1. Filipenses 2:3​pi shimicunata pactachishpaca ¿imashinata caita ushashun?

JEHOVÁ DIOSCA ñucanchipa ima ali cajtaca alimi yachan. Chaimi Jehovata sirvijcunaca humildecuna, Jehovapa mandashcacunatapash tucuita cazujcuna capanchi (Efes. 4:22-24). Humildecuna cashpaca Jehovapa munaita pactachingapami munashun. Shinallata shujcunamanda ashtahuan yalimi cani nishpapash na pensarishunllu. Humildecuna cashpami Jehovahuan, ñucanchi huauquipanicunahuanbash ali amigocuna caita ushapashun (Filipenses 2:3, liingui).

2. a) Apóstol Pabloca ¿imatata nirca? b) Caipica ¿imatata yachajupashun?

² Gentecuna orgulloso, paicunapilla pensarishpa causachunmi Diabloca munan. Chaimi cunanbica shina gentecuna tian. Paicunashna ama cangapami ñucanchica cuidarina capanchi. Apostolcunapa punllacunapipashmi orgulloso gentecuna tiarca. Chaimi Roma llactamanda huauquipanicunamanga apóstol Pabloca cashna advirtirca: ‘Na cangunapa munailla alicachirishpa, jariyanachu canguichi. Aliguta yarishpami tucuicuna causana canguichi’ (Rom. 12:3). Apóstol Pabloca ñucanchicuna ñucanchimandallata ali sintirishpapash na jariyashcacuna cana cashcatami intindichirca. Caipica cusahuarmi causaipi, congregacionbi imatapash pactachichun mingajpi, Internetpi redes sociales nishcacunapipash imashina humildecuna cana cashcatami yachajupashun.

3. a) Cusahuarmicunaca ¿imamandata problemacunata charin? b) Problemacunata charishpaca ¿imatata huaquin cusahuarmicunaca nin?

³ Cusahuarmicuna cushilla causachunmi Jehová Diosca munan. Shinapash ishcandi juchayucuna caimandami problemacunata charin. Apóstol Pabloca cusahuarmicunaca llaquicunata  charinga nircami (1 Cor. 7:28). Jehovata sirvij huaquin cusahuarmicunaca culirarishpalla yalimandami na igual canachu canchi, mejor divorciarinallami canchi nin. Shina pensarishpaca Diablo munashcashnami pensarinajunman.

4. Cusahuarmicunaca ¿imatata na pensarina can?

⁴ Ñanapacha canhuanga causangapaj munanichu nishpaca na nijunachu capanchi. Ashtahuangarin Bibliapica ninmi, huainayana juchapi urmashpallami divorciaritaca ushan nishpa (Mat. 5:32). Apóstol Pabloca cusahuarmicunaca llaquicunata charinga nircami. Llaquicunata charishpaca na cashna pensarinachu can: “Ñuca munashcashnaca na cuidahuanllu, ñucataca juyaitapash na juyahuanllu, mejor shujhuanrapashmi ali causaiman” carcani nishpa. Shina pensarishpaca ñucanchipilla pensarijushcatami ricuchinchiman. Canllamanda gentecunaca canba shungu nishcatami catina cangui, can cushilla yalinapimi pensarina cangui ninmi. Shinallata partiri o divorciari nishpapashmi animan. Shinapash Jehovapa mandashcacunata pactachijcunaca “quiquimbajlla ali cachunga, na yarinachu canguichi. Ashtahuangarin shujcunapajpash ali cachunmi, tucuicunallata yarina canguichi” nishcatami pactachipanchi (Filip. 2:4). Jehová Diosca cusahuarmicuna cushilla causachunmi munan. Divorciarichunga na munanllu (Mat. 19:6). Ñucanchi munaita rurashpa causachunga Jehová Diosca na munanllu. Ashtahuangarin paipa munashcashna causachunmi munan.

