1, 2. a) Jesuspa quimsa apostolcunataca Jehová Diosca ¿imatata mandarca? b) Caita uyashpaca paicunaca ¿imatata rurarca? c) Cai yachajuipica ¿imatata ricugripanchi?

 HUATA 32​pi Pascua punlla jipaca, apóstol Pedro, Santiago, Juanbashmi Jesuspa cuerpohuan ima pasajta ricurca. Shuj lomapi cashpaca Bibliapi nishcashnaca Jesuspa ‘ñavica, indishna punchapambami tucurca. Paipa churajunapash, yuraj yuraj michagushnami ricurirca’ ninmi (Mateo 17:1-4). Paipa apostolcuna Jesusta cashna ricushca jipami, jahua cielomanda shuj shimi uyarirca. Chaipica: “Caimi, ñuca juyashca churigu. Paimandami, ninanda cushijuni. Pai imata yachachishcataca, aliguta uyanguichi” nircami (Mat. 17:5). Jesuspa apostolcunaca, Jesuspa yachachishcacunata uyashpa cazushcataca paicunapa causaipi pactachishpami ricuchirca. Ñucanchipashmi paicunapa ejemplota catingapaj munapanchi.

² Punda yachajuipica Jesusta uyashpa, ima cosascunatalla na rurana cashcatami ricuparcanchi. Cutin cai yachajuipica Jesusta uyashpa ima ishcai cosascunata rurana cashcatami ricugripanchi.

 3. Mateo 7:13, 14 nishcashnaca ¿imatata rurana capanchi?

³ (Mateo 7:13, 14​ta liipangui). Jesusca ishcai ñangunamandami parlarca. Shujca “quichiji” y shujca ‘ancho’ ñanmi tian nircami. Cada ñan imaman apajtapashmi villarca. Shinaca cada unomi maijan ñanda yaicunataca dicidina capanchi. Cai decisionda japinaca ñucanchi causaipaca importantepachami can.

 4. Ancho ñanga ¿imamanda apan?

⁴ Shinaca caitami yaipi charina capanchi. Ashtacacunaca  ‘ancho’ ñan fácil cashcamandami chaita yaicun. Shinapash paicunaca diablo chai ñanman yaicuchun munashcatami na cuenta japin. Satanasca chai ñanman yaicushpa huañuita tarichunmi munan (1 Cor. 6:9, 10; 1 Juan 5:19).

 5. Ashtacacunaca quichiji ñanda catingapaca ¿imatata rurana tucushca?

⁵ Cutin “quichiji” ñanmanda parlashpaca Jesusca cai ñandaca huaquingunallami tarin, chaimandami huaquingunalla chai ñanmanga yaicun nircami. ¿Imamandata shina nirca? Cati versocunapimi ricuita ushapanchi. Jesusca panda yachachijcunami tianga, chaicunamandami cuidarina canguichi nircami (Mat. 7:15). Cunanbica ashtaca ashtaca religiongunami tian. Cai tucui religiongunallatami Diosmandaca cabaltami yachachinchi nin. Chaimi ashtaca gentecunaca maijan religionda catinata na atinashpa llaquilla sintirin. Shinallata shuj ali religionda mascangapallapash ñana munan. Shinapash Jesusca cabalta yachachij religionda imashina tari ushashcatami nirca. Jesusca: “Ñuca yachachijushca shimicunata, quiquinguna cazushpa catishpaca, ñucapaj yachajujcunapachami canguichi. Shina cashpami, na llullashpa villachijuj shimitapash rijsinajunguichi. Chai na llullashpa villachijushca shimimi, quiquingunataca cacharinga” nircami (Juan 8:31, 32). Quiquin antsicarin ashtaca gentecunashna cai ‘ancho’ ñanda na catishcamandami Bibliamanda aliguta yachajushpa, Biblia imata nishcata, Jesuspa yachachishcacunata uyashpa catipashcangui. Por ejemplo, Bibliata yachajushpaca, Jehová imata rurachun munashcata, panda religiongunapi ama chapurichun munashcata, panda fiestacunapi, panda costumbrecunapi ama chapurichun munashcatami intindipashcangui. Shinallata Jehovapa mandashcacunata pactachina na fácil cashcatapashmi cuenta japipashcangui (Mat. 10:34-36). Shina cashpapashmi Jehová Diosta juyaimandaca cambiocunata rurashpa paipa ñaupapi ali ricuringapaj esforzaripashcangui. Cashna cambiocunata rurashcamandaca Jehová Diosca seguromi cushijushca sintiringa (Prov. 27:11).

