1. ¿Imashpata Jehová Diosca shuj mamahuan chimbapurarin?

PROFETA Isaías causashca tiempopica Jehová Diosca paipa llactataca cashnami nirca: ‘¿Shuj mamaca, pai ungushca huahuataca cungangachu? Chai mama cungajpipash, candaca imahorallapash ñucaca na cungashachu’ nishpa (Is. 49:15). Cai textopica Jehová Diosca shuj mamahuanmi chimbapurarin. Imashina shuj mama paipa huahuata ninanda juyan, shinallatami Jehová Diosca paipa huahuacunataca ninanda juyan. Tauca mamacunami panigu Jasminshna nishca: “Ñucanchi vijsamanda llujshishca huahuataca juyaitaca nimahora na saquita usharinmanllu” nishpa.

2. Shuj huauqui o shuj pani Jehovamanda caruyajujta ricushpaca ¿imashinata Jehová Diosca sintirin?

² Shuj huauqui o shuj pani ñana villachingapaj llujshijujta, congregacionmanbash ñana rijujtaca Jehová Diosca ricujunmi. Cada huatami tauca huauquipanicuna Jehovamanda ñana villachishpa, paimanda caruyashpa inactivo * tucushca. Chaita ricushpaca Jehová Diosca ninandami llaquirishca.

3. Jehová Diosca ¿imatata munan?

³ Ashtaca juyashca huauquipanicuna congregacionman tigramujpica ninandami cushijupanchi. Paicuna congregacionman tigramuchunmi Jehová Diosca munan. Ñucanchicunapashmi chaitallata munapanchi (1 Ped. 2:25). Chai huauquipanicuna cutin tigramuchunga ¿imashinata ayudaita ushapanchi? Cai tapuita nara tigrachishpallatami paicuna imamanda congregacionmanda caruyashcata, imamanda villachingapaj ñana llujshingapaj munashcatapashmi yachana capanchi.

4. Yapata trabajaimandaca ¿imata huaquin huauquipanicunahuanga pasashca?

⁴ Huaquin huauquipanicunaca trabajashpallami yalin. Asia llactapi causaj Hung * shuti huauquica ninmi: “Yapatami trabajashpalla yalin carcani. Culquita charishpaca Jehovata ashtahuan sirvisha yarcanimi. Shina pensarinaca nalipachami cashca. Tauca horascunata trabajaimandami tandanajuicunamanbash faltai callarircani. Chaimi congregacionmanda caruyaitapacha caruyarcani. Cai mundopa ruraicunaca Jehovamanda asha ashami caruyachin” nishpa.

5. Ashtaca llaquicunata charimandaca ¿imata shuj paniguhuanga pasarca?

⁵ Shuj huauquipanicunaca shuj shuj llaquicunata charimandami llaquilla sintirin. Anne paniguca Gran Bretaña llactapimi causan. Paica 5 huahuacunatami charin. Paica ninmi: “Ñucapa shuj huahuaguca na sanogu nacirircachu. Shinallata tiempohuanga ñucapa shuj ushigumi expulsai tucurca. Cutin caishuj churigutaca shuj ungüita charin nishpami doctorcunaca villahuarca. Chai llaquicunata charimandami llaqui llaqui sintirishpa tandanajuicunaman, villachingapapash ñana llujshircani. Chaimi inactiva tucurcani” nishpa. Anne panigushna, paipa familiashna shuj huauquipanicunapash shina llaquicunata charijta uyashpa o ricushpaca ñucanchicunaca ninandami llaquiripanchi.

