1. ¿Imamandata Jesusca paipa catijcunaca “llamagucunashnami can” nirca?

 JESUSCA shuj llamata michij runaguhuanmi compararirca. Cutin paipa catijcunataca llamagucunashnami can nircami (Juan 10:14). Imashinami llamagucunaca paicunata michij runagu cayajpi uyan, shinallatami Jesusta catijcunaca Jesuspa yachachishcacunata uyashpa cazun. Y cai cierto cashcata ricungapaca shuj shuj llactacunata viajashpa purij jariguta ima pasashcata ricupashunchi. Paica ninmi: “Shuj viajeca ñucanchica llamagucunatami grabangapaj munanajurcanchi. Shinapash llamagucunaca ñucanchita na rijsimandami cayachinajujpipash na quimirirca. Cutin llamata michij runagu shamushpa llamacunata cayachijpica llamagucunaca michij runaguta rijsimandami ñapash shamurcalla” nin.

2, 3. a) Jesuspa discipulocunaca, Jesuspa nishcacunata uyashcataca ¿imashinata ricuchin? b) Cai yachajuipi, cati yachajuipipash ¿imatata ashtahuan yachajugripanchi?

² Shuj shuj llactacunata viajashpa purij jariguhuan ima pasashcata ricushpami, Jesuspa shimicuna cierto cashcata ricupanchi. Jesusca, ‘ñuca llamagucunaca ñucapa parlashcataca uyangami’ nircami (Juan 10:16). Shinapash cunanbica Jesusca jahua cielopimi can. Paita uyashcataca ¿imashinata ricuchi ushapanchi? Chaitaca paipa yachachishcacunata ñucanchi causaipi pactachishpami ricuchi ushapanchi (Mat. 7:24, 25).

³ Cai yachajuipi y cati yachajuipipash Jesuspa yachachishcacunata ashtahuanmi ricugripanchi. Jesusca imata rurana cashcata, imata na rurana cashcatami yachachishpa saquirca. Callaripica imata na rurana cashcata yachajupashunchi.

 4. Lucas 12:29​pi nishcashnaca ¿imamandata yapata preocuparita ushapanchi?

⁴ (Lucas 12:29​ta liipangui). Jesusca paipa catijcunamanga, ‘imatata micusha, imatata ufiashun’ nishpaca na yapata preocuparinachu canguichi nircami. Cai consejoca siempre ali cashca. Shinapash  cai consejota cazunaca na siemprechu fácil cashca. ¿Imamandata shina nipanchi?

 5. Huaquin huauquipanicunaca ¿imamandata preocupado causan?

 ⁵ Huaquin huauquipanicunaca micunaguta, ropaguta huasiguta na charimandami preocupado canga. Tal vez paicunapa llactapi na fácil shuj trabajota tari ushashpami, paicunapa familiata mantiningapapash culquigutaca na charinga. Cutin shuj familiapica shuj taita o shuj cusa huañushcamandami pipash paipa familiata mantiningapaca illanga. Chaimandami familiaca imapash minishtirishca cosasgucunapaca culquigutapash na charinga. Shinallata cai COVID-19 ungüi tiashcamandami ashtacacunaca trabajo illaj quedashca (Ecl. 9:11). Ñucanchita cashna pasajujpica, Jesuspa consejota cati ushangapaca ¿imatata rurai ushapanchi?

 6. Shuj viajeca Pedrotaca ¿imata pasarca?

⁶ Shuj viajeca Jesuspa apostolcunaca huairahuan ninanda tamiajujpimi barcopi rinajurca. Shinapimi apóstol Pedro Jesusta yacu jahuapi purijujta ricushpaca: “Apunchi Jesús, can cashpaca yacu jahuata shamushpa canda tuparichun cayahuayari” nircami. Shina nijpica Jesusca Pedrotaca “shamuilla nirca”. Chaimi apóstol Pedroca, “canoamanda llujshishpa, Jesusta tuparingapaj” yacu jahuata ri callarirca. Shinapash “ninan huaira jatarimujta ricushpami Pedroca manllarirca. Ña asha asha huashajui callarishpami: ¡Apunchi Jesús” salvahuayari! nishpa, ninanda caparirca. Shina caparijhuanmi Jesusca maquimanda japishpa Pedrotaca salvarca. Apóstol Pedroca, Jesús cayajpi, Jesusta ricujushpaca yacu jahuataca tranquilomi purishpa rijurca. Shinapash ninanda huairahuan tamiajujta ricushpami ninanda manllarishpa, ishcai shungu tucushpa yacupi huashajui callarirca (Mat. 14:24-31) .

