanajunchi. Chaimi ñucanchi huauquipanicunataca Jehová paicunata juyashcata, paipa ñaupajpi ninan valishca cashcata yarichun ayudana capanchi (1 Juan 4:19-21). Jesusta catijcunataca apóstol Pabloca nircami: “Aliguta catingapajmi, cangunaca caishuj chaishuj [cushichirina, NM ] canguichi. Chaitaca ñami ruranajunguichi” nishpa (1 Tes. 5:11). Imashinami ricupanchi, huauquipanicunataca ancianocunallaca na cushichinachu can. Tucuicunami Jehová Dioshna, Jesushna huauquipanicunataca cushichina, ayudana capanchi (Romanos 15:1, 2, liingui).

¹¹ Shinapash huaquin huauquipanicunaca llaqui llaqui sintirimanda o yapata preocuparimandami doctorcunapa ayudata, pastillacunatapash minishtin (Luc. 5:31). Bibliapica ninmi: ‘Na catinayanllu nijcunata [o llaqui llaqui cajcunataca] ayudapanguichi. Nara ali shinlli crijcunatapash yachachipanguichi. Pitapash ama ñapash fiñashpa yachachipaichi’ nishpa. Ancianocunapash, shuj huauquipanicunapash na doctorcuna cashpapashmi chai mandashcata pactachin (1 Tes. 5:14). Shinallata llaqui llaqui caj huauquipanicunata intindingapaj, juyangapaj, pacienciahuan tratangapaj, ayudangapaj esforzarinami minishtirishcapacha can. Shinaca tapuripashunchi: “¿Huauquipanicunata shinllichingapachu esforzarijuni? Huauquipanicunata cushichichunga ¿imata ayudahuanga?” nishpa.

12. Shuj congregacionmanda huauquipanicunaca ¿imashinata shuj panigutaca ayudarca?

¹² Llaqui llaqui caj huauquipanicunata juyaihuan tratanaca ¿imashinata ayudan?  Europa llactamanda shuj paniguca ninmi: “Huaquinbica huañungapami munani. Ñuca congregacionmanda turiñañacunaca ninandami juyaihuan ayudahuashca. Huaquin turiñañacunallami depresión ungüita charijtaca yachan. Shinapash tucuicunami ñucata ayudangapaj munan. Shuj cusahuarmica ñuca taitamamashnami ima hora minishtijpipash ayudahuan” nishpa. Chai huauquipanicunashna na ayudai ushashpapash llaqui llaqui caj huauquipanicunata shuj cosascunahuanmi ayudai ushapanchi. b

13. Huauquipanicunata shinllichingapaca ¿imatata rurana capanchi?

¹³ Aliguta uyapashunchi (Sant. 1:19). Shinaca llaquilla caj huauquipanicunataca ¿imashinata shinllichita ushapanchi? Huauquipanicunata aliguta uyangapaj, paicunata intindingapaj esforzarina capanchi. Paicuna imashina sintirishcata yachangapaca aliguta pensarishpami imagutapash tapuna capanchi. Shinami paicunata juyashcata ricuchishun. Ñucanchi imashna ricushcahuan, imasha parlashcahuanmi paicunamanda preocuparishcata ricuchina capanchi. Shinallata imashina sintirishcata paicuna parlajpica parlachun saquishpa, pacienciahuanmi uyana capanchi. Shinami paicuna imashina sintirishcata yachaj chayashun. Shina rurajpica llaquilla caj huauquipanicunaca ñucanchipi confiashpa, ñucanchi imata nishcatapash alimi uyanga. Huauquipanicunata ayudangapaj esforzarishpaca paicuna ñaupaman catichunmi ayudashun.

14. ¿Imamandata nalicachishpa na parlana capanchi?

¹⁴ Nalicachishpaca ama parlapashunchi. Llaqui llaqui caj huauquipanicunamanda nalicachishpa parlajpica paicunaca ashtahuanmi llaquiringa. Nalicachishpa parlashpaca paicunata ayudaitapash na ushashunllu. Bibliapica ninmi: “Huaquingunaca, imata rimashpapash, espadahuan chugrichinshnami saquinajun. Ashtahuangarin alipacha yachajushcacunapaj shimica, jambigushnami” nishpa (Prov. 12:18). Shinaca llaquichingapaj na munashpapash, na aliguta pensarishpa parlashpaca paicunataca ashtahuanmi llaquichishun. Huauquipanicunata juyaihuan shinllichingapaca paicunata intindingapaj esforzarina capanchi (Mat. 7:12).