 6. Salmo 119:9, 10, 45 y 133​pi nishcashnaca quichiji ñanmanda llujshishpa ama llaqui apangapaca ¿imata ayudaita ushan?

⁶ Shinaca quichiji ñanbi catingapaca ¿imata ayudanga? Huaquin llactacunapica loma ladocunapimi carreteracunataca ruran. Shinapash chai carreteracunapi purij carrocuna jacacunaman urmashpa ama llaqui apachunmi, chai carreteracunapica cercacunata churan. Cashna cercacuna tiashcamandami carrocunata charij gentecunaca tranquilo, ashtahuan seguro sintirin. Paicunaca na ninajunllu: “Cai cercacunataca deganami churashca, ¿imashpashi churashca?” nishpaca na quejarinajunllu. Jehová Diospa consejocunapash shina cuendami can. Quichiji ñanmanda ama llujshishpa, ama llaqui apachunmi ayudan (Salmo 119:9, 10, 45, 133​ta liipangui).

 7. Jovengunaca quichiji ñanmandaca ¿imatata pensana can?

⁷ Jovenguna ¿quiquingunaca Jehová Diospa mandashcacunaca yapatami imatapash ama rurachun jarcan yashpachu pensanajupanguichi? Cashna pensachunga Satanasmi munan. Satanasca, internetpi ricurishca gentecunashna o escuelapi compañerocunashna imatapash na rurashcamanda canba causai llaquilla cashcatashna ricuchunmi munan. Shinallata Jehovapa mandashcacunata pactachijuimanda, na shuj cushilla causaita charishcatashna ricuchunmi munan. b Shinapash Satanasca na villanllu ancho ñanda catijcuna huañuita tarina cashcataca.  Cutin Jehová Diosca quichiji ñanda catijcunaca causaita causagrinatami japigringa nijunmi (Sal. 37:29; Is. 35:5, 6; 65:21-23).

 8. Jovengunaca Olaf huauquigumandaca ¿imatata yachajui ushan?

⁸ Olaf jovenmanda yachajupashunchi. c Paitaca escuelamanda compañerocunaca shuj cuitsahuan huainayana juchapi urmachunmi atichinajurca. Chaimandami chai huauquiguca, testigo de Jehovami cani, Bibliapi mandashcashnami causani nirca. Chaita uyashpacarin ashtahuanmi escuelamanda compañeracunaca paicunahuan huainayana juchapi urmachun atichinajurca. Shinallata colegiomanda profesorcunapash paitaca “shuj ali universidadpi estudiachun animajushcatami nin. Shuj ali universidadpi na estudiashpaca cai mundopica imapapash na sirvij cuendami ricuringui” nishcarcami. Cashna ninajujpica cai huauquiguca ¿imatata rurarca? Paica ninmi: “Congregacionbimi ali amigocunata mascai callarircani. Paicunami ñucapa familiashna tucurca. Shinallata Bibliatapashmi ñucallata ali ali estudiai callarircani nin. Bibliata ashtahuan aliguta estudiashpami  Bibliapi yachachishcacuna ciertopacha cashcata, shinallata Jehová Diosta ali sirvij callarichunbash ayudahuarca” nin.

 9. Quichiji ñanmanda ama llujshingapaca ¿imatata rurana capanchi?

⁹ Satanasca quichiji ñanmanda llujshishpa, ancho ñanman yaicuchunmi munan. Paica ñucanchicuna causaita tarichunga na munanllu, ñucanchicuna huañuita tarichunmi munan (Mat. 7:13). Shinaca Jesusta uyashpa, cazushpami quichiji ñanmandaca na llujshishun. Cunanga Jesús imata ashtahuan rurachun mandashcata yachajupashunchi.

10. Mateo 5:23, 24​pi nishcashnaca Jesusca ¿imata rurachunda mandarca?

¹⁰ (Mateo 5:23, 24​ta liipangui). Cai versocunapica, judiocunapa shuj importante mandamientotami Jesusca yarichirca. Por ejemplo, pipash templopi shuj sacrificiota cungapaj rijushpa chai ratopi pihuanbash fiñanajushcata yarishpaca, Taita Diosman caragrijuj sacrificiotaca chai pushtupi saquishpami, cutin tigrashpa paipa cumbaguhuanra ali tucuna carca. Shinaca shuj sacrificiota nara rurashpallata ashtahuan importanteca, paipa ‘cumba runaguhuanra ali tucunami minishtishca ricurijurca’.