 7. Apóstol Pedromandaca ¿imatata yachajui ushapanchi?

⁷ Pedrota cai pasashcamandaca ¿imatata yachajui ushapanchi? Apóstol Pedroca barcomanda uriajushpa, yacu jahuata puri callarishpaca yacupi  pambarinataca na pensashcangachu. Apóstol Pedroca, Jesuspaman chayana yuyaihuanmi rijushcanga. Shinapash huairahuan ninanda tamiajujta ricushpami, manllarishpa yacupi pambari callarirca. Ciertomi can, cunanbica ñucanchicunaca yacu jahuataca na puri ushapanchichu. Shinapash llaquicuna, problemacuna ricurijpica ñucanchipashmi shinlli feta charishcata o na charishcata ricuchina tucushun. Jehovapa nishcacunapi na confiashpaca ñucanchipashmi yacu jahuata purijushpa yacupi pambarinshna tucunchiman. Chaimandami shinlli huairahuan tamiashna llaquicuna, problemacuna shamujpica Jehová Diospa nishcacunapi, pai ayudanapipash confiashpa catina capanchi. Chaipaca ¿imata ayudanga?

 8. ¿Imapi pensarinata ñucanchicuna ama yapata preocuparichunga ayudanga?

⁸ Jehová Diospi confianami imacunamandapash ama yapata preocuparichun ayudanga. Jehová Diosca paipa Reinotara o Gobiernotara pundapi churajpica, ñucanchitaca cuidashami nijunmi. Chaitaca siempremi yarina capanchi (Mat. 6:32, 33). Jehová Diosca paipa nishcacunataca siempremi pactachishca (Deut. 8:4, 15, 16; Sal. 37:25). Jehová Diosca jahuata rij alasyu animalgucunata, sisagucunatapashmi cuidan. Chaimandami ñucanchita cuidanatacarin seguro caita ushapanchi (Mat. 6:26-30; Filip. 4:6, 7). Imashinami shuj juyaj taitaca paipa huahuacuna tucui minishtirishcaguta charichun ricurian, shinallatami ñucanchitapash Jehová Diosca juyaimandaca tucui imapash ñucanchi minishtirishcaguta cunga. Shinaca Jehová Dios cuidanataca seguromi cana capanchi.

 9. Cai matrimoniomandaca ¿imatata yachajui ushapangui?

⁹ Jehová Diosca paipa tucui sirvijcunatami cuidajun. Chaitaca shuj matrimoniopa ejemplopimi ricuita ushapanchi. Tiempo completopi sirvinajuj shuj matrimonioca, shuj horas yalitami shuj ishcai panigucunata tandanajuiman pushangapaj paicunapa carrohuan rishca carca. Cai panigucunaca paicunapa llactamanda llujshishpami shuj pushtupi causanajushca carca. Cai matrimoniomanda huauquiguca, “tandanajui tucurishca jipaca, chai panigucunataca jacuchi huasiman micushun” nishcarcami. Shinapash chaita nishca jipallami, huasipi imapash micunagu illaj cashcata cuenta japirca. Shina pasajpipashmi cai matrimonioca Jehová Diospi confiashpa cai panigucunataca huasiman micuchingapaj pusharca. Huauquiguca: “Huasiman chayajpica, pungupica micuna cosasgucunaca ishcai funda jundami tiajushcarca. Chai micunagucunataca pi saquishcatapash na yacharcanchichu” ninmi. Shinallata, asha tiempo jipapash paicuna villachishpa purina carrogupashmi dañarishca nin. Y carroguta arreglangapaca culquitaca na charircanchichu nin. Chaimandami “chai carroguta arreglangapaj mashna valinata yachangapalla tallerman aparcanchi nin. “Shinapimi shuj amogu shamushpaca, cai carroguca ¿pipata can?’ nishpa tapushca” nin. Chaipimi huauquiguca “ñucapami, pero arreglanarami cani” nircani nin. Shina nijpica, “bueno na importanllu. Ñuca huarmigumi cashna cashna carroguta, colortapash chashna colortami munajun. Mashnatata mañajungui, ñucaman jatuhuai” nishca nin. Chaipimi chai huauquiguca, chai carrota jatushpa, shuj carrota randingapapash culquigutaca suficienteta charishcata nin. Chaimandami huauquiguca nin: “Cai tucui cosascuna pasashcamandaca cushijushcami carcanchi. Chaipica na yangamanda cai cosascuna pasashcata, ashtahuanbachaca Jehová Diospacha ñucanchita ayudajujtami sintircanchi” nin.

