1, 2. a) Libre causangapaj munashcata ricuchingapaca ¿imatata gentecunaca rurashca? b) Shina ruraimandaca ¿imata pasashca?

CUNAN punllacunapi gentecunaca tucuicunallatami igual derechota charingapaj, libre cangapaj munan. Tucui ladocunapimi gentecunaca llaquicunamanda, pobre causanamanda, nali tratai tucushpa causanamanda libre cangapaj munan. Cutin shujcunaca paicuna munashcashnami causangapaj munan. Tucuicunallatami libre causangapaj munan.

² Libre causangapaj munaimandami gentecunaca parocunata, huelgacunata rurashca. Shina rurashpapash jatun llaquicunatallami charishca. Huaquinbicarin huañuitapashmi huañushca. Rey Salomón escribishca shimicunaca cierto cashcatami ricupanchi. Paica nircami: “Runaca, paipaj llaquipajllata caishuj runata llaquichishpa charina punllami chayan” nishpa (Ecl. 8:9).

3. Cushilla ali causangapaca ¿imatata rurana capanchi?

³ Cushilla ali causangapaj imata ruranatami discípulo Santiagoca ricuchirca. Paica nircami, cushilla causangapaca ‘huatashcashna causanajujmanda cacharichij Diospa Shimita  shungupi alicachishpami na cungashpa pactachina’ can nishpa (Sant. 1:25). Jehová Diosca gentecuna cushilla causangapaj imata minishtijta ali yachaimandami paipa mandashcacunata cushca. Shinallata Adanman, Evamanbash cushilla ali causachun, libre causachunbashmi tucui minishtishcata curca.

4. ¿Imashina causaitata Adanbash, Evapash charirca? (Callari dibujota ricupangui).

⁴ Paraíso alpagupica pobre gentecuna, llaquicunapash na tiajpimi nimata na manllashpa causan cashca. Chaitami Génesis libropa callari capitulocunapica ricuchin. Adanbash, Evapash libre causaitami charirca. Paicunaca ungüi illaj, micunamanda, trabajomandapash na preocuparishpami causarca. Huañuitapash na huañuna carcachu. Shina causaitaca cunanbi gentecunaca yaitallapash na yai ushanllu (Gén. 1:27-29; 2:8, 9, 15). Shinaca Adanbash, Evapash ¿paicunallatachu tucuita decidi usharca? Ricupashunchi.

5. Gentecuna libre causai ushangapaca ¿imatata minishtin?

⁵ Huaquin gentecunaca ninmi, ima llaquicuna japina cajpipash ñucanchillatami imata ruranataca decidina canchi nishpa. Libre cana nishpaca ñucanchillata imatapash decidi ushashcata, chai decidishcata rurana cashcatami ningapaj munan. Shinapash shuj enciclopedia libroca ninmi: ‘Gobiernocuna ali leycunata llujchijpica gentecunaca libre causaita ushanmanmi’ nishpa (The World Book Encyclopedia). Imashinami ricupanchi gentecunallata tucuipi decidishpaca libre causaitaca na ushanmanllu. Shinaca ¿pita gentecunapa ima ali cashcata, ima nali cashcata decidi ushan?

6. a) ¿Imamandata Jehová Dioslla tucuita decidi ushan? b) ¿Gentecunaca tucuitachu agllai ushan?

⁶ Caitami yarina capanchi. Jehová Diosllami tucuita decidita ushan. Jehová Diosmi tucuita rurarca. Chaimi Tucui Ushaita charij Taita Dios can (1 Tim. 1:17; Apoc. 4:11). 1 Crónicas 29:11, 12​pi rey David escribishca shimicunata yaripashunchi. Chaipica Jehová Dios Tucui Ushaita charij Dios cashcata, Jehovatalla alicachina cashcatami ricuchin (chai texto liingui). Angelcunapash, cai alpapi gentecunapash na tucuita decidi ushanllu. Jehová Dioslla Tucuita Mandaj caimandami gentecunapa ima ali cajta, imata minishtijta ricushpa mandai ushan. Chaitami yarina capanchi. Callarimandapachami Jehová Diosca gentecunapa ima ali cajta ricushpa paipa mandashcacunata cushca.

7. Causangapaca ¿imacunatallata rurana capanchi? Chaita ruranaca ¿imashinata cushilla causachun ayudan?

⁷ Adanbash, Evapash paicunallata imata ruranata agllachun saquishpapash, Jehová Diosca huaquin mandashcacunatami paicunamanga curca. Por ejemplo, causaita charingapaca respirana, micuna, puñuna, shuj cosascunatapashmi rurana carca. Chaicunata rurangapaca Jehová Dios ayudachunmi minishtirca. Jehová Diosca cushilla ali causachunmi paicunamanga tucui minishtishcata curca (Sal. 104:14, 15; Ecl. 3:12, 13). ¿Nachu tucuicunallata frescolla huairata mutijishpa, ñucanchi gushtashca micunata micushpa, sumajta puñushpaca ali sintirinchi? Chai cosascunata rurashpaca cushilla alimi sintirinchi. Shinallatami Adanbash, Evapash chai cosascunata rurashpaca cushilla sintirishcanga.

