1, 2. a) Quishpichina nishpaca ¿imamandata parlajun? b) ¿Imamandata quishpichichun minishtircanchi?

ADANGA Taita Diosta na cazushcamandami cai alpapi para siempre causana oportunidadta chingachirca. Paipa huahuacunapash paipa culpamandami chai oportunidadtaca chingachirca. Adanga ali yachashpatami Taita Diosta na cazushpa juchata rurarca. Chaimandami paica huañunapacha carca. Shinapash Adanba huahuacunaca ¿imamandata huañuna carca? Paicunaca Adanshnaca na juchata rurashcachu carca (Rom. 5:12, 14). Adanba huahuacuna ama huañushpa catichunga ¿pipash quishpichita usharcachu? Ari. Adán juchata rurashca jipaca Jehová Diosca ashtaca ashtaca millón gentecunata imashina huañuimanda, juchamanda quishpichigrijushcatami asha asha villashpa catirca (Gén. 3:15). Jehová Diosca pai agllashca tiempopimi paipa Churi Jesustaca ashtacacunata pai ‘huañushpa quishpichichun’ cachamugrijurca (Mar. 10:45; Juan 6:51).

² Quishpichina nishpaca ¿imamandata parlajun? Escrituras Griegas Cristianas o Mushuj Testamento librocunapica Adán y Eva juchata rurashcamanda Jesús paipa causaita cushpa huañushcatami quishpichina nijun (1 Cor. 15:22). ¿Imamandata Jesús quishpichichun minishtiparcanchi? Bibliapica Jehová Diosca pipash, pitapash huañuchishca cashpaca, ‘paitapashmi huañuchina canguichi’ nishca leytami curca (Éx. 21:23, 24). Adanga jucha illaj cashpatami juchata rurashpa huañurca. Shinaca Bibliapi Jehová Dios mandashca leyta pactachingapaca shuj jucha illaj runami huañuna minishtirirca (Rom. 5:17). Shinami Jesús huañushpaca paipi tucui shunguhuan crijcunapaca “causaita causajujlla Taita” tucurca (Is. 9:6; Rom. 3:23, 24).

3. Juan 14:31, 15:13​pi nishcashnaca Jesusca ¿imamandata paipa causaita cushpa huañuna carca?

 ³ Jesusca gentecunata, Jehová Diostapash juyaimandami paipa causaita cushpa huañungapaj munarca (Juan 14:31; 15:13​ta liipangui). Shinaca gentecunata, paipa Taitata juyaimandami paipa Taitapa munaitaca huañungacaman pactachirca. Jesús caita rurashcamandami Jehová Dios callaripi munashca shina shuj punllaca cai alpagu juyaillagu tigrajpica gentecunaca para siempre causaita ushanga. Caipica Jehová Dios imamanda Jesús ninanda sufrishpa huañuchun saquishcata, shinallata apóstol Juan, Jesús huañushcamanda ninanda agradicishca cashcatapashmi yachajupashun. Ultimopica Jehová Diosta, Jesustapash imashina agradicishcata ricuchinatami yachajupashun.

4. Jesús imashina huañushcata parlapai.

⁴ Jesús cai alpapi cashpa ima llaquicunatalla charishcapi pensaripashunchi. Jesusca ashtaca angelcunapa ayudata mañaita ushashpapashmi romano soldadocuna paita japishpa ninanda macashpa llaquichichun saquirca (Mat. 26:52-54; Juan 18:3; 19:1). Jesustaca aicha carata liquij shuj azialhuan ninanda macashpami shuj jatun racu caspita apachishpa paita huañuchina pushtucaman pusharca. Shinapash jipamanga, soldadocunaca shuj runatami chai racu caspita aparishpa ayudachun obligarca (Mat. 27:32). Jesusta huañuchina pushtuman ña chayashpaca chai caspipillatami Jesuspa chaquita, maquitapash clavarca. Shina clavashcata huarcujpimi cuerpopa pesohuanga chai clavashca pushtucunataca ashtahuan nanachirca. Caita ricushpa Jesuspa mama, paipa amigocunapash ninanda huacanajujpica judiocunata ñaupaman pushajcunaca Jesusmandaca ninandami burlarinajurca (Luc. 23:32-38; Juan 19:25). Ashtaca horascunatami Jesusca chashna sufrijurca. Chaimandami ña shaijushca respiraitapash ñana ushajurca. Jehovapa munaitaca Jesusca huañungacamanmi pactachirca. Chaimandami Jesusca Jehová Diosta mañashca jipaca huañurca (Mar. 15:37; Luc. 23:46; Juan 10:17, 18; 19:30). Imashinami ricupanchi, Jesusca llaquinaita sufrishpami huañurca.

