Jesusca jahua cielopi paipa Taitahuan trabajashpami, shujcunahuan maquipurarishpa trabajanata ashtahuan ali yachajurca. Chaimandami cai Alpapi cashpaca, shujcunahuan maquipurarishpa trabajanamandaca shuj alipacha ejemplo tucurca. Jesuspa ejemploca ñucanchitaca ¿imashinata ayudaita ushan? Jesuspa ejemplomanda yachajunami ñucanchi huauquipanicunahuan ima trabajopipash randimanda ayudarishpa, ali llevarichun ayudanga.

Randimanda ayudarishpa trabajanata gushtaj personaca humildemi can. Chai personaca paihuan trabajajcunataca valorashpami ricun. Imatapash pai ushaimandallaca na jariyanllu. Jesuspash paipa Taita shinallata humilde cashcatami ricurca. Jehová Dioslla tucuita rurai ushashpapashmi, paipa churi Jesús ayudachun saquirca. Chaitaca Bibliapimi ricuita ushapanchi. Jehová Diosca: “Ñucanchishnalla rijchajta, ñucanchishnallapacha ricurichun genteta rurashun” nirca (Gén. 1:26). Jehová Dios cai shimicunata nijpimi, Jesusca paipa Taita humilde cashcata cuenta japirca (Sal. 18:35).

Jesús cai alpapi cashpaca, pai imatapash alita rurashcamanda shuj gentecuna paita alicachishpa rimajpica, paica humildadta ricuchishpami Jehová Dios ayudajushcamanda pai tucuita rurajushcata nin carca (Mar. 10:17, 18; Juan 7:15, 16). Shinallata Jesuspaca, paipa discipulocunaca paipa amigomi carca. Paica, paipa discipulocunataca shuj esclavotashnaca na tratarcachu (Juan 15:15). Chaimandami Jesusca paipa discipulocunaman humilde cana minishtirishca cashcata yachachingapaca, paipa discipulocunapa chaquitapash maillarca (Juan 13:5, 12-14). Jesús shinami ñucanchipash, ñucanchi huauquipanicunataca valorashpa tratana capanchi. Imata rurashpapash, na ñucanchipillachu pensarina capanchi. Randimanda respetarishpaca, maijanmanda alicachina cashcataca na ricunajushunllu. Ashtahuangarin ali trabajashpami, ashtaca cosascunata rurai ushapashun (Rom. 12:10).

 Shuj persona humilde cashpaca ‘ali yuyaitaca taucacunahuan’ parlarishpa chari ushashcatami cuenta japin (Prov. 15:22). Shinaca imaguta ali yachashpapash, na tucuita yachai ushashcatami cuenta japina capanchi. Jesuspashmi tucui tucuitaca na yacharca (Mat. 24:36). Jesusca paipa discipulocuna imata yuyashcata yachangapapash siempremi tapun carca. Chaihuanga, paipa discipulocunamandapash preocuparishcatami ricuchijurca (Mat. 16:13-16). Jesús chashna cashcamandami, paipa discipulocunaca paihuan cashpaca tranquilo, cushilla sintirin carca. Shina cuendami ñucanchicunapash humilde cashpaca, shujcuna ima nishcata, paicunapa yuyaitapash uyangapaj dispuesto capashun. Shinami tucuicunallata casilla, tranquilo, ali llevarita ushapashun. Trabajopash alimi llujshinga.

Ancianocunami ashtahuanbachaca Jesuspa ejemplota catishpa humildadta ricuchina can. Shinallata Jehová Dios congregacionbi shuj ali decisionda agllachun maijan ancianotapash paipa espíritu santohuan utilizai ushashcatami yarina can. Shinaca ancianocuna tandanajushpa shuj reunionda charishpaca, tucuicunami imagutapash nishpa, paicunapa yuyashcata parlangapaj tranquilo sintirina can. Cashna rurajpimi congregacionmanda tucui huauquipanicunallata beneficiaringa.

Shuj ali compañeroca tucuicunatami ali intindin. Chaimandami pai munashca shinaca na tucuita rurangapaj munan. Ashtahuangarin shujcuna ima nijtapash uyashpami intindin. Jesusca ashtaca viajecunatami paipa Taita shujcunata ali intindishpa tratashcata ricurca. Por ejemplo, Jehová Diosca gentecunata juyashpa ali intindimandami, gentecunata salvangapaca Jesusta cai alpaman cachamurca (Juan 3:16).

Jesuspashmi paipa Taitapa ejemplota catishpa, shujcunata ali intindishcata ricuchirca. Fenicia huarmigumanda yaripashunchi. Jesusca, Israel llactamanda gentecunatalla ayudangapami shamushcarca. Shinapash Jesusca chai huarmigupa nishcata uyashpa, paita ali intindishpa ayudashcatami ricuchirca (Mat. 15:22-28). Shinallata Jesusca paipa discipulocunatapash ali intindishpami tratarca. Chaimi paicuna imata rurai ushashcatallami mañan carca. Shuj viajeca apóstol Pedro Jesusta ashtaca gentecunapa ñaupajpi negashca cajpipash, Jesusca paita intindishpami perdonashpa, jipamanga ashtahuan responsabilidadcunata curca (Luc. 22:32; Juan 21:17; Hech. 2:14; 8:14-17; 10:44, 45). Jesuspa ejemploca ñucanchi yuyashcashna imatapash ama rurangapaj, shujcunapa ñaupajpi shujcunapa yuyaicunatapash intindij personacuna cashcata ricuchingapami ayudan (Filip. 4:5).

