1, 2. a) Villachinata jarcajpica ¿imamandata na manllarina capanchi? b) Cai temapica ¿imatata yachajupashun?

HUATA 2018​pica 223 mil yali huauquipanicunami villachinata jarcashca pushtucunapi sirvishpa catirca. Imashinami caishuj temapi yachajuparcanchi, tucui shunguhuan Jehovata sirvijcunata catiriashpa llaquichinataca alimi yachapanchi (2 Tim. 3:12). Maipi causashpapash na yashcapimi villachinata, Jehovata sirvinatapash autoridadcunaca jarcaita ushan.

² Gobiernocuna, autoridadcuna villachinata jarcajpica cashnachari tapurinchi: “Catiriashpa llaquichijpica ¿Jehová ñucanchita saquishcatachu ningapaj munan? ¿Jehovata ñana sirvinatachu ningapaj munan? ¿Shuj llactapichu sirvigrina cani?” nishpa. Cai temapimi cai tapuicunamanda yachajupashun. Shinallata villachinata jarcashca pushtucunapi villachishpa catingapaj, imacunatalla na ruranatapashmi cai temapica yachajupashun.

3. a) Apóstol Pablohuanga 2 Corintios 11:23-27​pi nishca shinaca ¿imata pasarca? b)  Paimandaca ¿imatata yachajupanchi?

³ Villachinata jarcajpica Jehová ñucanchita saquishca nishpachari pensari callarinchiman. Shina pensarinaca nalichu can. Cunanga apóstol Pablomanda yaripashunchi. Jehová Diosca paitaca alicachishpami ricun carca. Apóstol Pabloca 14 Escrituras Griegas Cristianas nishca cartacunatami escribirca. Paica na israelcunaman villachun cachashcami carca. Shina cashpapash paitaca gentecuna catiriashpa llaquichijpimi causarca (2 Corintios 11:23-27, liingui). Caimandaca ¿imatata yachajupanchi? Tucui shunguhuan Jehovata sirvijcunatapash gentecuna catiriashpa llaquichinataca alimi yachapanchi.

4. Cai mundomanda gentecunaca ¿imashpata ñucanchicunataca na ricunayachin?

 ⁴ Imamanda gentecuna llaquichinataca Jesusca ñami paipa catijcunamanga villashcarca. Cai mundopa ruraicunapi na chapurijpimi gentecunaca ñucanchitaca na ricunayachinga nirca (Juan 15:18, 19). Catiriashpa llaquichijpica Jehová ñucanchita saquishcataca na ningapaj munanllu. Ashtahuangarin catiriashpa llaquichijpipash villachishpa catijpica alita ruranajushcatami ricuchinchi.

5. ¿Gentecunaca Jehovata sirvinataca jarcai ushanllu? Shuj chimbapuraimanda parlapai.

⁵ Gentecunaca Tucuita Ruraj Diosta sirvichunga na jarcaita ushanllu. Jehovapa contracunaca paita ama sirvichun imatapash rurashpapash jarcaitaca na ushashcachu. Cunanga Segunda Guerra Mundialpi ima pasashcata yaripashunchi. Tauca llactamanda gobiernocunami Jehovata sirvijcunataca manllanayaita catiriashpa llaquichirca. Jehovata sirvinataca Alemania llactamanda gentecunallaca na jarcarcachu. Ashtahuangarin Australiamanda, Canadamanda, shuj shuj llactacunamanda gobiernocunapashmi jarcarca. Shina jarcajpipash imashina Jehová Dios ayudashcata ricupashunchi. Huata 1939​pimi guerra tiai callarirca. Chai huatapica 72.475 publicadorcunami mundo enteropi tiarca. Shinapash chai guerra tucurishca jipa huata 1945​pica, 156.299 publicadorcunami ashtahuan mirashca carca.

6. Catiriashpa llaquichijpipash ¿imata gentecunahuanga pasashca? Shuj chimbapuraimanda parlapai.

⁶ Manllanapa randica chai jarcaicunami Jehovata ashtahuan sirvichun ayudanga. Cunanga shuj cusahuarmimanda yachajupashunchi. Paicunaca shuj uchilla huahuagutami charirca. Gobiernocuna villachichun jarcaj llactapimi paicunaca causarca. Shina jarcajpipash paicunaca na manllashpa ashtahuan villachingapaj nishpami precursor regularcuna tucurca. Chaimi huarmiguca alipacha pagaj trabajotapash saquirca. Cutin cusaguca nircami, catiriashpa llaquichijpipash Testigocuna villachishpa catijta ricushpami gentecunaca Testigocunamanda yachangapaj munarca nishpa. Chaimi Bibliamanda yachachingapaca ashtahuan fácil carca. Shinallata shujcunatapashmi ayudarca. Chai llactamanda shuj ancianoca nircami, Jehovata sirvinata saquishcacunapashmi cutin tandanajuiman shamunajun, villachingapaj na llujshishcacunapashmi cutin villachingapaj llujshinajun nishpa.