5. Efesios 5:33​pi nishca shinaca cusahuarmicunaca ¿imashinata tratarina can?

⁵ Cusahuarmicunaca juyaihuan, respetohuanmi tratarina can (Efesios 5:33, liingui). Bibliapica carajpi japijcunatapash yalimi carajcunaca, ninanda cushijun nishpami yachachin (Hech. 20:35). Cusahuarmicuna humilde cashpaca juyarishpa, respetarishpami causanga.  Shina tratarishpaca na paicunapilla pensarishcatami ricuchinga. Ashtahuangarin huarmipi o cusapi pensarishcatami ricuchinga (1 Cor. 10:24).

6. Estiven, Estefani cusahuarmimandaca ¿imatata yachajupanchi?

⁶ Testigo cusahuarmicunaca humildecuna caimandami cushilla causaita ushan. Por ejemplo, Estiven huauquica: “Cusahuarmi causaica shuj equipota charij cuendami can. Imapash problemacuna tiajpica randimandami parlarinchi. Ñucapilla pensarinapa randica, ishcandipa ima ali cajtami pensarini” ninmi. Shinallata paipa huarmigu Estefanica ninmi: “Huasi ucupillata pihuanbash contrarishpa causanaca na alichu can. Imapash problemacunata charishpaca imamanda chai problema callarishcatami yachangapaj parlarinchi. Shinallata Jehovata mañanchi, publicaciongunapi informacionda mascanchi, shina liishca jipami ishcandi parlarinchi. Shinami ama cusatalla o huarmitalla nalicachishpa ricujungapaj ishcandimandallata esforzarinchi”. Cusahuarmicunataca ishcandipi pensarinami cushilla causachun ayudanga.

7. Anciano o siervo ministerial huauquica ¿imashinata cana can?

⁷ Ñucanchipaca Jehovata sirvinaca shuj jatun bendicionmi can. Chaimi paita ali sirvingapaj ninanda esforzaripanchi (Sal. 27:4; 84:10). Shuj huauqui Jehovapa organizacionbi ashtahuan sirvingapaj munashpaca alitami rurajun. Bibliapica, “Crijcunata maijanbash ricushpa yachachingapaj munashpaca, aligutami rurangapaj munan” nijunmi (1 Tim. 3:1). Shinapash congregacionbi ña anciano o siervo ministerial cashpaca na jariyashcaca purijunachu can (Luc. 17:7-10). Chai huauquicunaca tucui shunguhuan shujcunata ayudashpami humilde cashcata ricuchinga (2 Cor. 12:15).

8. Diótrefes, Uzías, Absalón jaricunamandaca ¿imatata yachajupanchi?

⁸ Bibliapica Jehovata huaquin sirvijcuna jariyashcacuna tucushcatami parlan. Por ejemplo, Diótrefes jarica congregacionbi shujcunata mandangapaj munaimandami jariyashca tucurca (3 Juan 9). Uzías jarica orgulloso caimandami paipa munai inciensota rupachingapaj Diospalla shicanyachishca ucuman yaicurca (2 Crón. 26:16-21). Shinallata Absalón jarica rey tucungapaj munaimandami gentecunataca jahua shungulla ali tratan carca (2 Sam. 15:2-6). Imashinami cai ejemplocunapi ricupanchi Jehová Diosca jariyashca gentecunataca nimamanda na alicachinllu (Prov. 25:27). Jariyashca gentecunaca imahorapash na cushilla causanllu (Prov. 16:18).

9. Jesusmandaca ¿imatata yachajupanchi?

⁹ Jesusca chai gentecunashna jariyashcaca na carcachu. Bibliapica ninmi: ‘Taita Diosman rijchaj cashpapash, paica Taita Dioshuan [igualmi] cani nishpaca na causarcachu’ (Filip. 2:6). Jesusca Jehová Dioshna poderta charishpapash Jehovata yalimi cani nishpaca na pensanllu. Ashtahuangarin paipa catijcunamanga cashnami nirca: “Maijanmi cangunapurapi huahuagushna causan, chaimi ashtahuan yali jatun” can nishpa (Luc. 9:48). Cunanbica precursorcuna, siervo ministerialcuna, ancianocuna, superintendente de circuito huauquicunaca Jesushna humildecuna cangapami ninanda esforzarin. Humildecuna cashpaca ñucanchi huauquipanicunataca juyaihuanmi tratashun. Shinami Jesuspa ali catijcuna cashcatapash ricuchipashun (Juan 13:35).