5. Jesusca ¿imamandata ashtahuanbachaca llaquilla sintirijurca?

⁵ Jesustaca “Taita Diosta, paipa shutitapash na respetashcanguichu” nishpami, llullacunata nishpa yangamanda juchachishpa huañuchirca (Mat. 26:64-66). Jesusca yangamanda juchachi tucushpa huañugrijushcamandami ashtahuanbachaca llaquilla, nali sintirijurca. Chaimandami ama shina huañungapaj Jehová Dios ayudachun munarca (Mat. 26:38, 39, 42). Jehová Dios, Jesusta imamanda llaquinaita sufrishpa huañuchun saquishcamanda quimsa yuyaicunata ricupashunchi.

6. Jesusca ¿imamandata shuj caspipi huañuna tucurca?

⁶ Callaripica, Jesusca judío gentecunata quishpichingapami shuj caspipi huañuna carca (Gál. 3:10, 13). Judiocunaca Jehová Diospa mandashcacunata pactachishun nishpapash na pactachishcarcachu. Chai jahuapash Adán y Evapa culpamandami juchayujcuna carca. Chaicunamanda quishpichingapami Jesusca huañuna carca (Rom. 5:12). Diospa Leypica pipash shuj jatun juchata rurashpaca huañunapachami carca. Chaimi huaquimbica shuj jatun juchata ruradorcunataca huañuchishpa shuj caspipi huarcun carca (Deut. 21:22, 23; 27:26). * Shinaca Jesús huañushpa shuj caspipi huarcui tucujpimi, judío gentecunaca quishpiri ushana carca.

7. Catipica, Jehová Diosca Jesustaca ¿imamandata sufrishpa huañuchun saquirca?

 ⁷ Catipica, Jesús Sumo Sacerdote cangapaj prepararichunmi Jehová Diosca Jesús sufrishpa huañuchun saquirca. Jesusca cashna sufrishcamandami llaquicunahuan cashpa Jehová Diosta cazuna shinllipacha cashcata alipacha intindirca. Jesusca na aguantai ushanalla llaquita apajushcamandami Jehová Diostaca ‘caparishpa, huacashpa’ mañarca. Shinaca Jesusca na aguantai ushanalla llaquicunata charishcamandami ñucanchicuna llaquicunata charijpica intindi ushan. Chaimandami Bibliapica: ‘Pandachi tucugrijujta ayudangapaca, paica ninan ushaitami charin’ nin. Shinaca Jehová Dios, Jesusta Sumo Sacerdote cachun nombrashcamandaca cushijushcami capanchi. Jesusca ñucanchita ‘llaquimanda’ o intindimandami ali ayudaita ushan (Heb. 2:17, 18; 4:14-16; 5:7-10).

8. Tucuripica ¿imamandata Jehová Diosca Jesús sufrishpa huañuchun saquirca?

⁸ Tucuripica, pipash ashtaca llaquicunata charishpapash Jehová Diosta huañungacaman sirvi ushashcata ricuchichunbashmi Jesustaca Jehová Diosca sufrishpa huañuchun saquirca. Satanasca, “Taita Dios cuidashcamandallami gentecunaca paitaca sirvin” ninmi. Shinallata Satanasca, “Adanshnallatami gentecunaca Jehová Diostaca na juyanllu” nin (Job 1:9-11; 2:4, 5). Jehová Diosca, Jesús paita juyashcataca seguromi carca. Chaimandami Jesús ña huañugrijujpica Jehová Diosca ñana ayudarca. Jehová Diosta huañungacaman cazushpaca Jesusca Satanás llullaj cashcatami ricuchirca.

