1. Diabloca ¿imapita animalcunata japijcunahuanga igual can?

SHUJ animalta japij o huañuchij jarica animalta japishpa o huañuchishpapachami ali can. Chaipaca huaquin trampacunatami utilizan. Cashna trampacunamandami Jobpa amigo cani nishcaca parlarca (Job 18:8-10). Animalcunata japingapaca ¿imatata ruran? Chaipaca animalcuna imata gushtajta, imata rurajta, maita rijtami callaripica ali ali ricun. Diablopashmi chaitallata ñucanchicunahuanga ruran. Paica ñucanchicuna imata rurajujta, imata gushtajta ali ali ricushca jipami, ñucanchita cungashcapi urmachingapaj trampacunata churan. Shinapash Bibliapica, Diablopa trampacunapi ama urmangapaj imata rurana cashcata, ña chai trampacunapi urmashca cashpa chaimanda safaringapaj imata rurana cashcatapashmi yachachin.

2. Satanasca ¿ima ishcai trampacunahuanda gentecunata ashtaca huatacunataca pandachijushca?

² Diabloca ashtaca huatacunatami jariyana munaihuan, imatapash yapata ansiarishpa charina munaihuan * gentecunataca pandachijushca. Diabloca shuj animalta lazuhuan japingapaj pacalla chapaj runashnami can (Sal. 91:3). Shinapash Jehová Diosca Bibliapica ñami ñucanchimanga, Satanás paipa trampacunapi urmachingapaj munashcataca villashca (2 Cor. 2:11).

3. ¿Imamandata Jehová Diosca paita sirvijcunapa huaquin experienciacunamandaca escribichishpa saquishca?

³ Jariyana munaipi, imatapash yapata ansiarishpa munaipi ama urmachunga Jehová Diosca ¿imashinata ayudan? Jehová Diosca Bibliapi huaquin experienciacunamanda parlashpami ñucanchicunataca ayudan. Chai experienciacunapica Satanás, Jehovapa sirvijcunata chai trampacunapi urmachishcatami ricuchin. Shinaca  ¿tucui Jehovata sirvijcunachu chai trampacunapica urmagrinchi? Na. Jehová Diosca ‘ñucanchicunata yachachingapami’ chai experienciacunataca Bibliapi escribichishpa saquishca (1 Cor. 10:11). Cai experienciacunaca Diablopa trampacunapi ama urmachun o urmashca cashpaca imata ruranata yachachunmi ayudaita ushan.

4. Jariyashcacunataca ¿imata pasai ushan?

⁴ Diabloca ñucanchicunapash paishnallata jariyashcacuna tucuchunmi munan. Ñucanchicunapash jariyashcacuna cashpaca Diabloshnallatami huañuchi tucushun (Prov. 16:18). Chaimi apóstol Pabloca jariyanamanda parlashpaca cashna advirtirca: Pipash jariyashpaca ‘Diablo urmashpa llaquichi tucujunshnallatami llaquichi tucunga’ nishpa (1 Tim. 3:6, 7). Shinaca ñucanchicunaca chairalla o tauca huatacunata Jehová Diosta sirvinajushpapashmi jariyashcacuna tucui ushapanchi. Chaimi cuidarina capanchi.

5. Eclesiastés 7:16, 20​pi nishcashnaca jariyashcacunaca ¿imashinata can?

⁵ Pipash jariyashca cashpaca paipillami pensarin. Satanasca ñucanchicuna problemacunahuan cashpa ñucanchicunapilla pensarichun, Jehová Diospica ama pensarichunmi munan. Por ejemplo, ¿ima horapash ñucanchitaca imatapash na rurajpitachu imamandapash yangamanda culpashca? Chai ratocunaca Jehová Diostara, ñucanchi huauquipanicunatara culpachunmi Satanasca munan. Shinallata Jehová Diospa mandashcacunata ladoman saquishpa, ñucanchi munai imashapash problemacunata arreglachunmi Satanasca munan (Eclesiastés 7:16, 20​ta liipangui).