10. ¿Ancianocunaca na imatapash ruranllu nishpachu pensarina capanchi?

¹⁰ Huauquipanicunahuan imapash problemata charishpaca ancianocunaca na imatapash ruranllu nishpaca na nijunachu capanchi. Shina nijunapa randica ancianocunata aliman apoyashpa humilde cashcata ricuchipashunchi (Heb. 13:17). Chaipaca cashna tapuripashunchi:  “Congregacionbica ¿ciertopachachu problema tian? Shuj huauqui o shuj pani pandarijujta ricushpaca ¿chai ratochu imatapash nina cani? ¿Ñucarachu consejajuna cani? ¿Huauquipanicuna ñucata alicachishpa ricuchun o paicunahuan ali cangapachu esforzarijuni?”.

11. Efesios 4:2, 3​pi nishca shinaca ¿imashinata cana capanchi?

¹¹ Ñucanchicuna humilde cachunmi Jehová Diosca munan. Pipash imatapash alipacha rurai ushaimanda jariyashca cashpaca Jehovapa ñaupajpica yangami ricuringa. Chaimi humilde cangapaj esforzarina capanchi. Shinami congregacionbipash shujllashna caita ushashun (Efesios 4:2, 3, liingui). Ñucanchicunaca villachishpa, shujcunata ayudashpapashmi catina capanchi. Congregacionmanda tucui huauquipanicunatami igual tratana capanchi. Tucuicunamanmi imagutapash carangapaj, invitangapaj o mingachingapapash esforzarina capanchi (Mat. 6:1-4; Luc. 14:12-14). Shinami huauquipanicunaca ñucanchicuna humilde cashcata ricunga.

12. Amigocunamanda parlashpaca ¿imatata Bibliapica yachachin?

¹² Familiacunahuan, amigocunahuan ali yalichunmi Jehová Diosca munan (Sal. 133:1). Cai alpapi cashpaca Jesuspashmi ali amigocunata charirca (Juan 15:15). Ali amigocunata charishpa cushilla causai ushashcatami Bibliapica yachachin (Prov. 17:17; 18:24). Ashtahuanbash huauquipanicunahuan yalina alipacha cashcatapashmi Bibliapica ricuchin (Heb. 10:24, 25). Huaquingunaca Internetpi redes sociales nishcacunapi tauca amigocunata charishpa na sololla sintiri ushashcatami pensan. Shinapash Internetpi redes sociales nishcacunata utilizajushpaca cuidadotami charina capanchi.

13. Internetpi redes sociales nishcacunata ricushpaca ¿imashinata huaquingunaca sintirin?

 ¹³ Internetpi redes sociales nishcacunata estudiajcunaca nishcami: huaquingunaca Internetpi shujcunapa fotocunata ricushpami paicunalla llaquilla sintirin nishpa. ¿Imamandata shina sintirin? Huaquingunaca paicunapa amigocunahuan maimanbash rishcata, pugllajushcata, micujushcatami fotocunata llujchishpa redes socialescunapi churan. Chaicunata ricushpami huaquingunaca cashna pensarishca: ñuca causaica aburrido, imatapash na rurai ushanica nishpa. 19 huatacunata charij paniguca ninmi: “Internetpi shujcunapa fotocunata ricuimandami llaquilla, culiraitapash culiranayan carca. Paicunaca cada semanami maimanbash puringapaj rin. Cutin ñucaca huasipilla satiria yalimandami llaquilla, aburrida yalin carcani”.