Shujcunapa yuyaicunata intindij persona cashpaca, shujcunapa yuyaicunata uyashpami tucuicunahuanllata maquipurarishpa trabajanata gushtapashun. Jesusca tucuicunahuanllatami ali llevarin carca. Chaimandami paipa contracunaca, “impuestota cobrajcunapa, juchayujcunapa amigomi cangui” nishpa rimarca (Mat. 11:19). Jesuspa ejemplota catishpami, shuj shuj llactamanda cajpi o shuj shuj culturata charijpipash, tucuicunahuan  maquipurarishpa, tandanajushpa trabajapashun. Louis shuti huauquiguca congregaciongunata visitashpami superintendente de circuito shina sirvishca. Shinallata Betelpipash shuj shuj llactamanda huauquipanicunahuan, shuj shuj culturata charij huauquipanicunahuanmi trabajashca. Paica ninmi: “Shuj paredta shayachingapaj rumicuna uchilla, jatun cashpaca trabajoca ashtahuanmi shinlli tucun. Shinapash pacienciahuan, esfuerzohuanga chai rumicunahuanga paredtaca shayachi usharinmi. Shina cuendami shuj shuj huauquipanicunahuan trabajanapash can. Tucuicuna juchayujcuna cashcamandami, tandanajushpa trabajangapaca esfuerzo minishtirin. Shinapash humilde cashpaca, shujcunapa opiniondapash respetashpami tucuicunallata tandanajushpa, ali trabajaita ushapashun. Shujcunahuan ali trabajangapaca, ñucarami shujcunata ali intindingapaj esforzarishcani” nin. Cashna ruranaca, alipachami can.

Congregacionbica ¿imashinata shujcunata respetashcata, paicunata ali intindishcata ricuchita ushapanchi? Por ejemplo, ñucanchi villachinaman llujshishpa, chai grupopi mayorlla huauquipanicuna tiajpica, paicunapi pensarishpami paicuna na caruta villachingapaj ri ushajpica, paicuna maipi usharishcagupi villachingapaj munashcata ricushpa, paicunata intindishpa, paicuna cushilla sintirichun ayudana capanchi.

Shuj ali compañeroca ishcandimandallata imagutapash parlarishpami ayudarin (1 Tim. 6:18). Jehová Diosca, Jesús jahua cielopi paihuan trabajajujpica, imashina trabajanataca na pacashpami yachachirca. Chaimandami Jesusca imata ruranata, imashina comportarinatapash aliguta yachajurca (Prov. 8:27). Jesús cai alpaman shamushpaca, paipa discipulocunamanga paipa Taitamanda imata yachajushcatapash na pacashpami villarca (Juan 15:15). Shinaca Jehová Diospa ejemplota catishpami, ñucanchicuna imaguta yachashpapash shuj huauquipanicunamanga na pacashpa, aliguta yachachina capanchi. Shuj ali compañeroca shujcunata ayudangapaca, imata yachashpapash na pacashpami yachachin. Shujcunata pai mandangapaj munaimandallaca na upalla saquirinllu. Ashtahuangarin pai imaguta yachashpapash, shujcunaman yachachishpami cushilla sintirin.

Imagutapash na pacashpa yachachishpami, shuj huauquipanicunataca animaita ushapanchi. Ñucanchita shujcuna ima trabajota rurajpipash felicitashpa agradicijpica, cushillami sintiripanchi. Jesusca paipa catijcuna imapash alita rurashcamanda felicitangapaca siempremi tiempogutaca llujchin carca (Mateo 25:19-23; Luc. 10:17-20​huan chimbapurashpa ricupangui). Chaimandami paipa catijcunamanga, ñuca rurashca cosascunatapash ashtahuan yalitami ruranguichi nishpa animarca (Juan 14:12). Shinallata Jesusca ña huañugrijushpapashmi, paipa catijcunataca, cangunami, ñuca llaquicunahuan cajpipash, ñucahuan cashcanguichi nirca (Luc. 22:28). Jesús paipa discipulocunata cashna nishpa animashcamandami paipa catijcunaca, paipa yachachishcacunataca pactachina munaita charishcanga. Ñucanchicunapash huauquipanicunata felicitangapaj tiempoguta llujchijpica, paicunapashmi cushijushpa, imata rurangapapash ashtahuan esforzaringa.

Kayode shuti huauquica ninmi: “Shuj ali compañeroca na tucuipi perfecto canachu minishtirin. Ashtahuangarin shujcunapa trabajomanda felicitashpa, paicunata cushichij compañero canallami minishtirin” ninmi. Quiquinga ¿cashna compañerochu capangui? Imashina compañero cashcata yachangapaca, shuj huauquipanicunatami ñucaca ¿imashina compañerota capani? nishpa tapuita ushapanchi. O ñucanchillatapash, shuj huauquipanicuna ñucahuan cashpaca ¿imashinata sintirin? ¿Jesuspa discipulocuna Jesushuan cashpa sintirishcashnachu sintirin? nishpa tapurita ushapanchi. Cai tapuicunapa ali respuestata tarishpaca, apóstol Pabloshnallatami ñucanchica, cangunahuan maquipurashpa trabajajcunami canchi nita ushapashun (2 Cor. 1:24).