6. Países Bajospi causaj shuj panigupa experienciamandaca ¿imatata yachajupanchi?

⁶ Países Bajospi causaj shuj paniguca shuj huauquipanicunapa pandarishcacunatalla ricuimandami nalipacha sintirijurca. Paica huauquipanicunahuan cangapallatapash ñana munajurcachu. Paica ninmi: “Ñucaca nalipachami sintirijurcani. Chaimi shuj turiñañacunataca ricuitallata ñana ricunayachijurcani. Ñuca cusagutapash, ‘shuj congregacionman cambiarishun’ nircanimi” nin. Chai panigutaca marzo de 2016​pi llujshishca JW Broadcasting^® programata ricunami ayudarca. Chai programapica shuj huauquipanicunapa pandarishcacunata ricujunapa randica, imata rurana cashcatami intindichijurca. Chai  paniguca ninmi: “Ñucaca shuj turiñañacuna cambiachun shuyanapa randica, ñucara cambiana cashcata, humilde cana cashcatami yachajurcani” ninmi. “JW Broadcasting^® programaca Jehová Diospi, Jehová Dioslla mandana derechota charishcapi pensarichunmi ayudahuarca” ninmi. Shinaca shuj huauquipanicunapa pandarishcacunata ricujunapa randica, “Jehová Dioshna shuj huauquipanicunata juyaihuan tratangapaj ayudahuai” nishpami Jehová Diostaca mañana capanchi. Jehová Diosca ñucanchi huauquipanicunapa pandarishcacunata ricushpapash, perdonangapaca listomi can. Jehová Diosca ñucanchicunapash shujcunata perdonachunmi munan (1 Juan 4:20).

7. Rey Uziastaca ¿imata pasarca?

⁷ Judá llactamanda rey Uziasca jariyashca caimandami imata na ruranacunatara rurarca. Paita “nalitami rurajungui” nijpica nalimanmi consejotaca chasquirca. Paica pundaca ali alimi carca. Ashtaca guerracunatapashmi misharca. Shinallata chai llactata cuidangapapash ashtaca pircacunatami shayachirca. Pambapi tarpushcagucuna fucuchunbash ashtaca cosascunatami rurarca. Pai mandajuj “punllacunapica, Diosca paitaca” tucuipi ali llujshichunmi ayudarca (2 Crón. 26:3-7, 10). Shinapash Bibliapica, “Uzías runaca, ninan ushaita ña charishpaca, paipaj shungupi jariyashpami llaquipi urmarca” ninmi. Jehová Diosca sacerdotecunatallami inciensota templo huasipi rupachichun mandashca carca. Shinapash chaitarami rey Uziasca rurarca. Chaimi Jehová Diosca lepra unguihuan llaquichirca. Rey Uziasca huañungacamanmi lepra unguihuan causarca (2 Crón. 26:16-21).

8. ¿Imapata 1 Corintios 4:6, 7​pi nishcacunaca ñucanchitaca ayudaita ushan?

⁸ Ñucanchipashmi rey Uziashnallata jariyashcacuna tucushpa juchata ruraita ushapanchiman. Huauqui Josemanda yachajupashunchi. Paica shuj ali negociota charij, congregacionbipash shuj ali ancianomi carca. Asambleacunapipash ali discursocunatami cun carca. Superintendente de circuito huauquicunapash paitami imagutapash tapun carca. Shinapash paica ninmi: “Ñucapa yachashcacunapilla confiashpami Jehovapa yachachishcacunataca ladoman saquishpa, Jehovapa consejocunataca ñana cazui callarircani” nin. Huauqui Joseca paipilla confiarimandami shuj jatun juchata rurashpa congregacionmandaca expulsai tucurca. Paica huaquin huatacuna huashamanllami congregacionmanga tigrai ushashca. Paica ninmi: “Ima responsabilidadta charishpapash Jehovapa mandashcacunata pactachina importantepacha cashcatami Jehová Diosca yachachihuashca” nin. Shinaca congregacionbi ima responsabilidadta charishpa o imata rurai ushashpapash Jehová Dios ayudajushcamanda shina pactachita ushashcatami nunca na cungana  capanchi (1 Corintios 4:6, 7​ta liipangui). Jariyashcacuna cajpica, Jehová Diosca ñucanchitaca imapapash na utilizangachu.

9. Imatapash ansiarishpa munajuimandaca Satanaspash, Evapash ¿imatata rurarca?

⁹ Satanasmi imatapash ansiarishpa munaj can. Chaimandami ansiarina shimita uyashpaca Satanaspi pensarita ushanchiman. Satanasca, Jehová Diospa shuj ali angelmi carca. Jehovapa ladopi cashcamandaca seguromi paica ashtaca bendiciongunata charishcanga. Pero paica na chaihuanlla cushijushca carcachu. Paica gentecuna Jehová Diosta adoranapa randi, paitara adorachunmi munarca. Shinallata ñucanchicunapash ima charishcacunahuan ama contento cachun, ashtahuangarin paishna imatapash ashtahuan ansiarishpa munachunmi munan. Callaripica Evatami Diabloca, Taita Dios cushca causaiguhuan ama cushijushca cachun, ashtahuan imatapash munachun pandachirca. Jehová Diosca juyaimandami Adán y Evamanbash jardín de Edenbica ashtaca frutacunata paicuna micuchun curca. Shinapash shujlla yuragumandallami paicunaca na micui ushana carca (Gén. 2:16). Satanasca, Evataca Taita Dios ama micuichu nishca yuramanda micuna munaita charichunmi umachirca. Evaca, Taita Dios cushca tucui frutocunahuanga na contenta caimandami Taita Dios ama micunguichu nishca yuramandapash micurca. Evaca ansiosamandami juchata rurashpaca jipamanga huañuna tucurca (Gén. 3:6, 19).