11. Jacobca paipa huauquihuan cutin ali llevaringapaca ¿imatata rurarca?

¹¹ Jacobpa causaimanda yachajushpami ñucanchi huauquipanicunahuan imamandapash fiñanajushca cashpa, imashina cutin ali llevarinata yachajushun. Jacobca ña 20 huatacunatami paipa llactapica ñana causajurca. Shinapash Jehová Diosca shuj angelta cachashpami Jacobtaca paipa huasiman cutin tigrachun mandarca (Gén. 31:11, 13, 38). Pero Jacobca paipa llactamandaca paipa huauqui Esaú huañuchingapaj munajujpimi pacajushpa llujshishca carca (Gén. 27:41). Chaimandami Jacobca paipa huauquica todaviami paihuan culirashca canga yashpa manllaimanda huasimanga na tigrangapaj munajurca (Gén. 32:7). Shinapash Jacobta cutin paipa huauquihuan ali tucushpa, ali llevaringapaca ¿imatata rurarca? Callaripica, shungumandami Jehová Diosta mañarca. Catipica paipa huauquimanmi ashtaca regalocunata cacharca (Gén. 32:9-15). Quimsapica Jacob paipa huauqui Esauhuan tuparishpaca paita respetashcata ricuchingapami ashtaca viajecunatami cungurirca. Shinami Jacobca paipa huauquihuanga cutin ali llevarita usharca (Gén. 33:3, 4).

12. Jacobmandaca ¿imatata yachajui ushapanchi?

¹² Jacobca cutin paipa huauquihuan ali llevaringapaca ¿imatata rurarca? Callaripica, Jehová Diostami paipa huauquihuan cutin ali llevaringapaj ayudahuai nishpa mañarca. Jehová Diosta mañashpapash, paipashmi pai mañashcashnallata pactachingapaj rurarca. Shinallata paipa huauquihuan ali tranquilo tuparingapami tucuita rurarca. Tuparishpapash paihuan parlashpaca na nircachu: “Canmi culpata charingui”. Ashtahuangarin paica, paipa huauquihuan cutin ali llevaringapami munajurca.

13, 14. Shuj huauquita o shuj panita nali sintichishcata cuenta japishpaca ¿imatata rurana capanchi?

¹³ Quichiji ñanda purijcunaca tucuicunahuanmi shuj tranquilo, casilla causaiguta charingapaj munapanchi (Rom. 12:18). Shinaca pitapash imatapash nishpa, rurashpa, nali sintichishcata cuenta japishpaca ¿imatata rurana capanchi? Jacob cuendami Jehová Diosta callaripica shungumanda mañana capanchi. Chai huauquihuan o chai panihuan cutin ali llevaringapaj ayudahuai nishpami mañana capanchi.

¹⁴ Shinallata ñucanchicuna imagupi mejorana cashcata pensaringapami tiempoguta llujchina capanchi. Chai jipaca cashna tapuripashunchi.  “Chai huauquihuan o chai panihuan cutin ali llevaringapaj ¿ñucapa orgullota ladoman saquishpa, perdonda mañashpa ali tucungapaj munanichu? Chai huauquihuan o chai panihuan cutin ali llevarijpica Jehová Diospash Jesuspash ¿imashinashi sintiringa?” nishpami tapurina capanchi. Cashna tapuicunapi pensarinami ñucanchi huauquihuan o panihuan cutin ali llevarichun ñucanchitaca ayudanga. Jacobpa ejemplopashmi ñucanchitaca ayudaita ushan.

15. Efesios 4:2, 3​pi nishcashnaca shuj huauquihuan o shuj panihuan cutin ali llevarichunga ¿imata ayudanga?

¹⁵ Jacob paipa huauquihuan tuparingapaj rishpa, jariyashcata parlajpica ¿imashi pasanman carca? Talvezpashmi paipa huauquihuanga cutin ali llevaritaca na ushanmanllu carca. Shinaca shuj huauquihuan o shuj panihuan cutin ali llevaringapaj parlangapaj rijushpaca, humildadta ricuchishpami aliguman parlana capanchi (Efesios 4:2, 3​ta liipangui). Bibliapi Proverbios 18:19​pica, “Llaquichi tucuj huauquica, muyundi jatun pircahuan pueblotapash yalimi. Huauquipura fiñanajushcacunaca, jirru aldabahuan vichashca jatun pungushnami” nijunmi. Shinaca pitapash disculpata mañangapaca, humilde canami minishtirin. Shinallami chai huauquihuan o chai panihuanga ali llevarita ushapashun.