10. Salmo 37:5​pi nishca shimicunaca ¿imapata ñucanchitaca ayudaita ushan?

¹⁰ Jesuspa yachachishcata uyashpa, cazunami ñucanchipa causaipa micunagumanda, ropagumanda, maipi causanagumanda ama yapata preocuparichun ayudan (Salmo 37:5​ta liipangui; 1 Ped. 5:7).  Párrafo 5​pi parlashca yuyaicunapi pensaripashunchi. Jehová Diosca cunangamanga, ñucanchi minishtirishca cosasgucunata yarichunga, talvezpashmi familiapica taitacunata o ñucanchipa trabajomanda jefetapash utilizashcanga. Shinapash familiapi shuj cusa o shuj taita trabajo illashcamanda familiata ñana mantini  ushajujpica, Jehová Diosllatami ñucanchi tucui minishtirishca cosasgucunata charichunga ayudanga. Shinapash cunanga Jesús imata ama ruraichu nishcata yachajupashunchi.

11. Mateo 7:1, 2​pi nishcashnaca, Jesusca ¿imatata na rurana canguichi nirca? Caita pactachinaca ¿imamandata na fácil can?

¹¹ (Mateo 7:1, 2​ta liipangui). Jesusca gentecuna juchayu caimanda, shujcunapa pandarishcacunata ricun cashcataca alimi yachan. Chaimandami paica: “Pitapash na yangamanda juchachinachu canguichi” nirca. Ñucanchicunaca shuj huauquipanicunataca na yangamanda imatapash nishpa rimangapaj munapanchichu. Shinapash huaquinbica caita pactachinaca na fácil canllu. Shina pasajpica ¿imata ayudanga? Chaipaca Jesuspa mandashcata uyanami, shujcunata ama yangata juchachishpa rimachun ayudanga.

12, 13. Jehová Diospa ejemplomandaca ñucanchicunaca ¿imatata yachajui ushapanchi?

¹² Shujcunata ama yangata juchachishpa rimangapaca, Jehová Diospa ejemplomi ayudaita ushan. Jehová Diosca shujcunapa pandarishcacunatallaca na ricujunllu. Ashtahuangarin paicunapa ali ruraicunatami yarin. Rey David ashtaca viajecunata pandarijpi, Jehová Dios imata rurashcata ricupashunchi. Shuj viajeca Bat-Seba huarmi casada cajpipashmi paica chai huarmihuanmi puñurca. Bat-Sebapa cusa Uriastapashmi huañuchingapaj cacharca (2 Sam. 11:2-4, 14, 15, 24). Cashna juchacunata rurashpaca, rey Davidca na paillachu llaquipica urmarca. Paipa tucui familiatami llaquichirca (2 Sam. 12:10, 11). Cutin shuj viajeca Israel llactapi Jehová Dios censota rurachun na mandashca cajpitami, mashna soldadocuna tiajta yachangapaj munaimanda rey Davidca, Jehová Diosta na cazushpa censota rurarca. Caita rurashpaca Jehová Diospi na confiashcatami ricuchirca. Paica cai censotaca ashtaca ashtaca soldadocunata charimanda jariyashca tucushpami rurashca yarin. Shinapash chashna rurashcamandaca Israel llactapica 70​mil israelitacunami shuj millai unguihuan huañurca (2 Sam. 24:1-4, 10-15).

¹³ Israelitacunapa tiempopi causanajushpaca, rey Davidmandaca ¿imatashi pensanchiman carca? ¿Davidtaca Taita Diosca na perdonanatami perdonashca ninchimanllu carca? Jehová Diosca, Davidpa pandarishcacunatallaca na ricurcachu. Paica, paita ashtaca huatacunata tucui shunguhuan sirvishcata, juchata rurashcamandapash tucui shungu arripintirishcatami ricurca. Chaimandami Jehová Diosca chai juchacunamandaca perdonarca. Shinallata Jehová Diosca rey David paita ninanda juyaimanda paipa ñaupapi cutin ali ricuringapaj munashcatapashmi ali yacharca. Shinaca Jehová Dios ñucanchicuna pandarijpipash, ñucanchipa ali ruraicunata yarijta ricushpaca imashinata sintiripanchi. Seguromi cushilla sintiripanchi (1 Rey. 9:4; 1 Crón. 29:10, 17).

14. ¿Imata shujcunata ama yangata rimachunga ayudanga?

¹⁴ Jehová Diosca tucuicunatami ali intindin. Chaimandami ñucanchicunapash shujcunata ali intindingapaj y paicunapa ali ruraicunata ricungapaj esforzarina capanchi. Shujcunapa pandarishcacunatara primero ricushpa rimanaca facilmi can. Shinapash Jehová Diospa ejemplota catishpa causajcunaca, shujcuna imagupi pandarijpipash, paicunata ali intindimandami paicunahuanga ali llevarishpa catin. Imashinami shuj diamante rumiguca nara procesashca cashpaca jahualla ricujpica na aligu ricurin. Shina cuendami pitapash ashatalla rijsimandaca paicunapa pandarishcacunatara ricunchiman. Shinapash ñucanchicunaca Jehová Dioshna, Jesushnami cana capanchi. Paicunaca na ñavitalla ricushpa pitapash tratanllu. Ashtahuangarin paicunaca shujcunapa causai imashinapacha cashcata ricushpami tratan.