10. Davidca ansiarishpa munaimandaca ¿imatata rurarca?

¹⁰ Davidmanda yachajupashunchi. Jehová Diosca Davidtaca ninandami bendiciarca. Chaimi Davidca charij charij, gentecunapa ñaupapipash rijsishca carca. Shinallata Jehová Diosca ashtaca contra soldadocunata mishachunbashmi ayudarca. Jehová Dios, Davidta cashna bendiciashcamandaca paica ninanda agradicishcami carca. Chaimi Jehovapa bendiciongunaca na cuentai ushanallami can nirca (Sal. 40:5). Shinapash shuj viajeca Davidca paipa charishca cosascunahuanlla na contento cashpami chai tucui charishca cosascuna Jehovamanda cashcataca cungarca. Codicioso tucushpami shuj viajeca ashtaca huarmicunata charishpapash shuj cazada huarmita munai callarirca. Cai huarmica Bat-Sebami carca. Urías shuti jarihuanmi cazarashca carca. Davidca paipilla pensarishpami Bat-Seba huarmihuan faltapi urmashpa vijsayuta saquirca. Chaita rurashca jahuapash paipa cusa Urías ama yachaj chayachunmi paitaca huañuchichun cacharca (2 Sam. 11:2-15). Davidca ¿imamandata shina rurarca? ¿Talvez Jehová Diosca na ricujunllu yuyarcachu? Davidca, Jehová Diosta ashtaca tiempota ali sirvijushpapashmi  ansiarishpa munaimanda juchata rurarca. Antsicarin tiempohuanmi Davidca juchata rurashcata cuenta japishpa arripintirirca. Shinaca David arripintirijpi Jehová Dios perdonashcamandaca Davidca ninandami agradicishcanga (2 Sam. 12:7-13).

11. Efesios 5:3, 4 nishcashnaca imatapash ama ansiarishpa munachunga ¿imata ayudanga?

¹¹ Davidmandaca ¿imatata yachajui ushapanchi? Jehová Dios cushca tucui cosasgucunahuan contento, agradecido canatami yachajupashcanchi (Efesios 5:3, 4​ta liipangui). Bibliata yachajujcunamanga paicunapa causaipi imapash ali cosasgucuna pasashcamanda Jehová Diosta agradicinatami yachachina capanchi. Cada punlla Jehová Diosta imagumandapash agradicishpaca, semanapica 7 viajecunata agradicishcami ricuringa (1 Tes. 5:18). Ñucanchicunapash ¿chaitallatachu ruranajupanchi? Jehová Dios ñucanchiman ima cosasgucunatalla carashcapi pensarishpami Jehová Diostaca ashtahuan agradicipashun. Shinallata ima charishcagucunahuanbash contentomi sintiripashun. Chaicunata rurashpami na imatapash ansiarishpa munashun.

12. Ashtahuan charina munai mishajpica Judas Iscarioteca ¿imatata rurarca?

¹² Cunanga Judas Iscariotemanda yachajupashunchi. Paica imatapash ansiarishpa munaimandami shuj nali persona tigrarca. Shinapash paica na siemprechu shina carca (Luc. 6:13, 16). Callaripica Jesusca, Judas Iscariotetaca paipa discípulo tucuchunmi agllarca. Paipi confiaimandami culqui alichina cajatapash paiman mingarca. Cunanbishna cashpaca chai culquiguca obra mundialpa cushca contribución culquigushnami canman. Jesusca ashtaca viajecunatami paipa catijcunataca ashtahuan charina munaimanda cuidarichun consejarca (Mar. 7:22, 23; Luc. 11:39; 12:15). Jesús cashna consejashca cajpipashmi, Judas Iscarioteca na cazushpa asha tiempo jipaca cajamanda culquitaca shuhuai callarirca.

13. Judasca ¿ima horata codicioso tucushcataca ricuchirca?

¹³ Jesús ña huañugrijujpimi Judas Iscarioteca codicioso tucushcata ricuchirca. Lepra unguita charij Simonmi Jesusta, paipa discipulocunatapash paipa huasiman invitashca carca. Chaipica María, Martapashmi carca. Huasipi micunajujpica Mariaca jatarishpami shuj frascopi mishquilla ashnajuj aceiteguta japishpa Jesuspa umapi tali callarirca. Chaitaca Judaspash, chaishuj discipulocunapashmi nalicachishpa ricunajurca. Discipulocunaca, chai frascopi mishquilla ashnajuj aceiteguta jatushpaca, chai culquitaca villachingaparapashmi utilizashpa ali canman carca nishpami talvez pensarianga. Cutin Judasca cajamanda culquita shuhuajushcamandami, culquica yanga desperdiciarijun yashpa culira ricujurca. Jipamanga Judasca ashtahuan culquita charingapaj munaimandami Jesustaca shuj esclavo valij culquipa traicionarca (Juan 12:2-6; Mat. 26:6-16; Luc. 22:3-6).