7. a) Levítico 26:36, 37​pi shimicunamandaca ¿imatata yachajupanchi? b) Quiquinda catiriashpa llaquichijujpica ¿imatata ruragripangui?

⁷ Ñucanchi contracunaca, villachinata jarcashpaca  manllaimanda Jehovata sirvinata saquichunmi munan. Llullacunata nishpami Testigocunapa huasicunaman imatapash mascangapaj policiacunaca yaicun. Shinami tribunalcunapa ñaupajman apashpa, huaquin huauquipanicunataca carcelpi vichashca. Chai ruraicunahuanmi ñucanchita manllachingapaj munan. Manllachichun saquishpaca ñucanchillatami catiriashpa llaquichun saquinajunchiman. Levítico 26:36, 37​pi nishca gentecunashnaca na cangapaj munapanchichu (chai textota liipangui). Manllai ñucanchita mishachunga ama saquipashunchichu. Huaquinbica manllaita charimandami Jehovata sirvinatapash saquita ushanchiman. Chaipa randica Jehovapi confiashpa catipashunchi. Manllai mishachunga ama saquipashunchichu (Sal. 27:1). Imata ruranata ayudahuai nishpami Jehovata mañana capanchi. Jehová Dios ayudata yachashpaca maijan gobiernopash Jehovata sirvishpa catichunga na jarcaita ushangachu (Heb. 13:6).

8, 9. a) Familia ucumanda cusaca ¿imatata rurana can? b) Maimanbash sirvingapaj rigrijushpaca ¿imatata rurana can?

⁸ Villachinata jarcaj llactacunapi na villachichun saquijpica, shuj llactapi Jehovata fácil sirvina llactamanllu rina cani nishpachari tapurinchi. Maiman rinataca cada unomi agllana capanchi. Huaquin huauquipanicunaca punda tiempopi Jesusta catijcuna imata rurashcata yachajunami paicunataca ayudashca. Punda tiempopica Jesusta ali catijcunapa contracunaca Esteban jarigutaca rumicunahuan pigashpami huañuchirca. Shina huañuchishca jipallami discipulocunaca Jerusalenman, Judea llactaman, Samaria llactacunaman o shuj llactacunamanbash Jehovata sirvingapaj rirca. Shinallata Fenicia, Chipre, Antioquía nishcacunamanbashmi rirca (Mat. 10:23; Hech. 8:1; 11:19). Cutin apóstol Pablotaca catiriashpa contracuna llaquichishca pushtupillata quedashcatami shuj huauquipanicunaca yarishca. Shinallata paipa causai peligropi cajpipash ali villaigucunata villachinamanda, huauquipanicunata ayudanamandapashmi chaipi quedarca (Hech. 14:19-23).

⁹ Caimandaca ¿imatata yachajupanchi? Familia ucumanda cusami imatapash ruranataca agllana can. Nara imatapash agllashpallatami Jehovata mañana can. Shinallata familiapa causai ali canata, maipi sirvina ali o nali canatapashmi ali ali ricuna can. Bibliapi nishca shinaca “tucuicunami, paicuna imata rurashcashnallata japinajunga” nishcatami Jehovata sirvijcunaca yarina can (Gál. 6:5). Cada uno maimanbash sirvingapaj rijpica nalicachishpaca na parlajunachu capanchi.

10. Sucursalmanda huauquicuna, ancianocunapash ¿imashinata ñucanchitaca yachachinga?

¹⁰ Villachichun jarcajpipash ¿imashinata Jehovata sirvishpa cati ushapanchi? Sucursalmandami ancianocunamanga espiritualmente ali catichun imata ruranata, imashina tandanajuicunata ruranata, imashina villachinatapashmi yachachinga. Shinapash ¿sucursalmanda huauquicuna ancianocunahuan na parlaita ushashpaca? Ancianocunaca Bibliamanda yachachishpa, publicaciongunahuanmi Jehovata sirvishpa catichun huauquipanicunataca ayudanga (Mat. 28:19, 20; Hech. 5:29; Heb. 10:24, 25).

11. a) Jehovata sirvijcunaca ¿imashinata shinlli feta charishpa catita ushapanchi? b) Bibliahuan, publicaciongunahuanga ¿imatata rurana capanchi?