6. Colosenses 3:13​pi nishca shimicunata na cazujpica ¿imata pasai ushapanchi?

⁶ (Colosenses 3:13, liingui) *. Huaquin huauquipanicunataca, shuj huauqui o shuj pani paicunata imacunatapash nishpami nali sintichishca. Huaquinbica congregacionbi huauquipanicunahuan cashna llaquicunata charita usharin nishpami apóstol Pabloca nirca. Huaquinbicarin imatapash nishpami yangamanda ñucanchitaca juchachita ushan. Chaimi congregacionmanbash ñana ringapaj munashun. Cunanga Sudamericamanda Pablo huauquimanda yachajupashunchi. Paitaca nalita rurashcangui nishpami yangamanda juchachirca. Shina juchachi tucuimandami congregacionbi privilegiotapash quichui tucurca. Huauqui Pabloca ¿imashinata sintirirca? Paica ninmi: “Shina yangata juchachijpimi ñucaca ushashcata culirashpa congregacionmandapash caruyarcani” nishpa.

7. Punda nali rurashcacunata yarishpaca ¿imashinata huaquingunaca sintirin?

⁷ Huaquin huauquipanicunaca paicunata Jehová Dios na perdonashcata, paicunata na juyanllu yashpami pensarin. Shinallata congregacionbipash na canachu cani yashpapashmi pensarin. Shinami huauqui Franciscoca sintirirca. Paica ninmi: “Huainayana juchapi urmajpimi ñucataca censurahuarca. Shina censurashca cajpipash tandanajuicunamanga rishpami catircani. Shinapash llaqui llaqui sintirimandami Jehovapa congregacionbipash ñana canachu cani yashpa nali sintirin carcani. Ñuca concienciapash nali caimandami Jehová Diosca ñucataca na perdonahuashcachu yashpa pensarin carcani. Chaimi villachingapapash, congregacionmanbash ñana rircani” nishpa. Shina huauquipanicunamandaca ¿imatata pensaripanchi? ¿Paicuna imashina sintirishcataca alichu intindipanchi? Paicunamandaca ¿imatata Jehová Diosca yuyan?

8. ¿Jehová Diosca paita tucui shunguhuan sirvishcataca cunganllu?

⁸ Paimanda caruyashca cajpipash, Jehová Diosca paita tucui shunguhuan sirvishcata, paita sirvingapaj imacunatalla rurashcatapash nimahora na cunganllu (Heb. 6:10). Jehová Dios  paita sirvijcunata imashina cuidajta, juyajta ricuchingapami profeta Isaiasca cai chimbapuraita churarca. Paica nircami: “Paica, llamata michinshnami, paipaj llamagucunata michijunga. Huahua llamagucunatapash, paipaj rigrapi churashpami, marcashpa apanga” nishpa (Is. 40:11). Jehová Diosca llamagucunata michijshnami can. Congregacionman shuj huauqui o shuj pani ñana shamujujta ricushpaca ¿imashinata Jehová Diosca sintirin? Jesús caimanda parlashpami paipa catijcunataca cashna tapurca: ‘Cangunaca ¿imata yanguichiman? 100 llamacunata shuj runa charijpi, shuj llamagu chingajpica, ¿nacha 99 llamacunata chai urcupi saquishpa, chai chingashca llamagutara mascangapaj rinman? Na llullashpami cangunataca cashna nini: Chai chingashca llamaguta tarishpaca, chai na chingashca 99 llamamandapash yalimi chai llamaguta tarishcamanda ninanda cushijunman’ nishpa (Mat. 18:12, 13).

9. ¿Llamacunata michijca imashinata can? (Callari paginapi fotota ricupangui).

⁹ Jehová Diostaca shuj michij runaguhuanmi chimbapuran. Llamacunata michijca paipa llamacunataca ninandami cuidan. Por ejemplo, Davidca paipa llamagucunata cuidangapami shuj leonhuan, shuj osohuanbash macanajurca (1 Sam. 17:34, 35). Shuj alipacha michijca shuj llamagu chingajpica ñapashmi cuenta japin ( Juan 10:3, 14). Chaimi pai charishca 99 llamagucunata corralpi saquishpa o shuj michijman mingashpa chai chingashca llamaguta mascangapaj rin. Cai chimbapuraihuanga paipa taita imashina cashcata ricuchingapami Jesusca cashna nirca: ‘Shujllapash chingarichunga na munanllu’ nishpa (Mat. 18:14).