14. Lucas 16:13​pi shimicunataca ¿imashinata shuj cusahuarmica pactachirca?

¹⁴ Jesusca paipa catijcunamanga: ‘Cangunaca, Taita Diostapash, imata charishcacunatapash, ishcandita sirvitaca na ushanguichichu’ nircami (Lucas 16:13​ta liipangui). Jesuspa nishca shimicunaca cunangaman cierto cashcatami ricupashcanchi. Rumania llactamanda shuj cusahuarmica shuj charij charij llactapimi shuj alipacha trabajota asha tiempopalla tarirca. Shinapash Jesuspa consejota catingapaj imata rurashcata ricupashunchi. Paicunaca ninmi: “Callaripica bancopi culquita ashtacata dibimandami chai trabajotaca Jehovami bendiciahuajun yarcanchi” nin. Shinapash chai trabajoca Jehová Diosta sirvina tiempotami quichugrijurca. Chaimi La Atalaya del 15 de agosto de 2008​pi llujshishca, “Mantengámonos leales con un corazón unificado” nishca temata liishca jipaca shuj decisionda japirca. Paicunaca ninmi: “Culquita ashtahuan ganangapaj shuj llactapi trabajashpaca Jehová Diostami huashaman saquigrinajurcanchi. Shinallata Jehová Diosmanda yachajungapapashmi tiempo illagrijurca, chaita ricushpami chai trabajotaca na chasquircanchi” nin. Shinaca paicunahuanga ¿imata pasarca? Paicunaca chai llactapillatami  paicunapa causaipi minishtirishcagupalla trabajotaca tarirca. Paniguca, “Jehová Diosca ñucanchitaca tucuipimi cuidashca” ninmi. Cunanga paicunaca Jehová Diosta ashtahuan sirvinajushcamandami cushijushca can.

15. Diablopa trampacunamanda llujshi ushashcataca ¿imashpata seguro capanchi?

¹⁵ Jariyana, imatapash yapata ansiarishpa munana trampacunapi urmashca cashpaca, nunca na cai trampacunamandaca llujshi usharingachu yashpaca na pensanachu capanchi. Apóstol Pabloca, Diablo munashcata rurachun charijuj tugllamandaca llujshi usharinmi nircami (2 Tim. 2:26). Chaitami rey Davidca rurarca. Paita profeta Natán “nalitami rurashcangui” nijpica, tucui shunguhuan arripintirishpami Jehová Diospa ñaupapipash cutin ali ricuri usharca. Jehová Diosca, Diablotapash yalimi poderta charin. Chaitaca siempremi yarina capanchi. Jehová Diospa ayudata chasquishpaca ñucanchicunaca Diablopa maijan trampapi urmashca cashpapash llujshi ushashunmi.

16. Satanaspa trampacunapi ama urmachunga ¿imata ayudanga?

¹⁶ Diablopa trampacunamanda llujshingapaj luchajunapa randica, mejor Diablopa trampacunapi callarimanda ama urmangaparapashmi ninanda esforzarina capanchi. Chaitaca Jehová Diospa ayudahuanllami rurai ushapanchi. Ñucanchipillaca na confiarinachu capanchi. Ashtaca huatacunata Jehovata sirvishca huauquipanicunapashmi jariyana, yapata ansiarishpa munana trampapica urmashca. Chaimi cada punlla Jehová Diostaca, ñucanchi shungu ucupi jariyana munaita o imatapash yapata ansiarishpa charina munaita charijtaiman ricushpaca cambiangapaj ayudahuangui nishpa Jehovataca mañana capanchi (Sal. 139:23, 24). Diablopa trampacunapica napacha urmanachu capanchi.

17. ¿Imata ñallapacha Satanashuanga pasanga?

¹⁷ Diabloca ashtaca ashtaca huatacunatami animalta huañuchij jarishna gentecunataca llaquichijushca. Shinapash ñallami paitapash huatashpa, jipamanga tucuchitapacha tucuchinga (Apoc. 20:1-3, 10). Satanás llaquichi tucuchunga ansiami shuyanajupanchi. Chaicamanga Diablopa trampacunapi ama urmangapaj cuidaripashunchi. Paica jariyashca cana yuyaihuan shinallata imatapash yapata ansiarishpa charina yuyaihuanmi pandachingapaj munan. Chaimandami cuidarina capanchi. Ñucanchicunaca “Diablohuanga shinllita macanajuichi. Chashna causajpimi, cangunamandaca Diabloca anchuringa” nishca consejotami pactachingapaj munapanchi (Sant. 4:7).