15. Shujcunata ama yangata juchachingapaca ¿imamandata shujcunapa causaipi imashna cashcata pensarina ayudan?

¹⁵ Shujcunapa ali ruraicunata ricushca jahuapash, shujcunata ama yangata rimangapaca shujcunapa causai imashinapacha cashcapi pensarinami, ñucanchitaca ashtahuan ayudanga. Por  ejemplo, Jesusca Diospa templo huasipi cashpaca, shuj pobrella viuda huarmigu ishcai uchilla monedagucunata cajagupi churajtami ricurca. Ishcai monedagucunata churajta ricushpapash Jesusca na nircachu “¿imamandashi cai huarmiguca na ashtahuan culquita churan?” nishpa. Jesusca, na chai ashalla culquiguta churashcapica pensarijurcachu. Chaipa randica chai huarmigupa causai imashinapacha cashcapimi pensarirca. Chaimandami Jesusca cai huarmiguca chaishuj gentecunamanda yalitami culquigutaca churarca nishpami ninanda cushijurca (Luc. 21:1-4).

16. Panigu Veronicapa experienciamandaca ¿imatata yachajui ushapanchi?

¹⁶ Panigu Veronicapa experienciami shujcunapa causai imashinapacha cashcapi pensari importantepacha cashcata ricuchin. Cai panigupa congregacionbica, shuj madre soltera panigumi tiashca. Panigu Verónica ninmi: “Cabalguta parlashpaca cai ñañagu reuniongunaman na seguido shamujta ricushpa, predicacionmanbash na seguido llujshijta ricushpami, paicunataca nalicachishpa ricun cariani. Shinapash shuj punlla cai ñañaguhuan predicacionman llujshishpami, cai ñañagu shuj discapacitado churiguta charishcata yachaj chayarcani. Shinallata chai churiguta cuidangapaj ashtaca tiempota utilizajta y chai churigu irquilla cashcamandapash huaquinbica shuj congregacionba tandanajuiman rina cashcatapashmi yachaj chayarcani nin. Cai ñañagu cashna llaquita charishcataca pensaitallapash na pensashcachu carcani. Shinapash cunanmi paita ali rijsishpa, Jehová Diosta sirvingapaj ninanda esforzarijta ricushpa juyaihuan, respetohuan tratani nin.

17. Santiago 2:8​pi nishcataca ¿imashinata pactachita ushapanchi?

 ¹⁷ Ñucanchicuna shuj huauquita o shuj panita imatapash nishpa yangata rimanajushcata cuenta japishpaca ¿imatata rurana capanchi? Shina pasajujpica ñucanchicunaca ñucanchi huauquipanicunata tucui shunguhuan juyana cashcatami yarina capanchi (Santiago 2:8​ta liipangui). Shinallata shujcunata ama yangata rimangapaj ayudahuai nishpami, Jehová Diosta mañana capanchi. Jehovata mañashcashnallatami ñucanchicunapash rurangapaj esforzarina canchi. Chai huauquihuan o chai panita ashtahuan rijsingapami esforzarina capanchi. Shina rurashpami paicunata ashtahuan rijsi ushapashun. Ñucanchicunaca shuj micunaguta micungapaj o predicacionman llujshingapami invitaita ushapanchi. Paicunata ashtahuan rijsishpami, Jehová Diospa, Jesuspa ejemplota catishpami ñucanchicunapash shuj huauquipanicunapa ali cualidadcunata ricuita ushapashun. Shinami pitapash ama yangata juchachishpa rimanguichu nishca, Jesuspa shimicunata pactachishcata ricuchishun.

18. Jesuspa yachachishcacunata cazushcataca ¿imashinata ricuchita ushapanchi?

¹⁸ Imashinami llamagucunaca, michij runagu cayajpica ali uyan. Shinallatami Jesusta ali catijcunapash Jesuspa yachachishcacunataca aliguta uyashpami cazun. Shinaca Jesús yachachishcashna ashtaca cosascunata charinamanda na yapata preocuparijpi, ñucanchi huauquipanicunata yangamanda na rimajpica Jehová Diospash, Jesuspashmi ninanda bendicianga. Shinaca cai alpapi causana esperanzata charishpapash o jahua cielopi causana esperanzata charishpapash, tucuicunallatami Jesuspa yachachishcacunata uyangapaj, cazungapami esforzarina capanchi (Luc. 12:32; Juan 10:11, 14, 16). Cati yachajuipica, Jesús paita catijcunata imata rurachun mandashcatami ricugripanchi.