10. Ezequiel 34:11-16​pica Jehová Diosca paipa caruyashca llamagucunamandaca ¿imatata rurasha nirca?

¹⁰ Jehová Diosca paipa sirvijcunataca cada unotami ninanda juyan. Masqui paimanda ‘cai uchilla’ llamagucunashna caruyashca cajpipash cuidashpami catin. Punda tiempopi profeta Ezequielmanga Jehová Diosca cashnami nirca, ñucamanda caruyashcacunataca mascasha, ñucata sirvishpa catichunmi ayudasha nishpa. Shinallata paicuna tigramuchun imata ruragrijushcatapashmi  profeta Ezequielmanga villarca. Shuj llamata michij israelitapashmi shinallata paipa llamagu chingajpica rurana carca (Ezequiel 34:11-16, liingui). Chingashca llamaguta taringapaca ¿imatata llamata michijca ruran? Primero, mascangapami tiempoguta llujchin. Segundo, tarishpaca chaishuj llamagucunahuan igual cachunmi apan. Shinapash llamagu chugrishca cajpica imaguhuanbash huatachishpami juyaihuan jambin. Yarjaihuan cajpica jihuata micuchunmi marcashpa apan. Shina cuendami ancianocunaca congregacionmanda caruyashca huauquipanicunataca Jehovaman tigrachun ayudana can (1 Ped. 5:2, 3). Ancianocunami chai huauquipanicunata cutin congregacionman tigramuchun juyaihuan mascashpa ayudana can. Shinami paicuna espiritualmente ali cachunbash ayudaita ushan. *

11. Llamata michijca ¿imatata ali yachan?

¹¹ Llamata michijca shuj llamagu chingai ushashcataca alimi yachan. Pero tarishpaca na macanllu. Cunanga huaquin Jehovata sirvijcuna shuj tiempota Jehovata na cazujpi, Jehová Dios imata rurashcata yachajupashunchi.

12. Jehovapa mandashcata Jonás na pactachijpica ¿imatata Jehová Diosca rurarca?

¹² Jehová Dios mandashcataca profeta Jonasca na pactachircachu. Shina na pactachijpipash Jehová Diosca Jonasta na sirvihuanllu nishpaca na nircachu. Shuj llamaguta michijshnallatami Jehová Diosca Jonastaca cuidashpa, paipa mandashcata pactachichun ayudarca (Jon. 2:7; 3:1, 2). Jipaca, shuj calabazata utilizashpami Jehová Diosca gentecunapa causaica valishcapacha cashcata yachachirca (Jon. 4:10, 11). Caimandaca ¿imatata yachajupanchi? Ancianocunaca shuj huauqui o shuj pani congregacionmanda caruyajpica cai huauqui o panica congregacionmanga ñana tigramungachu nishpaca na pensanachu can. Chaipa randica congregacionmanda imamanda caruyashcata intindingapami esforzarina can. Congregacionman tigramujpica ali tratashpa, juyaihuanmi chasquina can.

13. Salmo 73 librota escribij salmistata uyashpaca ¿imatata Jehová Diosca yuyarca?

¹³ Salmo 73 librota escribij salmistaca, shujcuna  charij tucujta ricushpami envidiai callarirca. Jehovapa munaita pactachinaca na sirvinllu yarin yashpami pensari callarirca (Sal. 73:12, 13, 16). Jehová Dios chaita ricushpaca ¿imatata salmistamandaca yuyarca? Jehová Diosca paita nalicachishpaca na ricurcachu. Chaipa randica salmistapa nishcacuna Bibliapi escribishca quidachunmi saquirca. Tiempohuanga Jehovahuan ashtahuan ali amigo cana cashcatami salmistaca cuenta japirca (Sal. 73:23, 24, 26, 28). Caimandaca ¿imatata yachajupanchi? Shuj huauqui o shuj pani Jehovata sirvinaca na minishtirishcachu can nishpa pensarijujpica, ancianocunaca chai huauquipanicunataca nalicachishpaca na ricujunachu can. Chaipa randica, imamanda shina ninajujtami intindingapaj esforzarina can. Shinallami Bibliahuan paicunataca ayudaita ushanga.