16. Shuj huauquihuan o shuj panihuan cutin ali llevaringapaj munashpaca ¿imatata rurana capanchi? ¿Imamandata shina rurana capanchi?

¹⁶ Chai huauquiguhuan o chai paniguhuan nara parlangapaj rishpallatami imata ninataca ali pensarina capanchi. Shina pensarishca jipami paihuanga parlangapaj rita ushapanchi. Cai huauquiguhuan o cai paniguhuan parlangapaj rishpaca, parlarishpa cutin ali llevarinatami yuyana capangui. Callaripica cai huauquiguca ñucanchicuna imatapash rurashpa o nishpa llaquichishcamandami, talvez imapash nali cosascunata nishpa ñucanchitapash nali sintichita ushan. Shina rurajpica na culirashpami paihuan cutin ali llevaringapaj esforzarina capanchi. Caitami yarina capanchi, shuj huauquihuan o panihuan ali llevaringapaj munashpaca pi culpata charishcataca na pensarijunachu capanchi. Ashtahuanbachaca ñucanchi huauquihuan o panihuan ali llevarina ashtahuan importante cashcapimi pensarina capanchi (1 Cor. 6:7).

17. Cai huauquipa ejemplomandaca ¿imatata yachajupanchi?

¹⁷ Huauqui Gilbertmanda yachajupashunchi. Huauqui Gilbert paipa familiahuan shuj tranquilo causaiguta charingapaj, tucuicunahuan ali llevaringapaj imata rurashcata ricupashunchi.  Paica, paipa familiamanda shuj familiarhuan problemacunata charishcatami villan. Chaimandami paica casi ishcai huatacuna yalita tranquilo parlashpa, ali llevaringapaj esforzarishcata nin. Cai huauquiguca ¿imatata ashtahuan rurarca? Paica ninmi: “Ñucapa familiarhuan nara parlashpallatami Jehová Diosta mañan carcani. Imapash nalicunata nishpa ñucatapash nali sintichijpi, ama culirashpa paita perdonai ushangapami mañan carcani” nin. Shinallata, “cai familiarhuan tranquilo causaiguta charingapaca ñuca esforzarina cashcatami cuenta japircani” nin. Cashna rurashcamandaca ¿imata pasarca? Huauqui Gilbertca ninmi: “Cunanga tucuicunahuanmi ali llevarini. Tranquilo causaigutapashmi tucuicunahuan charini” nin.

18, 19. Pitapash imatapash nishpa o rurashpa llaquichishca cashpaca ¿imatata rurana capanchi? ¿Imamandata chashna rurana capanchi?

¹⁸ Shinaca shuj huauquita o shuj panita ñucanchicuna llaquichishcata cuenta japishpaca ¿imatata rurana capanchi? Jesuspa mandashcata catishpami chai huauquihuan o chai panihuan cutin ali llevaringapaj esforzarina capanchi. Chaita rurangapaca, Jehová Diospa ayudatami mascana capanchi. Jehová Diostaca paipa espíritu santohuan ayudachunmi mañana capanchi. Shina rurashpaca Jesusta uyajushcata ricuchishpami, ñucanchipash cushilla causaiguta chari ushapashun (Mat. 5:9).

¹⁹ Jehová Dios, Jesusta congregacionda ‘umashna’ pushachun saquishcamandaca, cushijushcami capanchi (Efes. 5:23). Chaimandami apóstol Pedro, Santiago, Juanshnallata Jesuspa yachachishcacunataca uyana capanchi (Mat. 17:5). Jesuspa yachachishcacunata uyashpa cazushcataca, shuj huauquihuan o shuj panihuan imamandapash fiñanajushca cashpaca, cutin ali llevaringapaj esforzarishpami Jesusta uyashcataca ricuchipanchi. Shinami quichiji ñanbi rijushcatapash ricuchipashun. Shina rurashpaca, ashtaca bendiciongunata chasquishpami para siempre cushilla causaita ushapashun.