9. Apóstol Juanmandaca ¿imatata yachajupanchi?

⁹ Jesusta catijcunaca Jesús ñucanchimanda huañushcata yachaj chayashpami Jehová Diospica ashtahuan cripanchi. Chaimandami llaquicunata charishpapash Jehovamanda villachishpa ñaupaman catipashcanchi. Apóstol Juanba causaimanda yachajupashunchi. Apóstol Juanga 60 yali huatacunatami Jesusmanda, Jesús imamanda huañuna cashcatapash tucui shunguhuan villachishpa catirca. Casi 100 huatacunata charijpimi Roma llactamanda gobiernoca paipa llactamanda calpachishpa isla de Patmosman cacharca. Paica ima nalitapash na rurashcachu carca, ‘Taita Diosmanda, Jesucristomandallami villachijushca’ carca (Apoc. 1:9). Apóstol Juanga ñucanchipaca shuj alipacha ejemplomi can.

10. Apóstol Juanga ¿imashinata Jesús huañushcamanda agradicishcataca ricuchirca?

¹⁰ Juan escribishca librocunapica Jesusta ninanda juyashcata, Jesús ñucanchicunamanda huañushcata ninanda agradicishcatami apóstol Juanga escribishca. Chai librocunapica 100 yali viajecunatami Jesús huañushcamanda ima bendiciongunatalla chasqui ushashcatapash parlan. Por ejemplo, paica nircami: ‘Juchata maijambash rurashca cashpaca, Taita Dioshuan ñucanchimanda rimajtami charinchi. Paica, imatapash cashcatapacha ruraj Jesucristomi can’ nircami (1 Juan 2:1, 2). ‘Jesús villajushca shimicunatapash villachina’ minishtirishcapacha cashcatapashmi Juanga intindichirca (Apoc. 19:10). Shinaca apóstol Juanga Jesús huañushcamandaca agradicishcapachami carca. Ñucanchicunapash ¿imashinata paishna agradicishcataca ricuchi ushapanchi?

11. Juchapi ama urmachunga ¿imata ayudanga?

¹¹ Juchapi ama urmangapaj cuidarishunchi. Jesús ñucanchimanda huañushcata agradicishcataca juchapi ama urmangapaj esforzarishpami ricuchipanchi. “Juchapi urmashpapash, Jehová Diosta perdonda mañashallami. Chaica ña cutin ali cashallami” nishpaca  na pensarinachu capanchi. Chaipa randica, “Jehová Diospash, Jesuspash ñucata ashtacata bendiciashcamandaca ¿imamandata juchataca rurashayari?” nishpami pensarina capanchi. Shinallata, “juchata rurana munaicunamandapash jarcahuangui” nishpami Jehová Diosta mañana capanchi (Mat. 6:13).

12. ¿Imashinata 1 Juan 3:16-18​pi shimicunataca pactachi ushapanchi?

¹² Ñucanchi huauquipanicunata juyapashunchi. Jesús huañushcamanda agradicishcataca ñucanchi huauquipanicunata juyashpapashmi ricuchipanchi. Jesusca ñucanchi huauquipanicunatapash juyaimandami huañurca (1 Juan 3:16-18 liipangui). Ñucanchi huauquipanicunata ali tratashpami paicunata juyashcatapash ricuchipanchi (Efes. 4:29, 31–5:2). Ñucanchi huauquipanicunataca paicuna irquillagucuna cajpi, problemacunata charijpi, imapash shinlli llaquicunata charijpipashmi ayudapanchi. Pero shuj huauqui o shuj pani ñucanchita llaquichijpica ¿imatata rurana capanchi?

13. ¿Imamandata perdonarina capanchi?

¹³ Ñucanchita pipash nali sintichijpica ¿risintirishcachu quidapanchi? (Lev. 19:18). Shinaca cai cati consejotami pactachina capanchi: “Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi. [Jehová Dios, TNM ] cangunapaj juchata perdonashcashnallatami cangunapash perdonarina canguichi” (Col. 3:13). Shuj huauquita o shuj panita perdonashpami Jehová Diostaca paipa Churigu huañushcamanda agradicishcataca ricuchipanchi. Jesús huañushcamanda valichishcataca ¿imashinata ashtahuan ricuchi ushapanchi?