14. Redes sociales nishcacunata ali utilizachunga ¿imashinata 1 Pedro 3:8​pi shimicunaca ayudan?

¹⁴ Ñucanchicunaca redes sociales nishcacunataca ñucanchi familiacunahuan o amigocunahuan parlangapami utilizaita ushapanchi. Shinapash huaquingunaca paicunatalla alicachishpa ricuchunllami fotocunata redes socialescunapica churan. Huaquingunaca chai fotocunata ricushpami nalicachishpa imapash nali comentariocunata churashca. Shinapash Jehovata sirvijcunaca caicunataca na ruranachu can. Chai comentariocunata na churashpami shujcunapi pensarishcata, humilde cashcatapash ricuchipashun (1 Pedro 3:8, liingui).

15. Ama jariyashcacuna cachunga ¿imashinata Bibliapa consejocunaca ayudan?

¹⁵ Internetpi redes socialescunata utilizashpaca cashna tapuripashunchi: “Fotocunata, imapash videocunata Internetpi churashpaca ¿ima yuyaihuan o ima munaihuanda churajuni? ¿Shujcuna ricuchunllachu churajuni? ¿Chai fotocunata ricushpa shujcuna ñucata envidiashpa ricuchunllu churajuni?”. Bibliapica ninmi: “Cai pachapi tucui imalla tiashcapash, quiquin munaipajlla, imatapash ricushcandi munangapajlla, yangata jariyashpa causanallami tian. Chaicunataca, na Taita Dios yarichijunllu. Ashtahuangarin cai pachami, chashna yarichijun” nishpa (1 Juan 2:16). Bibliapa shimicunata intindichijcunaca: “Yangata jariyashpa causanallami tian” nishpaca “pipash shujcunata yali, jariyashca  cashcatami” ningapaj munan ninmi. Jesusta ali catijcunaca shujcuna ñucanchita alicachishpa ricuchunga na munapanchichu. Chaipa randica Bibliapa cai consejotami catipanchi: ‘Na jariyashpa rimanachu canchi. Caishujmanda, chaishujmanda na fiñanajunachu canchi. Imaguta charishcatapash, na caishujmanda chaishujmanda ñucapa cashcanman yanachu canchi’ nishcata (Gál. 5:26). Humildecuna cashpaca cai mundomanda gentecunashna jariyashcacunaca na cashunllu.

16. ¿Imamandata na jariyashca cana capanchi?

¹⁶ Humildecuna cangapami esforzarina capanchi. Jariyashcacunaca “aliguta yarishpa” causaitaca na ushanllu (Rom. 12:3). Orgulloso gentecunaca imatapash nishpa, shujcunata yali cani nishpami shujcunataca nali sintichin. Shinami paicunallatapash nali sintirin. Paicuna na cambiajpica paicunapa yuyaicunataca Diablomi ashtahuan pandachinga (2 Cor. 4:4; 11:3). Cutin humilde gentecunaca imatapash aliguta yarishpami imatapash ruran. Humilde gentecunaca shujcunata yalimi cani nishpaca na pensanllu (Filip. 2:3). Paicunaca siempremi caita yarin: “Taita Diosca jariyashcacunata ninandami fiñan. Ashtahuangarin ali shunguhuanbacha causajcunatami ninanda juyan” nishcata (1 Ped. 5:5, MTQI ). Aliguta yarishpa causajcunaca Jehovapa ñaupajpi ali cangapami esforzarin.

17. Humilde cashpa catingapaca ¿imatata rurana capanchi?

¹⁷ Humilde cashpa catingapaca ‘punda causashcata ña saquishpami’ causana capanchi. Chaipaca Jesusmanda yachajushpa, paipa ejemplota catingapami esforzarina capanchi (Col. 3:9, 10; 1 Ped. 2:21). Shinlli cajpipash humilde cangapami esforzarina capanchi. Humildecuna cashpaca familia ucupipash cushillami causashun, congregacionbipash shujllashnami caita ushapashun. Shinallata Internetpi redes socialescunata aliguta utilizanatapashmi yachajushun. Ashtahuanbachaca humildecuna cashpami Jehovapa ñaupajpipash ali caita ushapashun.