8. Jehová Diosca ¿imatata Adandapash, Evatapash mandarca? ¿Imamandata shina mandarca?

⁸ Adanda, Evataca huahuacunata charishpa cai alpata cuidanguichi nishpami Jehová  Diosca mandarca (Gén. 1:28). ¿Chai mandashcata cushpaca Adanbash, Evapash ñana libre causai ushashcatachu ricuchijurca? Na, na chaita ricuchijurcachu. Gentecuna cai alpata shuj juyailla pushtuta rurashpa, chaipi para siempre causana oportunidadtami Jehová Diosca curca (Is. 45:18). Cunan punllacunapi gentecunaca na cazaranata decidishpa, huahuacunata na charishpapash Jehovapa mandashcata huashaman saquinajushcataca na ricuchinajunllu. Ashtaca gentecunaca problemacuna tianata yachashpapashmi cazaran, huahuacunatapash charin (1 Cor. 7:36-38). ¿Imamandata shina rurashca? Cushilla ali causasha yashpami shina rurashca (Sal. 127:3). Shinaca Adanbash, Evapash cazarashpa, huahuacunata charishpami para siempre cushilla causai ushanman carca.

9. Génesis 2:17​pi Taita Diospa mandashcaca ¿imamandata ali carca?

⁹ Adanmanbash, Evamanbash Jehová Diosca shuj mandashcatapashmi curca. Chai mandashcata na pactachishpa ima tucunatapashmi villarca. Jehová Diosca nircami: “Alita, nalita yachaita cuj yurapi fucushcataca ama micunguichu. Ima punlla cashpapash, chai yuramanda micushpaca huañunguipachami” nishpa (Gén. 2:17). ¿Na pactachi ushanatachu Jehová Diosca mandarca? Chai mandashcata cushpaca Adanbash, Evapash ¿ñana libre causai ushashcatachu ricuchijurca? Na, na chaita ricuchijurcachu. Bibliata huaquin investigajcunaca ninmi, Jehová Diospa mandashcaca alimi carca nishpa. Por ejemplo shujca ninmi, Génesis 2:16, 17​pi nishcashnaca ‘Taita Diosllami gentecunapa ima ali cajta, ima nali cajtaca yachan. Ali causaita charingapaca Taita Diospi confiashpami, paipa mandashcacunata pactachina can. Taita Diosta na cazungapaj munashpaca, gentecunallatami ima ali cajta ima nali cajta agllana can’ nishpa. Shinapash gentecunaca paicunallata tucuita deciditaca na ushanllu.

10. Jehová Diosca ¿ima derechotata charin? Cutin gentecunaca ¿imatata rurai ushan?

¹⁰ Ashtaca gentecunaca pensanmi, Jehová Diosca paicuna munashcashna na causachun saquishpami, Adanmanbash Evamanbash chai mandashcata cushca nishpa. Shinapash chai yuyaica na ciertochu can. Ñucanchillata imata ruranata agllai ushashpapash, ima ali cajta, ima nali cajta decidina derechotaca na charinchichu. Adanbash, Evapash Taita Diosta cazunata o na cazunataca paicunallatami decidi usharca. Shinapash Jehová Diosllami gentecunapa ima ali cajta, ima nali cajta decidina derechotaca charin. ‘Alita, nalita yachaita cuj yuraca’ chaitallatami ricuchijurca (Gén. 2:9). Imata decidishpapash, jipaman ima pasanataca na yachanchichu. Shinallata chai decisionguna ñucanchipa ali canata o nali canatapash na yachanchichu. Huaquinbica ali yuyashpa imata decidishca cashpapash sufrinchi, jatun llaquicunatapash charinchi (Prov. 14:12). Ñucanchicunaca tucui tucuitaca na rurai ushanchichu. Shinaca ¿imamandata Adanda, Evataca ‘alita, nalita yachaita’ cuj yuramandaca na micunachu  canguichi nishpa Jehová Diosca mandarca? Libre causaita charingapaj paipa mandashcacunata cazuna cashcatami Jehová Diosca yachachingapaj munarca. Adanbash, Evapash ¿imatata decidirca?

11, 12. Adanbash, Evapash ¿imamandata jatun llaquicunata charirca? Shuj ejemplota churapai.

¹¹ Adanbash, Evapash Jehovata na cazunatami decidirca. Evaca Diablopa nishcatami uyarca. Diabloca nircami: “Chai yuramanda ima punlla micushpapash, cangunapaj ñavi pascarijpimi, Taita Dios yachanshnallata alita, nalitapash yachanguichi” nishpa (Gén. 3:5). Shinaca Diablo nishcashnachu ¿Adanbash, Evapash libre causaita chari usharca? Na. Paicunaca Jehovata na cazushpaca llaquicunatalla charina cashcatami cuenta japirca (Gén. 3:16-19). Jehová Diosca gentecunallata ima ali cajta, ima nali cajta decidina derechotaca na curcachu (Proverbios 20:24; Jeremías 10:23, liingui).