14. Jesús ñucanchimanda huañushcata valichishcata ricuchingapaca ¿imata ayudanga?

¹⁴ Jesús huañushcamanda Jehová Diosta agradicipashunchi. 83 huatacunata charij panigu Joannaca India llactamandami can. Paica: “Jehovata mañajushpaca Jesús ñucanchimanda huañushcamandapashmi ninanda agradicipani” ninmi. Jehová Diosta mañajushpaca punllapi imacunatalla nalita rurashcata yarishpami perdonahuai nishpa mañana capanchi. Shinallata shuj jatun nali juchata rurashca cashpaca, ancianocunapa ayudatapashmi mañana capanchi. Paicunaca ñucanchita ayudangapaj, Bibliahuan consejangapami aliguman uyanga. Shinallata ñucanchihuanmi Jehová Diostapash mañanga. Paicuna mañanajushpaca ñucanchicuna  cutin Jehovapa ñaupapi ali ricurichunbash ayudapai nishpami mañanga. Cai mañaicunataca Jesús ñucanchi juchacunamanda huañushcamandami mañaita ushanga (Sant. 5:14-16).

15. ¿Imamandata Jesús huañushcapi pensaringapaj, ashtahuan yachajungapapash esforzarina capanchi?

¹⁵ Jesús ñucanchimanda huañushcapi pensaripashunchi. 73 huatacunata charij Rajamani shuti paniguca: “Jesús llaquinaita sufrishpa huañushcata liishpaca ñapashmi viqui muyuhuanlla” ninmi. Ñucanchicunapashmi Jesús imashina huañushcata liishpaca ninanda llaquiripanchi. Pero Jesús ñucanchi juchacunamanda huañushcapi cutin cutin yarinami Jesustapash, Jehová Diostapash ashtahuan juyachun ayudanga. Chaipaca Bibliamanda cada uno yachajujushpaca Jesús imamanda huañunapacha cashcata intindichij temacunatami ashtahuan yachajushpa catina capanchi.

16. Jesús ñucanchimanda huañushcata yachachinaca ¿imapata ayudan? (Callari paginapi fotota ricupangui).

¹⁶ Jesús ñucanchimanda huañushcata shujcunamanbash yachachipashunchi. Shujcunaman Jesús ñucanchimanda huañushcata yachachishpaca ashtahuanmi Jesusta, Jehovatapash agradicishcata ricuchipashun. Jesús imamanda ñucanchimanda huañushcata intindichingapaca ashtaca ayudacunatami charipanchi. Por ejemplo, Taita Diosmanda Ali Villaigucuna nishca folletopi, lección 4, “Jesusca ¿pita can?” nishca temata, na cashpaca ¿Imatata Bibliaca yachachin? libropi, capítulo 5​pimi, “Gentecunata salvangapaca ¿imatata Diosca rurarca?” nishca tematapash yachachi ushapanchi. Shinallata Jesús Huañushcata Yarina Tandanajuiman rishpapashmi Jesustaca ashtahuan agradicishcata ricuchipanchi. Chaimandami cushijushpa shujcunatapash cai tandanajuiman invitapanchi. Jehová Diosca ñucanchimanga shujcunaman Jesusmanda yachachina bendiciondami cushca.

17. Jesús ñucanchimanda huañushcaca gentecunataca ¿imapillata ayudan?

¹⁷ Jesús ñucanchimanda huañushcataca ninandapachami agradicipanchi. Jesús huañushcamandami ñucanchicunaca juchayuj cashpapash Jehová Diospa amigocuna caita ushapanchi. Jesús huañushcamandami Diablopa tucui rurashcacunapash tucuringa (1 Juan 3:8). Shinallata Jesusmandami cai alpaca Jehová Dios munashcashna shuj juyailla paraíso alpagu tigranga. Chaipica Jehovata sirvijcunallami causanga. Shinaca cada punlla, Jesús ñucanchimanda huañushcata ashtahuan agradicingapaj esforzaripashunchi.