Filipinas llactamanda gentecuna trabajangapaj rishca llactapimi María y Juanga a causan. Paicunaca chai gentecunamanmi predican. Mariaca COVID-19 tiashca tiempopimi, paipa llactapi y shuj llactacunapi causaj gentecunamanbash Bibliata yachachingapaj esforzarirca.

Mariaca Bibliata paihuan yachajujcunataca “¿nachu Bibliata estudiangapaj munaj gentecunata rijsipanguichi?” nishpami tapun carca. Ari nijpica “presentahuai” ninmi carca. Bibliata yachajuj gentecunaca paicunapa familiacunaman, amigocunamanmi imata yachajushcataca compartinata yachan. Chaimi Mariaca Bibliata yachajungapaj munaj ashtaca gentecunataca tarishca. Shinaca panigu Mariapa ejemplota ricupashunchi.

Jasminga Bibliata estudiangapaj munaj chuscu personacunatami Mariamanga presentarca. Shujca Kristine shutimi carca. Paica Bibliata ninanda yachajungapaj munaimandami semanapica ishcai viaje yachajui callarirca. “¿Nachu Bibliata yachajungapaj munaj gentecunata rijsipangui?” nishpa tapujpica, Kristineca “ari ñami presentasha” nircami. Solo huaquin semanacunapillami Bibliata yachajungapaj munaj chuscu personacunata Mariamanga presentarca. Jipamanga shuj personacunatapashmi Kristineca Mariaman presentarca.

Kristineca paipa amigacunata Mariaman presentashca jipaca, Filipinas llactapi paipa familiapash Bibliata yachajuchunmi munarca. Shinami Kristineca paipa ushi Andreahuan parlarca. Andreaca testigo de Jehovacunaca shuj secta cashcata, Jesuspi na crishcata y Antiguo Testamentotalla utilizaj cashcatami pensarin carca. Pero shuj viajegutalla estudiashpami, Andreaca pandarijushcata cuenta japirca. Bibliata estudiashpa catishpaca, “Bibliapi chashna nijushpaca ciertomi canga” ninmi carca.

Tiempohuanga Andreaca ishcai amigacunata, trabajopi shuj cumbatapashmi Mariamanga presentarca. Paicunapashmi Bibliata yachajui callarirca. Andrea Bibliata yachajujujpica paipa tía Angelaca pacallami uyajun carca. Andreapa tiaca ciegagumi carca. Angelapashmi Bibliata estudiangapaj munaimandaca Mariata presentahuai nirca. Bibliata estudianata gushtaimandami narapash shuj quilla tucujpillata, Angelaca Bibliapa ashtacata textocunata de memoria yachajushcarca. Shinallata “semanapi chuscu viajemi Bibliataca estudiangapaj munani” nirca. Andrea ayudajpimi, Angelaca reuniongunamanga por videoconferencia seguido conectari callarirca.

 Kristine Bibliata estudiajujpica, paipa cusa Joshuaca uyajunmi carca. Uyajujta cuenta japishpami Mariaca “¿nachu quiquinbash yachajungapaj munangui?” nishpa tapurca. Chaimi Joshuaca “ari, pero solo uyaitallami uyasha, imatapash tapujpica ñucaca rishallami” nirca. Pero narapash 5 minuto tucujpillatami Joshuaca, ashtaca tapuicunata rurashpa “ñucapashmi Bibliata yachajungapaj munani” nishcarca.

“Nachu Bibliata yachajungapaj munaj gentecunata rijsipangui” nishpa tapushcamandallami, ashtaca gentecuna Bibliata yachajui callarirca. Mariaca ashtacacuna yachajui callarijpimi shuj huauquipanicuna paicunaman yachachichun mingarca. En totalca chuscu llactamanda 28 personacunami Mariahuan Bibliata yachajui callarirca.

Jasminga abril de 2021​pimi bautizarirca. Kristineca mayo de 2022​pimi bautizarirca y cunanbica paipa familiahuanmi Filipinas llactapi causajun. Kristine Mariaman presentashca ishcai estudiantecunapashmi bautizarirca. Angelapash huaquin quillacuna jipallami bautizarirca y cunanbica precursora regularmi can. Kristinepa cusa Joshua, paipa ushi Andrea y Bibliamanda shuj estudiantecunapashmi Bibliata estudiashpa aliguta progresanajun.

Apostolcunapa punllacunapica, ali villaicunata shuj shuj familiacunaman, amigocunaman villachijpimi Jesuspa discipulocunaca mirarca (Juan 1:​41, 42a; Hech. 10:​24, 27, 48; 16:​25-33). Shinaca quiquinba estudiantecunataca “¿nachu Bibliata estudiangapaj munaj gentecunata rijsipangui?” nishpami tapuita ushapanchi. Shina tapushpami ashtaca gentecunaman Bibliata yachachi ushapanchi.