14. a) Profeta Eliasca ¿imamandata ayudachun minishtijurca? b) ¿Imashinata Jehová Diosca paita ayudarca?

¹⁴ Profeta Eliasca reina Jezabelmanda pacajushcami rijurca (1 Rey. 19:1-3). Profeta Eliasca, ñucallami Jehovapa profeta cani yashpa ninanda manllajurca. Jehová Diostaca yangallatami sirvijushcani yashpami pensarirca. Chaimi llaqui llaqui sintirimanda huañungapapash munarca (1 Rey. 19:4, 10). Shina nijujpipash Eliastaca nalicachishpaca Jehová Diosca na ricujurcachu. Chaipa randica na pailla cashcata, Jehová Dios paita ayudajushcatami intindichirca. Profeta Elías parlajujpica Jehová Diosca ali alimi uyarca. Shuj shuj asignaciongunata pactachichunbashmi mingarca (1 Rey. 19:11-16, 18). Caimandaca ¿imatata yachajupanchi? Anciano huauquicunami ashtahuanbachaca juyaihuan Jehovata sirvijcunataca tratana can. Shuj huauqui  o shuj pani Jehovata ali sirvitaca na ushanichu ninajujpipash ancianocunaca ali alimi uyana can. Chai jipaca, Jehová Dios paicunata ninanda juyashcatami yarichina can.

15. Juan 6:39​pi nishcashnaca Jesusca ¿imatata rurarca?

¹⁵ Congregacionmanda caruyashca huauquipanicuna paiman cutin tigrachunmi Jehová Diosca munan. Chaipaca Jesuspa ejemploca alipachami can. Jesusca Jehová Diospa tucui sirvijcuna valishcapacha cashcatami yacharca. Chaimi ‘llamashna chingashca israelcunata’ Jehová Diosman cutin tigrachun ayudarca (Mat. 15:24; Luc. 19:9, 10). Jesuspashmi shuj alipacha michij caimanda, paipa Taitapa sirvijcuna shujllapash ama chingachun cuidarca (Juan 6:39, liingui).

16, 17. Congregacionmanda caruyashcacunataca ¿imashinata ancianocunaca ayudana can? (“ Jehovamanda caruyashcacunaca ¿imashinata sintirin?” nishca recuadrotapash ricupangui).

¹⁶ Éfeso congregacionmanda ancianocunamanga apóstol Pabloca Jesuspa ejemplota catishpami cashna rurana canguichi nirca. Paica nircami: “Cashna imatapash rurashpa causashpami: ‘Imagupash illajcunaman carana canguichi’ nishpa yachachijurcani. ‘Carajpi japijcunatapash yalimi carajcunaca, ninanda cushijun’ nishpami, Apunchi Jesusca yachachishca. Chaitaca, yarinami canguichi” nishpa (Hech. 20:17, 35). Imashinami ricupanchi ancianocunami caitaca pactachinapacha can. España llactamanda Salvador anciano huauquica cashnami nin: “Jehová Dios paipa sirvijcunata ninanda juyajta ricushpaca, paicunata ashtahuan ayudangapami munapani. Jehová Diosca paicunata alipacha cuidachunmi munan” nishpa.

¹⁷ Cai temapi parlashca Jehovamanda caruyashca huauquipanicunataca ancianocunaca ayudarcami. Chaimi cutin congregacionman tigramui ushashca. Shinapash cunanbica congregacionmanda caruyashca tauca huauquipanicunami cutin tigramungapaj munanajun. Paicunata ayudangapaca ¿imatata rurai ushapanchi? Chaitaca cati temapimi yachajupashun.