¹¹ Jehová Diosta sirvijcunaca shinlli fetami charishpa catinga (Is. 65:13, 14; Luc. 12:42-44). Jehovata sirvijcunaca ¿imashinata shinlli feta charishpa catita ushan? Jehovapa organizacionga paita tucui shunguhuan sirvishpa catichunmi ayudashpa catinga. Shinaca villachinata jarcai callarijpica ¿imatata rurana capanchi? Bibliata, publicaciongunata maipi pacanatami cunanmanda ña charina capanchi. Bibliata, publicacionguta papelpi o tabletcunapi charishpapash ama maipipash yangata saquipashunchichu. Shinaca cada unomi Jehovata tucui shunguhuan sirvishpa catingapaj esforzarina capanchi.

12. Ancianocunaca tandanajuicunataca ¿imashinata ruranga?

 ¹² Chaupi semanapi tandanajuicunahuanga ¿imata pasanga? Ancianocunami shuj gentecuna na yachaj chayajta maipi tandanajunata ninga. Shinallata ashalla huauquipanicunahuan tandanajunatapashmi ninga. Cutin maipi, ima horas tandanajunatapash casi siempremi cambianga. Shinaca ñucanchicunaca ñucanchi huauquipanicunata ama llaqui apachunga ¿imatata rurana capanchi? Shuj huauqui o shuj panipa huasiman chayashpaca upallaguta parlashpa, llujshigrijushpapash upallami llujshina capanchi. Shinapash ñucanchi ropaca tandanajuiman rijunshnaca na churajunachu capanchi.

13. La antigua Unión Soviética nishca carcelpi cashca huauquipanicunamandaca ¿imatata yachajupanchi?

¹³ Villachinahuanga ¿imata pasanga? Cada llactapimi shuj shuj jarcaicuna tianga. Shinapash Jehovata juyaimandaca paipa Reinomanda villachingapami imatapash rurashun (Luc. 8:1; Hech. 4:29). Emily Baran historiamanda parlaj huarmica la antigua Unión Soviética nishcapi testigo de Jehovacunapa villachinamandaca cashnami nirca: “Chai llactamanda gobierno tucuilla crijcunatami paicunapa crishcamandaca na parlanachu canguichi nijpipash, Testigocunaca paicunapa crishcacunamanda paicunapa vecinocunaman, trabajo pushtucunapi, paicunapa cumbacunamanmi villachi callarirca. Shina villachimandami Testigocunataca prezo aparca. Paicunaca chaipipashmi villachishpa catirca” nishpa. Shinaca la antigua Unión Soviética nishca carcelpi cashca huauquipanicunaca villachichun jarcashca pushtucunapipashmi villachishpa catirca. Ñucanchi causaj pushtucunapi villachichun jarcajpipash, ñucanchicunapash villachishpa catingapaj munaitami charina capanchi.

14. Salmo 39:1​pi shimicunata cazushpaca ¿imatata na rurashun?

¹⁴ Shujcunaman imata nigrijushpapash ali alimi pensarina capanchi. Villachinata jarcajpica Bibliapi nishcashnami ima hora “upalla” quedanata ricuna capanchi (Ecl. 3:7). Ñucanchi huauquipanicunapa shuticunata, maipi causajta, maipi tandanajujta, imashina villachinajujta, espiritualmente imashina ayudajujtapash na pimanbash villanachu capanchi. Caicunamandaca shuj llactapi o ñucanchi pushtupi causaj familiacunahuan, ni ñucanchi amigocunahuanbash na parlanachu capanchi. Autoridadcunamangarin nimamanda na parlanachu capanchi. Ñucanchi huauquipanicunamanda pimanbash parlashpaca paicunapa causaitami peligropi churashun (Salmo 39:1, liingui).

15. Diabloca ¿imatata rurangapaj munan?

¹⁵ Imapash problemacunamanda ñucanchi huauquipanicunahuanga ama culiraripashunchichu. Diabloca ‘shuj huasipi causajcuna paicunapura fiñanajushpa shicanyarishpaca, chai huasi ucupurapi causajcuna tucurinataca’ alipachami yachan (Mar. 3:24, 25). Chaimi Diabloca huauquipanicunapura culirarichun  munan. Huauquipanicunapura culirarishpa contra tucunapa randica Diablohuanmi contra tucuna capanchi.

