ASHTACA gentecunaca, shuj gentecunatapash yali paicunata ashtahuan mejor tratachunmi munan. Paicunata ña ali tratajpipash ashtahuan mejor tratachunmi munan. Bibliapica paicunapilla pensarij gentecuna y malagradecido gentecuna ashtahuan miranatami villajurca (2 Tim. 3:2).

Paicunapilla pensarij gentecunaca punda tiempomandapachami tiashca. Por ejemplo, Adán y Evaca paicunallatami ima ali cajta, ima nali cajta decidina derechota charinchi yarca. Chaimandami cunanga ashtacata sufrishpa causanajunchi. Rey Uziaspashmi paipilla pensarin carca. Paica rey caimandami Taita Diospa templo huasiman yaicushpa inciensota rupachinalla can yarca (2 Crón. 26:​18, 19). Fariseocunapash y saduceocunapash Abrahanba huahuacuna caimandami Taita Diosca shuj gentecunatapash yalimi ñucanchitaca ali tratachun miricinchi yarca (Mat. 3:9).

Paicunapilla pensarij gentepuracunapi causaimandami ñucanchipash ashtahuan ali tratachunmi miricini yashpa pensari callarinchiman (Gál. 5:26). Ama chashna cangapaca ¿imatata rurana capanchi? Primeroca paicunapilla pensarij gentecunamanda Jehová Dios imata pensajtami intindina capanchi. Chaipaca Bibliapi ima nijta ricupashunchi.

Jehová Diosmi imashina tratana cashcataca decidin. Huaquin ejemplocunata ricupashunchi.

•   Jehová Diosca huarmicuna paipa cusata respetachun y cusacunaca paipa huarmita juyaihuan tratachunmi munan (Efes. 5:33). Shinallata cusahuarmi randimanda juyarishpa causachunmi munan (1 Cor. 7:3). Taitamamacunaca huahuacuna paicunata cazuchunmi munan. Cutin huahuacunaca taitamamacuna paicunata juyaihuan cuidachunmi munan (2 Cor. 12:14; Efes. 6:2).

• Congregacionbica ancianocunatami respetana capanchi (1 Tes. 5:12). Shinapash ancianocunaca huauquipanicunata controlana derechotaca na charinllu (1 Ped. 5:​2, 3).

• Taita Diosca gobiernocuna autoridadta charichunmi saquishca. Chaimandami impuestocunata pagana y respetota ricuchina capanchi (Rom. 13:​1, 6, 7).

Jehová Diosca ñucanchicuna na miricijpipash ashtaca cosascunatami carashca. Pecadorcuna caimandami huañunata miricinchi (Rom. 6:23). Shinapash Jehová Diosca ninanda juyaimandami ñucanchicunamanga ashtaca ali cosascunata caran (Sal. 103:​10, 11). Jehová Dios ñucanchita ninanda juyashcamandallami bendiciongunataca charipanchi (Rom. 12:​6-8; Efes. 2:8).

Cai mundopi gentecunashna ama pensaringapaca cuidadota charinami capanchi. Cai mundopi gentecunaca paicunata ashtahuan ali tratachunmi munan. Chai pensamientocunaca na cuenta japijtami ñucanchitapash afectaita ushan. Imasha afectajta cuenta japichunmi Jesusca uvas chagrapi trabajadorcunamanda parlarca. Primeroca uvas pamba dueñoca punlla entero trabajachunmi trabajadorcunataca contratarca. Chai jipami shuj trabajadorcunatapash contratarca. Shinapash chishiyajpica dueñoca punlla entero trabajashcacunamanbash y shuj horastalla trabajashcacunamanbashmi shuj denario culquita pagarca. Pero punlla entero indipi trabajashcacunaca ñucanchimanga yalitami paganga yanajurcami (Mat. 20:​1-16). Cai comparacionda utilizashpami Jesusca Taita Dios carashcacunahuanlla contento cana cashcata paipa catijcunamanga yachachirca.

Shujcuna imatapash carachun shuyajunapa randica agradecidomi cana capanchi (1 Tes. 5:18). Apóstol Pablopa ejemplota catipashunchi. Apóstol Pabloca pai minishtishca cosascunata  mañana derechota charishpapash Corinto llactamanda huauquipanicunataca na mañarcachu (1 Cor. 9:​11-14). Shujcuna imagutapash carachun exigijunapa randica imaguta carashcamandapash agradecidomi cana capanchi.

Humildemi cana capanchi. Importantemi cani yashpa pensanata yachaj gentecunaca siempremi paicunamanga lo mejorta cuchun munan. Pero humilde canaca ama chashna pensamientocunata charichunmi ayudan.

Profeta Danielca importante familiamandami carca. Paica guapo, inteligente, imata rurashpapash alipachami ruranata yachan carca. Shinapash ñucataca ali tratachunmi miricini yashpaca na pensajurcachu (Dan. 1:​3, 4, 19, 20). Ashtahuanbash Danielca humildemi carca. Chaimandami Jehová Diosca paitaca ninanda valichirca (Dan. 2:30; 10:​11, 12).

Cai mundopi gentecunaca paicunapillami pensarin. Pero ñucanchicunaca ama paicunashna cangapami cuidadota charina capanchi. Shinaca Jehová Dios ima bendiciongunata carajpipash siempremi contento cana capanchi.