¹² Avionda manejaj runagupi pensaripashunchi. Paica maiman chayanata yachangapaca maita rina nishcatami rina can. Shinallata shuj shuj aparatocunatami utilizana can. Ashtahuanbash aeropuertopi trabajaj huaquin gentecunaca maita rinata yachachunmi aviongunataca ayudan. Chaimi avionda manejajca paicunapa ayudatapash mañana can. Shinapash chai tucui ayudacunata na cazushpa, pai munashcata rurashpaca avionda manejajca jatun llaquicunatami charinman. Adanbash, Evapash Taita Diospa ayudata na chasquimandami jatun llaquicunapi urmashpa juchayu tucushpa huañurca. Chaimi paicunapa culpamanda ñucanchipash juchayu tucushpa huañunchi (Rom. 5:12). Adanbash, Evapash paicunapa munaitalla  ruraimandami libre causanatapash chingachirca.

13, 14. Libre causaita charingapaca ¿imata rurana capanchi?

¹³ Ashtaca gentecunaca pensanmi, paicunallata tucuita agllai ushashpaca alimi causai ushanchiman nishpa. Shinapash caica na ciertochu can. Ñucanchillata imata ruranata agllana ali cajpipash, tucuita ñucanchillata decidinaca peligrosomi can. Chaimanda cashna tapuripai: Gentecunallata tucuita decidina cajpica ¿imashinashi causanchiman? nishpa. Párrafo 5​pi parlashca enciclopedia libroca ninmi: ‘Organizaciongunaca gentecunata ayudangapaj leycunata llujchina cashpapash, gentecuna ama paicunapa munashcata rurachunbashmi ricuriana can’ nishpa. Chaita ruranaca na facilchu canga. Ñucanchicunaca ashtaca ashtaca leycunatami charinchi. Chaimi ashtaca abogadocuna, juezcunapash chai leycunata intindishpa pactachingapaj esforzarin.

¹⁴ Libre causaita charingapaj imata rurana cashcatami Jesusca ricuchirca. Paica nircami: “Ñuca yachachishca shimicunata, canguna cazushpa catishpaca, ñucapaj yachajujcunapachami canguichi. Shina cashpami, na llullashpa villajtapash rijsinguichi. Chai na llullashpa villashcami, cangunataca cacharichinga” nishpa (Juan 8:31, 32). Jesuspa nishcata pactachingapaca ishcai cosascunatami rurana capanchi. Primero: Jesuspa yachachishcacunatami chasquina canchi. Segundo: Jesuspa ali catijcunami tucuna canchi. Shina rurashpallami libre causaita chari ushashun.  ¿Imacunapillata libre causashun? Jesusllatami cashna nirca: “Juchata rurashpa causajcunaca, tucuillami juchapaj gañan o esclavo causanajun” nishpa. Caitapashmi nirca: ‘Diospa Churi cacharichijpimi cachari tucushcapacha canguichi’ nishpa (Juan 8:34, 36).

15. Jesús carasha nishca causaica ¿imashinata gentecunataca ayudan?

¹⁵ Jesusca paipa catijcunamanga libre causaitami carasha nirca. Shina causaitaca paillami cuita ushan. Chaimi Jesusca cashna nirca: ‘Diospa Churi cacharichijpimi cachari tucushcapacha canguichi’ nishpa. Jesusca chai shimicunahuanga ricuchijurcami, juchapa esclavo shina causanamanda gentecunata quishpichina cashcata. Juchapa esclavoshna causaimandami alita ruranapa randica nalitalla ruranchi. Chaimi llaquirinchi, sufrinchi, huañuitapash huañunchi (Rom. 6:23). Apóstol Pabloca juchapa esclavoshna causana imashina cajtaca alimi yacharca (Romanos 7:21-25, liingui). Ñana juchayu cashpallami cushilla libre causaita ushashun. Shina causaitami Adanbash, Evapash chingachirca.

16. ¿Imashinata libre causaita chari ushapanchi?

¹⁶ Jesusca paipa nishcacunata ‘catishpa’ causana nishpaca, libre causaita charingapaj paipa nishcacunata pactachina cashcatami ricuchijurca. Jehovata sirvijcunaca ñucanchi causaita na llaquishpami Jesuspa nishcacunata pactachijushcata ricuchinchi (Mat. 16:24). Jesús paipa causaita cushpa ñucanchita salvashcamandami shamuj punllacunapica libre causaita charishun.

17. a) Cushilla ali causangapaca ¿imatata rurana capanchi? b) Cati temapica ¿imatata yachajupashun?

¹⁷ Cushilla ali causangapaca ¿imatata rurana capanchi? Jesuspa yachachishcacunatami cazushpa causana capanchi. Chaita ruranami juchamanda, huañuimandapash quishpirichun ayudanga (Romanos 8:1, 2, 20, 21, liingui). Ñucanchillata imata ruranata decidi ushashpapash ¿imashinata libre causaita cuj Jehová Diosta jatunyachishcata ricuchi ushapanchi? Chai tapuitaca cati temapimi yachajupashun.