16. Gertrud Poetzinger panigumandaca ¿imatata yachajupanchi?

¹⁶ Jehovata tucui shunguhuan sirvij huauquipanicunapashmi caishuj huauquipanicunahuan ama culiraringapaj esforzarina can. Cunanga Gertrud Poetzinger, Elfriede Löhr panigucunamanda yachajupashunchi. Paicunaca ishcandimi ungidacuna carca. Paicunaca campo de concentración nazi nishcapimi shuj panicunandi prezo carca. Elfriede paniguca paicunahuan prezo caj panicunata ayudangapami alipacha discursocunata cun carca. Chaimi Gertrud paniguca Elfriede panigutaca envidiai callarirca. Shinapash tiempohuanga pinganayachishpami Jehovata ayudahuai nishpa mañarca. Gertrud paniguca cashnami nirca: “Shujcunaca, ñucanchita yalimi imagutapash ashtahuan ali rurai ushajta yachajurcani” nishpa. Chai paniguca ¿imashinata ñana envidiarca? Elfriede panigu ali ali cashcata, ali rurashcacunata ricushpami Gertrud paniguca ñana envidiarca. Shina ruranami paihuan cutin ali catichun ayudarca. Paicunaca campo de concentración nazi nishcamanda llujshishpaca siempremi Jehovata tucui shunguhuan sirvirca. Paicunaca cai alpapica ñana causanajunllu. Shinaca ñucanchicunapash ñucanchi huauquipanicunahuan imapash problemacunamanda na culirangapaj esforzarishpaca na shicanyarishunllu (Col. 3:13, NM, 14).

17. Ancianocunapa nishcacunata cazunaca ¿imamandata minishtirishcapacha can?

¹⁷ Ancianocuna nishcata cazupashunchi. Paicunapa nishcacunata cazushpaca imapash problemacunapica na satirishunllu (1 Ped. 5:5). Villachichun jarcashca shuj llactapi ima tucushcata ricupashunchi. Chai llactapica villachinajushpa publicaciongunataca na saquinachu canguichi nishpami ancianocunaca mandarca. Shinapash shuj precursor huauquica alitami rurajuni yashpami ancianocunata na cazurca. Shina na cazuimandaca ¿imata pasarca? Ñangunapi shuj punlla paipash, shuj huauquicunapash villachinajujpimi policía japishpa paicunataca tapuchi callarirca. Policiacunaca chai huauquicunata pacalla catishpami maipi publicacionguta saquishcata yachaj chayarca. Caimandaca ¿imatata yachajupanchi? Ñucanchi imata ruranata yachanchimi nishpaca na confiarinachu capanchi. Chaipa randica ancianocunapa nishcata cazupashunchi. Ancianocunataca Jehová Diosmi ñucanchicunata cuidachun churashca. Paicunata cazujpica Jehová Diosca ñucanchita bendiciangami (Heb. 13:7, 17).

18. Huauquicunaca ¿imamandata paicunapa yuyaicunata rurachunga na mandana can?

¹⁸ Ñucanchi munashca yuyaicunata rurachun na mandanachu capanchi. Ancianocuna paicunapa munashcata rurachun mandashpaca huauquipanicunataca llaquichita ushanmi. La antigua Checoslovaquia llactapi villachinata  jarcaj pushtupi cashca Juraj Kaminský huauquica nircami: “Ancianocunata, siervo ministerial huauquicunata prezo churajpimi, caishuj ancianocuna, superintendente huauquicunaca paicunapa munashca yuyaicunata rurachunmi publicador huauquipanicunataca mandarca. Imacunata ruranata imacunata na ruranatami chai huauquicunaca mandai callarirca” nishpa. Shinapash Jehová Diosca shujcunapa causaipi imata ruranata imata na ruranata mandachunga nipiman na mandashcachu. Maijanbash paicunapa yuyaita rurachun huauquipanicunata mandanajushpaca, Jehová Dios mingashcashna paicunata cuidajushcataca na ricuchinajunmanllu. Paicunapa yuyaita rurachun mandashpaca chai huauquipanicunapa dueño cuendami ricurinman (2 Cor. 1:24).

19. 2 Crónicas 32:7, 8​pi nishcashnaca ¿imamandata Diablo llaquichingapaj munajpipash na manllana capanchi?

¹⁹ Diabloca ñucanchicunapa contrami can. Paica tucui shunguhuan Jehovata sirvijcunataca, jarcaicunata churashpami catinga (1 Ped. 5:8; Apoc. 2:10). Diablopash, Diablopa munaita ruraj gentecunapashmi ñucanchicuna villachichun, tandanajuchun jarcangapaj munanga. Shinapash na manllanachu capanchi (Deut. 7:21). Villachinata jarcajpipash Jehová Diosca ñucanchitaca na saquingachu, ayudashpami catinga (2 Crónicas 32:7, 8, liingui).

20. ¿Quiquinga imatata ruragripangui?

²⁰ Punda tiempopi Jesusta ali catijcunaca na manllashcatami ricuchirca. Paicunaca jatun mandajcunapa ñaupapi cashpaca: “Cangunallata aliguta yaripaichi. Taita Diospaj ñaupajpica, ¿cangunatara cazushpa, Taita Diosta na cazunachu ali canga? Ñucanchi ricushcata, uyashcata villanataca, napacha saqui ushanachu canchi ninajurcami”. Paicunapa alipacha ejemplotami catina capanchi (Hech. 4:19, 20).