15. Huauquipanicunata shinllichichunga ¿imata ayudanga?

¹⁵ Bibliahuan ayudapashunchi (Romanos 15:4, 5, liingui). “Na ñapash fiñarij, cushijuita caraj” Taita Diosmi Bibliataca cushca. Chaimi Bibliahuan huauquipanicunataca shinllichishpa ayudai ushapanchi. Shinallata huauquipanicunata ayudangapaca Índice de las publicaciones Watch Tower, Guía de estudio para los testigos de Jehová nishcatapash utilizai ushapanchi. Chaipica huauquipanicunata ayudangapaca Bibliapa textocunata, publicaciongunatapashmi tari ushapanchi.

16. Llaqui llaqui caj huauquipanicunataca ¿imashinata tratana capanchi?

¹⁶ Juyaihuan parlapashunchi. Jehová Diosca “ñucanchita ninanda llaquij, tucuipi cushichij Taita Dios” can. Chaimi paita sirvijcunataca ‘ninandapacha llaquishpa’ juyaihuan tratan (2 Corintios 1:3-6, liingui; Luc. 1:78; Rom. 15:13). Jehová Dioshnami apóstol Pabloca huauquipanicunataca juyaihuan tratarca. Paica nircami: “Mama paipaj uchilla huahuacunata juyashpa viñachinshnami,  cangunataca charircanchi. Ñucanchica, cangunataca ninanda juyashpami, Taita Diosmanda ali villaita villarcanchi. Cangunamandaca, huañuitapash huañushunlla yashpami, na saquishpa villarcanchi. Cangunaca, ninanda juyai tucushcami canguichi” nishpa (1 Tes. 2:7, 8). Llaqui llaqui caj huauquipanicunaca Jehová Diosta ayudahuai nishpami mañan. Jehová Dioshna paicunata juyaihuan tratashpaca paicunataca ninandami ayudashun.

17. ¿Imamandata huauquipanicuna tucuita ali rurachunga na shuyana capanchi?

¹⁷ Tucuita ali rurachunga na shuyanachu capanchi. Ñucanchi huauquipanicuna imapipash na pandaringachu yashpaca paicunataca na ayudai ushashunllu (Ecl. 7:21, 22). Jehová Diosca ñucanchicuna tucuita ali rurachunga na shuyanllu. Chaita yarishpaca shuj huauquipanicuna pandarijpipash juyaihuanmi tratashun (Efes. 4:2, 32). Huauquipanicunataca shujcunahuan na chimbapuranachu capanchi. Shinallata Jehovata sirvingapaj ashtahuanmi esforzarina canguichi nishpaca na ninachu capanchi. Chaipa randica siempremi cushichina capanchi. Chaimi huauquipanicunaca cushilla Jehovata sirvishpa catinga (Gál. 6:4).

18. ¿Imamandata huauquipanicunata juyaihuan ayudana capanchi?

¹⁸ Jesusca tucui gentecunamandami huañurca. Shinaca Jesuspash, Jehovapash tucui paipa sirvijcunatami ninanda alicachin (Gál. 2:20, NM ). Huauquipanicunata tucui shunguhuan juyaimandami ayudangapaj munapanchi. Paicunata cushichingapaca ‘casilla ali causaiguta charingapaj, caishuj chaishuj shinlli tucushpa causangapami’ esforzarina capanchi (Rom. 14:19). Tucuicunallatami paraíso alpagupi cushilla causangapaj munapanchi. Chaipica ungüicuna, guerracuna, jarcaicuna, familiapi problemacuna, huañuipash ñana tiangachu. Ña mil huatacuna pactarijpica tucuilla gentecunami jucha illaj cashun. Shinapash último pruebapi Jehovata tucuipi cazujcunatami Jehová Diosca ‘paipa huahuacunatashna punchapambapi causagrichun cacharichinga’ (Rom. 8:21). Shinaca caishuj chaishuj juyaihuan ayudaripashunchi. Shinami paraíso alpagupi cushilla causai ushashun.